أكبر مشكلة أن تكون لديك قريبة شينة سمينة وقصيرة وزي ابو القنفد 00 خصر مافي نهائي طبعاً 00 كلو على بعضو والخشم شدة ماكبير وعريض مايفيد إلا في طراش الملاريا بس عووووووووع مرة واحدة والحكاية تخلص مش زي الجماعة الخشمهن صغير وجميل حتى الطراش دا يدوك ليهو على جرعات ماصدقنا لقينا واحد يعرسها 00 طبعاَ شين جداً لكن زي توم كروز بالنسبة لزولتنا قال ماعندو حق الشيلة قلنا ليهو يازول قروش الفندق ذاتها بندفعها ليك المهم تخارج ابو القدح دا الراجل معاه حق ياجماعة قال لازم يستخير قلنا ليهو تستخير شنو ياخي المهم ماخليناهو ركع نهائي أنا وود خالتي ختينا سرايرنا وعصرناهو ليك في النص يعني لو قام عايز يمشي الحمام ساكت نقوم نمشي وراه قال يستخير قال المهم حددنا العرس بعد أسبوع لأنو لو إتأخر أسبوع تاني الرماد كال حماد ونحن في ذروة التجهيز والتنشنة والبشتنة تقوم أم العروس تقول : العرس دا مابيتم إلا تجي بنتها الكبيرة تحضر العرس والبت وين ؟؟؟؟؟ دي عرسوها بي حراق الروح في اقاصي الشمالية بعد أمها زارت ليها عشرين فلاتي قالوا تركب ليها من دنقلا 8 ساعات وتاني تقطع بالمركب وكان لقيت ليك كارو توصلك تكون محظوظ وكان مالقيت تنوم لحد الصباح بعد يجوا ناس الطماطم ويشيلوك معاهم طبعاً كلموها وماجات وإتأخر العرس عشان نانسي عجرم دي تجي وقام العريس نطه بالله عليكم الله دي عادات شنو ؟؟؟؟ اها دي يعرسوها لينا تاني كيف ؟؟؟؟؟
05-08-2004, 10:34 AM
ملكة سبأ
ملكة سبأ
تاريخ التسجيل: 06-18-2003
مجموع المشاركات: 3855
إنتو غلطتو في حاجة واحدة كان تنقلو مراسم الزواج لمحل البت في الشمالية ، لأنو العريس في السكة أم دقداق و العتمور و الباجة و لغاية ما يصل يكون حيلو إنهد و ما عندو تفكير تب . غايتو ،، أنا مع راى الملكة ،، ( جحا أولى بلحم تورو ) و شد حيلك و نحن من خلفكم نؤازركم. تسلم
05-08-2004, 11:04 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
ابونور حرام عليك عايزني استفرغ وللا شنو يعني نخلاي بنات الأهلية ديل لمنو قال عرسها قال انت براك شفت الخرطوم كيف والجمال الذي يتقطر رحيقا وعسلاً تجي تقول لي أهل العوض تصدق واحد جايي من الفتيحاب عشان يعرس في آخر الدنيا مشينا معاهو السيرة أها نسأل من الحلة يقوم واحد يقول لينا شفتو الترعة دي وعييييييييييييك عييييييك دي تعرف كم كيلو 59 كيلو متر أها نلقى واحد تاني بعد العييييييك دي اها يازوول عد المنسي وين يقوم يقول لينا تمسكوا الترعة دا وأها اها دي 00 50 كيلو بالله العريس الحيوان دا ساكن جمب جامعة أمدرمان الاسلامية وكل يوم بتمر عليهو 5000 طالبة هسي في داعي لعييييييييك دي ؟؟؟؟؟
05-08-2004, 11:17 AM
abas
abas
تاريخ التسجيل: 07-27-2002
مجموع المشاركات: 6254
عباس تعرف زولتنا دي زمان لمن كنا بنقدم البنات بالليل طبعاً نهائي مابتمرق من بيتنا قال عندها عشم قال طبعاً لمن الجماعة يقولوا لي أمشي قدّم البت دي تعرف نهائي مابمشي وبحرن وبحرد اي حاجة المهم يصروا علينا أها بوديها ليك بي زقاق فيهو كلب صعب جدا بالله الكلب ينبح الليل كلو مما يشوف زولتنا دي يعصر ضنبو ويدخل البيت قال سيك سيك قال والله دي ماتنفع إلا اسكراب على قول ناس الخليج
05-08-2004, 11:19 AM
Ahlalawad
Ahlalawad
تاريخ التسجيل: 02-05-2002
مجموع المشاركات: 2832
أهل العوض شابكننا الأخلاق 00 الأخلاق 00 الأخلاق والله هسي دي الواحد لو لقى أخلاقها في السماء لكن هي شينة مايعرسها نهائي قال أخلاق قال بعدين العريس للأسف ما أدانا فرصة لي دق الريحة شتت طوالي
05-08-2004, 11:23 AM
Teeta
Teeta
تاريخ التسجيل: 02-23-2003
مجموع المشاركات: 669
