|
ألف مرحب كمال قسم الله، كنز الحداثة والتراث
|
ألف مرحب بك يا كمال في هذه الساحة
كمال قسم الله إنسانٌ عامر بالمحبة والوفاء. من أهل بربر، وأقام بالقاهرة، فكان سفيرنا فيها بلا منازع. ويقيم الآن باستراليا. يحفظ كمال الكثير من الحكايات والأساطير والشعر، ويرويها بعذوبة وسحر نادر المثال. وإلى جوار ذلك، ينتمي كمال عن جدارة إلى القرن الحادي والعشرين. معكم بالبورد كنزٌ من كنوز الحداثة والتراث، فاحتفوا بمقدمه ورحبوا به، فهو أهلٌ للترحيب والاحتفاء.
نجاة
|
|
|
|
|
|
|
|
Re: ألف مرحب كمال قسم الله، كنز الحداثة والتراث (Re: Nagat Mohamed Ali)
|
ياسلام يا استاذه نجاة
لك الشكر الجزيل....
Quote: وأقام بالقاهرة، فكان سفيرنا فيها بلا منازع |
دى أسألينى منها انا.....قاسمنا رغايفه...وضحكته الرويانه.....وفى اغلب الاحيان عنقريبه....العيان ,والجاى القاهره اجازه.....والصرمان....تستقبله احضان كمال قسم الله
لايكل ...لايمل
فعلا انسان نادر وبشوش...وزول نكته
مليون مرحب...الحداثه..والتراث ...والأدب عموما جاهم بلا..
يا...بختنا
فى الانتظار
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: فجراوى)
|
مجرد يا عمر ما فكيت شفرة فجراوى اول شيء تبادر لذهنى , الديمقراطيه مفتاح الحل .... الخ , و اصلاح الخطأ, و كيف تكون شيوعياجيدا لليوشاوسى , و روايات حنا مينا, الحاره الحداشر ,بت الملك,عاشه العويره,امين حسان, جعفر عبدالمجيد, رحمة الله , الفاضل بابكر, التحالف الديمقراطى, محجوب شريف, احمد عوض الكريم بله, لبيب الشاهد, عمار المغوارى, ذكريات و بشر قل ان يجود بمثلهم الزمان و يستحيل ان تجمعنا الظروف مره اخرى , و هذه هى بياخات الدنيا
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: Alia awadelkareem)
|
عالية وبما أنك أول المرحبات، فدعيني أحكي لكم عن جانب مهم في شخصية كمال تتجلى فيه إنسانيته وانتماؤه الحقيقي لجانب الحق والخير والمستقبل الأفضل. ففي تعامله مع النساء والرجال يصدر كمال عن شعور حقيقي بالمساواة بين البشر. لا تجدين ولا ذرة من اختلاف في تعامله مع أهله، وأحبابه، وأصدقائه، وجيرانه، وكل من حوله، من النساء والرجال، بسبب نوعهم. يحكي كمال حكايات أهل بربر وأبطال أساطيرهاوقصصها من النساء والرجال بنفس التقدير والإعجاب. يتعامل بنفس الروح والضحكة والمودة مع من حوله من صديقات وأصدقاء. ويلتقي الكل بنفس الترحاب والسعادة والتعليقات الودودة. وستسعدون وتسعدن بوجوده بيننا.
