من أساطير النوبة في شمال السودان حكوة قَلو كب تأليف الأستاذ مكي علي إدريس شاعرنا المطبوع جيلي عبد الرحمن،يسبح دوما في دموع أشواقي، لأيام طفولتي… ليالي الصيف والشـليل، تحت ظلال النخيل، أنين السواقي وخرير السباليق، سيد تلول ومواسم الحصاد، والشوك القتاد، والبهم البعاد، أسراب الإوز.. سموم الخماسين، عزائم التركين، سك المرفعين، ليالي الذكر وعازه في هواك… العوم المحرم بين بوائق نهر النيل، حين يغتسل بالصبايا الغزلان، في رحلته الأبدية، طقوس عاشوراء، القش والسعيه.. مرقات الرعيه.. مراسيل مغربيه و(أمش جيب الملاح).. الهيش، العقارب، (النبي نوح رفاعي).. في الصيف المجمر والبرد الصقيع. حبوبه بتصلّي.. حطب النار كمل، تحت الفروه خمسه، يا حبوبه أحكي حكوة (قَـلّوكب). أها وحبوبه قالت: سنين ودنين زمان.. أيام الرسول سلمان (أب داؤد).. نسوان (ميرتمار) قالن للرجال: ما دايرات وشم لا دق لا ختان.. واجتمعوا الرجال ورفضوا الاقتراح.. وكان الرد عقاب بالضرب الشديد.. النسوان كمان قالن يشتكن للنبي (أب داؤد).. عالم باللغات وما برد المظالم.. في أرض الميعاد البلد البعيده، بسهولها وجبالها، أنهارها وتلالها.. رحله طويله، قالن: ما بقدر عليها، إلاّ الطير وراحن يسألن الطيور، في الغابة الكبيرة. الصقر إستخب.. الوطواط جفل.. القمريه طارت.. البومه اشتكت من وجع الضهر وزاغت في الضلام.. لكين (قَـلّوكب) آكل التمر إتحمّس وقال أدوني الرساله.. وقام من الدغش، إتوكل، دفر، للبلد البعيد.. نسوان (ميرتمار) فرحانات يعاينن للأمل اللي طار، منتظرات رجوعو بالخير والعديل، قالن لا وشم لا دق لا ختان.. لاكين (قلَوكب) (أب سلمان فقير) من سافر بعيد، لي بلد الرسول، أبداً ما رجع. ونسوان (ميرتمار) قاعدات في رجاهو، وكل ما الطير يوجوج فوق حيطان بيوتن، بي لهفه بيقولن (قول الخير، وحاتك أب سلمان فقير).. والنسوان هناك ما عرفن حقيقة إنو الطير رجع وجاب رد الرسالة، بالخير العدالة… لاكين السنين، والرحلة الطويلة خلّت (قَـلّوكب) ينضم بي لساناً غير لغة الحريم.. والرد المعاهو، ضاع في بير قديم، زي ما كل حقيقة بتضيع في الضلام.. نسوان (ميرتمار).. حيطول انتظارن، لامن ( قَـلّوكب ) يتعلم لسانن، ونسوان الفريق يفهمن الكلام… أها وحبوبه قالت: (انتهت الحكايه.. يا جنيات حشايا).. برايا الكنت صاحي..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيس بوك
تويتر
انستقرام
يوتيوب
بنتيريست