عارفة الواحدة مرات من اسمها بتكون جميلة يعني ناس تيتي وتوتا وتتي أشياء رائعة بلا شك لكن من تلاقيها ست النفر وكلتوم وحاجة فاطنة الله يستر الغريبة مرة عروسنا دي سحروها الليل كلو نبخر فيها وهي ترفس زي البقرة أنا مستغرب في الناس البتسحر دي يعني الواحد صراحة مرات ذوقه تعبان جداً
قال قاطعة السماحة قال
05-08-2004, 11:38 AM
مريم بنت الحسين
مريم بنت الحسين
تاريخ التسجيل: 03-05-2003
مجموع المشاركات: 7727
محارب قال يسوقني الشوق قال انشاء الله رزقك دا يسوقك لقريبتنا دي عشان تكره حياتك للأبد تعرف دي مافيها حاجة اسمها أنوثة والله لمن تجيك ماشة الا تقرب منها حتين تعرف انها إمراة طبعاً زمان كان عندنا جدنا شيء صعب جداً دا تعرف بيقول من الأول كلتوم دي لي حاج الفاضل وحاجة الرحمة دي ادوها لي حاج قسم المولى اها يقسم ليك النسوان ساكت تقول ببيع ليهو في عجور طبعاً الراجل دا كاتن حكيم جداً والله النسوان البيوزع فيهن ديل شينات جداً جداً ولو ما الراجل دا كان صعب وقراره حاسم ماكان صاحباتنا ديل اتزوجن نهائي والمشكلة دي زولتنا دي ماولدوها الا بعد جدنا دا اتلحس يعني كان تكون مصيبة لو قال بسمات دي ادوها لأبوحراز غايتو كان حاتكون مشكلة كبيرة جداً
05-08-2004, 12:26 PM
حمزاوي
حمزاوي
تاريخ التسجيل: 10-10-2002
مجموع المشاركات: 11622
يا اخوي ابوحراز عرسها لي فيروس ساسر عشان واحد فيهم يقضي على التاني قال داير تجيب ملاريا هي ملاريا وبس دي تجيب كل امراض وفيروسات العالم يا ابا حراز يا رجل يا ضكر يا شيال المحن اتوكل علي الله وسويها وعرسها نحن زاتنا متزوجين زيها ما احسن منها في شئ والوصف متقارب انا كنت قاعد اقول لمراتي صدقني مافي اي واحده اشنا منك ولكن طلعت قريبتك دي زيها في المقاس
05-08-2004, 02:15 PM
almohndis
almohndis
تاريخ التسجيل: 05-05-2002
مجموع المشاركات: 2663
حمزاوي لو المدام بالمواصفات دي معليش خلينا نقول الفااااااااااااتحة وربنا يعوضك غايتو انا واحدة شينة مابعرسها لو اقعد ساااااااكت طول عمري
المهندس كيفك الكاراكتير رائع جداً ومعبر رغم إنو زولتك دي جميلة حبتين يعني نحن لو كانت زولتنا زي دي كان زمان اتوكلنا وعرسناها قال كاريزما قال موضوع الكاريزما دا مهم بالمناسبة لكن برضو لو الواحد كان شين زينا كدا بيكون بينو وبين الكاريزما آلاف الكيلومترات في واحدة ظريفة طبعاً مامعانا بالبورد دخلت معاي في المسنجر أها من بديت أسلم عليها قالت لي : معاي المهندس وللا شنو قالت المهندس قالت قلت ليها ابوحراز كلو ماعرفتيه
05-09-2004, 08:35 AM
garjah
garjah
تاريخ التسجيل: 05-04-2002
مجموع المشاركات: 4702
والله ياقرجة لو الراجل دا سبناه يستخير كان من الركعة الأولى شتت ياخي دي كابووووووووووووس عديل كدا والشين طبعاً مابتصلح نهائي مرة رسلت ليها اسكيرت وبلوزة اشتريتهم ليها من مركز المحمل يعني باكثر من 200 ريال والله لمن لبستهن وشفتها قلت ليها اقول ليك بصراحة 00 الاسكيرت دا مشى بالغلط وضل الطريق عديل بالله ابتسام جارتنا اشتروا ليها من ابوعشرة ريال والله لمن لبست 00 بس قول ياساتر أنوثة بلا حدود قال المحمل قال
05-09-2004, 12:00 PM
بدرالدين شنا
بدرالدين شنا
تاريخ التسجيل: 07-30-2002
مجموع المشاركات: 3514
