|
|
 قال : ( أنا كُنت نَاوي الحَج لكن قَبضوني )
|
قال : ( أنا كُنت نَاوي الحَج لكن قَبضوني )
مُقدِم البرنامَج : مولانا معانا خط .. ألو .. ألو
مُقدِم البرنامَج : ألو ... ألو
المواطن : السلام عليكم .
مُقدِم البرنامَج : وعليكم السلام ورحمة الله .. قول إسمَك ووَطي التلفزيون .
المواطن : أنا عبدالرحمن عبدالجليل مختار من قِريحتي رَاحت .
مُقدِم البرنامَج : طيب يا عبدالرحمن وطي التلفزيون .
المواطن : التلفزيون ما بتاعِي . أنا ضيف ساكِت .
مُقدِم البرنامَج : طيب كلمُن يوطوهو ليك .
المواطن : هُم مافيشين .
مُقدِم البرنامَج : طيب ما توطيهو إنتَ !.
المواطن : الناس ديل بتاعين مَشاكِل .
مُقدِم البرنامَج : إنتَ بتتكلم من شِنو ؟
المواطن : من الموبايل .
مُقدِم البرنامَج : طيب ما تسيب الأوضة واطلع برة وكلمنا .
المواطن : أنا قاعد في السَهلة .
مُقدِم البرنامَج : … طيب .. أمشي بعيد وأرفع صوتك وقول سؤالَك .
المواطن : أنا داير أكلم مولانا مُمكن تد يني فُرصة ؟
مُقدِم البرنامِج : أتفضل .
المواطن : مولانا أنا كٌنت ناوي الحج . وصلت السعودية أصلو للعُمرة ، وصبرتَ كتير أدور لَي شُغُل و ما لقيت ، لحَدي ما دخل شهر الحج ، وقلتَ أحِج . ويوم ( 8 ) في الشهر الشرطة السعودية قبضتني ، أها يا مولانا وَضعِي كيف ؟
مولانا : اللللللللللللللللله … إنتَ أحْرمتَ وبعدين قبضوك ؟
المواطن : أيوة
مولانا : إنتَ مُتمتِع ؟
المواطن : مُتمتِع يعني شنو ؟
مولانا : إنت داير تحج وما عارف مُتمَتِع يعني شنو ؟
المواطن : لأ ....عارِف لكن قلتَ أتأكد .
مولانا : إنت مُقْرِِن ؟
المواطن : لأ.. يا مولانا ما تصعِّب الموضوع . السودان كُلو قاعد يسمع وكمان المغتربين ، سُمعتي بِتبُوظ .
مولانا : دحين إنتَ ما عِندك غير النية… ، و لا شِنُو ؟
المواطن : شِنُو !
مولانا : شِنُو.. ! يعني سويت نُسُكك من طواف …؟
المواطن : لأ .
مولانا : طيب ما ياهُو كلامنا !. أنتَ زول نية بَس .
المواطن : لكن أنا مُحرِم !
مولانا : في النهاية إنتَ عِندك النية . ربنا قال إنما الأعمال بالنيات . ربنا بإذنه تعالى يديك أجر النية ، والسنة الجاية إن شاء الله تسوي أوراقك كاملة . وتَجي في النُور ، وتحج . بدل ما تخُت إيدَك في قلبك ، ياربي ممكن يقبضوني في الحَرم ، يقبضوني في الطريق ، يقبضوني جَنب الحمامات . الحج مع الخوف بِزعزع العِبادة .
المواطن : مولانا عندي سؤال تاني .
مولانا : أتفضل
المواطن : الناس المغتربين البِطولوا من نُسوانُم تسعة سنين وضعهم كيف ؟
مولانا : الواحِد البتزَوج دة ما عارِف إنو زوجتو دي عندها حقوق وواجبات. ولا الواحِد فيكُم ياخُد بنات الناس ساكِت وينطَلِق ؟
المواطن : عارِف .
مولانا : بَس من ديك وعِيك .
المواطن : والله ما صاح .
مولانا : طيب أنتَ وَكِت عارف الكلام دة ما صاح ما تكَلِم السألك دة.
المواطن : أنا كلامي ما بِسمعوهو ، لكن إنتَ طبعاً مولانا . أنا زي ما قلت ليك من ناس قِريحتي راحت .
مولانا : الواحِد المفروض يرجَع بَلَدو إن شاء الله ولو زيارة خمستاشر يوم ، على الأقل يتونَس مع مرتو ويشوف وليداتو . كان الموضوع صعب يرجع بلدو يشتغل .
المواطن : لكن السودان ما فيهو شُغل .
مولانا : الواحِد يتوكَل . وربنا قال البِتوكَل ربنا بِرزقو . دحين كلامي دة ما ياهو ؟
المواطن : يا هو يا مولانا .
مولانا : الواحِد لو ما لقى شُغل إنشاء الله ياكُلها كِسرة بى موية . ولو الكِسرة غالية ياكُل أي حاجة بى موية .
عبدالله الشقليني
15/4/2005 م
|
|
 
|
|
|
|
|
| |
عبدالله الشقليني
فيس بوك
تويتر
انستقرام
يوتيوب
بنتيريست