|
|
|
 Re: القسم والحليفة والتخصيم في الأغنية السودانية (Re: ود الباوقة)
|
واحشنى يا الخليت ملامحك ..
فى حياتى ،
واحشنى يا الرسيت مراسيك ..
جوة ذاتى ،
الا باكر لما ترجع ،
أنا بحكى ليك عن الحصل ،
وعن بعد المسافة وقربها
ولمن يفارق زول عيون
غاليات عليهو كتير خلاص وبحبها
والله أحكام يا قدر
والله أحكام يا مسافة ويا سفر
أبوعركي --- التجاني حاج موسى
_____
يا جماعة شايف في نصوص جايبينها لمجرد ورود إسم الجلالة فيها، وليس فيها قسم أو حليفة أو (تخسيم) .... مثلاً (الله الليموني) و (يا ربي جيت قبل المعاد)، فورود إسم الجلالة يمكن يكون للإعجاب والدهشة أو التساؤل، وليس فقط القسم. ......... والاّ شنو؟
| |
 
|
|
|
|
|
|
|
|
Re: القسم والحليفة والتخصيم في الأغنية السودانية (Re: محمد أبوالعزائم أبوالريش)
|
الطير المهاجر!!!!
• بالله يا الطير المهاجر للوطن، زمن الخريف ، تطير بسراع، ما تضيع زمن، أوعك تقيف ، وتواصل الليلة للصباح، تحت المطر، وسط الرياح، وكان تعب منك جناح
في السرعة زيد، في بلادنا ترتاح، ضل الدليب أريح سكن
• بالله يا طير قبل ما تشرب، تمر على بيت صغير، من بابه ومن شباكه بلمع ألف نور ، وتلقى الحبيبة بتشتغل منديل حرير، لحبيب بعيد
وردي/صلاح م. إبراهيم.
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: إسماعيل التاج)
|
يا حلبي
والله في ناس هنا ، انا وعاطف عمر فايتنهم بالشهرة بس
كدي أنظر الولولات البيجيبها محمد أبوالعزائم دي
وشوف المتاهات الدخلنا فيها صلاح عبدالله ، من لدن منعم الخالدي
واللا شوف عمايل خليل فينا
واللا شوف تيسير و وضاحة الماقادرات يقولن بغم من الدموع
الناس دي كلها بكاية بالدس
بس انا وعاطف ضاربيت تأمين ومفضوحين
الله فيي
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: khaleel)
|
محمد عزائم ريش:
Quote: يا جماعة شايف في نصوص جايبينها لمجرد ورود إسم الجلالة فيها، وليس فيها قسم أو حليفة أو (تخسيم)
مثلاً (الله الليموني) و (يا ربي جيت قبل المعاد)، فورود إسم الجلالة يمكن يكون للإعجاب والدهشة أو التساؤل، وليس فقط القسم. .........