لك الشكر والود يا عالية نجاة
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: كمال قسم الله)
|
كمال قسم الله او ابو زرد كما يحلوا لاخينا اصبح الصبح ان يسميك(عبد العظيم ادريس) ياخى الواحد اصبح برجوازى اسما يعنى خلى قاسم حق دى داخليا فقط
مشتاق جدا لى القفشات والشعر الحلمتنيشى داك والشاى البى حرجل قصى قال ليك يا عمى بوش دى مافى زول عارف القصد منها شنو طبعا انت فاهم انى عارف يا كمال وللتاكيد
الو ممكن اكلم............... لا ما موجود طيب انت منو......... انا كمال........... ازيك يا عمى بوش اها شنو ليك صاح ولا ما غلط
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: محمد سر الختم)
|
اجمل تجارب الحياه كانت فى مصر و تحديدا فى القاهره , صقلتنا و علمتنا ما لم نعلم, و اصبحنا فى حالة شوق مستدام لمصر و أزقتها و حواريها و لحوش قدم الذى لا يعرفه كثير من المصريين. و اجمل ما فيهااننا لاقينا ناس من اى حته فى السودان حتى الجنجويد مقطوعين الطارى يا بولاِ
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: الكيك)
|
محمد سر الختم لك الشكر وأنت تأتي للترحيب بعمدة القاهرة وعمدة سيدني القادم
ود الجيران إنت منو يا خوي؟ ويبدو إنك جار كمال كما يبدو من مداخلتك الثانية. لك جزيل شكري
الكيك شكراً لك للمشاركة في الترحيب بكمال. وسنلتقي حتماً في اللقاءات الآتية معه
لكم تقدير وشكري نجاة
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: Nagat Mohamed Ali)
|
العزيزة الغالية (الخالة) نجاة: تحية طيبة وود قبل كم يوم كده كتبت في البوست بتاع تماضر (أشخاص تتمنى أن تراهم في البورد) او حاجة زي كده ما قادر أضبط في العجالة دي العنوان كتبت ان من الذين أود مشاهدتهم (كمال قسم الله) وربنا ما خذلني واستجاب لي ... احب ان احكي لكم طرفة حكاها لي كمال في القاهرة .. قال : إتفقنا نحن ومجموعة من الشباب الصغار نشتري لينا كورة ... لمينا القروش (أظن كمال قال مليم، مليم، لانو القرش في وقتهم وهم صغار كان بجيب يا عربية يا موتر)المهم جمعوا القروش واشتروا الكورة وإتفقوا انو لو جاء واحد متأخر ما يلعب كلو كلو .. في اليوم التاني جوا عشان العبوا وبعد القسمة بتاعة الكورة بدوا العبوا ... جا واحد من ناسهم بتاع مشاكل وقال الا العب .. كمال قال ليهو مافي طريقة .. نحن اتفقنا انو مافي لعب بعد القسمة .. رقد في نص الميدان وقال ما بتحرك لو ما لعب. قالوا ليهوا خلاص هاك مليمك وأمش قال .. لالا أنا داير حقي جلد!!!!!!)
زي ما قال محمد السر ... مرحب بي عمدة القاهرة ... أكيد أحسن حاجة في أستراليا انو مافي (أيوب) ....صح ؟؟؟!!؟!؟!؟!؟!؟؟!؟!؟!؟!
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: قصي مجدي سليم)
|
بهاء بكري ألف مرحب بيك، وفي انتظار مشاركتك في مرةٍ قادمة بعد صول كمال
قصي مجدي سليم أهلاً بالعريس. نشاهد يا قصي من حين إلى آخر تسجيلات تلك الأمسيات القاهرية التي جمعتنا مع أصدقاء عزيزين، كنت أنت وكمال من بينهم. وسنشاهدها معك حينما تأتينا مع العروس في الزيارة التي وعدتنا بها في بوست التهنئة بزواجك.
لكما خالص ودي ومعزتي نجاة
| |
|
|
|
|
|
|
Re: كمال قسم الله (Re: mohmmed said ahmed)
|
و اخرجت الارض اثقالها و قال الانسان ماله ت هل لازلت فى صنعاء و قديما قيل عصفورتان فى الحجاز حلتا على فنن ليبيا و اليمن ضياع زمن تحياتى لك و لجبل اولياء , و اسأل عن الصديق ازهرى ميرغنى .
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: nada ali)
|
يا مراحب بالاخ كمال قسم الله احد زملاء القاهرة..بكل ضجيجها وحيويتها ومنظماتها ..واحزابها..وزهرة البستان وتحياتى عبرك للصديق عادل فيصل..نتمنى ان نراه بيننا وبالله بالمرة..تحياتى لصديقى وابن مدينتى هنداوى..الزول الجميل ده خلوهو يجينا بيجاى الف تحية وتحية
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: عبد المنعم سيد احمد)
|
محمد سيد أحمد تعرف يا محمد نحن برضو ما اتعودنا بسهولة على رؤية القاهرة بدون علاء ونبيل، أو كمال بدونهما. أنتظر أن نلتقي مرةً أخرى عند وصول كمال، الذي كان من المفترض أن يشارك اليوم معنا. ويبدو أن هناك طارىء حال دون دخوله المنبر.
ندى علي لك ألف شكر للترحيب معنا بهذا الإنسان الرائع الذي أتمنى ان تسعدي بمعرفته ويسعد بمعرفتك.
عبد المنعم سيد أحمد شكراً لك، ومعك أرسل عاطر تحياتي للصديق عادل فيصل.
