بمناسبة ذكرى الإستقلال ، الأستاذ محمود يتحدث عن نشأة الحركة الوطنية
في يوم السبت 22 نوفمبر من عام 1975 أجرى بعض مندوبي معهد الدراسات الآسيوية والأفريقية (جامعة الخرطوم) لقاءا مع الأستاذ محمود محمد طه سألوه فيه عن نشأته وعن دوره في الحركة الوطنية التي عاصر فجرها وسألوه عن ثورة رفاعة الشهيرة وها أنذا أنقل هنا (من التسجيل الصوتي) بعض هذه الأسئلة المرتبطة بنشأة الحركة الوطنية والإجابات التي جرت لها وذلك بمناسبة العيد الخمسين لإستقلال السودان .. هذا الإستقلال الذي ضاع بين ركام المطامع الدنيوية والهوس الديني والتفريط وهو ضياع كان قد تنبأ الأستاذ محمود بحدوثه قبل الإستقلال حيث كتب (فقد يخرج الانجليز غدا ، ثم لانجد أنفسنا أحرارا ، ولا مستقلين ، وانما متخبطين في فوضى مالها من قرار) .. س: ذكرت انك سنة 41 قدمت استقالتك من هندسة السكة حديد .. هل لنا أن نعرف الأسباب؟ لمن اشتغلت سنة 36 في السكة الحديد كنت بقوم بأعمال في بداية الأمر في المكتب - مكتب الهندسة .. في سنة 37 نقلت لأنه كان عندنا نشاط في نادي الخريجين في عطبرة .. ماكان اسمه نادي الخريجين كان اسمه نادي السكة الحديد - نادي موظفي السكة حديد السودانيين .. وفي الجانب الآخر في نادي السكة حديد للمصريين .. النادي كان كأنه تابع للمصلحة .. رئيس المصلحة - مدير مصلحة السكة الحديد- كان رئيس الشرف ليهو .. وكان كبار الموظفين في حكم البيعينوا في مناصب النادي .. نحن أحدثنا فيهو سنة 36 و37 ثورة أدبية كبيرة جدا اقتضت أنه اللجنة تكون منتخبة وأنه السكة الحديد ما يكون عندها إشراف على النادي وقلبنا الأوضاع فيه .. الناس اللي كانت بتعينن السكة الحديد كضباط يشرفوا على إدارة النادي كأنه مصلحة من المصالح غيرناهم ، فدا اقتضى أنه السكة حديد تنقلني من عطبرة الى كسلا .. والنقل كنت بشعر بأنه كيدي .. فيما بعد كانت الخلافات بتكون بيني وبين الموظفين الإنجليز كتيرة .. سنة 41 أنا آثرت أن أستقيل وكان عندي محاولات في النشاط السياسي ، وماكان بيستقيم لي أن أباشره وأنا موظف في السكة الحديد .. بخاصة بأنه السكة الحديد موظفيها بكون بعيدين من المدن .. وأنا فعلا لمن نقلوني من عطبرة لكسلا نقلوني لأكون في الخط في المحطات - محطات ميتة وقررت في الوقت داك أن أستقيل ..مشيت تلاتة أربعة سنين بعدها وفعلا كنت زي بشعر كأنه في محاولة إبعاد لي .. نقلوني لعطبرة لخلاف نشأ بيني وبين كبير المهندسين في كسلا بعدين ودوني لخط جديد لأمده مع الناس البمدوه لجهة تسني في أثناء الحرب ثم لما انتهيت منه انتدبت لأمد خط من حلفا فرس* ثم لما انتهيت منه انتدبت لأمد خط من ربك للجبلين وفي دا اعترضت وكان الخلاف ومنه استقلت .. س: ماهي طبيعة النشاط اللي انت استقلت بسبب التعبير عنه؟ كان عن شنو؟ ذكرت بأنك كان عندك نشاط سياسي ، النشاط كان عن شنو؟ فكر معين ، شيء معين كنت بتعملو؟ يلاحظ أنه الفكر السياسي في السودان اتبلور بعد نشأة مؤتمر الخريجين ، ودا كان سنة 38 .. نحن نشاطنا في الثلاثينات - في منتصف الثلاثينات 36 و37 كان نشاط أدبي وطني زي ما كانت بتتسم الحالة في الوقت الماضي .. النشاط الأدبي دا كان قايم في المدن الكبيرة كلها .. في مدني وفي أمدرمان وفي الخرطوم وفي عطبرة وفي بورتسودان .. والنشاط الأدبي اتمخض عنه مؤتمر الخريجين سنة 38 في نادي الخريجين بمدني وكنا بنتجه لأن نسمي الأندية كلها أندية الخريجين .. حتى في آخر الأمر استطعنا أن نغير اسم نادي عطبرة الى نادي الخريجين يعطبرة .. دا تمهيد لأن يكون الناس - الخريجين - كلهم يشتركوا في مؤتمر الخريجين العام النشأ سنة 38 .. ونشاطنا الأول كان نشاط أدبي للجمعيات الأدبية لكن بياخذ الإتجاه الوطني في إحياء الثورة بين المواطنين لمعارضة الإستعمار .. س: نحن دايما بنضع النشاط الأدبي أو جزء من المشروع النحن شغالين فيه عندنا جزء منه حيكون خاص بأدب الحركة الوطنية في فترة من الفترات .. بنعتبر أنو النشاط الأدبي ذاتو كان تعبير عن وعي وطني معين .. رأيك في الكلام دا شنو؟ صحيح .. النشاط الأدبي كان تعبير وخصوصا في الوقت دا من تطور المجتمع السوداني ، يلاحظ أنه في الأزمة بتاعة سنة 29 و 30 و 31 نشأ أول إضراب معروف عندنا في السودان العاصرناه وهو إضراب كلية غردون .. لأنه الأزمة الإقتصادية اقتضت أنه الإنجليز يخفضوا مرتبات الخريجين ويخفضوا المدارس الى النصف .. يعني المدرسة الوسطى تأخد سنة وتغيب سنة حتى بقى يكون عندك مثلا فصلين من الأربعة فصول مستمرات .. لمن حصل اضراب الطلبة في كلية غردون كان سنة 31 ، نحن جينا عقبه طوالي للكلية ، فكان الإضراب دا أحيا روح وطنية كان وسيط تعبيرها الأدب ، نثر ونص ، ما كنت تكاد تلقى قطعة نثرية أو قصيدة الا وهي متجهة لإحياء الروح الوطني في الناس .. وكان فعلا الأدب وسيط للتعبير عن الروح الوطنية اللي هي منها نشأت الأحزاب السياسية فيما بعد ، بعد نشأة مؤتمر الخريجين .. * لست متأكد من اسم المحطة إذ أن التسجيل غير واضح نواصل عمر (عدل بواسطة Omer Abdalla on 01-02-2007, 01:28 AM) (عدل بواسطة Omer Abdalla on 01-07-2007, 06:39 AM)

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]