|
Re: يبدو انني من اهل الكهف والرقيم؟؟؟ (Re: nazar hussien)
|
Quote: جروح الشـوق تضج لي كل رفـاق الخيمة شدو وكربتـو وعـدمـت سمانـا الغيمـة مناي مولاي يتم نِعمـو ويزيـل الضيمـة يجمع شملـي بالرفـقـة البليغـة حكيمة |
أصحو يا أهل الخيمة.. البقت كهف ورقيم خلوها تنقلب جنة ونعيم..
عزة قومي كفاك نومك ما كفانا دلال يومك إني يا (النوموك) البنات فاتوك بالقطار.. الطار
عزة شوفي بنات قومك سبقوك على كومك بت رجال ولدوك للقبيلة هدوك إنتي عز.. وفخار
| |
|
|
|
|
|
|
Re: يبدو انني من اهل الكهف والرقيم؟؟؟ (Re: nazar hussien)
|
اما تماضر ففوق صنقورنا كلنا
================================================================
فيك نظرنا مناظر يعلم الفتاح لو قفلنا قلوبنا كان لهن مفتاح أدري لو ما أدري صرت كالملتاح لو رضاك هلاكي انا للهلاك أرتاح
ومسّو نوركم وشوفو عمكم سيد عبدالعزيز
| |
|
|
|
|
|
|
Re: يبدو انني من اهل الكهف والرقيم؟؟؟ (Re: Shinteer)
|
Quote: يا سلام يا ناس الزمن السمح. |
الصديق ود شنتير...شيخ العرب....حبابك...أأأأ اب توب سماحة هلا هلا...او ربما هي هلّ هلّ...واظن اهلنا بقولوها عندما يتذكرون امرا عزيزا عليهم...او ذكري عطره....فماذا عساني قائل وشيخنا ود شنتير بي جلالة قدرو قد دخل المحاص...فحبابك ألاف...ورمضان كريم....كان في اليابان في شمسا بتصوّم...
ان جيتنا تاني ...عليك رسولك كان ما جدعت لنا هنا...من الصادق ود أمنة تمرة تمرتين...
| |
|
|
|
|
|
|
Re: يبدو انني من اهل الكهف والرقيم؟؟؟ (Re: nazar hussien)
|
صاحب الكهف نزار حسين ورواد الكهف.. كلكم كل عام وأنتم بخير رمضان- والعيد
ود شنتير.. يا خوي صبرنا كِمل وانت غيبتك طالت وجيتك بقت طلة وترجع للنوم في كهفك.. زمان ياخوي بنتاوق ليك من برة لي برة.. وما بنقدر نناضمك دحين وكت دخلنا الحوش وطلبناك كمين مرة.. وماك داير تطربنا بغنا اهلنا واهلك العارفنو داك.. الحكاية بيبقى فيها حلف.. نحلف عليك!!؟ ولا بتجي بي أخوي واخوك.. ؟ في رجاك يا شيخ العرب.
نزار الدوبيت باقيلك بيحرم!!؟ كدي نستفتي ود شنتير
| |
|
|
|
|
|
|
Re: يبدو انني من اهل الكهف والرقيم؟؟؟ (Re: عبد الله عقيد)
|
أهل الكهف والرقيم. أنا أدمنت الكهف واتوسّدت ذراعي الكلب. ولو الكلب ده ما أداني عقرة في صنقوري ده ماني مارق.
اللهم أنفعنا بجاه الصادق ود آمنة وبجاه السابقين واللاحقين من مِلّته.
فتوى: الدوبيت مفيد للصيام. هذه الفتوى لا تنطبق على من يعترض عليها، وكل من شكّ في مصدرها فهو في حلٍّ عنها ومنها. أرأيت سماحةً كهذه يا ساكن الكهف؟. ===
مالاّ تْكِبِّس الساحة وْبِسيلو مَلامة أخير الخَتْرة يا البَيرَق دَرَكّا سَلامة سَوق أم قُجّة مو هَرَفي وْكِضِب خَشّامة أنا يا الوَزْنة يوم ضَرْب السُّلاح في الهامة == لا مهرب من ود عبشبيش، يعتّر لينا محل ما قبّلنا، حتى جوة الكهف.
مولانا ود آمنة له علينا حقوق وواجبات، عليه الرحمة ورضي الله عنه رضاياً يكيل ويدفّق.