والاّ شنو؟ |
100% ناقش ودقيق و أي حاجة
يا جماعة فرقو بين القسم وبين الدهشة والاعجاب
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: أبو ساندرا)
|
دي زى القمر
والله أحلى من القمر
يا حلوة يا ست البنات
يا متعة للروح والنظر
طولتي بتخبي الغرام
الليلة في عيونك ظهر
في بسمتك في رقصتك
في خدودك الحلوات زهر
خلاك أحلى من البنات
والله أحلى من القمر
_________________
الأستاذ صلاح بن البادية
_________________
إمعاناً في ( تودير ما تبقى من رويحة بركوتة )
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: Asim Fageary)
|
يا نسيم بالله أشكي له
أروي له
حديث الحب وتأويله
وبالغ شرحي تطويله
لعله يسيب دا كله أو أقله
يرجع قلبي في محله
يكون في عطفه إكرامي
وأفوز بى حظي ومرامي
دوام أنا شوقي نامي له
جداول دمعي تهمي له
صرف عن حبي صار ميله
وأنا اللا زال أحامي له
احبه .. وافتخر به
________________
عتيق
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: Asim Fageary)
|
يا قائد الأسطول تخضع لك الفرسان
ياذو الفخار والطول أرحم بنى الإنسان
مين لسماك يطول ما يطولك اللمسان
معناك شرحه يطول والله يا إنسان
أصدق كفانا مطول ياذو الحسن إحسان
أنا عقلى بيك مختول والناس عقول ولسان
ما بنكر المعقول آمنت بالأيمان
بالطلسم المصقول بدل لخوفى أمان
بالنور سحرت عقول كانت صميمة زمان
يا من تحق القول قتل النفوس حرمان
وما الجندى والمكتول و طالب الغفران
________________
سيد عبد العزيز
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: khaleel)
|
تهيم خطواتى نشوانا
تعانق دربك الاخضر
وحات اللوعه والآهات
يا مشوار ما تقصر
________________
" الدرب الأخضر "
أستاذنا أبو عفان
كلمات الأستاذ محمد يوسف موسى
________________
لوعة وآهات قاليك يابركوتة
أمسك في كلام عاصم فقيري بتاع علاقة الغناء بالتصوف دا قوي
فهو كلام سليم ( أتحدث عن الغناء الصحي صحي )
قد نناقشه معاك في بوست آخر
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: عاطف عمر)
|
عشان خاطرنا خلى عيونك
الحلوات تخاطرنا
ولما تمرى أبقى أقيفى
واسألى عـن مشـاعرنا
......
......
.....
.....
وحاتك تانى لما تفوتى
أبقي أقيفى سالمى الناس وحيينا
كفايه علينا لما نشوف
بسيماتك تصـابحنا وتمسينا
عشان نتملى من عينيك
عشان نلقى الصباح مسحور
يعاين لصباح خديك
جهرتى الدنيا يا دنيتنا ياروعتنا
ما هماك جهرتينا
__________________
" عشان خاطرنا "
الأستاذ محمد ميرغني
__________________
" عشان خاطرنا " يا بركوتة
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: أسامة البيتى)
|
يا عاطف
شايف ابو ساندرا وابو الريش محتجين علي خلاسية بان ليس بها قسم
محمد المكي ابراهيم اراد ان يقول
والله انت خلاسية
والله بعض الرحيق انا والبرتقالة
ولكن اكتفي بتكرار اسم الجلالة خمسة مرات في مطلع الاغنية
ويا ربي جيت قبل الميعاد
الشاعر اراد يخصم الزمن ويتمني ان يكون قد اتي هو متاخرا او الزمن زاد بقليل
لان لا يريد ان يغيب المحبوب ( قصة تغيب ما اظن تكون يوم في اعتقاد)
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: khaleel)
|
ونقول في التخصيم ...
يا ستي أمرك لي مطاع مَن غيري كل العاصِ طاع
اعلانها باقي على انقطاع نرجوهو عدم الانقطاع
لو تاني عاد الانفصام بشكيهو عند قاضي الغرام
بوريهو ناري الفي العضام سراجا حامياني المنام
الموز روي ... من التراث ... عبدالكريم الكابلي
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: أسامة البيتى)
|
تحياتي وسلامات يا أسامةQuote: كيفك يا عاطف..
تصور دى من أحب الأغانى إلى!! شاعرها مصطفى سند!!!
