|
|
 اها دي يحلوها كيف دي ؟؟؟
|
أول ما يجي واحد من الإجازة تسالوا :
اها السودان كيف ؟
و الله ياخي البلد ماشة للاحسن .
الشغلانة دي قربت ، بس اديها سنة ولا اتنين ، تاني مافي زول حيقعد في البلد دي .
الحاصل شنو ؟ الجديد شنو ؟
و الله شايف في شوارع جديدة قعد تتعمل ، و في استثمارات تقيلة خاشة البلد ، الناس دي ماشة لي قدام نحنا بس القاعدين هنا ديل الضحك شرطنا .
بعدين أي شي راقد في السودان ، بس القروش دي المافي ، داير ليك دخل ما يكون اقل من اتنين تلاتة مليون في الشهر تعيش فيهو بي ارتياح ، تعيش ملك .
تعاين ليهو بي امل بائس في هذه العودة القريبة ، فيستطرد قائلا :
يا خي شوف الاتصالات دي انتا عارف هناك الاتصالات متطورة أحسن من هنا ، الناس دى كلها شايلة ليك موبيلات اخر موديل ، و مجدعين آخر تجِدع .
تقعد تفكر في كلام الزول المتفائل دا ، تخت في راسك طوالي بكرة تقوم تقَلبا مع ناس الشغل ، و تشتت ليهم ورقم في وشهم و تقول ليهم ادوني جوازي الليلة انا تاني ما قاعد ليكم ساعة هنا ، يلا خارجونا بس .
و تقعد تحلم ، اسي انا مستحقاتي بقت كدا .... ، و لو قدرت طلعت بي عربيتي دي ، و لقيت لي شغلة هناك بي مليون و نص و لا اتنين دي تكون في السلك ، لأنو قالوا المرتبات هناك بقت عالية جدا ، و خاصة الناس الجايين من بره ، قالوا مرغوبين شديد . يا اخوي انا تاني البقعَدني في القرف دا شنو ؟
اها بي حماسك دا تمشي تشحن موبايلك و تتصل بي ود عمتك الفى السودان ( و الله ما عارف المقعدو لحدي اسع في السودان شنو ؟ ) .
كيف الحال و الاحوال ، و بعد المجاملات و الهظارات و الشمارات تسالوا عن حال البلد :
اها السودان كيف و انتو عاملين شنو ؟
يا خي دي بلد تسال منها دي ، الله يخرب بيت اليوم القعَدنا في البلد دي .
مالك يا زول ؟
يا خي دي بلد كلها حرامية ، و ناس كضابين ، و الله البلد دي تكون بي حالتا دي لي يوم الدين ، عمرها ما تمشي لي قدام .
ياخي الحاصل شنو ؟ ما قالوا البلد ماشة لي قدام و الحال قعد يتصلح !!!!!!
يتصلح و ين يا زول مع الناس ديل ، علي اليمين البلد مافي أي حاجة فيها ماشة لي قدام ، ما في حاجة كدا تطلع ليها الصباح تقول اقضيها و تجي راجع البيت تقول و الله انجزتا الشي الفلاني ، يومنا كلو ضايع في الجري و المساككا ورا الناس ، و طوالي يدك في جيبك .
تقلب ايدك الشمال ، و تكون ماسك الموبايل بي ايدك اليمين ، و تحاول تترجاه انو يسحب او يتراجع عن جزء من كلامو الاول دا :
ياخي ما قالوا البلد ماشة او فيها شوارع جديدة ، و في استسمارات تقيلة خاشة ، و الناس شغالة كويس ، مالكم تاني ؟
شوارع جديدة !!!!!!!
يا زول الشوراع الجديدة البتقول عليها دي كلها اتحفرت تاني ، و الاستسمارات البتسمع بيها دي ما شفنا فيها غير العربات البي اللوحات ( خ استثمار ) .
ترد علية باحباط منقطع النظير ، و عيناك تترقرقان دمعا :
يا خي نحنا هسي قنا راجعين خلاص مالك محبطنا تاني ؟
راجعين !!!!!
يا زول راجعين و ين خليك قبلك ، و شوف لينا طريقة نحنا زاتنا نحصلكم .
تقوم تقفل من الزول دا السماعة ، و تدي وشك للحيطة ، و تقعد تفكر ....