البارح سِمِعْتْ ساجْع القَماري النوَّح اتذكَّرْتْ زمن جهَلي وشبابي الروَّح بِقْيَن دورة ستّاتي العطارْهِن فوَّح لِقن أيامي وأيامهِن مَطَرْهِن شوَّح
أسمحوا لنا بالرجوع إلى الكهف. أها الفاتحة.
| |
|
|
|
|
|
|
Re: يبدو انني من اهل الكهف والرقيم؟؟؟ (Re: Shinteer)
|
البارح سِمِعْتْ ساجْع القَماري النوَّح اتذكَّرْتْ زمن جهَلي وشبابي الروَّح بِقْيَن دورة ستّاتي العطارْهِن فوَّح لِقن أيامي وأيامهِن مَطَرْهِن شوَّح
يا شيخنا التاء في سمع واتذكر دحين في ليها لزوم غايتو براي كدي ابن تب يجن معاي....
لتيب خشم الدرو الكبد البقونة بساقي في ناموسو فوق ساجا كبير متّاقي ديفة الفي اللتيمة مقمّحة البنداقي في سهمين عوالي وجرسة منو فراقي
الحار دلو
شيخ العرب الكهف كهفك...وكلبا بيعض ما فيه
| |
|
|
|
|
|
|
Re: يبدو انني من اهل الكهف والرقيم؟؟؟ (Re: nazar hussien)
|
التاء يا نزار في ليها لزوم. تكتب ولا تنطق وعشان كده ختّينا ليها سكون والحرف القبلها برضو عليه سكون. لو شلنا التاء مرة واحدة يمكن يجي زول يقول دي أفعال مجردة عادية ولا تعني المتكلم في شيء. طيب المعنى ما راح هنا؟. انت قايل الناس كلها بترطن زيك؟. أسلم طريقة هي ان تسكِّن التاء وتسكِّن الحرف الـ قبلها .. وبكده الداير ينطق التاء الينطقها بس بشرط ما يتجاهل التسكين الفوق راسها والتسكين القبلها مباشرة.
إلى الكهف
| |
|
|
|
|
|
|
Re: يبدو انني من اهل الكهف والرقيم؟؟؟ (Re: Shinteer)
|
انت عارف يا شيخنا ود شنتير...انا فصدت التعليق لأنها افتكر مسألة تحتاج لوقفة...وهي أفصح من الفصيح علي فكرة...ويا ريتك...تضيء للناس المستكفهين معانا والبعاينو من صنقور الكهف...هذه الادغامات...البي غنّتها وغناها...
انا شخصيا أعترف تماما...انك ...اشيخ من يتولي سجادة...شيوخنا ود عبعشيش...والصادقين وود دوقة وود شوراني...
مسعلتك فيها فطرة ومعرفة ...ومعايشة...بين...المدينة وألبل...وبين ناطحات السحاب...والخيّم...
فأنت قطعا...افقه من يحدثنا...وعليك الله...الهتش الفي رأسك دا كله أبهلو لينا هنا ان شاء الله الكهف دا...يطق..
ورطانتنا هنا صدقني هي ما تبقي لي ...ولك...وللكلام المعافي
| |
|
|
|
|
|
|
Re: يبدو انني من اهل الكهف والرقيم؟؟؟ (Re: Shinteer)
|
رمضان كريم يا أهل الكهف و الرقيم نزار ، بتذكرك ..أنا و القماري مع العصاري و يا شنتير أخوي كلامك مـميز بالحيل لـكـن ..
Quote: وبكده الداير ينطق التاء الينطقها بس بشرط ما يتجاهل التسكين الفوق راسها والتسكين القبلها مباشرة. |
ان بقى القاريء لتلك التاء نطقها و حافظ على وزن البيت (يبقى قابلني) .. أنت تضع ما يشبه القوانين لقراء عزف أكثرهم عن هذا الفن النادر ، الله يخليك ، أعملها قوانين صعبة ما فيها BREAK زي لو عاوز ينطق التاء الينطقها............خليهم يجتهدوا في الدارجة السمحة دي أكان (يندرجوا) في (الطريق) دة ..
| |
|
|
|
|
|
|
Re: يبدو انني من اهل الكهف والرقيم؟؟؟ (Re: الطيب بشير)
|
الله أكرم يا...ابو البشير...والله ذاكرنك بالحيل....
