|
|
|
 Re: أسامة معاوية (Re: mohammed alfadla)
|
فاضلابي؟
مسالخير
قاااااااااااااااعد
اعد العد لعمل كبير لكن ما عارفو شنو
غايتو هاك التهويمة دي
انسرب هادئا لنفسي بعد أن جلست عبير ... تسكن كل حواسي إلی مساربها ... تمسحني عينيها بمنديل من راحة
- تأخير عشرة دقايق
أوسعت عينيها وهي تنظرإلی ... لم تجب ... كأنها تقول لي (وكمان تقول تأخير ؟) أخرجت من حقيبتها مرآة صغيرة طالعت عينيها قليلا ثم جرت بلوزتها للأسفل وهي تعدل جلستها وتضربني بيدها في يدي وتقول
- دا شنو العملتو امس دا ؟
- شنو ؟
كنت اتصلت عليها عند الثالثة صباحا بعد أن تمنيتها أن تقاسمني كأسي الجميل المملوء بها ... نام خالد المزعج بعد أن أضربت عن الكلام معه ... يزعجني هذا الخالد كثيرا ... متی يتركني ويمضي لحال فظاعته؟ أنا أشرب كوؤسي هذه لأحادث عبير ويصرهو أن يكون حاضرا ... غدا ... علی أن أخبره غدا أني أشرب لعبير وليس له ... نام ... فاتصلت عليها ... اكتشفت أن صوتها المغسول بالنوم أجمل من كأسي ومن النوم نفسه بل ومن صوتها المعجون بالصحو ...
- سيف؟
- أيوة
- انت مجنون ؟ الساعة كم ؟
- والله ما عارف لكن الوكت بدري تكون زي عشرة ونص كدا
ضيعت الزمن منذ أن مسحت كأسي بمنديلها الرمادي وجلست للشرب … ماذا عساني أعرف عن الزمن وأنا في حضرتها
- عشرة شنو ؟ الساعة تلاتة ... أها داير شنو ؟
- داير شنوووووو؟ داير شنوووووو ؟ والله بس قت تشاركيني النشوة الأنا فيها دي
- طيب ...
وكأنها جلست في منتصف سريرها ... أسمع صوت السرير وحركة التلفون المنتقل من المنضدة الصغيرة إلی حجرها ... كأنني أحسست بحرارة ما ... صوت امعاء قطتها يأتيني ناعما ... يالهذا السائل المجنون يرهف سمعي لإمعاء القطة ؟ ترقد قطتها دائما بين يديها ... تنام وتشبع حب ... متی ستبدلني بهذه القطة الحيوانة؟ بدأت تغير من قطة يا سيف ؟ هذا العالم أوسع من أن نغير من بعضنا البعض ... ضيق لدرجة أني أحسد قطتها ... كركرة امعائها منتظمة جدا ... تنعم هذه التافهة بكل الراحة وأنا يمزق نشوتي شخير هذا السخيف ... خالد ... خلاص سأخبره حال يعود من رحلته الخرافية تلك بأني ما عدت راغبا في منادمته القاتلة بعد الآن ...
" وبعدين ياخي أنا ألف مرة قلت ليهو ما تجيني ببنطلونك العجيب دا ... ياخي بنطلون زي الزردية ... لا خلاص دي آخر مرة "
القطة تدفع بي إلی جنون وشيك وهي تصر علی إيصال كركرتها المنتظمة ... عبير تهمس همسا نائما وهي تغازلها ... هل ادركت غيرتي منها ... هل مضحك أمر الغيرة من (كديسة)؟ ... كأنها ترفعها قليلا علی الوسادة ... احست بارتفاع معدل كركرة امعائها ... متی تحس بارتفاع معدل موتي ؟ متی ؟ ... السماعة الآن علی المرتبة أسمع حفيف الملاءة بوضوح ... رفعتها وتثاءبت
- والله انت مجنون
- عارفة ... قبيل قربت أعضي أصبعك ... قربت ... قلتها وأنا أضغط علی الراء
- طيب مالك ما عضيتو
ستقتلني هذه البنت ... والله ستقتلني ... كانت الغرفة لا تتوقف عن دورانها اللذيذ ... خالد ينام خارج التاريخ ... يبدو طرف قميصه خارجا من البنطلون وهو ينام في كامل حذائه وجواربه البالية ... يفتح عينا ويغلق أخری وكأنه يطالع مستقبله البعيد جدا ... غير الموجود أصلا ... يرقد بعرض السرير تكاد رجليه تلامسان الأرض ولكنه يبدو مبتسما لأنه ينعم بنصف سرير كامل الآن فهو عادة يفتقد النوم علی السرير ... منزلهم .. يا للمسكين .. به سريران فقط ... وهم يقاربون العشرة ... عزاب عظام جاءوا من كل السودان لينشروا قهرهم علی عاصمة البلاد الحبيبة ... ما علينا ...
| |
 
|
|
|
|
|
|
|
|
Re: أسامة معاوية (Re: طلال عفيفي)
|
طلال يا عفيفي
ازيك ياخي
والله متوتر جدا ومتوجس جدا جدا غايتو ربك يسهل
بقول ليك لمان اجي السودان بالمناسبة جاي الضحية الجاية ولمدة شهر كامل
تحياتي
| |
|
|
|
|
|
|
|
|
|
Re: أسامة معاوية (Re: mohammed alfadla)
|
أسامة معاوية الطيب
سبقني الفاضلابي في السؤال عنك ، وينك غايب ؟ غايتو لوغيابك حا تتمخض عنه مثل التهومية الحلوة ، فكن كالسمندل على حافة الغياب.
ممكن تهويمة أخرى من نفس الجراب؟
| |
|
|
|
|
|
|
|
|
|
Re: أسامة معاوية (Re: أبو ساندرا)
|
بركات
رمضان كريم
تحياتي سيدي
انا حا اخلي كل الكلام لمان نتلاقي في الديم في الضحية
وهاك
صمت لحظات وهو يضرب بيده اليسرى على أذنه ويطالع الأرض
- كان البحر هائجا والقرية كلها في المركب قادمون من الجزيرة بعد نهاية يوم مرهق ... كان عمك عابدين مضجعا على يده في مقدمة المركب يطالع الجميع ويحكي لهم نكاته التي لا تنتهي ... النساء يهمهمن بأصوات خائفة ... الموج يتزايد ... وفي تأرجح المركب يمنة ويسرة ... دخلت الماء من منتصفه ... الضجة تتزايد ... النساء يتصارخن ... والرجال تسكن عقولهم سكتة مخيفة ... عمك عابدين يعدل من رقدته وينتبه ... ياسيدي ما أطوّل عليك ... مرق الحريم الفي المركب كلهن ... لكن مات ... الدكتور قال سكتة قلبية ... القلب الوحيد الما كنا قايلنو بيسكت ... سكت ... مشيئة الله ... مركب يسكت قلبها في النهر ... مشيئة الله ... انا كت بقول في شنو ؟
- تحكي عن الجماعة القابلتهم يوم ولادتي
- ايوااا جاءوا كلهم يتوكوون على فوانيسهم وأدعيتهم المهموسة وعصيهم الغليظة وجلابيبهم البالية حتي لتكاد تتلاشى ...
سرت نسمة حلوة في المكان فجعل علي ود عاشة يجيل نظره في السماء ويردد في همس أقرب للشعر ... يهز رأسه ويكاد يغمض عينيه ... شفت سيرة عمك عابدين جابت الهوا...
- سرنا في صمت لا تسمع سوى صوت الأرجل في حجارة الطريق ... السفنجات هذه لا تترك صوتها أبدا وهي تصاحبنا الى مشاويرنا كلها ... وخصوصا حين تصاحب النساء ... كنا وكأننا نتسابق نحو كنز عظيم ... قابلنا أباك يتلفح شاله الأبيض ويرزع فناء منزلكم بخطى قلقة ويمسك عصاته بيده اليمنى... يطالع الأرض كأنه يتابع فيها شريطا سينمائيا ... في يده اليسرى ابريقه وسبحته وهبابته وكل عقله ...
- خير انشاء الله
- خير ... حرك عصاته في الأرض قليلا ثم رفع نظره تجاهنا ... بس المرة بتلد
- المرة بتلد ؟ صرخ العمدة وهو يدلق كل هواجسه علينا لحظتها ... المرة أول مرة تلد كواريكا جايبنا من آخر البلد ؟
العمدة لم يكن يعرف لغةً آخرى يا ولدي غير لغة الحكومة ... والمجلس الذي غالبا كان ينام قبل نهاية جلساته ... والمحاكم في المدينة
- وأنا رسلت قت ليك تعال يا عمدة ؟ ما تكورك المرة انت المزعلك شنو ؟
انتبهنا لسحابة غامضة سارت بيننا لحظتها ... تبادلنا القلق والخوف وانتظرنا لحظات قبل أن يصيح علي صلاح
- يا جماعة قولو خير ... انتو ماكن عاقلين ؟ واسع المرة كيفنها ؟
تنهد أباك وكأنه يأسف على حواره مع العمدة وأجاب وهو يجــــرُّ دلاءا من بئر صبره ...
- كويسة ... رسلنا نجيب الحكيم
- الحكيم ؟ قرّب العمدة ما بين حاجبيه كأنه يقلع صخرةً من جبل تماسكه
- أيوة ... الداية ما قدرت ... قالت الجنا معووج الا يجي الحكيم ؟
- الجنا معووج ؟ وارسل العمدة ضحكته الحارقة ... الجنا معووج ... والله كويس يا هو الفضل ... الجنا الله لا عدلو ... حكيم شنو البيولد المرة ؟
الفوانيس حينها علمت أن شيئا ما سيحدث فتتطاير ضوءها الباهت ... الصمت علّق أوراقه فوق رووسنا ورحل ... كانت أول مرة أرى فيها عصا أبيك تفارق الأرض ... اوسع فتحة عينيه من تحت نظارته ... قطب جبينه وهو يهزّ رأسه ... أول مرة تفارق الأرض وتحط على غصون رأس العمدة المتفرقة اليابسة فتساقط كل أوراقها ... اختلط كل شيء بكل شيء ... نسينا أمك والحكيم والداية ... ما سمعنا صراخك بين صراخ العمدة وأبيك ...
تنهد علي ود عاشة ومسح وجهه بيديه وضحك ... وقف وأمسك بالجدار القديم وضربه بيده والتفت ناحيتي وقال بين ابتسامته
- ومن يوما والعمدة كارهك انت وأبوك .
- أها ... واصل
- ضحك ... أواصل شنو يا ولدي ... انت أول زول يولّدو الحكيم ... وطهّروك كمان في ساعتك ... انت أول زول يولد على العصا وهي تساقط أوراق أغصان رأس العمدة ... تاني داير شنو ؟
| |
|
|
|
|
|
|
|
|
|
Re: أسامة معاوية (Re: mohammed alfadla)
|
ورد الينا الخبر التالي :
الامارات العربية : دُبي
شوهد شاب ذكي الملامح طويل القامة وبروح شاعر واسمه أُسامة معاوية الطيب يتجول في الشوارع المضاءة قلبه بوصلةُ علي بنات فقراء جنوب أسيا بذاكرة شايقي حنين يستعد لعمل كبير : أنتهي .
ملحوظه :
مرة كان في واحد بستعد لعمل كبير " اتزوج " نسأل الله الستر
.......
.......
ياتري انت فين يا ضناياه
,
فاضلابي من خلال رصدنا لتحركاتكم في هذا البوست بدا لنا انكم تضمرون مغيب اكثر علي الاقل ولا حتي عيد الفيكتمس
,
نادي القصة القصيرة قول ليها تعالي جاي
,
| |
|
|
|
|
|
|
|
|
|
Re: أسامة معاوية (Re: Ibrahim Algrefwi)
|
ابراهيم
ياخي امشي بس
ياخي مية مرة متصل عليك وانت ولا انت هنا
كيف كانت ورطتك ؟
حا احاول اتصل عليك الليلة اكيد
تحياتي
لكن بيني وبينك في عمل اكبر من العرس ؟ لدرجة انهم بيقولو فلان دا مرتو عاملة ليهو عمل
حينما يكون مخلصا لدرجة البهدلة
| |
|
|
|
|
|
|
|
|
|
Re: أسامة معاوية (Re: أسامة معاوية الطيب)
|
أسامة ..
وينك يا مان ؟
طبعاً في عمل أكبر من العرس ..
منادمة سيف لصديقه خالد هي عمل أكبر من العرس ولكنه لا يدري ..
بعدين بمناسبة العمل الكبير .. سأعطيك رقم تلفون شخص مهم بالقاهرة
فقط أكتب لي في ايميلي بالياهو كما نوهت لك من قبل ذات بوست ..
"ذات بوست" تعبير يخص النوبي عثمان وعاجبني وبقيت استخدمه في كل البوستات تقريباً .. كمان عاجبني تعبير طلال "السودان الشقيق" لكن ما لاقي لي مناسبة .. تتخيل ما لاقي مناسبة أذكر فيها السودان؟
| |
|
|
|
|
|
|
|
|
|
Re: أسامة معاوية (Re: elmahasy)
|
المحسي
صديقي الذي غاب رغم حضوره البهي داخلي
ازيك ياخي وكيفك ؟ التذاكر والقطارات والمحطات ؟ بالمناسبة محطات استراليا دي برضو بيبيعو فيها البيض المسلوق ؟
اكتب لي على ايميلي [email protected]
عشان انا ما عارف عنوانك علي الياهو
منتظرك اكيد في رسالة
| |
|
|
|
|
|
|
| |
mohammed alfadla
أسامة معاوية الطيب
طلال عفيفي
خضر حسين خليل
أبو ساندرا
Ibrahim Algrefwi
elmahasy
فيس بوك
تويتر
انستقرام
يوتيوب
بنتيريست