لما يطل في وجهنا ظالم..

[qb]
محمد الأمين:
لما الليل الداجي الطول
فجر النور من عينا اتحول
كنا نعيد .. الماضي الأول
ماضي جدودنا الهزموا الباغي
وهدّوا قلاع الظلم الطاغي

كورال:
وفي ليله .. وكنا حشود بتصارع
عهد الظلم .. الشبّ حواجز ..
شبّ موانع
جانا هتاف من عند الشارع

كورال:
قسماً .. قسماً .. لن ننهار
طريق الثورة .. هُدي الأحرار

بهاء الدين:
والشارع ثار ..
وغضب الأمة إتمدد نار
والشارع ثار

كورال:
وهزمنا الليل .. هزمنا الليل
والنور في الآخر .. طلّ الدار
وهزمنا الليل .. هزمنا الليل
والعزة إخضرت للأحرار

محمد الأمين:
وطني .. أنحن سيوف أمجادك
ونحن مواكب .. تفدي ترابك
وكل العالم بيشهد لينا
في يوم الغضبه.. حصاد ماضينا
مشينا نعطر .. حقل الثورة
بدم نفديه .. دمانا الحره
وكان أكتوبر .. فجر الغضبه
نسجنا خيوط الماضي الصعبه
ولما مشينا مواكب صامده
تحلف .. وتغلي .. وتهتف راعده

كورال:
الرصاص لن يثنينا ..
الرصاص لن يثنينا

عثمان مصطفي:
سال الدم .. في أرض الوادي
فدينا النور .. بالروح يابلادي
وكان صرخه .. حكاها العالم
وفجر أكتوبر .. طلّ وسالم

كورال:
وهزمنا الليل .. هزمنا الليل
والنور في الآخر .. طلّ الدار
وهزمنا الليل .. هزمنا الليل
والعزة إخضرت للأحرار

أم بلينه السنوسي:
وكان القرشي شهيدنا الأول
وما اتراجعنا
حلفنا نقاوم ليلنا وسرنا
وما اتراجعنا

محمد الأمين:
كان في الجامعه .. موكب هادر
صمم يجلو .. الليل السادر
وكان الليل السادر غادر
فجر غضبو سموم دخان
رصاص من صوتو .. صحا السودان
وكان القرشي شهيدنا الأول
وما تراجعنا
حلفنا نقاوم ليلنا وثرنا
وماتراجعنا

عثمان مصطفي بالتبادل مع أم بلينه السنوسي:

للشمس النايره .. قطعنا بحور
حلفنا نموت .. أو نلقي النور

كورال:
وكان في الخطوه .. بنلقي شهيد
بدمو .. بيرسم .. فجر العيد

محمد الأمين:
يا أكتوبر .. نحن العشنا
ثواني زمان
في قيود ومظالم .. ويل وهوان
كان في صدورنا .. غضب بركان
وكنا بنقسم .. بالأوطان
نسطر .. إسمك .. يا سودان

بدمانا السالت .. راويه الساحة
حلفنا نسير .. ما نضوق الراحه
شهرنا سيوف عصيانا المدني
وكانت وحدة صف يا وطني

خليل اسماعيل:
إيد في إيد حلفنا نقاوم
وما بنتراجع .. وما بنساوم
خطانا تسير .. في درب النصر
هتافنا يدوي .. يهز القصر

محمد الأمين:
قسما قسما .. يا أكتوبر
نحمي شعارك .. ونجني ثمارك
ونرفع راية الثورة الغالية ..
عالية ترفرف فوق الساريه
عليها شعار الثورة الأكبر
وجهو الناير .. ناضر وأخضر
ولسه بنحلف يا اكتوبر
لما يطل .. في وجهنا ظالم
بنحمي شعار الثورة نقاوم
بنبني صفوف .. تتحدي وتهتف
لما يعود الفجر الحالم
يا أكتوبر ..

التحية والمجد لثورة أكتوبر الفتية

[/qb]