|
Re: ده البحبو فى السودان (Re: Khalid Osman Jaafar)
|
سلام... ولو العاجبني ببدأ بحاجه فيها شئ من المظاهر السلبيه...لكن هي لمة الشباب جنب دكان الحله أو عامود النور أو أحد اللساتك أو المساطب...حيث تنطلق من هذه المنتديات المشاريع (المستنيره) من بوش (فتا ما المسخوط داك)..ووجبه كنا نسميها الفرشه نتناولها الساعه الثانيه ظهرا بعد المدرسه وتشييع الجكس إلى هوادجهن أو راحلاتهن من 11خ أو مواصلات..والفرشه هذه عباره عن خليط من الطحنيه والجبنه والعسل ومعاها رغيف حااااااااار في الجو الرهاب داك وبعد كده إذا أسعفتنا الميزانيه كمان حاجه بارده كده تجعل عيناك تدوران حول محوريهما..وبالعدم مويه من السبيل..الغريبه برضو بيخلى عيونك تلف! وده كلو إستعدادا للدافوري (تحدي بالبيبسي)..ثم العوده لمراكز الإنطلاق..والتخطيط لبرنامج الليله أو الذهاب لحفل عام فى أحد الأيام القادمه.. وبعد شويه واحد ينط وهو يتحسس كرشته: بوش كيف شباب?...ويرد عليه الجميع : زبط...ويبدأ اللتيق الحثيث...الدكان مافيهو رغيف الحق الفرن...زيت السمسم المره ده ما كويس جيب من دكان سيف داك بس ما يشوفك آدم (صاحب الدكان الذي نحن فيه) آي عليك الله يا آدم أديها حبة جبنه كده زياده مع المويه...وما يلبث صحن البوش أن يلامس الأرض حتى يرتفع كأنهاTouch down عالم آفات كيف!.. قد أنداح وأغرق المنبر وقرائه وبكري زاتو! لكن هذا لن يحملني فى فعل لحظى الى عيون وطني! أشياء مبعثره! منظر الكتاحه ولها في الأفق نذير...النهوض في اليوم التالي وأنت تارك لوحه فنيه عبقريه لجسدك علي فراشك... ريحة الدعاش يا أخوانا كانت تغريني بأن أتذوق طعم الأرض لولا الخوف من الناس المسلطين أن يتهمونى بالجنون أو الطفوله وأكاد أذكر أنني فعلت ذلك بعيدا عن أعين الفضوليين..
لذاذة الونسه لما الكهرباء تقطع.....ضحكات جداتى ...رحم الله إحداهما وأطال عمر الباقيه...نكاتهن معجونه بخبيز الزمن..جدتى لأبي رحمها الله ردت على تحرشاتنا بها وبنظارتها قعر الكبايه بأن قالت : شفتوا العيون الورا النظاره دى كانت مجرحه قلوب الصبيان...ولم نستطع مواصلة غدانا من الضحك!..الله يرحمك يا حبوبه. فطيرة بي لبن مع جدى رحمه الله بعد صلاة المغرب...كنت أترصدها بشده..وانبسط حين يحثنى على (القيام سدارى) بما تبقى فى (الكوريه) ختيتها بين قوسين عشان ما يجى ينط لى واد من الحناكيش ويقول عاصمتها سيول.
هي أشياء لا تشترى وقد تعود وقد لا....حب الأرض ..المكان...الناس....البساطه ...النيل الأبيض ....الخريف و .........إحساس أكبر من اليتم في الغربه.
ونعشق الأرض التي لا هواء بها ولا ماؤها عذب لكنها لنا وطن.
|
|
|
|
|
|
|
العنوان |
الكاتب |
Date |
ده البحبو فى السودان | Khalid Osman Jaafar | 05-21-05, 08:44 PM |
Re: ده البحبو فى السودان | Khalid Osman Jaafar | 05-21-05, 08:46 PM |
Re: ده البحبو فى السودان | Nasser Mousa | 05-22-05, 00:00 AM |
Re: ده البحبو فى السودان | banadieha | 05-22-05, 02:57 AM |
Re: ده البحبو فى السودان | Khalid Osman Jaafar | 05-23-05, 03:04 PM |
Re: ده البحبو فى السودان | Khalid Osman Jaafar | 05-26-05, 05:38 AM |
Re: ده البحبو فى السودان | Hussein Mallasi | 05-26-05, 06:02 AM |
Re: ده البحبو فى السودان | Khalid Osman Jaafar | 05-29-05, 12:00 PM |
Re: ده البحبو فى السودان | Khalid Osman Jaafar | 06-11-05, 08:32 AM |
Re: ده البحبو فى السودان | Khalid Osman Jaafar | 07-01-05, 02:23 PM |
Re: ده البحبو فى السودان | Elawad Eltayeb | 07-02-05, 08:20 AM |
Re: ده البحبو فى السودان | Elawad Eltayeb | 07-02-05, 08:21 AM |
Re: ده البحبو فى السودان | saadeldin abdelrahman | 07-02-05, 01:24 PM |
Re: ده البحبو فى السودان | Salma Daoud | 07-06-05, 02:35 AM |
Re: ده البحبو فى السودان | Salma Daoud | 07-07-05, 04:17 AM |
Re: ده البحبو فى السودان | أيمن جبارة الله الخضر | 07-07-05, 05:11 AM |
Re: ده البحبو فى السودان | Khalid Osman Jaafar | 07-16-05, 08:03 AM |
Re: ده البحبو فى السودان | مصدق مصطفى حسين | 07-17-05, 04:57 AM |
Re: ده البحبو فى السودان | بلدى يا حبوب | 07-17-05, 11:03 AM |
|
|
|