لكم خالص تقديري
نجاة
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: wd al geran)
|
Quote: تتجلى فيه إنسانيته وانتماؤه الحقيقي لجانب الحق والخير والمستقبل الأفضل. ففي تعامله مع النساء والرجال يصدر كمال عن شعور حقيقي بالمساواة بين البشر. لا تجدين ولا ذرة من اختلاف في تعامله مع أهله، وأحبابه، وأصدقائه، وجيرانه، وكل من حوله، من النساء والرجال، بسبب نوعهم. يحكي كمال حكايات أهل بربر وأبطال أساطيرهاوقصصها من النساء والرجال بنفس التقدير والإعجاب. يتعامل بنفس الروح والضحكة والمودة مع من حوله من صديقات وأصدقاء. ويلتقي الكل بنفس الترحاب والسعادة والتعليقات الودودة. وستسعدون وتسعدن بوجوده بيننا.
|
نجاة الحبيبة ما أوردته أعلاه أمر مفرح للغاية و مفرح أيضا أنه من طرفكم فالف مرحبا به
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: Nagat Mohamed Ali)
|
Quote: تتجلى فيه إنسانيته وانتماؤه الحقيقي لجانب الحق والخير والمستقبل الأفضل. ففي تعامله مع النساء والرجال يصدر كمال عن شعور حقيقي بالمساواة بين البشر. لا تجدين ولا ذرة من اختلاف في تعامله مع أهله، وأحبابه، وأصدقائه، وجيرانه، وكل من حوله، من النساء والرجال، بسبب نوعهم.
|
العزيزة نجاة
الف مرحب لانسان بهذه الصفات، انه من يحتاجه زماننا والمحبة لك
اشراقه
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: إيمان أحمد)
|
اخبار امين شنو و اخبارك شنو . و بعدين واحد اختلف مع مرته , و دخلو الناس فى الموضوع عشان يصلحوهم , الراجل كان غلطان , اعترف بغلطته و اعتذر للمره قدام الحضور , بعدين قامو الجماعه سالو المره , تانى فى حاجه؟ بدت المره تطنطن , الجماعه شعرو انه لسه فى شيء . نط واحد فيهم , قاليها يا مره الراجل ده قال غلطان و اعتذر قدامنا تانى فى شنو. قالت و الله الراجل ده ما بحبنى , فى اللحظه دى نط الراجل و بأعلى صوته , يا مره احبك انا خواجه.
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: Nagat Mohamed Ali)
|
أهلاً بإيمان العزيزة "أتعرفين كمال؟" تقولين:
Quote: (عمكم كمال) كما يحلو له، ويثقل علينا مناداته. |
وأنا ايضاً يثقل عليّ أن أسمعكم تنادونه بـ "عمكم كمال"، لأن رأس سوط العمومة قد لحقني.
شكراً على المرور، ونلتقيك مرةً اخرى بعد وصول كمال للمداخلات القادمة. وها هو "يتاوق" الآن سريعاً بسبب مشغولياته.
نجاة
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: Nagat Mohamed Ali)
|
الصديقة العزيزة نجاة لك التحية والتقدير (مافي طريقة ليكم كلكم في العمومية دي. نحن ذاتنا ما بنرضي بيها. مسألة العمومة دي في نظري وهمية لحد كبير. وقد اخترت لك اسم الإبنة الشقيقة نجاة لمزيد من اللخبطة لمن يرتكنون لأشكال العلاقات التقليدية)
الاستاذ كمال قسم الله عمدة فعلاً للقاهرة، لهذا تشرفت بمقابلته هناك في فترة عملي مع "ضحايا التعذيب"، وهو صديق لشقيقي الأكبر، أمين. مرحباً به مجددا، وشكراً لك علي التقديم لك حبي وشوقي إيمان
| |
|
|
|
|
|
|
i (Re: Nagat Mohamed Ali)
|
Dear Wad Gasmalla Where have you been ...hope to see you at homeas you promise me ..well come to the bord
| |
|
|
|
|
|
|
Re: i (Re: خالد العبيد)
|
امبارح كنت فى سيرتك مع التجانى حسن, و بعدين انا قايلك ساكن جمبهم اللتاريك فى بلاك تاون . كيفك و كيف رقيه و الاولاد.