محمد ميرغنى، كعادته، إتقطع فيها!! |
فعلاً " عشان خاطرنا " من إلياذات الأستاذ محمد ميرغني
عمل فني متكامل .. كلمات ولحن
أما أداء محمد ميرغني فهو البصمة التي يستحيل تقليدها
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: أبو ساندرا)
|
الأخ العزيز / ابوساندرا
سلامات
بوست جميل وخفيف ورائع
من الأشياء الطريفة في الحليفة إن ابوصلاح أتى بقسم لم يكن مطروقا في الشعر السوداني حيث أن الشعراء
يقسمون بالعيون ( وحياة عيونك ) أو بالابتسامة ( وحياة ابتسامتك ) أو بالحياة
( وحياتك ) وغيرها أما ابوصلاح فلقد اقسم بشئ غير معهود قائلا في قصيدة اشتياقي وهجرك حرام …
يا الضمير الرق انحزم ........بى صديرك ماح ما لزم
بى نهيدك حالف جــزم ......... صافى حسنك ما فيه ذم
يا الضمير الرنع انقسام .......... والبريق الفى الابتسام
يا الشليخ اللي روحي سام .........كف لحظك رمشك حسام
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: Ahmed al Qurashi)
|
Quote: أما ابوصلاح فلقد اقسم بشئ غير معهود قائلا في قصيدة اشتياقي وهجرك حرام …
يا الضمير الرق انحزم ........بى صديرك ماح ما لزم
بى نهيدك حالف جــزم ......... صافى حسنك ما فيه ذم |
أمااااااك
دكتورنا الموسوعي جاب حديث
هسع القسم دا يلونوه بالأحمر كيف ؟؟
____________
على القسم
عمنا أبوصلاح بالغ
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: عاطف عمر)
|
ضاع الكلام ماتت حروف اللقيا قبال اهمسا
والله ما غابت محاسنك لحظة لا الجرح اتنسى
للّيلة ما وشوش نسيم في روضو ما غرد مسا
للّيلة ما سافر عبير في الطيب يغازل نرجسة
للّيلة يا حبي الكبير في حرقة لافيني الأسى
صحّيتي في نفسي الوجود
ورجّعتي لعيوني النهار
من غير معاد - وردي
_____
يا عاطف خليل عايز يحلل موضوعو ساكت.
أما الرش، فما عليك .. نقبلها عشان كلمة (دوقمائيين) عجبتني برضو.
فيما يخص بركوتة .... رشو ولا تأخذنك به رأفة
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: محمد أبوالعزائم أبوالريش)
|
الجميل ابو ساندرا ...
وكل الرائعين ... فقيري ... خليلو ملك النوادر ... الشفيف احمد القرشي ... جار البركس الجميل عاطف عمر ... وابو الريش .. وكل المتدخلين في هذا البوست الانيق ...
وتخريمة يابو الريش ... انت قريت الخرطوم القديمة و كنت ساكن بري ... بين 1975-1978 ؟؟
نرجع لاحلي حلفان للبديع محجوب شريف ... و ياوالده يا مريم ....
قال ليها :
العُودو خَاتِي الَّشَّـــق
ما قال وحاتـِــك طَـــق
تب ما وقف بين بين
لي موتُو إتقدَّم ...
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: يحي قباني)
|
سيد الاسم
محبوبى وكتين يبتسم
الدنيا ياناس تنقسم
الفرحه تملاها وتزغرد فيها والشوق يرتسم
.....
.....
.....
يوم جانا شايل خطانا الكايسنه راح
وشايل الأمل فى عيونه والحب والسماح
ارتحنا من ماشفناهو والليل استراح
ضحكت نجومه وغنى قمرو معانا لى عند الصباح
يكسينا من ضوو إبتهاج ويضفي شعاعو علينا راح
لكن بغير والله ويرجع منهزم
الدنيا ياناس تنقسم
الفرحه تملاها وتزغرد فيها والشوق يرتسم
_____________________
" سيد الإسم "
الأستاذ أحمد الجابري
كلمات الأستاذ كامل عبدالماجد
________________
إهداء للحبيب المهندس يحيى قباني
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: وضاحة)
|
ح أرشكم بقسم ابوطيرة وحنين ومن خلال كلم جد معبر ورقيق
لغاية ما أرجع ليكم للقسم المافيهو وضع يد ده
شوفو حمد الريح في تائه الخصل قال شنو
أظن الشاعر عبدالواحد عبدالله
وحيات الحنان الضقنا ليلات لو بتتذكر عسل ...
وحيات اهة ساقيها الدلال من النعاس خدر الكسل .
