|
آآآآآبرى .. ابيض واحمر ...ورقاق
|
ايييييييييييييك الايام ده ماتجى قاطع بى شارع من شوارع الخرطوم اكان عندك نزله السنيين ونخرينك مايشمو القدحه دى تشم ريحة الآبرى .. آبرى كميات وفى جميع انحاء العاصمه القومية خاصة الاطراف (ناس انحنا ) طبعا ماقصدى ال..... الناس البشتروا اشترا ولا الناس البرسلوليهم من الولايات بالكراتين .. ؟ عوووووووووووووك رمضان كبس والله النسوان ديل كان رمضان مافى السنه قالو هم يجيبوه عليهن جنس شفقه .. اها انا قمت مشيت بيتنا فى عطله بتاعة يومين كدى وناسى ليك الموضوع بتاع الهناى دى لقيت ليك الحاجه زعلانه وقال شنو نحن لى هسع ماعسنا الآبرى وهى مدينه الحله كلها عواسة عاست مع حنان جارتنا جردلين ومع ناس دار السلام الحله ام قلب ومع ناس عيييييييييك اازول كمية ، قلت ليها ياامى هسع رمضان وينو عليك النبى آآآزول صرت وشيها وحلفت بى جدى المابتحلف بيه ساكت علا بكره دى تسوى العواسة بتاعتنا .. ؟ اها انا طبعا الفار لعب فى راسى وفى جيبى وعاوز انط وكده وقلت ليها والله ياحاجه انا ذاتى مسافر بكره وكده لانوا الاجازه قصيره والمهم طبعا انا خايف من موضوع الدفع لاحول لله حالتو العيش مشترنو من بدرى ومزرعنوا فى الزقاق اها هاك ياصرف عاوزين حاجات العواصة البهارات وحق الشنو والشنو والشنو لمان قلت الروب .. قلت ليها ياحاجه كدى عليك النبى التانكى دى عيبى لى مالو ماسمح بالحيل وقالوا ذاتو الابرى بقو يبيعوا والله ياحاجه ... نطت من العنقريب وقالت لى سجمى ياولدى مالك داير تشيل حسنا مع الجيران داير ناس بخيته يقولوا بت الناظر اشترت الابرى (مخيّّييير الله يابنات امى ) العبدلله دنقر وصنقع ومرق البنكنوت وكده ، وحق الفطور لى النسوان والسكر والبن لى جبنة العواسة وحق الدقيق للرقاق والذى منوا وطلعت مواضع تانيه (الشرموط .. والويكه لى هسع ما نشفتا والسكر بتاع المويات وعيييييييييييييييييك . المهم قالت هى الدور دا عايزه تعوس آبرى كتييير لانو بترسل لى بناتا فى الخرتوم ودة ذاتا فرصه تشيلوا معاك صروا لى الزريعة ( والله اكان شفتوها هيييييييع زريعة النسوان لى حدهن ) وجبت الكاروا ووديتا ليكم الطاحونه .. طاحونه عباس من الله خلقا فى رمضان بيقيفوا ليها بالصف .. المهم لى المغرب كده حتى الدور جانى فى الدقيق ؟؟؟
( اها كدى النشرب لى مويه واجيكم .. ما زكرتونا رمضان )
|
|
|
|
|
|
|
العنوان |
الكاتب |
Date |
آآآآآبرى .. ابيض واحمر ...ورقاق | اسلام عبد الرحمن عمر | 09-10-05, 10:57 AM |
Re: آآآآآبرى .. ابيض واحمر ...ورقاق | اسلام عبد الرحمن عمر | 09-10-05, 11:41 AM |
Re: آآآآآبرى .. ابيض واحمر ...ورقاق | اسلام عبد الرحمن عمر | 09-10-05, 12:10 PM |
Re: آآآآآبرى .. ابيض واحمر ...ورقاق | nada ali | 09-10-05, 12:18 PM |
Re: آآآآآبرى .. ابيض واحمر ...ورقاق | اسلام عبد الرحمن عمر | 09-11-05, 00:49 AM |
Re: آآآآآبرى .. ابيض واحمر ...ورقاق | اسلام عبد الرحمن عمر | 09-11-05, 02:02 AM |
Re: آآآآآبرى .. ابيض واحمر ...ورقاق | اسلام عبد الرحمن عمر | 09-12-05, 02:13 AM |
Re: آآآآآبرى .. ابيض واحمر ...ورقاق | nada ali | 09-13-05, 00:54 AM |
Re: آآآآآبرى .. ابيض واحمر ...ورقاق | اسلام عبد الرحمن عمر | 09-13-05, 01:11 AM |
Re: آآآآآبرى .. ابيض واحمر ...ورقاق | almohndis | 09-13-05, 01:32 AM |
Re: آآآآآبرى .. ابيض واحمر ...ورقاق | اسلام عبد الرحمن عمر | 09-13-05, 08:57 AM |
Re: آآآآآبرى .. ابيض واحمر ...ورقاق | اسلام عبد الرحمن عمر | 09-13-05, 09:33 AM |
|
|
|