|
بيت البرالمة ابقوا تعالوا
|
مرحبا بكل الزملاء والزميلات اللذين انضموا الى المنبر العام اخيرا فكانوا اضافة مقدرة فى تحريك بعض السكون الذى لازم البورد منذ فترة وتمنياتى لهم ان ينداحوا ويجددوا دماء المنبر العام فأهلن بكم . وتعودت ان اعيد بعض الجمل التى اكتسبتها خبرة فى المنبر العام كلما اطلت كوكبة تزين جيده ولتعتبروها نصائح مجرب ... * لا تتعجل الردود عند كتابة أول بوست وان شاهدت عضو جديد تتنزل الردود على البوست الذى كتبه فأعلم ان هذا العضو ربما كان له معارف وما اكثر دوران بوستات الشللية وحتى اعطيكم تجربتى تعالوا معى نستقطع هذا الجزء من بوست يوميات سيد جرسة وعبره ستجدون الكثير من النصائح
http:// يوميات سيد جرسة (3)
Quote: سيد جرسة والهترشة الرمضانية تقوده الى الحديث المنبر العام الكان زمان خاص ولكن فى ظل العولمة التى اصابته تغير الى مسمى العام وانا بس داير اعرف امين المنبر العام العضو بكرى ابوبكرى غير الاسم ده ليه والله اقول ليكم الكلام ده الظاهر بجيب الهوى واسالوا العضوية التى ما زالت متمسكة بعدم الرجوع وعلى فكرة المنبر العام اصبح يتكون من ثلاثة طوائف الاولى وهم اهل البيت وديل الواحد فيهم بنزل البوستات وكل الدايره استمرارية المنبر بالرغم بعض البوستات بتكون محتاجة الى فاتحة علشان تترفع وأهل البيت متوافقون مع سلحافية المنبر فى بعض الاحيان كماانهم لهم المقدرة على ركوب الامجاد البوستية فى حالة حركة دوران المنبر السريعة والناس ديل اغلبيتهم فى الشتات ومحتاجين الى اللمة بسبب البعاد وانا عارف فى مجموعة منهم ما عندم غير الدوام والمنبر السريرى واضيف اليهم كل منبرتيه الداخل او الناس الدخلوا المنبر من السودان عن طريق بركات العم بل صاحب شركة مايكرسوقت التى منحتنا الانترنت وبقول ليه بلغة اهلنا فى السودان ايام المجاعة ربنا يديك حجة يا حاج بل بورداب السودان لولا المنبر لكانوا طرشقوا من عدم التنفيس وانته عارفين الحاصل والماشفه سمع ربنا يسترنا... والعجيبة بعد ده كله ينزل بوست يقول ما دايرين الملثمين فى المنبر وديل كلامهم زين لكن البحرق كلام تانى بقول ما دايرين الظلاميين فى المنبر المهم يا ناس عمنا بكرى ابوبكرى وطبعا عمنا ده لزوم التكبير والاحترام وصح يستاهله غايتوا عن نغسى انا من اهل الداخل وكمان من مجموعة النيجا الملثميناستفدنا من المنبر كتير وبعمل مع المنبر بسياسة العندى انا بدى وحق الناس بزيده لو فى شىء . نرجع الى الطائفة الثانية وهى أهل المشورة والدعوات والتبريكات بمعنى انو الواحد لو جابوا ليه طفل تلقاه منزل بوست علشان يعزل ليه اسم يعنى المنبر العام اصبح مرتبط بدايات امدرمان للناس التحت لكن الدايات حسه بقت رهابات عديل فى ناس الواحد يلدو ليه طقل يكلف 2 مليون جنيه فى الجناح الخاص وطعاالجنى الذى ده اكيد بمشى حضانة خاصة وتعليم خاص وقدامه حاجتين يا شهادة عربية او مأمون حميده والاهلية وفى قول اخر مجوهة البرير للتقانةوكمان لكل قاعدة شواذ ..