صديقي ابوحراز سلام يارائع أسمع قريبتكم دي ما تستعجل عليها بتتعرس إنت كدي شوف قريبتنا دي عشان تطمئن والله يا أبوحراز عندنا واحدة في حلتنا شدة ماها شينة أنا معاها زي تاجوج وفي واحد من حلتنا أصلو ما متخيل في يوم من الأيام الزولة دي ممكن تتعرس المهم الراجل دا سافر السعودية وقعد فيها سنين عددا والبت الشينة في فترة غياب ذلك الشاب تزوجت وولدت (سبحان الله) المهم الراجل جاء إجازة وشاءت الظروف إنو يركب في بص المواصلات بتاع القرية جنبها وهي تحمل الشافع في كرعيها ودا كلو هو ما إنتبه ليهو .. أها بعد شوية قووووووووووووووم يا الشافع بول في صاحبنا وقووووووووومي إنت يا المرا أعتذري للشاب المرا : هي كر علي يا محمد ولدي بال فيك محمد : هو دا ولدك إنتي؟؟ .. وإنتي عرسوك؟؟ إن شاء الله يخرا فيني عديييييييييييييييل
05-09-2004, 12:57 PM
ابوحراز
ابوحراز
تاريخ التسجيل: 06-27-2002
مجموع المشاركات: 5515
الأخ الرائع أبو حراز على وزن بوست الأخ بدر الدين شنا سائق شاحنة إنت البوست بتاعك ده خشبة مسرح ومسرح من شدة ما كوميدي عادل إمام ومستر بين يضحكوا فيهو ، يا أخي قبل التعليق على موضوعك المهندس ده يا ربي يكون شارب شنو ، يا زول دي أفكار شنو دي إنت براك ولا الحاصل ليك شنو ، أما قريبة بدر الدين شنا دي يعني من شدة شناتها الراجل أفلس وقال ليها عبارته الشهيرة: ده ولدك إن شاء الله .... المهم يا أب حراز نظرياً ومنطقيا زاتو الجمال والشناة حاجات نسبية لكين في الواقع السمح سمح كان قام من النوم والشين برضو ممكن يقوم من النوم بس أكيد هناك فرق شاسع يعني ممكن تقوم بي نمره أربعة أو نمرة تلاته وتقوم العربية ترترت منك وممكن تقوم وتأخد سنده زيك وزي سايق الفيات وممكن تقوم وتقوم قيامتك عديل كده وممكن تقوم بينا العربية براها كده زي ما جاء في الأغنية ، ونظريا برضو الزواج قسمة ونصيب لكين في الواقع القسمة مرات بتكون ضرب من أولها وربما طرح والنصيب ممكن يصيب وممكن يجلى. أنا مع جميع الآراء التي تنادي بأن تهدما معاً إنت وقريبتك ركن العزوبية الذي لم تستطيع سنين غربتك الطويلة في هدمه لوحدك وإيد على إيد تجدع بعيد وأسمع كلام الببكيك ويا دار ما دخلك شر وكل من عليها فان وإن بليت يا فصيح لا تصيح والقرد في عين عريسو غزال خاصة إذا كان عريسو قريبو شديد ، من هذا المنطلق أخي أب حراز أعملها وتوكل على الله وبرضو حا يغنو ليك حننوه وفرحت أمو يا عديله لي وممكن يغنو ليك برضو الجنيات يا بقاره الشدو خيلهم للمغارة وأنا من على البعد أهدي ليك غير خالد ما ليك تنين عرش دود الأربعين السيل بوبا يا الفوتك مو دحين ، وأكيد لأنك ينطبق عليك القول: لا بخاف ولا بتر قدام العينهم أى لون ما مشكلة. ورقصة العروس إذا عايزه تكون slow ممكن تكون على إيقاعات أب كريق في اللجج سدد وحبس الفجج ، أما إذا كنت عاوز تنافق وتراعي تقاليد وعادات القرية فحا تقوم تغني ليها وين وين وين تلقو زي ده ، وبالتأكيد دي الأغنيةالوحيدة الحا تكون صادق فيها لأنو زي ده أو دي ما بتتكرر تاني بس ممكن يعاد عرضها بالبطئ.
وبيت مال وعيال وإن شاء الله ما تغلبك بالعيال و لا تغلبك في الشطرنج بس تغلبك في جر الحبل أو القفز بالزانه وتغلبها بالتحكيم والتحكيم فاشل. ---- التحية لك أخي أب حراز وأنت تغوص بنا في كل هذه الأعماق السحيقة من الإبداع والإمتاع والتحية للمبدع أخونا المهندس الذي إستغل الموقف خير إستغلال وشات على الطاير والتحية أيضاً لنجم الكوميديا الرائع بدر الدين شنا ، بالمناسبة الشين رجلاً كان أم إمرأة بكون مشكلة كبيرة للرسام وبيكون مشكلة كبيرة جدا للجمهور إذا كان هذا الشين موهوب زي موهبة بدر الدين في الفن. دمتم ودام إبداعكم ودام البورد إستراحة وإتكاءة لا تستقيم حياتنا اليومية بدونها. التحية لكل الشينين الذين ألهموا أخونا أب حراز لتجود قريحته الأدبية بهذا المقال والتحية لكل الحلوين الذين جعلوا المقارنة بين الشنا والحلا تبدو مستحيلة وعزاء كل الشينين في الأسرة أنه لولا ظلام الليل ما طلع البدر بس مش بدر الدين شنا.