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: وضاحة)
|
وضاحة يا وضاحةQuote: غايتوا يا عاطف يوم بتكتل ليك زول هههههههههههههههه
شكلك كنت بكاااااااااااااااااااى
وكتلت البكيت فيها ببكاك دا
الله يدينى زول بكاى زيك كده علشان ابكى وابكى معه هههههههههه |
أولاً أقول آميييييين
بأن يرزقك الله تعالى بمن يستاهلك
ويقعد يبكي ليك ( لمن يقطع زراير قميصو )
أما عن قصة بكانا
فالسيدة المبجلة ( بعلتنا ) ترى أن ( المهندسين ) يكونون عادة عمليين أكثر من اللازم وأنهم دائماً في حالة حسابات وقلق لذلك فهم أضن الناس بالكلمة الحلوة
لذلك فهى تتمنى ألا تتزوج إحدي كريماتنا من مهندس
Quote: والله لكن الشاعر بالغة
الحمد لله القسم دا مافيه وضع يد |
هههههههههههههههههههههه
صدقاً يا وضاحة
إنتي الـ ح تكتلي ليك يوم ( أزوال ) بخفة الدم
والتلميحات الذكية دي
_____________
غايتو أديتي بركوتة ( باص ) في خط ستة
والله هيثم مصطفى ما يطلع باص زيو
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: عاطف عمر)
|
عزيزي عاطف عمر عليك الله لون لينا القسم هنا باللون الأحمر
ويا وضاحة خلي شرحك تلميحا كمداخلتك السابقة
الأبيات للشاعر أحمد محمد الشيخ الجاغريو ولقد قالها في حزام (قاش)
اخضر وداخله بنبى وبالصفار نابتنو
وفى الخصر المتل طى الحجاب رابطنو
لو قولي كــــضب النهـــــود ثابتنو
والضاقو الحزام لو ضاقوا غيره يجنو
********
يا حزام السواد ذنبك شنو السويتو
بى فوق للنهود مريت وقلبي كويته
حلف بحياته قال في حياتي ما كاويته
عارفه غشيم وجاهل ولى عذابي حويته
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: Ahmed al Qurashi)
|
عزيزنا الدكتور الأديب ود القرشي
الله عزيز
لكن أعفى لينا
التلوين في ( المناطق الملتهبة ) دي
بيدخلنا في ( جناية وضع اليد )
ودون أن نفعل ذلك بركوتة شايل حالنا
______________
سمعت نكتة الشيخ المصري الكان بيدرس في سودانيين دروس دينية وهو يدخن سيجارة وراء السيجارة
ولمن أذن المؤذن للصلاة قام الشيخ صلى عادي ؟؟؟
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: عاطف عمر)
|
عفيناك عزيزي عاطف عمر
وحقيقة لم أسمع بنكتة الشيخ المصري ولكن بمناسبة السيجارة
أهديك أبيات لطيفة للشيخ محمد ود الرضي وأظن أنه قالها قبل معرفة مضار التدخين
ما خلق الرجل عشــان ينــوم ويبــلع
خلق يكون مدرب في الأمور متضلع
وان لزم الأمر من جيبه يقـدر يطلـع
سجارة ويقول لي أخوه خودك ولــع
*******
يوم الحرب يوم الرجال تتـجـــارى
تخطر على صــف اليهود ونصارى
سويت الكرم يا أب آمنه ليك تجاره
ياود الكرام أكرم أخوك بى سجــاره
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: Ahmed al Qurashi)
|
عزيزنا العزيز| Quote: وحقيقة لم أسمع بنكتة الشيخ المصري |
راجع الماسنجر
Quote: ما خلق الرجل عشــان ينــوم ويبــلع
خلق يكون مدرب في الأمور متضلع
وان لزم الأمر من جيبه يقـدر يطلـع
سجارة ويقول لي أخوه خودك ولــع
*******
يوم الحرب يوم الرجال تتـجـــارى
تخطر على صــف اليهود ونصارى
سويت الكرم يا أب آمنه ليك تجاره
ياود الكرام أكرم أخوك بى سجــاره |
رجعتنا لأيام الشباب والتدخين يا عزيز
دخنت أول سيجارة وأنا في الصف الثاني بالمرحلة الثانوية في العام 1977
وتوقفت عنه في يوم الجمعة 17/08/1995 وقد كان معدل تدخيني حوالى ( 70 - 80 ) سيجارة يومياً
_______________
أبو الريش
ما تتحسس ( يا دفعة ) من التواريخ
خليك زينا كدا
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: يحي قباني)
|
Quote: يحي قباني ...