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: Nagat Mohamed Ali)
|
اشكر جميع الذين رحبوا بي وعلى رأسهم نجاة (بت عبود) , وللذين لا يعرفون نجاة هي من حفدة مهيرة بت عبود, هذه على الطريقة السودانية, اما على الطريقة المصرية التي تحلو لي دائماً فهي "أم فاطمة" .. اكرر شكري لكل الأسماء الحسنى التي رحبت بي هنا فجراوي عالية عوض الكريم "ازيك يا عالية" قاسم إسماعيل عصام جبرالله "انت موضوعك براهو" معروف سند محمد سرالختم ود الجيران الكيك عشة بت فاطنة "وين إخلاص العبيد" خالد الطيب عثمان حامد "عِرق سوس" بهاء بكري "وين عمارة اولاد قسم الله" قصي مجدي سليم "مبروك العرس وانشا الله الما ضاقو يضوقو" صلاح ابو حجل "جاز" هادية بدر الدين "دايلة" الموصلي محمد سيد احمد "ود الجبل" ندى مصطفى عبد المنعم سيد احمد لنا مهدي صفاء فقيري إشراقة مصطفى سلوى صيام إيمان احمد إسماعيل رجاء العباسي "جنجة" خالد العبيد شكرا ليكم واحد واحد وبعدين مسالة الغربة دي جننتنا وخلّت تواصلنا الإلكتروني تعتريه الكثير من الشحتفة, لكن نقول شنو هذا اضعف الايمان. بمناسبة الغربة دي , مرة جا واحد من المكيلاب لبربر – والمكيلاب دي من اعمال مدينة بربر يا عملات عبدالله علي ابراهيم – وفي جلسة من جلسات الونسة البعد الغدا, جلس ذلك الرجل بعيداً على طرف البرش ولم يشارك في الونسة... سألوه الجماعة .. يا ود مكاييل قاعد بعيد مالك.. ما تجي تتونس, فرد عليهم , والله الزول وكت يتقرب اخير يمسك خشمو – تخيلوا هذه غربة مسافة لا تزيد على تمانية او تسعة كيلو, وكل كيلو فيه نفس الناس وبذات الاوضاع, معاشهم واحد وتسليتهم واحدة وهي الونسة الممتدة المنسابة والسلسة… طيب اكان داك هو حال ود مكاييل, نحنا مفروض خشمنا دا نخييتو عدييل….. علي كل بكري ابوبكر ما قصر انه بادر بفرش هذا البرش الواسع, واي واحد فيه ذي ود مكاييل , بس مسالة الزول يمسك خشمو دي صعبة شوية. وكان مفروض في الوكت دا, بعد ما ضربنا الصعيد والسافل وشفنا العالم شرق وغرب, نكون رجعنا بلدنا وقاعديين في البرش نسف ونبزق ونحكي ذكرياتنا في الاتحاد السوفيتي العظيم – يا عملات حسن نجيلة . ولكن للأسف بدأنا ذلك في توقيت غير مناسب وكان خيارنا خيار أزمة وكان الأمر مختلفا. والاغتراب يا ابونا ما طول الغياب الاغتراب فال اليخونك ويزدريك تحياتي ومحبتي لكم فرداً فردا ولنا لقاءات كثيرة.
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: Nagat Mohamed Ali)
|
أخى الحبيب كمال
بالأمس وعدت الأخت نجاة بالرد على رسالتكم فى هذا البوست ... لكن لقيت ليك الرد طويل... جدا خاصه إنت ما خليت ليك زولا ما ذكرتو.... وعلى قول حاج مجيد عليه رحمتوالله قلتا أجيبا ليك بالقطاعى .... وأولا بالتبادى أبدا ليك بى والدنا على ود المصطفى ربنا يطول لينا فى عمروا ..... تعرف بعد ما إتفارقنا فى بدايه التمانينات .. وبعد ما جاء راجع من الحج هو و الثرياربنا يكرمنا بى حبهم ومحبتم .. أخد الطريفه التجانيه على يد الأستاذ الخال سليمان ود شبرين ومسك ليك فيها يا ديك المسكه .. وحاتك هسع نزور فيهو ....... يقوم يلم ليك فيهم واحد من الوهابيه فى الجامع الكبير.... بعد صلاه جمعه ... وهاك يا تكفير لى القادريه والصوفيه ... ولما وصل للتجانيه قال عليهم ديل راس الكفر عديل ......