05-10-2004, 04:25 PM
nada ali
nada ali
تاريخ التسجيل: 10-01-2003
مجموع المشاركات: 5258
عارف، والدتى دائما تقول انه مافى واحد/ة شين/ة فى الدنيا، ولو قرات كلامك عن قريبتك كانت شاكلتك و قالت ليك "حلاااتها". و بعد يومين تلاتة كانت حاتعمل لقريبتك برنامج رياضة للتخسيس و تخليها تاكل خضار و اكل مسلوق و ممنوع السكريات و الشكولاتة الخ الخ (ممكن ملعقة رز فى الاسبوع) و تقول ليها انتى لو اهتميتى بنفسك شوية حاتكونى احلى من ممثلات السينما و قريبتك بعد شوية حاتصدق و ال Self esteem بتاعها يرتفع و تتفلهم عليكم و انت تحنسها ترضى بيك بدون فائدة. قال شينة قال
05-10-2004, 05:02 PM
almulaomar
almulaomar
تاريخ التسجيل: 07-08-2002
مجموع المشاركات: 6485
الأخت ندى علي التحية لوالدتك وكل أمهات السودان في الداخل والخارج والتحية لروح المجاملة الرائعة التي تتمتع بها والدتك لكين يا ندى يا أختي إذا كان الموضوع يعني حكاية: والذي نفسه بغير جمال لا يرى في الوجود شئاً جميلا ما كمان يا بت الناس في فلاسفه قالوا – تقول بيهم CHUP- القولة المشهورة: إنك لا تجني من الشوك العنب ، يعني أديني واحده نص شناه مع برنامج السيدة الوالدة ممكن تكون مقبولة بس البرنامج ما بينفع مع ناس لا لا ديل ، أها يا ندى لسه عند رأيك ولا تستعيني بالجمهور في مسألة الشناة دي.
05-10-2004, 05:18 PM
Raja
Raja
تاريخ التسجيل: 05-19-2002
مجموع المشاركات: 16054
يا اخوانا البت دى نقيتوا شعيرها كرهتوها العيشه ان شاء الله يقع فيها سعد بت المنى الابوها دفعها والمولى رفعها والله كان قلت بسم الله يا ابو حراز وعرستها تلقاها ست بيت من الدرجة الاولى يعنى الخلقة ما ضرورى كفاية الاخلاق قال اخلاق قال ؟؟؟؟؟؟ ان ما الامم الاخلاق يا سيد الناس ومبروك عليك بنية خالتك اريتها بنية السرور ام سعدا سمح جيد ليها العرسها ابو حراز بس ان شاء الله الاولاد يشبهوها هى بى شناتها دى ولا يطلعوا يشبهوك انت اكيد هى اجمل منك ( خلى الشناف ) وامشى سد المال ام وضاح
05-11-2004, 11:07 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
الملا عمر لك التحية على هذا الرد القيم وأتمنى أن نعطي قليلاً من الابتسامة لهذا البورد صدقني يحس الواحد منا بالكثير من الفخر عندما يشعر بأن حديثه المتواضع وصل الى قلوب الناس أذكر أن أحد معارفنا كان يعمل سائق لأحد التجار بالقرية وهذا السائق تعرف على بنت بالخرطوم في منتهى الجمال ووافقت على الارتباط به 00 طبعاً يوم مشى الخرطوم وكان معه هذا التاجر وهو رجل خشمو فاكي زي مابيقولوا الجماعة 00 أها صاحبنا دا كلمه بالموضوع ومشوا لبيت البت في الصحافة والجماعة إحترموهم شديد والراجل شاف ليك البت وكانت في منتهى الروعة طوالي وافق ليهو وقال ليهو نصف تكلفة العرس حاتكون مساهمة مني00 طبعاً قال الكلام دا نكاية في زوجته الشينة 0 تمر الظروف وزي ماقال المثل العرجاء لي مراحها 00 السواق اتوكل وخطب بت عمه في القرية والعرس تم 00 طبعاً صاحبنا التاجر سمع بالعرس لأنو كان في سفر وقطع السفر وجاء عشان يحضر وهو في باله عروس الخرطوم 00 اها جاء الحفلة ومشى عشان يبارك للعريس مفتكر انو العروس جابوها من هناك عشان يعملوا الحفلة عند أهل العوض 00 التاجر اسمو حاج عبد الرازق لمن وصل الكوشة شاف ليك العروس شينة جداً 00 ولا مبروك ماقالها وقام قدام العريس قال ليهو يازول دا شنو العملتو دا ؟؟ العريس قال ليهو : والله ياعم عبد الرازق دي القسمة !! قام قال ليهو : إنعل ابو القسمة ذاتها !!! طبعاً هو قال عبارة غير كدا لكن مافي داعي ليها 00 العروس لبدت ساكت عارفة لو قالت أي حاجة بديها تاني كلام أكعب من الأول 00 قال قسمة قال