انا عارف فى جماعة معانا فى المنبر ده ناس حبل عديل لكن برضو فى النهاية ولادة ونرجع الى بوستات المشورة وده الزول يكتب فيها عن كيف السفر الى امريكا وعلشان ما تقولى انا بخرف والله انا ذاتى اتذكر يوم كنت برلوم منبرى كتبت بوست عن المشورة لزوم السفر لكن كل زول عامل اضان الحامل طرشه وللناس الماعرفين المثل ده بشرحه وبفول اصلو قالوا الحامل لمن تجىء لحظات الولاده وعسرته تحلف تقول تانى ما تلد لكن يمر الزمن وهاك يا حمل وده المعنى بمفهوم سيد جرسة الذى جعل منه رمضان مصلح اجتماعى . نجىء للطائفة الثالثة ديل ناس من دقنه وفتله يعنى الواحد تلقاه دخل المنبر وبدل ما يفتش فى المواضيع تلقاه يفتش للاسماء واول ما يلقى زيد او زيدة كاتبه بوست على طول تلقاه لو حتى الكلام ما عجبه يمسك الكى بورد ويكتب لقدام UP بعنى المقصود زوله بزوله وعلى فكرة الطائفة البتعمل كده تعتبر من ضمن موسوعة جنون المنبر التى تعصف به احياناواخرون مصابون بداء انفولنزا المنبر وده اعراضه العضو تلقاه فاتح نيران وقبال ما يقرأ البوست تلقاه ولع لو قلته ليه ده تور يقول ليك احلبه ولو قلته ليه ده مجرد اجتهاد بقول ليك شوف يا زول دخول الحمام ما ذى خروجه ..... بصراحة المنبر العام برغم هذه الاختلافات جميل وحلو وروضة تجمع كل الشتات ولو قالوا لى شبه حاجة بقول هو يمكن ان يكون الحلم الذى نحلم به وهو السودان الجديد نواصل تحياتى |
وفى نهاية البوست برضو بقول أهم امرا بعد الانضمام هو ................... تذكر ان المنبر العام به العديدمن القراء فكم هم تواقؤون الى الجديد من البوستات المعبرة التى تعكس السودان فى أجمل وجه تحياتى
|
|
|
|
|
|
|
العنوان |
الكاتب |
Date |
بيت البرالمة ابقوا تعالوا | بلدى يا حبوب | 11-14-05, 11:05 AM |
Re: بيت البرالمة ابقوا تعالوا | عادل فضل المولى | 11-14-05, 11:31 AM |
Re: بيت البرالمة ابقوا تعالوا | ناصر محمد خليل | 11-14-05, 12:29 PM |
Re: بيت البرالمة ابقوا تعالوا | بلدى يا حبوب | 11-15-05, 08:49 AM |
Re: بيت البرالمة ابقوا تعالوا | بلدى يا حبوب | 11-15-05, 08:58 AM |
Re: بيت البرالمة ابقوا تعالوا | بلدى يا حبوب | 11-15-05, 08:58 AM |
Re: بيت البرالمة ابقوا تعالوا | بلدى يا حبوب | 11-15-05, 09:01 AM |
Re: بيت البرالمة ابقوا تعالوا | بلدى يا حبوب | 11-15-05, 09:06 AM |
Re: بيت البرالمة ابقوا تعالوا | سعيد شمت | 11-15-05, 09:11 AM |
Re: بيت البرالمة ابقوا تعالوا | بلدى يا حبوب | 11-15-05, 09:12 AM |
Re: بيت البرالمة ابقوا تعالوا | بلدى يا حبوب | 11-15-05, 09:17 AM |
Re: بيت البرالمة ابقوا تعالوا | عبد الله عقيد | 11-15-05, 09:31 AM |
Re: بيت البرالمة ابقوا تعالوا | بلدى يا حبوب | 11-15-05, 09:42 AM |
|
|
|