ايها الرجل النقي...
الصديق ود شنتير يا الطيب....رجل مطرطش بلحيل...ولابد ان يبهل طرطشته هذي هنا...دحين ساعدنا...بالطلة...كل ما اسعفتك الظروف...واجدع معانا كم رمية...
أتفق معاك ...في ان الناس لابد ان تعرف الدرب من تجرو
عليكم الله بس كدي أتفرجو في اللوحة دي ...وبجيكم ليها صاد عقبان:
عقبن ود دعول بجرن شفاقة عدال ختمن مقرح الحربة الجبالا طوال قلت امات قرود وردنّو بي القبّال خلقن كيف برمّولهن دمير حبّـــال
| |
|
|
|
|
|
|
Re: يبدو انني من اهل الكهف والرقيم؟؟؟ (Re: nazar hussien)
|
ديل الديمة من رد الانيس ناجعات وكل حين فوق عليون نابي منجمعات تيسن دوّر الوادي الورا(ي) القلعات ضمّر خلقه مو من قل معاش ضايعات
ديل ناس ناعومي كامبل زااااتن.....شبعانات ورويانات ورقااااااااق زي السوط.....تقول لي ما كانو بعرفو مقاييس الجمال...
| |
|
|
|
|
|
|
Re: يبدو انني من اهل الكهف والرقيم؟؟؟ (Re: nazar hussien)
|
يعني يا الطيب السكونين لمّن يجوا ورا بعض ما في زول بيقدر ينطقهن؟. غايتو لو أي زول قدِر ينطق التاء ساكنة والحرف القبلها ساكن .. الوزن ما بيختل البتة. لكن لو في مشكلة في نطق السكونين ديل .. هنا حل ما عندنا تب.
نزار الدين بن الحسين. لوحتك سمحة والله. قِلت أمات قرود وردنّو بالقُبال خِلَقاً كيف برَمّولهِن دمير حبّال
البيتين ديل بالذات بيرجّعني لأيام الروضة. خِلقاً كيف برمّولهن دمير حبّال!!! بالله شوف الكلام ده ومفرداتو الساحرة دي. خلقاً كيف برمولهن دمير حبال .... الله يطرا أيام الروضة بالخير.
| |
|
|
|
|
|
|
Re: يبدو انني من اهل الكهف والرقيم؟؟؟ (Re: Shinteer)
|
عليك الله يا شنتير شوف قدرة ود اب نادم ده وفعايلو
هسع ان قالو لي فان جوخ أرسم...مش حا يرسم ويمحي لي الصباح...وكان سخيت لنا انت آ المسيخيت سوف تشرح لنا حتي يؤذن المنادي.
جاهن منقلب وقتا عصير وشفاف وكاسب ليله بيهن من صدف ما بخاف ديل الطبعهن دايم الأبد عيّاف وفي نايط السروج لقين بقيلن جاف
| |
|
|
|
|
|
|
Re: يبدو انني من اهل الكهف والرقيم؟؟؟ (Re: عبد الله عقيد)
|
يا شيخنا ود عقيد....يا راجل....انت سيد الكلام كلّه....النضم بعدك بيحرن... تقول بتخرب الكلام...؟؟ الكهف كهفكم تمدد فيه ما شئت...وقل ما تشاء...فكل قولك درر...
لأننا نقتات بالاشعار في عالم التروس والأقمار أحببت فيك نهرنا الوديع وحقلنا الذي يصفر في الربيع
أظنه الجيلي ومن غيره يعشق تلك التي كانت قرية
| |
|
|
|
|
|
|
Re: يبدو انني من اهل الكهف والرقيم؟؟؟ (Re: الطيب بشير)
|
جاتك أماني تسأل يا نزار الغالي من يوم مرقتك درت الكلام و أبالي و اليابانا غيرك بيهو ما بنبالي إلا الليلة بركة الجيت و سريت بالي يا ود بشير
الكلام عندك حروفو محاية نتبخربو,توب العافية نلفا حفايا بت ابواتك السمحين ركيزة تاية كان يختاها هي وامثالها منبركم رقد حاحاية
ما بياباك الا عدو وحسود أخوانو والله سفيه مغفّل فاضي تب صيوانو
الزيك ود بشير ما بنقفل ديوانو وبالك منشرح زي كسري في ايوانو
| |
|
|
|
|
|
|
|