ندى علي قالت شوكولاتة قالت تصدقي دي نهائي تكون مابتعرف الشيكولاتة دي 00 ديل ناس حلاوة لكوووووووووووم 00 بتعرفيها دي والله مرات الزواج دا ذاتو حظ يعني معانا واحدة هنا في السعودية جاية معلمة الراتب 6000 ريال مع بدل السكن وأشياء أخرى غايتو أدوها نص شناة العالم والنص الباقي يظهر عندما تتحدث 00 منتهى العوارة يعني حتى لو عرسوها باقي ليها بطنة واحدة بس والا العريس يستعجل هسي قبل يومين خطبوها ياربي يكون العريس دا خطب الستة آلاف ؟؟؟؟
رجاء اشياء كثيرة استغرب لها ولا أجد ليها تفسير مرات بعض البنات الشينات لمن يعرسوهن بيزدادن جمال والق وروعة وقد لاحظت برضو ملاحظة غريبة في إجازتي هذه للسودان ثلاثة من قريباتنا كان أزواجهم بالسعودية وحالتهم مبشتنة خالص وهؤلاء الأزواج حضروا في عيد الأضحى وبعد خمسة عشر يوم بس قابلت النسوان ديل شيء غريب جداً 00 تغيرن تماماً وإزددن ألقاً وروعة يعني اتحولن 180 درجة هل وجود الرجل بجوار زوجته بهذه الأهمية الكبيرة التي تنعكس حتى على جمال المراة ؟
صديق الموج تعال ياصديق الموج نديك العروس دي والله لا تتلقي إنت ولا يتلقي المووووووج قال موج قال إنت بتكون زول حفلات ساااااااكت وهؤلاء الذين يحضرون الحفلات باستمرار وعاملين فيها مقددنها ديل طوالي بجيبوها ليك بعدين شينة ومعاها ضنبها كمان بس أوعا تكون معرس وتقوم المدام تقرا الكلام دا
أم وضاح 00 تحياتي لوضاح وابيه قالت سد المال قالت والله الا كان أسد منها الباب واسد نيتها ذاتها تعرفي يا أم وضاح كما ذكرت سابقاً نحن البنعرسها حاتكون شينة بدون شك لأنو قالوا الزول اب لساناً طويل دائما مابيكون متوفق في الأشياء دي لكن سوف نحاول مع فوضوية العولمة دي نقلب الصورة لكن بيني وبينك البنات من الناحية الجمالية وإن كانت الظاهرية فقط إن جاز التعبير فهن أجمل من السابق ولكن الفرق بين الأمس واليوم اليوم ترى أغلب تفاصيل الأنوثة من خلال اللبس والاحتكاك الكثير وهنا يفقد الإنسان عنصر المفاجأة والدهشة عند الزواج بعكس بنات الجيل السابق فانت تتزوج كنز 00 تريد في كل يوم أن تنقب عن مآثره وفي كل يوم تكتشف اشياء جديدة حد الروعة بل وفي كل يوم يكتشف الإنسان تاريخاً جديد وصفحات قيّمة ومتفردة
05-11-2004, 12:55 PM
almulaomar
almulaomar
تاريخ التسجيل: 07-08-2002
مجموع المشاركات: 6485
أخي أب حراز مازلنا في إنتظار إجابتك ، هل تقبل الأنثى موضوع البوست هذا زوجا لك أما لا ، أكيد إذا وافقت فالويل والثبور لك وإذا ما وافقت فالويل والثبور لك برضو يعني في الحالتين إنت الضايع ، لكن نصيحة من أخوك الملا ما تعرسها حتى ينقطع نسل الشينين شديد من الدنيا ، والله يا أب حراز تخيلتك بالعراقي البتكرهو بت قضيم ماركة ورق البرنسيس وعروستك معنكشة كشب زي بوكسي العرب وكلو فالصو طبعا وبعدين فنانه شحمانه وعرقانه والواطه حر تغني ليك في حفل عائلي في بيتكم الكائن في قريتكم الكائنة في بلادنا الكائنة ف عالمنا الثالث:
رقصت ليهو مسك حجباتا عديلة لي جابت قونين بي بساطه يا عديله لي والمنظر يا أب حراز مؤثر جداً وأنت ترفل في عراقي البرنسيس إياه وبالضريرة والحريرة والحناء وكمية بتاعت كحل يخزي العين- كما يقول أهل الشام - والإبتسامة المصطنعة يا وسيم الطلعة وأنا لا أحسدك على هذا الموقف المهيب الرهيب الذي يشبه يوم الحشر ، لكن حبذا لو تم تعديل الرقصة بحيث تغني النسوة لك أنت لا للعروس يا أب حراز فبدلاًُ من أن يقولو للعروس أليلا لا فتحي وشوفي يقولو ليك إنت فتح لكين على مسئوليتك.
سوت ليهو القيد حرن عديله لي وخلت الأبكم رطن وفي الحتة الأخيرة دي بالذات – يعني حكاية إنو الأبكم يرطن دي ممكن تفتحو مشيخة أو عيادة بلدية وأنا حا أكون فيها كبير الحواريين لفخامتكم ومواصلات السودان كلها حا تتجه نحو قريتكم لطلب الشفاء لأن الذي يخلي الأبكم يرطن ممكن يخلي الأعمى يفتح والمفتح يعمى والمكسر يجري ، وهناك قائمة تطول من أصحاب العاهات والحاجات في بلادنا والبلاد المجاورة وجميع دول العالم وأيضا هناك الذي يريد الجنا وهنا الذي يريد تحديد النسل ، هناك الذي يريد قطع النسل من الأرض وبدل الفكي أب مكوة تكون ست النفر والسفر ومن هسع شوف لي إقامة دائمة في قريتكم.
