Post: #1
Title: انتاج أدبي ليس بلغتنا ولكنه يربط الوجدان ويقربنا
Author: Suad I. Ahmed
Date: 10-09-2004, 08:45 AM
Parent: #0
من أساطير النوبة في شمال السودان
حكوة قَلو كب
تأليف الأستاذ مكي علي إدريس
شاعرنا المطبوع جيلي عبد الرحمن،يسبح دوما في دموع أشواقي، لأيام طفولتي… ليالي الصيف والشـليل، تحت ظلال النخيل، أنين السواقي وخرير السباليق، سيد تلول ومواسم الحصاد، والشوك القتاد، والبهم البعاد، أسراب الإوز.. سموم الخماسين، عزائم التركين، سك المرفعين، ليالي الذكر وعازه في هواك…
العوم المحرم بين بوائق نهر النيل، حين يغتسل بالصبايا الغزلان، في رحلته الأبدية، طقوس عاشوراء، القش والسعيه.. مرقات الرعيه.. مراسيل مغربيه و(أمش جيب الملاح).. الهيش، العقارب، (النبي نوح رفاعي).. في الصيف المجمر والبرد الصقيع. حبوبه بتصلّي.. حطب النار كمل، تحت الفروه خمسه، يا حبوبه أحكي حكوة (قَـلّوكب). أها وحبوبه قالت:
سنين ودنين زمان.. أيام الرسول سلمان (أب داؤد).. نسوان (ميرتمار) قالن للرجال: ما دايرات وشم لا دق لا ختان.. واجتمعوا الرجال ورفضوا الاقتراح.. وكان الرد عقاب بالضرب الشديد.. النسوان كمان قالن يشتكن للنبي (أب داؤد).. عالم باللغات وما برد المظالم.. في أرض الميعاد البلد البعيده، بسهولها وجبالها، أنهارها وتلالها.. رحله طويله، قالن: ما بقدر عليها، إلاّ الطير وراحن يسألن الطيور، في الغابة الكبيرة. الصقر إستخب.. الوطواط جفل.. القمريه طارت.. البومه اشتكت من وجع الضهر وزاغت في الضلام.. لكين (قَـلّوكب) آكل التمر إتحمّس وقال أدوني الرساله.. وقام من الدغش، إتوكل، دفر، للبلد البعيد..
نسوان (ميرتمار) فرحانات يعاينن للأمل اللي طار، منتظرات رجوعو بالخير والعديل، قالن لا وشم لا دق لا ختان.. لاكين (قلَوكب) (أب سلمان فقير) من سافر بعيد، لي بلد الرسول، أبداً ما رجع.
ونسوان (ميرتمار) قاعدات في رجاهو، وكل ما الطير يوجوج فوق حيطان بيوتن، بي لهفه بيقولن (قول الخير، وحاتك أب سلمان فقير).. والنسوان هناك ما عرفن حقيقة إنو الطير رجع وجاب رد الرسالة، بالخير العدالة… لاكين السنين، والرحلة الطويلة خلّت (قَـلّوكب) ينضم بي لساناً غير لغة الحريم.. والرد المعاهو، ضاع في بير قديم، زي ما كل حقيقة بتضيع في الضلام..
نسوان (ميرتمار).. حيطول انتظارن، لامن ( قَـلّوكب ) يتعلم لسانن، ونسوان الفريق يفهمن الكلام… أها وحبوبه قالت: (انتهت الحكايه.. يا جنيات حشايا).. برايا الكنت صاحي..
|
Post: #2
Title: Re: انتاج أدبي ليس بلغتنا ولكنه يربط الوجدان ويقربنا
Author: Adil Osman
Date: 10-09-2004, 10:21 AM
الاستاذة سعاد إبراهيم أحمد
تحية وإحترام
فى هذه الوصلة صورة، فيها كلام كتير، عنده علاقة بالكلام الجميل الفوق ده، الكتبو الاستاذ مكى على ادريس، بلغة غير لغته الام، ولكنه يجيدها، ومتمكن منها اكثر مننا نحن الناطقين بها..
http://www.reliefweb.int/appeals/2003/photos/sudan.jpg
|
Post: #3
Title: Re: انتاج أدبي ليس بلغتنا ولكنه يربط الوجدان ويقربنا
Author: Safa Fagiri
Date: 10-09-2004, 10:42 AM
Parent: #2
لك حب هتون
وشوق مزن
ايتها العزيزة
الى نفوسنا..