بالحيل .... أنا بتاع بري والقديمة.
لكن دي ...
Quote: بين 1975-1978 ؟؟
لزومها شنو؟
في ناس هنا متربصين.
___
إنت كنت في ياتو فصل (نهر)
ومعليش ما رحبنا بيك في المنبر .......... "حبابك عشرة" |
سلامات يابو الريش ... و شكرا علي الترحيب ...
انا كنت في اولي عمر و تانية و تالته ابوبكر ... " شعبة الرياضيات "
اولاد بري اصحابي و دفعتي امسك عندك :
كمال محجوب ... كمال صديق ... احمد سراج النور ... وجميع اولاد مضوي خيلان كمال صديق ... واسماء كتيره الزمن بس جار علينا ...
قدامنا لكن جمعنا " الكديت " والكره الطايره ... عبد العزيز ابشيبه ... وعبدالوهاب سورين ... والمجموعة الجات معانا من الخرطوم الاميرية
وانا بتذكرك و كان ما اخاف الكضب كنت معانا في الكديت ؟
شلتنا كانت كبيره جدا ... مجدي مختار ... سعد بشير " سعد ميته " ... عمر مختار ... محمد جعفر قريش ... محمد ابوصالح
مجدى صدقي ... خيري عبدالرحمن ... محمد كامل قباني ... نواري عمر نواري ... وكتيرين تاني ...
اها لقيت الذاكره كيف ؟ ؟
بعدين يا حبيب العمر ده مجرد رقم .... زى ما بيقولو الخواجات
طبعا بعرف آل ابو الريش اولاد و بنات عباس ابراهيم ابو الريش كلهم لانو زاملونا و درسونا " في حالة محاسن " ... في المعمار ...
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: محمد أبوالعزائم أبوالريش)
|
هاك دي يا عاطف و يا ابو الريش و يا فقيري و كل الصحاب الهنا ... خصوصا وضاحة المحيّا ...
دي يجيكم د. القرشي يوريكم فخامة البكا الفي الابيات دى ...
خلطة حليفه و خصام و بكا من عمنا سيد عبد العزيز ... و لحن و غناء ابراهيم عبد الجليل ...
يا أم جمالاً يشفى السقيم
مريضك كيفن دواه
فى صراط الحب مستقيم
قلبى لكن كلت قواه
يا أم جمالأً يشفى السقيم
طال عذابو الليكن غوى
حق نبينا وموسى الكليم
فر عقلى وشالو الهواء
يا الحشيمة وذوقك سليم
كيف علاجى ودائى الهوى
كلام لكن ...
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: يحي قباني)
|
ودى " بكائية " عمنا عبدالرحمن الريح و الذري ابراهيم عوض ...
متين يا ربي تاني تلمنا
قريب يا ربي إن شاء الله تلمنا
***
متين يا ربي لي حبيبي يعود
أقيم ليالي بالكمان والعود
أغني ليهو الرائع المنشود
وأشوف في خدودو نضرة الورود
***
متين يا مسافر عودة لي أم درمان
كتير لو لحظة تغيب عن الأوطان
تعود وأقابلك مبتسم فرحان
كأنك زهرة ندية في بستان
***
متين يا ربي أيام الفراق
تفوت ولقانا يكون هنا وأشواق
ما كان بيدي أكون وحيد مشتاق
لكن يا سيدي الزمان فراق
***
متين يا ربي تاني تلمنا
قريب يا ربي إن شاء الله تلمنا
كلها بكا و حليفه ما عرفت الونها كيف زاتو ....
