|
|
 انخفاض رهيب في اسعار اغلي السلع عالميا في السودان
|
هما سلعتان :
الانسان و الوقت اغلي سلعتين في الدنيا، و يا للمفارقة هما ارخص ما يباع و يشتري عندنا . فعبارة ( خلاص مرنا بكره ، و يجيك بكرة تقول ليهوا خلاص ياخي تعال لينا بعد بكرة ) أو ( و الله نسيت ، خلاص تعال لي في وكت تاني ) كل عبارات التسويف نجيدها ، لا احد يقدر قيمة الوقت ، فيمكن و بكل بساطة تواعد واحد و تشروا و تاني تواعدوا و برضوا تاني تشروا زي الما حصل حاجة ، لمن ابليس يخجل منك ، و برضوا الواحد ما يخجل من نفسوا ، و في النهاية لمن تمشي ليهوا في المواعد تصلوا متأخر ساعة و لا اتنين عادي ، مش كتر خيري المشيت ليهوا زاتو . كلنا يعلم قيمة الوقت لدي باقي الناس ( الدول المتغدمة ) ، فكل دقيقة و كل ثانية تعني زيادة في الإنتاج و العداد رامي طوالي ، و دخل الفرد زايد و بالتالي الدخل القومي ، و طبعا الحاجة دي كلها في النهاية تؤدي لرفاهية الإنسان و الحيوان و الشجر . نحنا عندنا العكس كل دقيقة تعني زيادة في الاستهلاك و الانفاق ، نستهلك كل شي ابتداءً من الكلام و السياسة و الموارد و المقدرات و المخصصات و الشوارع و الكهرباء ، يا خي استهلكنا أي شي لمن خلاص استهلكنا نفسنا زاتو ، و هسع ما فضل لينا حاجة تانية نستهلكا . حتي الباندوث بتاع المنتدي دا قاعدين نستهلكو في الفاضي ساكت . باختصار وكتنا كلو رايح في الفاضي . يعني بالخليجي ( ما عندا سالفة ) و بالسوداني ( ما عندنا موضوع ) و بي لغة العالم تجردنا من كل شي .
السلعة التانية الأرخص من الأولي هي الإنسان ، خلينا ما نقول حقوق الإنسان و حقوق الحريم و الرجال وحقوق البهايم و التنظير الفوقاني داك ، خلينا في ادني المستويات ، و أهم الحاجات الأساسية ، لا صحة ولا تعليم ولا بيئة و لا معاملة حسنة ، الإنسان في نفسو ما ليهوا قيمة ، عادي ممكن تأكل حق أخوك و تلعن ابوهو كمان ، تستغل أي شي و كل شي لتصل انت و بس ، تاكل العالم دي كلها و تلعن أبو أهلها ، مالوا ما حلال أكل البهايم ديل ، هو ديل يسوا شنو زاتو . مقابل اتنين ولا تلاتة مليون دولار ممكن تسمح بي دفن نفايات و استيراد فضلات ، ملعون ابو البيئة و صحة البيئة . مافي حاجة اسمها المصلحة العامة ، أو دي بلدي و ديل ناسي . كل شي انساني معروض للبيع ، الذمة و الاخلاق و الضمير كلها تباع و تشتري بارخص الاثمان ، و مرات بدون تمن عادي ممكن تتبرع لي قريبك بي ذمتك او تقايض ضميرك بي واسطة لي ولدك ولا اخوك .
المشكلة انو الأمور كدا ماشية من السيئ للأسوأ ، و كل يوم اطين من القبلو ، و ما عارفين حنصل لي وين في طريقنا دا ، و ما عارف يا ربي في أسوا من حالنادا راجينا، ولا كدا خلاص .
|
|
 
|
|
|
|
|
| العنوان |
الكاتب |
Date |
| انخفاض رهيب في اسعار اغلي السلع عالميا في السودان | حمد فتح الرحمن | 11-29-05, 03:36 AM |
 Re: انخفاض رهيب في اسعار اغلي السلع عالميا في السودان | عبدالرحمن الحلاوي | 11-29-05, 03:50 AM |
| Re: انخفاض رهيب في اسعار اغلي السلع عالميا في السودان | حمد فتح الرحمن | 11-29-05, 02:03 PM |
| Re: انخفاض رهيب في اسعار اغلي السلع عالميا في السودان | Badri | 11-29-05, 09:13 AM |
| Re: انخفاض رهيب في اسعار اغلي السلع عالميا في السودان | حمد فتح الرحمن | 11-29-05, 02:12 PM |
| Re: انخفاض رهيب في اسعار اغلي السلع عالميا في السودان | DKEEN | 11-29-05, 05:19 PM |
| Re: انخفاض رهيب في اسعار اغلي السلع عالميا في السودان | DKEEN | 11-29-05, 05:19 PM |
| Re: انخفاض رهيب في اسعار اغلي السلع عالميا في السودان | حمد فتح الرحمن | 11-30-05, 04:24 AM |
| Re: انخفاض رهيب في اسعار اغلي السلع عالميا في السودان | سامي عبد الوهاب إدريس | 11-30-05, 05:23 AM |
| Re: انخفاض رهيب في اسعار اغلي السلع عالميا في السودان | حمد فتح الرحمن | 11-30-05, 07:47 AM |
|
| |
حمد فتح الرحمن
فيس بوك
تويتر
انستقرام
يوتيوب
بنتيريست