05-11-2004, 01:23 PM
shawgi badri
shawgi badri
تاريخ التسجيل: 04-26-2003
مجموع المشاركات: 622
عزيزي ابو حراز ياخ الجمال هو جمال الروح . و بعدين المرأه مهما تكون جميله او الراجل يكون وسيم ، العمر بغير كل شئ . و تفضل الشخصيه و الاخلاق . صديقي حسين خضر رحمة الله الياس ( ود الحاوي ) شقيق الموسيقار عبداللطيف ود الحاوي كان متزوج من سويديه جميله اسمها ليسي في نهاية السبعينات . و رزقوا بطفله اسمها املي . و عندما كانت البنت في الثانيه من عمرها كان حسين يسألني باستمرار ( يا شوقي بتي رايك فيها شنو ؟ ...يا شوقي ما قلته لي رايك في البت شنو ؟ ...... و يا شوقي بتي دي ما حلوه ؟ ) . و انا لانو ما بعرف اكذب اروح ضارب طناش . قام يوم شال البت ختاها قدامي و قال ( لازم تقول لي حسي البت دي حلوه و لا لا .) فقلت له ( و الله انا شايف احسن تسلحها بالعلم ) فانتفض و صرخ . لمن البت عملت سبعتاشر تمنتاشر سنه بقت بت جميله و ملفته بقوام ممشوق و شعر غزير طويل و بيني و بينها ود. و هي الان سيده متزوجه و ام . و في احد الايام بعد ان قبلتها علي خدها و جلست اتحدث معها و هي تعزني جدا قال لها حسين ( انتي عارفه شوقي ده قال فيك شنو لمن كنتي صغيره ، انك شينه و قبيحه و يسلحوك بالعلم ) . فخجلت، الا ان املي قالت بصراحة السويديين ( ليهو حق ، انا شفته صوري لمن كنته صغيره ، كنته زي القرد ) . شوقي
05-11-2004, 02:04 PM
almulaomar
almulaomar
تاريخ التسجيل: 07-08-2002
مجموع المشاركات: 6485
يا أستاذ شوقي بنتكم كانت شينه لمن كانت صغيرة لكين قريبة اب حراز على وش زواج يعني محطتين وسنده والقطر يفوتها ده إذا ما كان شتت وفاتها زمان ، أها دي يحلوها كيف. بعدين أنا مقتنع شديد إنو الجمال جمال الروح والخلق لكين برضو نحن بشر يعني حكاية الـ First Impression دي مهمه جداً ما تقول لي عندك دكتوراه في الكيمياء أو الفيزياء النووية حتى وتجيني ناكش شعرك ونافخ جضيماتك ولابس بنطلون كاروهات وقميص كاروهات وسفنجه كاروهات ، أوديك وين عاد يا شوقي بالصورة دي دى ما إنبراشه عديل كده.
05-11-2004, 02:59 PM
بدرالدين شنا
بدرالدين شنا
تاريخ التسجيل: 07-30-2002
مجموع المشاركات: 3514
Quote: هل وجود الرجل بجوار زوجته بهذه الأهمية الكبيرة التي تنعكس حتى على جمال المراة ؟
أبوحراز بالمناسبة ردك على الأخت رجاء دا ممكن يكون بوست قائم بذاته .. بس عليك تبني ليهو حمام ومزيرة وتحفر ليهو بالوعة وبعد داك أسالني أنا من الناس البسكنوهو لك حبي وتقديري
ياخونا والله كان انشبك الملا عمر مع شوقي بدري دا أنا خائف البوست دا بعمل حادث .. الناس ديل الإتنين غنيانين بالجمال والمعلومة
05-11-2004, 04:52 PM
nada ali
nada ali
تاريخ التسجيل: 10-01-2003
مجموع المشاركات: 5258
الاخ الملا عمر سلامات، و شكرا لكلماتك الطيبة (فى اول الرد) ماهى النظرية انه مافى واحدة شينة و لا واحدة نص شناة - يعنى ما مجاملة. لسة عند رايي و لو استعنت بالجمهور حا استعين برأى رجاء و امال
قال هون تشوب قال
الاخ ابو حراز،
خلاص خليت قريبتك و قبلت على زميلاتك! نحنا عارفين؟ يمكن ادتك شاكوش علشان كدة عاوز تنتقم منها.
قال عويرة قال
05-11-2004, 05:38 PM
waleedi399
waleedi399
تاريخ التسجيل: 08-20-2003
مجموع المشاركات: 2767
السماح بس ما كفاية ولا خدود زي المراية السماح لا سود عيون ولا حواجب راسمة لون ولا خدود زي المراية السماح طيبة ومحنة نغمة من طنبور اهلنا السماح وعي ودراية
مع تحياتي اخوك / وليد
05-12-2004, 11:11 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
الملا عمر طبعاً ممكن اعرسها دا لو كانت هي أنثى قال أنثى قال 00 والله أمبارح شفت مسز لابانون في التلفزيون طبعاً شيء رهيب جداً بالله بديت أسأل نفسي بعض الأسئلة ياترى هل ستفوز اليمن يوماً ما بكأس العالم ؟؟؟ وهل يمكن أن تدخل زولتنا دي مثل هذه المسابقات ؟؟؟
استاذنا العزيز شوقي بدري لك التحية وانت تفرد لنا مساحة من وقتك وقبلها مساحة من قلبك لتشاركنا العزاء في عروسنا الشينة 00 وفعلاً هناك ظاهرة بعض الأطفال بيكونوا شينين جداً خاصة الإناث منهم ولكن عندما تننمو وتتخضب بلون الأنوثة تصبح إمراة أخرى أذكر أن هناك سيدة سعودية مرموقة كانت تقرا لي وتعلق على كتاباتي قالت لي يوماً ما : أن جمال المراة يتحول من نعمة إلى مأساة للرجل 00 فقلت لها : إن الرجل الشرقي يسعى بكل حواسه لأن يمتلك إمراة جميلة ولكن ما إن يتحقق له ذلك سرعان ماتشتعل في دواخله نيران الغيرة 00 نحن نريدها إمراة جميلة بكل المقاييس ونريدها لنا ونحاصرها من كل الجوانب 00 صدقني بعض الرجال الذين يتزوجون نساء قبيحات وشينات تراهم مستقرون جداً 0 في حين ان بعض المتزوجون من جميلات معذبون جداً 0
بدر الدين خلاص يا بدر الدين أنا هديت ليك البوست دا وكمان حقوق الملكية الفكرية نريد أن نعرف عندما تكون هناك إمراة مع زوجها وإمراة أخرى زوجها بعيد عنها كيف يكون تفكير كل منهما 00 كيف هي أحاسيسهما 00 طبعاً لم أر والدي وقد بات خارج المنزل نهائياً لهذا كانت والدتي في قمة النضارة 00ولكن يعاب على ذلك الجيل من الآباء والأجداد أنهم مزواجون جداً ولا أدري السر في ذلك 0يعني نحن أقل واحد في الأسرة متزوج ثلاثة والله يستر علينا نحن لسه واحدة مالامين فيها 00
ندى والله الشواكيش في البورد دا انا واحدة أدتني شاكوش هنا لسه ماقادر استعدل عملت فيها بتحبني فجأة قالوا اتزوجها واحد من ناس الامارات محروق على ناس الامارات ديل إنت تحب وهم يجوك ناس عرس سااااااااكت
وليد دا الشعر وللا بلاش قال السماح طيبة ومحنة قال اها لو جابو ليك واحدة طيبة جداً وزي ابوالقدح وابرسي غاز وجابو ليك واحدة جميلة زي نيكول كيدمان لكن الطيبة نص نص أها بتختار منو ؟؟؟
Quote: عوض ود حلتنا .. دوما زهجان و أخلاقو فى راس نخرتو .. لم نشهدها يوما تسربت مع شهيقه .. بعد زواج وجد نفسه متلبسا به قسرة لا رغبة .. بعدت أخلاقه مترا .. لم يكن أمامه مهرب .. وهو الوحيد لقدح وحيد .. حاصرته الطلاقات من كل جانب .. حتى صار غطاء مطلق .. تحسرت بشـدّة .. ليس على عوض .. لكن على نفسى التى لم تملك حينها .. الحق فى إضافة طلاق للطلاقات المنطلقة فى صحبة رزاز الصعوط .. التاية .. أو البت الدلاهة كما تلقبها نساء الحلة .. فاتتها كل القطارات .. حتى الترماى الذى يمشى كما يمشى الوجى الوحل .. لم تمكنها مؤهلاتها من التمرغ فى ترابه .. لولا القصر الذى يجعلها فى مقدمة الصفوف فى الصور الجماعية و حفلات الأعراس .. لا يوجد ما يجبر عوض على الرفض .. هذا إذا إستثنينا صوتها الأخشن .. و مشيتها التى تسمعها .. دب .. دب ..
أبو حــراز .. ما عندكم ناس بتحلف طلاق !! زولتك دى ما أشـنا من التايـة
05-12-2004, 12:24 PM
ابوحراز
ابوحراز
تاريخ التسجيل: 06-27-2002
مجموع المشاركات: 5515
الحلاوي طبعاً أكيد سمعت بنكتة العروس لمن زوجها كان ماشي معاها شهر العسل أها قام بصق السفة بعد ان فتح زجاج السيارة فجأة العروس اتخلعت وقالت ليهو سجمي ماقلت لي قاعد تسف صاعووووود قام قال ليها نحن أسرتنا كلها بتسف وبتطلق !!! قالت ليهو سف سااااااكت انشاء الله تكمل عماري الفاشر كلو
قالت سجمي قالت
05-12-2004, 12:29 PM
james
james
تاريخ التسجيل: 06-21-2002
مجموع المشاركات: 2726