الجماعه هاجو وماجو وقالوا إلا يشتكوه فى المركز .... يقوم يلاقيهم عمك علي وهو ماشى على زاويه التجانية ... قال ليهم يا جماعه الحاصل شنو... قامو حكوليهو القصه وقالوليهو نحن ماشين نشتكيهو فى المركز والليله إلا نوصلا معاهو الحد .... الجماعه بعد مازعلانين دايرين يطرشقوا... قال ليهم ... كدا كفرنا من عدم كفرنا ده خلو ... إنتو قبيل أيام سجمى ورمادى ديك متذكربنها كويس ... وأبدا مافى زول قال لى يا كافر... دحين هسع بعد ما عرفنا درب الله ومشينا فيهو يا نرضى بى تكفيرو لينا الله يهدينا ويهديهو يا أنا وإنتو النرجع للسجم والرماد هسع دى ونسدر على الإندايه وستاتا ان كان ده الدرب الفى نظروا عديل..الله يجازى محنك .. و بعد الضحك سقط مشروع الشكيه للظابتيه....
دى واحده ياكمال ... الباقيات الماسمعتبيهن كتار ... لكن لازم وبعد الغيبه الطويله دى كل مره أجيك بى حكايه للناس الإجملت بيهم رسالتك البهجه ... بجيك راجع صلاح أبوحجل
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: Salah Abuhigill)
|
معينيفه منطقه متميزه من حيث الموقع و من حيث مساهمتها فى محو الاميه ـ فالدور الذى لعبته ست بتول و بمنتهى الصمت ادى الى طفره نوعيه فى حياة الناس و بالاخص وسط النساء. كذلك الدور الذى لعبه مولانا عبد الصادق من قبلها , تأثيره موجود و بصوره ملحوظه لغاية اللحظه ـ تتلمذ على يديه و فى خلوته المتواضعه كثير من الاجيال . اما من ناحية الموقع حيث ,, شمر جب،، التى تعلمنا فيها العوم على اسس تقليديه و عندما انفتحنا على احواض السباحه , اكتشفنااننا ,,دراريب قيف،، شكرا لك على حديثك عن ست بتول المدرسه التى تجاهلها السر قدور فى عموده اليومى بجريدة الخرطوم ,, اساتذه و تلاميذ،، اما عن عمنا على مصطفى يطول عمره و فهو رجل سريع البديهه و النكته ,, اليس هو من ابناء الرباطاب،، و نزوعه الصوفى لم يبدأ على يد سليمان شبرين, نزوعه الصوفى نزوع متمكن منه و من دواخله و يبدو لك ذلك واضحا من اول لحظه , تحياتى له
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: Nagat Mohamed Ali)
|
......., ;وكمال قسم الله رجل نادر المثال ، كريم معطاء تتمناه المواقف التي يتصدى لها بحكمة الشيوخ وفوران الشباب ولا تناقض ، ديمقراطي حتى النخاع ،وإنساني للطيش ،مهموم بالقضايا الكبيرة أما الصغائر فيتركها للصغار، أخو أخوان وفارس حوبة، بسيط ومتواضع ومتعوان مع أصدقائه الكثر النجوم ، وحاسم مع الأعداء والخونة، صادق ومرهف الحس ، ذات شوق غامر للرشيدة ،أدركه كمال الألمعي من لمعان العيون المغرورقة ، فربت على روحي بقصيدة نجرها وبلحنها وغنيناها معآ ، ولم يتركني حتى روض شوقي وحزني ، كانت أول مرة أفارقها فيها ، وكل اللذي فيها من حب وجمال وجدته عند كمال ورفاقه وعلى رأسهم العزيز علاء عبدالرحمن السيد ، التحية لهما ، ولك نجاة ، ومليون مرحب بالشفيف كمال
| |
|
|
|
|
|
|
Re: ألف مرحب كمال قسم الله، كنز الحداثة والتراث (Re: عمر محمد عبد القادر)
|
عمر عبدالقادر , و الله الحى مصيرو يلاقى , اين انت ؟ و اين الان استاذى الجليل بابكر عبدالقادر؟ طبعا بعد ان تخرجنا فى بربر الثانويه و تفرقت بنا السبل , تزاملنا مع الاستاذ بابكر فى مصر حيث كان طالبا فى الدراسات العليا و كنا طلاب فى الازهر الشريف كان كريما رحيما شهما , اهتم بنا كثير الاهتمام و كنا نزوره و يزورنا بصفه مستمره. تحياتى لك وله و للسيده زوجته التى اكرمتنا بمائدتها العامره و تحياتى للرجل الفاضل شريف الخضر و و يا حليل التكاوين و واوستى و الجرانيس و المخازن و الحواشات و العماره و السليمانيه التى كنت فيها فى 19 يوليو 1971. بعدين يا عمر البنت الظريفه دى من الواضح انها بنتك , تحياتى لها لكم جميعا
| |
|
|
|
|
|
|
|