يا ربي الحال دا كدا حيستمر لي متين ، كل يوم نحنا في جنس الحالة دي ، يا ربي بلدنا دي بالجد حتتصلح متين ، و انحنا الحيرجعنا لي بلدنا تاني شنو ؟
تقعد تفكر في حال المغتربين الليهم عشرين و تلتين سنة ديل ، يا ربي انا حاكون زي ديل ، خلاص يعني حاقعد طوالي في البلد ، نوم ، اصحي ، ........ ، امشي الشغل ، الحال طوالي حيكون كدا ؟؟؟؟؟؟؟
طيب انا فرقي من تور الساقية ، و لا حمار النوريق شنو ؟
يا ربي السوا فينا كدا منو ؟
لي شنو نحنا ما زي باقي شعوب الارض ، نولد في بلادنا ، و نكبر و نتعلم فيها ، نعيش فيها ، نشتغل فيها ، و ليها . ليه اول ما الواحد فينا يتخرج و لا يخلي المدرسة خلاص طوالي يفكر في السفر و الغربة .
هل كتب علي الانسان السوداني الشريف ان يعيش في المنافي ، و من اجل المنافي .
هل كتب علي من لم يجد شيئا لدي والدة يعينه علي بداية حياته ، او لم يقبل ان يمد يده لمال غيرة ، او يعيش طفيليا علي فتات الاسواق هذا التشرد و الشتات ؟
|
|
 
|
|
|
|
|
|
|
|
|
Re: اها دي يحلوها كيف دي ؟؟؟ (Re: ودقاسم)
|
حقوقنا يا خال
يا خال نحن حقوقنا دي خليناها ورانا زمان لما خلينا بلدنا و سافرنا ، و خليناها ليهم ينهبوا فيها و يسرقو زي ما عايزين .
اكيد ما في انسان ما عايز يسترد حقوا ، و لكن كيف ؟؟؟؟؟؟؟؟؟؟؟
لو عايز ترجع السودان عشان ما تسترد حقك ، ياهو الضحك شرطنا ، او بدل ما ترجع حقك تقعد تجاري و تساسق ورا لقمة العيش من اجل لقيمات يقمن صلبة ، و تتلطش زيادة و رقبة العندك يقلعوا منك ، او بعد شوية تبقي في الطريقة التخارجك تاني من البلد .
برضوا ما عندها حل !!!!!!!!
| |
|
|
|
|
|
|
|
|
|
Re: اها دي يحلوها كيف دي ؟؟؟ (Re: حمد فتح الرحمن)
|
حمد ياخوانا
لاقيتو في كلية الاقتصاد جامعة الخرطوم في منتصف تسعينات هذا الزمان..
مبهدلا كان عربيدا ومشردا ..فقيرا ومعدما ..
واخو اخوان ومباري الدهنون..
ينتهي من سجارة يخت التانية ..ينتهي من التانية يرفع السفة..
وفي الليل في داخلية النشر ترى منه عجبا ... والنيل الازرق يشهد..
خرج حمد فتح الرحمن من السودان الى المنطقة الشرقية ..
الان تراه فترى عجبا
ود وجيه ..سايق عربية كامري بترقش زي وش اميمية..
بمؤخرة زي بتاعة هندوية ..
خلى السجاير والسعوط من زمن بعيد ..
اكثر تهذيبا واكثر القا .. واخو اخوان يحتفظ بذكريات طيبة لي ناس طيبين ..
وبمقتضى تحسن احوالة ورضى الله عنه وعامل الجغرافيا خلا مباراة الدهنون ..
يستمع الى حسن عطية بمزاج زول قرا جامعة الخرطوم وسكن داخلية النشر ..
وليس اجمل من ذلك استماع..
ياحمد
ترجع وين انتا اهبل ؟؟
كيف يعود الانسان الى بلدً لا امن فيها ولا امان ...
تصحي ربة البيت قائلة ما خبر سلفاكير ؟؟هل هو بخير ..اهوحي يرزق ام تسسمم ام سقطت به طائرة ..
إذا كان الرد انه حيا اطلقت عيالهاالى المدارس ..
واذا كانت الاشاعات مُـشاعة ..درس العيال فصلا اخر من الخوف في منازلهم ..
تقول لي منافي؟؟
كامري اخر موديل وتقول لي منافي؟؟
| |
|
|
|
|
|
|
|
|
|
Re: اها دي يحلوها كيف دي ؟؟؟ (Re: DKEEN)
|
ابدول امبس
وينك يا راجل
بالفعل كنت عربيدا معدما مشردا ، اتضور جوعا و فقرا .
قاتل الله الدهون جالب السمعة السيئة ، غير انة لا ذنب له فقد وجد ارضنا طينية خصبة كجروفنا ليبذر فيها تقاوي التشرد. غير اننا استمتعنا و ربي بمبارات الدهنون صاحب القلب النقي ( بونتي ) من بره اسود ، و من جوة ابيض .
عارف يا دكين
الايام ديك كنت معدما لا املك التكتحني ، لكن و الله كنت بخت راسي في سرير بلاستيك بدون لحاف او مخدة او بطانية ، و ما لابس غير بنطلون جينز ( عبد الواحد ) و فنلة داخلية احيانا ، و انوووووووووم كنوم اهل الكهف .
النوم و راحة البال يا دكين ما عرفتها الا في محلتين هم الداخلية و تحت سماء القولد تحرسني نجومها و يؤنسي صوت ( قوقوقها ) اتعرف ما هو القوقوق يا دكين .
تعرف يا اخوي الواحد في الغربة دي لو راكب طيارة و ساكن في قصر ، برضو كانك بتاكل في كرتون و لا اسفنج ، لا طعم و لا نكهة ، في النهاية انت غريب مشرد لا وطن لك ، في النهاية ممكن يجي طفل و يقول ليك بكل بساطة ( يا غريب خليك اديب ) .
يا دكين الفقر علقم و خاصة بعد ما تتخرج من الجامعة ، و تشيل شهادتك و تجري وراء الوظايف و البنوك و الشركات ، و انت لا معين لك غير حق المواصلات ( الرجعة ) و كيس تمباك باقي من الامس و قد اختمر و طاب للسافين . بقيت شايل مسؤلية اخوات و اخوان عايزين ياخدو حظهم من التعليم ، و شايل هم اب موظف خلاص قرب ينزل للمعاش ، ليس امامك سوي ان تبحث عن فيزا يشتريها لك ابناء عمومتك ، لتغترب و تشيل احمالك .
ابدول الامرين احلاهما مر ، لا تقدر تعيش في وطنك فقير معدم مشرد لا وظيفة و لا حقوق و لا التراب اليملا خشمك ، و كمان ما تقدر تعيش مترف منعم في دارا ما هيلنا و ما ها هيلو .
كدة ووووووووووب و كدة وبين .
| |
|
|
|
|
|
|
|
|
|
Re: اها دي يحلوها كيف دي ؟؟؟ (Re: حمد فتح الرحمن)
|
Quote:
ياحمد
ترجع وين انتا اهبل ؟؟ |
عارف يا زول قعد افكر في كلامك دا من امس ،
كويس قلت ياخي الزول دا يمكن عندوا حق و مافي داعي للكلام الني دا ، يا زول ربنا مادام عوض فقرنا بتاع السودان داك و فتح علينا و الحال بقي مستور و الحمد لله ، رجعة شنو البتفكر فيها اسكت اقعد و اكل رزقك بي جنبة ، و قش خشمك و قول الحمد لله .
بعد شوية قمت بتصل علي واحد صاحبي معانا في نفس المنطقة و اكيد بتعرفوا كلكم ( بدري ) آآآآي بدر الواحد دا ( Badri ) ، اها بتونس مع الزول دا يمكن مسافة بتاعة ربع ساعة من خلال المحادثة عرفت انو يا داب راجع من الشغل للبيت بعد يوم عمل اكتر من 14 ساعة .
اثناء الونسة مع الزول دا حسيت انو ما طبيعي ، سالتو مالك ؟؟؟
ردي علي :
ياخي جوالي ما لاقيهو !!!!!!!!
شنو !!!!!؟؟؟؟؟؟؟؟
رد علي تاني بي اصرار :
الجوال الجوال ما عارف ختيتو وين ، يمكن نسيتو في الشغل و لا البقالة الغشيتا في الطريق .
يا زول قول بسم الله ، جوال شنو الراح منك ، و انت قاعد تتكلم معاي بي شنو ؟؟؟؟؟؟؟ يا زول انت فوتا و لا شنو ؟؟؟؟؟
عارف الزول دا صنا مسااااااااافة ، بعدين اتشهد ، قال لي يمين قدر المخ الفي خلاص راح .
الزول دا عمرو صغير و قلبو اخضر و لسع في ريعان شبابو ، و العشرة سنوات الاولي في الغربة بتاعة بني ضنقل ما كملا و خلاص مخوا بدا يتلحس .
