|
|
 السودان الفريسة ......
|
كلام بالدارجى كدة
يعنى يا ناس المتابع لاحوال السودان السياسية والله راسو بطق عديل كدة
حركات سياسية واحزاب قومية وفصائل عسكرية وتنظيمات خارجية واتحادات قبلية وعشائرية وكمان بيانات فردية والكل يطالب بسودان جديد او بحصة فى الثروة او تدخل اجنبى او انفصال او حرب ضروس .
يا ناس مالكم الحاصل عليكم شنوا كدى تعالوا النسالكم سؤال موش انتوا دمقراطيين ومثقفين ومتعلمين ؟؟؟
طيب مالكم ما تسعوا وترفعوا راية الدمقرلطية وتطالبوا بانتخابات حرة تجمع الكل بدل الانفصال والحرب والفرقة وكمان اعطاء فرصة للاعداء وتخلوهم يتصيدوا كل فريق او فصيل او حزب كل على حدة ويمرروا اجندتهم عن طريقة؟؟؟
يا ناس السودان مهدد بالمشاكل الفيهو دى وفرقتنا خلت الاعداء يطمعوا فينا وفى بلدنا وفى خيراتنا نحاول نسدها بهنا تنقدا بهنا نجيها بيجاى نلقاها مشت هناك الحاصل شنوا ؟
كلكم عارفين لا اوربا ولا امم متحدة حتساعدنا عشان سواد عيونا لا حتساعدنا وحتكون سيراليون على مرمى البصر نتعب ونتحرق وما نلقى وكل يوم نحلو بالفرج وهم فى بلدنا اسياد وكمان حكام.
يا ناس كلنا طيبن وكلنا سمحين وكلنا اولاد بلد طيب ما نحل مشاكلنا بعيد من الامم المتحدة وامريكا وبريطانيا والاتحاد الافريقى ونكون مثال لافريقيا ذى ما كان سوار الدهب.
كلنا عارفين انة السودان والسودانيين بيعانوا ا كان من وضع اقتصادى ولا اجتماعى ولا سياسى والمعاناة دى حلها فى يدنا ونحنا اسيادا وماشاء الله فينا العارفين والمتعلمين والمثقفين وعلم دة على معرفة داك والله المشكلة تنحلا ونبقى كلنا سمن على عسل ونتحد ونصنع و نزرع سلة الغذاء العالمى دى والخير يعم وكلنا نرجع لبلد واحدة مليون ميل مربع ما بلد مقسمة ومربعة ومثلتة .
الناس المتعصبة ومع الاعتزار بتشوف الكلام دة زى الحلم وما ممكن يتحقق لكن بقول اقرب مثل لعزيمة الرجال هو اليابان خلينا نخوت تجربتهم قدامنا وعليكم الله خلونا من السلاح والمعارك والانفصال وتعالوا نفتح صفحة جديدة .
|
|
 
|
|
|
|
|
| العنوان |
الكاتب |
Date |
| السودان الفريسة ...... | Hisham Amin | 12-07-04, 05:27 PM |
| Re: السودان الفريسة ...... | kamalabas | 12-07-04, 05:53 PM |
| Re: السودان الفريسة ...... | zoul"ibn"zoul | 12-07-04, 06:35 PM |
| Re: السودان الفريسة ...... | kamalabas | 12-07-04, 07:17 PM |
| Re: السودان الفريسة ...... | Hisham Amin | 12-08-04, 04:51 PM |
| Re: السودان الفريسة ...... | zoul"ibn"zoul | 12-08-04, 05:17 PM |
| Re: السودان الفريسة ...... | kamalabas | 12-08-04, 05:52 PM |
| Re: السودان الفريسة ...... | Hisham Amin | 12-09-04, 10:57 PM |
| Re: السودان الفريسة ...... | zoul"ibn"zoul | 12-10-04, 07:09 PM |
| Re: السودان الفريسة ...... | Hisham Amin | 12-11-04, 10:26 PM |
|
| |
Hisham Amin
فيس بوك
تويتر
انستقرام
يوتيوب
بنتيريست