"شايلين في السكة نمد من سيرتك للجايين"
.
.
.
.
"
الاستاذ عادل ....احتاجك..في بوست الموت.. للترجمة جزيل الشكر .
دمتو
|
Post: #4
Title: Re: انتاج أدبي ليس بلغتنا ولكنه يربط الوجدان ويقربنا
Author: Yahya Fadlalla
Date: 10-09-2004, 12:03 PM
Parent: #3
الاستاذة سعاد ابراهيم احمد
عارم التحايا و كثيف الود والاحترام
شكرا ، علي هذه الحكاية الموحية حد اللجو الي علائق من التحليلات التي تضرب بعيدا في الميثولجي والفلسفة وعلوم المجتمع
حكاية شفيفة كثيفة تؤكد علي ان كنوزنا من الحكي الشعبي يمكن الرهان عليها كي تشاكش سؤال العصر
يكفي ان انتظار نساء ـ ميرتمار ـ للطائر الرسول ـ قلوكب ـ مشروط بتعلم لسانهن وقد اضاع من قبل لغة الحريم و هذه الجزئية تلامس تماما فكرة ـ عجز التواصل ـ التي لعب عليها الادب من رواية و مسرح ما بعد الحرب العامية الثانية ولا زالت حتي الان فكرة معاصرة
شكرا يا استاذة وربنا يديك العافية
واطمع شخصيا في المزيد من هذه الكنوز المدفونة
مع هميم ودي وتقديري
|
Post: #5
Title: Re: انتاج أدبي ليس بلغتنا ولكنه يربط الوجدان ويقربنا
Author: Suad I. Ahmed
Date: 10-10-2004, 08:21 AM
Parent: #4
عادل عثمان
صفاء فقيري
يحي فضل الله
لكم جميعا لشكر والتقدير لتجاوبكم مع إيماني القاطع بأن الوجدان او الأدب والفن هما السلاح المضاء في نضالنا من أجل سودان جديد ـ فليس بالسياسة وجدها يحيا الانسان رغم انغماسي في أتونها منذ زمن سحيق!!
في تلك الأيام الحالكة كم كنت استمتع (بتداعيات) يحي فضل الله في قصصه الأسبوعية ذات الشفافية الهائلة وبطلته الرائعة وكم حزنت عندما توقفت حين اجبر على الخروج بعيدا عن وطن احتكرت فضاءاته الثقافية ولفكرية قوى الظلام والردة..
اعدكم بالمزيد من ابداع النوبيين.. ووا أسفاه على عدم معرفتكم للغتنا الجميلة ففيها درر مكنونة!!
سعاد إبراهيم أحمد
|
Post: #6
Title: Re: انتاج أدبي ليس بلغتنا ولكنه يربط الوجدان ويقربنا
Author: Outcast
Date: 10-10-2004, 09:53 AM
Parent: #5
Quote: والنسوان هناك ما عرفن حقيقة إنو الطير رجع وجاب رد الرسالة، بالخير العدالة… لاكين السنين، والرحلة الطويلة خلّت (قَـلّوكب) ينضم بي لساناً غير لغة الحريم.. والرد المعاهو، ضاع في بير قديم، زي ما كل حقيقة بتضيع في الضلام..
نسوان (ميرتمار).. حيطول انتظارن، لامن ( قَـلّوكب ) يتعلم لسانن، ونسوان الفريق يفهمن الكلام… أها وحبوبه قالت: (انتهت الحكايه.. يا جنيات حشايا).. برايا الكنت صاحي.. |
الاستاذة سعاد أبراهيم أحمد ..
أستجمعت شجاعتى لارد على بوستك هذا بعد ان قرأت رسالتك الحكيمة هنا.....
أتمنى ان يرد الله غربة (قَـلّوكب) لتعم الفرحة قلوب كل النساء .....
أرجو ان تتحفينا بمزيد من الدرر المدفونة فى أعماق التراث النوبى ...
ولك الحب و الاحترام...
|
Post: #7
Title: Re: انتاج أدبي ليس بلغتنا ولكنه يربط الوجدان ويقربنا
Author: Safa Fagiri
Date: 10-11-2004, 08:25 AM
Parent: #6
الاستاذة
سعاد أبراهيم أحمد ..
هتون الاشواق
نحتاجك ان تتحفينا
اكثر من الادب
النوبي الرائع.
دمتي
|
|