جاي يا دكين تقول لي ماشي وين انتا اهبل ؟؟؟
امشي الحق بدري داك بدا دا تعال سبتني .
| |
|
|
|
|
|
|
|
|
|
Re: اها دي يحلوها كيف دي ؟؟؟ (Re: حمد فتح الرحمن)
|
حمد يا فقرى..زمان فى المدرسة كانوا بدرسونا حمد لبد حمد ولد العرب وكان ذلك ايام
الزمن السمح،ولكانهم يقرأون الغيب وكانهم كانوا يدرون ان حمد سوف يلبد فى الشرقية
من اجل لقيمات يقمن صلبه ويسدن عوز ويعدلن فاقة سببها..لا نملك الا ان نقول اللهم لاتواخذنا بما فعل السفهاء منا وفينا..... والغريبة انهم منا وفيناوبتنا نشكو الغربة
وظلم ذوى القربى ..وهو اوقع من الحسام المهند او كماقيل!!!
حمد السودان امره عجب وحاله قلب حول ..لابنفات ولا بنقعد..والغربة مرة والفقر فى الوطن غربة..اذن كيف تحل هذه المعادلة الصعبة؟؟ وهى لعبة شطرنج يا صديقى معقدة يظل اللاعب فيها حاضنا راسه بين كوعيه وهو يفكر فى منظر الجياد وخبب السنابك فى تلك الرقعة المقطعةباقدار الرجال والذين يزلهم انهم لم يولدون وفى افواههم معالق الذهب!!!متى يكون التراجع ومتى يكون التقدم والفرار قدر الجبناء..عليك ان تختار اكثر الميتتات شرفا حين يكون ليس من الموت بدا..اما بعد:
والنحويين يسمون اما بعد بفصل المقال..والله لا اعرف بعد اما بعد هذه ان اقول لك اقعد او ترجل فماذا زالت الرقعة تمور فى عينى مورا..لاتسمع نصائح دكين التافهات تلك ولا نصايحى الاتفه ولكن اعد البصر كرتين واجلس ثم قدر وفكر كيف تقدر ثم اقتل كيف تقدر ثم انظر ثم ابسر..... وانت فى نظرة ديكارت المتاملة تلك قل لنا ماذا نفعل كلنا.
لك ولبدرى العزيز تساليمى واشواقى ..دمتم..ياربى الكلام ده فيه جملة مفيدة ..مالو بقى يشبه لى كلام هناى داك...غريبة!!!!!!!!!!!!!!
| |
|
|
|
|
|
|
|
|
|
Re: اها دي يحلوها كيف دي ؟؟؟ (Re: حمد فتح الرحمن)
|
| Quote: يا زول قول بسم الله ، جوال شنو الراح منك ، و انت قاعد تتكلم معاي بي شنو ؟؟؟؟؟؟؟ يا زول انت فوتا و لا شنو ؟؟؟؟؟ |
ههاهاهاهاهاهاهاهاهايا
| Quote: اها بتونس مع الزول دا يمكن مسافة بتاعة ربع ساعة |
في ذمتك يا حمد ده زول تتكلم معاهو ربع ساعة
حمد اخوي
بدري ما استاندر .. ولايمكن القياس عليه..
بدري ود وجيه وبمشي البحرين اربعة خمسة مرات في اليوم..
زول بمشي البحرين اربعةخمسة مرات في اليوم بتفضل فيهو ذاكرة..
وسلم لي عليهو الود الحتة ده ..وقول ليهو ديكو قال ليك سوق براحة عامل وشك السمح ده ..انتا منك في نسخة واحدة فقط .
حمد اخوي
اسمع مني وانا اخوك
طالما رزقك هنا ماشي غير مقطوع فكن فيه ساعيا بالخير وبالمعروف..وادع الله يبارك لك فيه ..
رزقك ما تقطعو بيدك وتسعى اليه في مكان اخر..
الارزاق مقسومة مفصلة من لدن حكيم خبير .. وقد ساقه الله اليك في الشرقية حلال طيبا لا شبهة فيه..
اسمع من اخوك ياحمد ..
اخوك البحمل فسوك..
| |
|
|
|
|
|
|
|
|
|
Re: اها دي يحلوها كيف دي ؟؟؟ (Re: صديق الموج)
|
Quote: : اخوك البحمل فسوك..
|
كلام الحبوبات دا قلعتوا جبتوا من وين او سيل .
اوع يطقك سل بس .
Quote:
دكين يا ردىء انت كمبيوترك ده خاتيه فى ادبخانة؟؟؟ |
ودج الموج و الله غيرك مافي زول جابا ، دي في الشبكة عديل ، دكين دا ان ليمتد ، اتوقع منو حاجات اكعب من كده ، كويس لو وقف بي دي بس .
| |
|
|
|
|
|
|
|
| |
حمد فتح الرحمن
ودقاسم
صديق الموج
فيس بوك
تويتر
انستقرام
يوتيوب
بنتيريست