أخي أبو حراز الضحك شرطنا ياخي لكن أقول ليك حاجة دي سيك .. سيك معلق فيك يعني بالواضح كده .. تدق صدرك وتغطي قدحك يا ود البلد الليلة وين لي وين .. يا ود البلد جنوني خلاص .. ود البلد لقيتو جم بابم بابم القراش.. يا ود البلد شفايفو كالعنبة .. خدودو كالأنا زول يويويويويو...أبشر ياعرييس
05-15-2004, 07:35 AM
ابوحراز
ابوحراز
تاريخ التسجيل: 06-27-2002
مجموع المشاركات: 5515
جيمس بالجد مشتاقين ليك كتير شايفك مما اتزوجت مشاركاتك تقلصت كتير يا أخوانا ورونا السر شنو في الزواج دا جميل جداً ان نجد إمرأة تشغل كل تفكيرنا وتملأ لنا كل مساحات حياتنا بالود 00 بالحب 00 بالأمل 00 بالمطر 00 بالغيوم عاوز اغير صورتي في المنبر وماعرفت الطريقة كيف 00 طبعاً زهجت منها وتاني شيء بقت مابتأكل عيش بعد ماظهرت صور جديدة لناس في البورد قطعوا مننا الموية والنور عاوزين نخت لينا حاجة تنافس 00 وماتخاف بديك البياض
ندا علي شمتانة والله الواحد يلم فيك إلا يعضيك مفروض تخففي عني شوية
اعقل شنو ياخي دي يعقلوها كيف تعال نديك ليها إنت 00 بس الواحد مما يشوفها شينة يقول ليك أعقلها وتوكل
رجووووووية خلاص نحن في انتظار بوستاتك الجميلة والخفيفة دي تعجبني كتاباتك ويعجبني طرحك لمواضيع غاية في الأهمية واستمتع كثيراً بالعزف على أوتار كلماتك
دقنا لك التحية وين يا مان مشتاقين ليك كتير كل ما اذهب بورتسودان أو سواكن تكون في خاطري هناك أبحث عنك في كل عيون السواكنيات براءة بلا حدود وجمال يخترق القلب في لحظة عشق تزوج قريبي قبل فترة من كسلا هدندوية كانت تعمل معه وعندما أحضرها للخرطوم وجئنا للسلام عليها كانت مفاجأة لنا جميعاً صدقني 00 لاتستطيع أن تنظر لها اكثر من مرة جميلة حد الدهشة ولو نظرت مرة أخرى فإنك ستذوب وتذهب بعيداً عن هذا العالم هزمت قريباتنا 3 صفر شعر منسكب يلامس الخصر ويتمرد عنه ليوشك أن يصل أطراف قدميها وعيون بحجم العالم !!!!! أكثر ما أغاظني فيها خصلات شعر جميلة تمردت ووقفت بجوار عينيها تمنيت أن أزيحهما فقط لأرى كل ماتخـتـزنه خلف هذه العيون صراحة 00 أحياناً لدينا شناة عويرة جداً وأحياناً أخرى لدينا جمال أكثر من عوير
كبسيبة قال سأصبر قال أكيد صابر على شناتك دي رغم شناة زولتــنا لكن صراحة لمن أشوفك بطمئن وأقول الحمد لله الدنيا مازالت بخيرها يا أخوي مسؤول من الخير أوعا تكون شاركت في بوست رجاء بتاع فارس الأحلام ؟؟؟ غايتو لو كنت إنت فارس أحلام نحن نكون طيارة أحلام عديل كدا
05-17-2004, 03:07 PM
Raja
Raja
تاريخ التسجيل: 05-19-2002
مجموع المشاركات: 16054
الرائعة حد الدهشة رجاء وهذه الرياح عندما تشتد تاتي اليك فتتفلتر وتتحول إلى أنسام وعندما تمر علينا تلاطف وجوهنا وتجعلنا نتثاءب لك التحية وأنتي تشاركينا الحلم حلم بأن تتزوج قريبتنا رغم هذه الأعاصير من الشناة أما بوست فارس الأحلام فهو رائع بكل المقاييس وكنت أنتظر فارسة الأحلام إن جاز التعبير أنتظرها لأمتطي صهوة خيالي وأكتب بلا رقيب فمن الصعب أن تكتب على أنك فارس وتعلن عن مواصفاتك او أن تعرضها أخال بأننا 00 أنا وفارستي سنكون جوادين عنيدين كلانا يحتاج لترويض والجياد لايمكن أن تروض الجياد ولكننا حتماً سنروض أنفسنا للإنسانية وللكلمة وللجمال وللحب
05-18-2004, 11:28 AM
bint algazeira
bint algazeira
تاريخ التسجيل: 06-29-2002
مجموع المشاركات: 571
عاد ياابوحراز اريتني ماقريبتك البنيه شلت حالا .. دا كلام تقولوا تكون المسكينه كل يوم عندها عشراقه من سيرتها الجايبنها في البورد
طبعاانت بعد تعرس البنيه دي بعد عمر طويل تقول ليها انا كتبت عنك بوست كامل في بورد بكري غايتو بعدين اللهم لا شماته
اقول ليك شئ ياقريبي انتم من يصنع جمال المرأة ايها الرجال كم من امرأة جميله عاشت دون احساس بجمالها كم من امراة لا تملك صفات الجمال ولكنها عاشت ملكة للجمال
مبروك ياابوحراز بيت مال وعيال وكمان جمال
05-18-2004, 12:15 PM
ابوحراز
ابوحراز
تاريخ التسجيل: 06-27-2002
مجموع المشاركات: 5515
يكفينا فخراً ان نسمع كلماتك واشراقاتك وطلتك المتفردة طبعا عبارتك جميلة الرجل هو من يصنع الجمال لدى المراة ثقي لو كانت شينة تلك التي ن ت ز و ج هـ ا فإنني سأصنفرها ليس بالكريمات بل بالكلمات بالحب وبالأمل وبالثقة الكبيرة
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة