|
Re: رجــال الانــقــاذ ودارفــور (Re: البحيراوي)
|
الاخ بحيراوي اشكرك علي المداخله
اعتقد ان مهدي ابراهيم ما عاد عنده تاثير علي الاحداث والظاهر بيبحث ليه عن دور جديد، بعد ما طرده علي عثمان من وزارة ( السخافه). طبعا كما تعلم مهدي ابراهيم كان متوقع ينحاز لمجموعة الترابي بعد الانشقاق لقربه المعروف من الترابي وافضال الترابي الكثيره عليه، ولكنه ( خيب) كل توقعات المراقبين وانحاز لمجموعة النائب الاول ( يعني – اتلصق فيهم او بالاحري – اتلبط في علي عثمان) وبفتكر كان متوقع علي عثمان يديه موفع اكبر كوزارة الخارجيه مثلا، طبعا السيد مهدي ابراهيم – كما هو معروف - كان طول عمره بيحلم انو يكون وزير خارجيه ( عشم ابليس في الجنه) لكن علي عثمان طلع اشطر منه، مسكو ليك وزارة الثقافه كم شهر كده الي ان ضمن انه الراجل خسر علاقته مع ناس الترابي وبعد داك طرده لصالح مجموعة مبارك الفاضل واصبحت الوزاره من نصيب الزهاوي ابراهيم مالك. غايتو مره مره ( لما القعده تحر عليه) يقوموا يرسلوه ليك كم مشوار كده ( قريب دا رسلوه لجنوب افريقيا)، وطبعا كلام ميت ساكت. المهم حاليا ما عندوا تاثير وهو خسر جماعة الترابي ولم يربح مجموعة علي عثمان، وربما يكون وقع ( بي قد القفه) لا اعتقد انه ممكن ياثر علي الاحاث في دارفور، وحقيقة الحكومه كلها اصبح ما عندها تاثير علي الاحداث في دارفور ( الحكومه كما تعلم اصبحت تنفذ تعليمات فقط – وتعليمات محدده جدا) لذلك حديثه اول ام بارح ما كان عنده معني ولا في زول حا يشتغل بيه. في الحقيقه انا ما رضيت دريج يظهر معاه في ندوه، لانه دا شخص اصبح لا يودي ولا يجيب. بالنسبه للسيد دريج ( اعتقد) انه ممكن يكون علي الاقل عنده رؤويه للحل لو ما عنده تاثير مباشر علي الاحداث، وبالفعل الراجل طرح روؤيه محدده واعتقد انها مهمه وايجابيه، ولا ادري ما هو تاثيره علي الاحداث علي وجه الدقه.
مع خالص الشكر
عسكوري
|
|
|
|
|
|