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: khaleel)
|
عاطف عمر :
| Quote: إمعاناً في ( تودير ما تبقى من رويحة بركوتة ) |
ودرت زمااان بعد ما إتقطعت مزع
كل واحد نتف منها نتفة ، أولهم أنت بقاتلات عثمان حسين ، وتانيهم يحي قباني بفاتكات الحقيبة
أما محمد أبوالعزائم العارف بشؤون الغناء والموسيقى منذ ان كان بيعرف مارشات الكديت في منتصف السبعينات
فإنه لو إكتفى ب ( صبابة) عبدالعزيز داؤود للحقني له
وخليل وما أدراك ما خليل ، وعاصم فقيري الذي يضع لنا السم في الدسم
يا حليل الرويحة دي ، عفيتا ليكم ولوضاحة أم تعليقات قاتلة
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: أبو ساندرا)
|
أمانة عليك يا تايه الخصل
ويا خير عمّ في دروب عمرنا الضايع هطل
انحنا متين عرفناك
ومتين الكنا ما دايرنو يحصل
داس مشاعرنا وحصل
.....
.....
.....
وحيات الحنان الضقنا ليلات لو بتتذكر عسل
وحيات آهة ساقيها الدلال من النعاس خدر الكسل
_______________________
" تايه الخصل "
الأستاذ حمد الريح
كلمات الأستاذ كامل عبدالماجد
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: عاطف عمر)
|
| Quote: وحيات الحنان الضقنا ليلات لو بتتذكر عسل |
اها يا عاطف شوف عمك كامل عمل شنو
حول الحنان إلىى شييء يمكن تذوقه
الضوق ده إلا باللسان ، عسل ياخ
زي : ( في غيابك اضناني الألم ... إندس في قلبي الألم وفقدت للأيام مذاق )
وأظنه هو الذي حول الشعاع إلا سائل يكشح
( ويكشح شعاعو علينا راح
و إرتحنا يوم شفناهو والليل إستراح)
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: أبو ساندرا)
|
| Quote: وحيات آهة ساقيها الدلال من النعاس خدر الكسل |
الآهة المسقية دلال دي إتخيل بتكون كيف ؟
والله تحاولها تلحق بالبشير وحبالك الصوتية تروح شمار في مرقة
لكن الإسمها وضاحة دي بتقدر عليها
تتكلم كما لو في فمها ماء
يطلع الكلام مسقي وتريان
تخت السماعة تحس بروحك ذاتها رويانة
الله يحفظك انت من حق البشير
والله يحفظها هي من عيني ، أقصد أذني
| |
|
|
|
|
|
|
|
|
|
Re: القسم والحليفة والتخصيم في الأغنية السودانية (Re: أبو ساندرا)
|
Quote: اها يا عاطف شوف عمك كامل عمل شنو
حول الحنان إلىى شييء يمكن تذوقه
الضوق ده إلا باللسان ، عسل ياخ
زي : ( في غيابك اضناني الألم ... إندس في قلبي الألم وفقدت للأيام مذاق )
وأظنه هو الذي حول الشعاع إلا سائل يكشح
( ويكشح شعاعو علينا راح
و إرتحنا يوم شفناهو والليل إستراح) |
Quote: الآهة المسقية دلال دي إتخيل بتكون كيف ؟
والله تحاولها تلحق بالبشير وحبالك الصوتية تروح شمار في مرقة
لكن الإسمها وضاحة دي بتقدر عليها
تتكلم كما لو في فمها ماء
يطلع الكلام مسقي وتريان
تخت السماعة تحس بروحك ذاتها رويانة |
بركوتة منداحاً
___________
إنعل أبو الجمكسين زااااتو
" الحقوق محفوظة لـ طارق جبرين "
| |
|
|
|
|
|
|
| |
khaleel
محمد أبوالعزائم أبوالريش
إسماعيل التاج
أبو ساندرا
Ashraf el-Halabi
omar arbab
عاطف عمر
Moawia Mohammed
Asim Fageary
يحي قباني
حمد عبد الغفار عمر
Ahmed al Qurashi
وضاحة
فيس بوك
تويتر
انستقرام
يوتيوب
بنتيريست