ما هو معروف ان الاستاذ محمود محمد طه كان لا يصلي الصلاة المفروضة علينا جميعا ولم يصطف مع الناس في صلاة جماعة اماماً او مأموماً ولم يحضر صلاة جمعة خطيباً او مصلياً كان له صلاة اصالة هل هذا الوضوء لصلاة الاصالة ايضا هل وضح الشيخ صلاة الاصالة وسردها كما سرد الوضوء عشان نحن كمان نصلي مثله صلاة الاصالة
الأخ حمزاوي.سلام عليكم.. هسه الكلام المنشور دا عن الوضوء، ما وريتنا رايك فيهو شنو؟ هل وجدت فيه شى جديد مشجع على إتقان الوضوء.وإنت راجل صادق مع نفسك ومع القراء والصدق دين.. هل كنت قاعد تعمل كدة في التجهيز أو الإستنجاء أو غيرو مما هو مذكور هنا..هل ممكن تجيب لينا صيغة واشياء زي دي عن الوضوء من العلماء البي تعرفن عشان تكون جبتا لينا صيغة تانية كمان كدة وشرح يساهم في إتقان الوضوء.. كدي بصورة خاصة ومؤكدة أنا أطلب منك تجيب هنا واحدة صيغة كدة هنا عشان تتضافر الجهود وكلنا نستفيد منها لأنو إتقان الوضوء ما ليهو نهاية.. ما وريتنا رايك شنو في الكلام القالو دا الأستاذ محمودمحمدطه عن الوضوء بعدين بي نمشى لى موضوع صلاة الأصالة دي شرحو هين.بس المعارضين عملو عليهو راو.ساكت وضللوا العامة بي أشياء ماها حاصلة.. ثانياً.. أنت قلتا الأستاذ ماهو معروف عنو إنو ما صلى مأموما أو إماماً..ولم يحضر صلاة جمعة خطيباًأو مصلياً..بإختصار كل هذا الكلام كذب منك وممن تسمع عنهم.الأستاذ صلى صلاة جماعة وصلى مأموما وصلى إماماً وقام خطيباً وصلى صلاة جمعة والله على ما أقول شهيد.. وإذا ما مصدقنى أسأل ناس رفاعة.. أمال مين الخطب في الناس بعد صلاة الجمعة في جامع رفاعة ليحرض الناس على الإنجليز لما إعتقلوا المرأة التي خفضت بنتها خفاض فرعوني لا تعاطفاً مع عادة الخفاض السيئة ولكن يريد أن يفهم الإنجليز إنو العادات السيئة لاتحارب بالقهر وإنما بالتربية وهي منهاج الأستاذ الى أن ذهب الى ربه.التربية أولاً.. التربية ثانياً التربية ثالثاً..ثم برضو هو عايز يلهب حماس الشعب عشان يكسر الصلف وحاجز الصمت المضروب على الإنجليز وكسر حاجز الخوف ويلهب الروح الوطنية في الشعب حتي تتضافر الجهود في يوم ما وتصب هذه الإسهامات في المجمع الأساسي ويحصل الإستقلال..هذه الحادثة يعرفها كل أهل رفاعة ومدونة في تاريخ السودان.. إنو يوم الجمعة وبعد الصلاة قام المهندس محمود محمد طه وخطب في الناس وخرجوا بعدها الناس في مظاهرات وبعدين بعدها حطموا السجن واخرجوا الفتاة، قصة طويلة يا حمزاوي... يعني تفتكر يكون خلاهن صلوا وجاء داخل عليهن في الجامع يعني والله شنو رايك؟ ... قلتا عشان كمان نحن نصلي زيو صلاة الأصالة.. يعني إنتا عايز تصلى صلاة الأصالة زيو طوالى كدة.مقتنع بيها والله ساكت مجرد كلام..وماذا تعني بصلاة الأصالة.. يا سيدي صلاة الأصالة بإختصار شديد هي أن تجد أصالتك الخاصة بيك من داخل صلاتك نفسها..أمال حكاية تجويد الوضوء بالصورة دي وغيرو وغيرو دا ما كلو عشان يخليك تحضر وتكون ليك نكهتك الخاصة بيك..واصالتك داخل صلاتك المابيشبك فيها زول في الظاهر هي صلاة بحركاتها في الباطن هي حالتك الفردية مع الله..يعني نسبة الحضور البي تحضرا مع الله في الصلاة دي ما بيشبهك فيها زول حسب تجوديك وحسب توحيدك.نسبة مئوية من الحضور يختلف فيها حمزاوي عن زيد عن عبيد حسب التحقيق وقربك من الله.. مافي حاجة إسمها صلاة الأصالة عندها وضوء خاص والصلاة العادية عندها وضوء خاص.دا كلام هراء ومضلل وينضح بسوء النية والغرض وبغيض. الأستاذ محمود يتوضأ بهذا الوضوء الى أن التحق بربه، وقد ظل طول الليل يتوضأ بهذه الكيفية في لحظاته الأخيرة. وآخر وضوء له عندما ذهب لحبل المشنقة ظلماً.. أنا متابع عزيزى حمزاوي حواراتك مع ياسر وحيدر ومحمد عثمان ومريم وغيرهم.. وأعرف من اي نقطة بدأت وعند اي نقطة انتهيت. يعني موش بديت معاك هنا من أول وجديد. وعليه دا شي اسهمت به أنا هنا ونظري على المصلحة العامة والقراء.. وإذا عاوز زيادة طبعاً كتب الفكرة موجودة في موقعها.. مع فايق شكري وتقديري بأنك دايماً تفتح لنا باب هام يساعد في إلمام القراء الكرام بتفاصيل الفكرة الجمهورية فكرة السلام.. فكرة الإسماح..فكرة إن شئت فلتؤمن، وإن شئت فلتكفر..فكرة ضد الإرهاب والقهر ونابئ القول والفعل والعمل والخاطر حتي.فكرة ضد الجهل والتقوقع والتخلف والتسلط.. آمل أن يكون في هذا التبسيط فائدة لك.ختاماً شكري ومحبتي..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة