|
|
 Re: حنان ..أنثي ولا دستة رجال .... ( ولكن ) ..!!!؟ (Re: samo)
|
لمن الواحد يسمع كلمة (اب) او والد .. بيجي في عقلو شخص معين ..بيكون موجود داخل عقلو الباطن الجوووة داك ..يعنى بيكون ليهو نموزج للاب ..ممكن يكون ابوك زاتو وممكن يكون ابو صاحبك او الساكن جاركم او المحاضر في الجامعة ..المهم بيكون في انموزج للاب ..الواحد بيتمنى ابوهو يكون مثلو ..او ابو اولادو لو كنت بنت ..او انت بالنسبة لى اولادك ..لو كنت رجل ..
نفس الشي للام ..داخل عقل كل واحد فينا نموزج مثالي للام ..انا اتمنى أمي تكون مثلها لو هي ما النموزج ده ..واتمني حبيبتى وام اولادي المرتقبة تكون كما اتمناها ..كذالك الاخت ليها نموزج داخل العقل ..والاخ ..والصديق ..وهكذا ..
النمازج دي ..بتختلف داخل كل واحد فينا عن غيرو .. وتوافق الشخص (ابوك وامك واخوك وزوجتك وصاحبك) مع الصورة الفي عقلك ..هو البيولد احترام وتقديس وحب .. وتعلق شديد بالطرف الاخر ..لانو في فرق بين اخوى العادي ..العلاقتي بيهو علاقة خوة وبين اخوى المثل الاعلى لي ..البحبو وبخاف عليهو من الهوى ..وفرق بين زوجتى البحبها عشان هى زوجتى وام اولادي وبين الزوجة البموووت فيها ومقتنع بانو مافي زيها في الكون ..
و ممكن يكون شخص مثالي في نظر كل الناس لكن انا اشوفو عاادى ..و ممكن اشوف فيهو عيوب كمان ....وبالعكس ..ممكن واحدة تكون عادية في نظر كتيرين .. بس انا اشوفها مميزة جدا ..وتكون بالمقاس مع صورة الحبيبة في عقلي .. اقوم ..كف كرف ..اكنكش فيها ..واتغرب وعينى تطلع عشان اوفر حق شيلتها ومهرها وعشان اضمن ليها حياة كريمة ..
واكيد الواحد ما بيقدر يختار اهلو ..والدو ووالدتو واخوانو .لكن بيقدر يختار شريك الحياة والصديق...والاختيار ده هو الامتحان ..وهو النقطة الحتلف حوالينو حياتك ..وبيحتاج دراسة شاملة للشخص وسلوكياتو وتصرفاتو .
ممكن... ده السبب البيخلي بعض البنات يرفضو كميات من العرسان ..لانهم ما بتوافقو مع صورة الزوج الفي عقلهم ..او صورة الاب ..لى اولادها ..وممكن تقعد كتييير تنتظر الشخص ده ..اللي هو ممكن مايجي ..او ماتصادفو . وبرضو نفس السبب البيخلي الشباب يخطبو وينطو ..او حتى يتزوجو ويطلقو ..و لمن تسالو عن سبب الاختلاف والطلاق حيقول ليك الزولة دي مابتنفع معاى ... ونحنا مامتفاهمين ..او ..جنها نوم..او بتشخر ..او نقناقة ..قرقر كتير يعنى ...او لمن تصحي من النوم بتكون بشعة ..او وسخانة ..مابتنضف البيت . ده كلو لانها اتعارضت مع صورة االزوجة في عقل الشاب.
الكلام الفوق ده ماعندو أي علاقة بي حنان ...نجرتو من راسي بدون مناسبة .. لله كده ... 
اها ..
كدي نتم ليكم حكاية زولتنا ..
من اخر مقابلة ..في الجامعة ..ما اتلاقينا تانى .. اتخرجت انا ..وبعد شويتين كده جيت للمصيبة البيقولو عليها السعودية دي ..طبعا الكفلة يطيرو ليك كلمة حنان من قاموسك اللغوى .. نسيتها مع زحمة الشغل والجري .. بالاضافة لي برنامج العمل هنا (نظام الدوامين ) البيخلى الواحد في خلال شهور ينسي امو اسمها منو ..؟؟ دوام ممل وقاتل ...المكتب ثم البيت والاكل ثم النوم ........بس
ولي حظي الشليق ..اشتغلت في مدينة العيش فيها ماساة حقيقية .. والواحد لو كان في الرياض او الدمام او جدة ..ماكان حس بالغربة ..لاني بشوف السودانيين اكتر من (السعوديين + البنقالة + الهنود) مجتمعين ..في المدن دي ...
المهم ..
مرااات كدة الواحد بيمشي على الرياض يفرق مع الاصدقاء والزملاء ايام الجامعة ..(تلتين دفعتنا في المملكة) ..
يووووم مشيت حفل زواج شبه ضهب ..لانو الكان عازمنى هو الفنان ..طبعا مابعرف أي زول في الحفلة ..وجريت لي كرسي وقعدت بعيد امارس هوايتى المفضلة (اعاين للخلق وهم بينططو ويرقصو ..وبعد ما الحفلة تسخن والناس تبدا تنفعل مع الفنان ..بقفل اضنيني واعاين ليهم بدون صوت الموسيقي ..حقيقي شكلهم يجنن ) .
الناس لمن كترت ..بقو يزحفو بي كراسيهم على جهتى حبة حبة ..وفجاءة لقيت نفسي في نص الخلق ..بعد دقايق واحد من القاعدين وراي لكزنى من ضهري .. اتلفت عليهو ..لقيتو معرفة من السودان ..من ناس الحلة يعنى ..لكن من نوع الجلاكين الماكان الواحد عندو بيهم علاقة قوية .. سلمت عليهو ..وبقينا نتونس ونحن بنتفرج ..في الفاصل جا الفنان قعد معانا ..عمك اتكيف شديد من حكاية انو قاعد مع الفنان دي ...وفتح لي فتحا مبينا وقعد يتونس مع الفنان .. بعد شوية لقيتهم قامو ...اها وين ياناس ..عمك قال لي ارحكاكم اعرفكم على زوجتى ..انا رفضت ..وقلت البيودينى شنو في نص 200 مرة ..لا لا ..ماماشي .. صاحبنا الفنان اصر الا امشي معاهم قمت مشيت ..
زوجتو ..مرة ..كبيرة في السن بس لطيفة ودمها خفيف ..وبي طريقة ظريفة كده اقنعتنا نقعد ..وقعدنا نتونس ..حقيقي الاتنين طلع دمهم خفيف وونستهم جرت ..بعد ما الفنان طلع المسرح وعمك مشي يوصلو لي فوق المسرح .. بقيت مع المرة براى نتونس ..
ومن ماجيت قعدت وسط النسوان ديل كنت مكهرب ..لاقادر اتلفت يمين ولا شمال ..حتى عاوز اقوم ارجع محلى ماقادر ..فجاءة ..وبحركة غير ارادية اتلفت يمينى ... وشفتها ليك ..حناااان
امااااك حنان ... حنان زااااااااااتها ...بي شحمها ..وشحمها ....كمية من الشحوم..لحم تك ....سميييينة بقت ..وشايلة شافع ..كانت تجلس وبينى وبينها كرسي فاضى ..بس قمت ... جب ..نطيت الكرسي وقعدت جنبها ..
ازيك يا حنان ..في البداية ماعرفتنى ..وعاينت لي بي ملل..نظرة لا فيها تحدى بتاع زمان ولا فيها اي شي غير القرف..والغباء نظرة عادية ...فيها شي من الخوف ..
ماعرفتنينى ... قلت وانا نفسي قايم ..
قالت بتساؤل ...بعد طول نظر ...سمو ..؟؟؟
قلت ...ايوة
قالت: ازيك ..والله اتغيرت
قلت : وانا امسح راسي ..بقيت وجيه مش كده
ضحكت وقالت : والله الوجاهه في درب وانت في درب
سكت وبقيت اعاين للولد في حضنها ..
ابتسمت وقال: اااااي ولدي
قلت : كدى براحة ..الجابك البلد دي شنو ..وعرسوك متين ..ومنو ده القدر يقنعك بي نفسو ..والله ده بيستاهل ميدالية ..
قالت : راجلى ....ونصيبي ..وهي تاشر بي اصبعها باتجاه الناس البيرقصو .
وبدون ما اقبل عشان اشوفو ..
قلت :: يعنى اتزوجتى ..وانا مندهش
قالت: يعنى عاوزنى اعمل شنو ..ما كل البنات بيتزوجو
قلت : عمر الولد الفي حضنك ده بيقول انك اتزوجتى بعد ما اتلاقينا بي شهور تقريبا
قالت : بالضبط
قلت مندهشا : والدراسات العليا .. والطموح ..والتنظيم والسياسة ..والشعر..؟؟؟؟؟
قالت وهي بتنظر بعيييد طموح مين ياعم ..انا تزوجت اول ما اتخرجت و ..
قاطعتها : بدون ارداتك صح ..؟؟
قالت : لا
وكانت صاعقة ..
قلت ليها: اتزوجتى بي رضاك بدون أي ضغوطات ؟؟
قالت : ايوة
قلت وانا واثق من الرد : يعنى اخيرا حبيتى
وكانت الاجابة الثانية الصاعقة : لا
لمن شافت الذهول في عينى ..وبعد صلحت التوب كويس : شوف يا سمو .. انا حختصر ليك ..لانو راجلى اذا جا شافنا قاعدين كده حيعمل لي مشكلة .. انا اتزوجت واحد..بدون حب ...ماعشان المادة ..لانك بتعرف حالتنا ..بس هو اتقدم وانا وافقت بينى وبينك كده ..انا ماكنت بحبوبس كنت بحترمو وافتكرت ده كل شي ..وبعد الزواج كشفت فيهو عيوب ماليها حد ..حاولت اصلحها لكن ماقدرت ..
واتنهدت بحسرة وواصلت : انا شايلة هم باقي عمري حقطيهو كيف معاهو . ..واول ما اتزوجنا ..الحياة الزوجية ياسمو في بدايتها جنة ... كل شي فيها حلو .. انبهرت بيها ..وقررت (في لحظة حميمة مع الزوج انو مستعدة امشي معاك لاخر العمر )
وقالت كلام كتيرر ...كتير . حسيت انها بتحاول تقنع نفسها قبل ماتقنعنى بيهو ..اتغيرت ..ماهي حنان ..هى ست بيت ..وبس .. متحملة زوجها عشان بيتها ..نبل انقرض من زمن امهاتنا وحبوباتنا..بس القوة ..والجرءة .. والنظرة المخيفة ..والشخصية القوية ..والصوت الواضح النبرات ..كلو ..بح ...راح .. بقت واحدة ..زيها وزي اكتر نساء المغتربين في الخليج ..تقوم من النوم الساعة 12 ضهر ..وتجهز الغدا ..يجي سي السيد ..ياكل ..وينوم ..وهى تدخل المطبخ ..تغسل العدة الاتوسخت ..تصحي الراجل ..يمشي الشغل ..وتنتظرو.. مرة تقلب في مجلة ..ومرة في القنوات الفضائية لحدى الساعة 10 مسا ..يرجع تحشي بطنو بالعشاء الفاخر ..الماعندو طعم (اكل الخليج كلو تفافيح واعناب وجداد ومعلبات وكل ماتشتهيهو الانفس ..لكن مسيــــــخ ).. بعد داك ..يتونسو ونسة كل يوم ..المعتادة وينومو ..وتصحي الساعة 12 ضهر ..و ...و والمكنة لافة ...بس ... حنان بي حالها ..دى حياتها ...
بعد ماكملت ..واتململت ..وحسيت انها عاوزانى اتخارج ..قمت من جنبها ..ومشيت ابعد مكان في الحفلة وبقيت افكر ...حقيقة شعور كان غريب الانتابنى في وقتها ..
في نهاية الحفلة ... ونحنا طالعين .. كانت ماشة قدامى ..وجنبها كان زوجها .. ودى كانت الضربة القاضية ..
شخص عملاق وجهااامة .. وسمين ...لابس ليهو جلابية سكروتة ..ويكووورك في جماعة قدامهم ..هو بيمازحهم ..بس مزاح دمو تقيل ..وعامل هيلمانة ..وكل الناس الطالعة بيعاينو ليهو ..خاتي سفة.. دقار لوري بس .. (انا زاتى كنت بتمبك بس مابنفس الطريقة ) .. وجات عربية كريسيدا طالعة من الاستراحة وكانو فيها العرسان ..والظاهر علاقة العريس بي صاحبنا كويسة ..بس مجرد ما جات العربية قصادو صاحبنا كورك بي اعلى صوتو : ابشر ياعريسنا..ابشر ..ابشر .ومشي على العربية ..ووقفت العربية ودنقر علي العرسان واتكلم شوية ..وبعد ما العربية اتحركت من جنبو قال باعلى صوتو : يافلان ..ويقصد العريس ..الطلع راسو من الشباك ..وقال بس براحة على البنية ...زولتك دى صغيرة ..ماتخلعها من اول يوم ..وهاهاهاهاهاهاهاهاها ..بقي يضحك ..والله انا خجلت لمن بقيت عامل فيها بتناقش مع الفنان الطالع معاى.. في طبقات صوتو والتوزيع الموسيقي . . فما بالك بالحريم .
عاينت بي طرف عينى لي حنان ..لقيتها ماشة بعيد منو ..كانو ما معاها ..
اتزكرت كلماتها قبل دقايق (ما كنت بحبو لكن ..بحترمو ..!!!) وسالت نفسي ..اي نوع من الاحترام لشخص مثل هذا ..؟؟
لحدى هنا ..وحكاية الزولة دي انتهت .. بس ماحعلق انا على الموضوع ..وعاوز اسمع رايكم .
.
|
|
 
|
|
|
|
|
| العنوان |
الكاتب |
Date |
 حنان ..أنثي ولا دستة رجال .... ( ولكن ) ..!!!؟ | samo | 05-01-04, 08:56 PM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-01-04, 09:26 PM |
| Re: حنان ..أنثي ولا دستة رجال .... ( ولكن ) ..!!!؟ | Osman Hamad | 05-02-04, 00:39 AM |
| Re: حنان ..أنثي ولا دستة رجال .... ( ولكن ) ..!!!؟ | hala guta | 05-02-04, 01:10 AM |
| Re: حنان ..أنثي ولا دستة رجال .... ( ولكن ) ..!!!؟ | مريم بنت الحسين | 05-02-04, 01:24 AM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-02-04, 09:23 AM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-02-04, 09:33 AM |
| Re: حنان ..أنثي ولا دستة رجال .... ( ولكن ) ..!!!؟ | doma | 05-02-04, 12:45 PM |
 Re: حنان ..أنثي ولا دستة رجال .... ( ولكن ) ..!!!؟ | haneena | 05-02-04, 01:12 PM |
| Re: حنان ..أنثي ولا دستة رجال .... ( ولكن ) ..!!!؟ | حمزاوي | 05-02-04, 01:47 PM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-02-04, 08:47 PM |
| Re: حنان ..أنثي ولا دستة رجال .... ( ولكن ) ..!!!؟ | Abdel Aati | 05-02-04, 11:37 PM |
| Re: حنان ..أنثي ولا دستة رجال .... ( ولكن ) ..!!!؟ | Osman Hamad | 05-03-04, 00:19 AM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-04-04, 07:31 PM |
| Re: حنان ..أنثي ولا دستة رجال .... ( ولكن ) ..!!!؟ | Nada Amin | 05-07-04, 08:58 PM |
| Re: حنان ..أنثي ولا دستة رجال .... ( ولكن ) ..!!!؟ | smart_ana2001 | 05-07-04, 11:29 PM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-09-04, 11:07 AM |
| Re: حنان ..أنثي ولا دستة رجال .... ( ولكن ) ..!!!؟ | خالد الحاج | 05-13-04, 06:38 PM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-14-04, 09:39 PM |
| Re: حنان ..أنثي ولا دستة رجال .... ( ولكن ) ..!!!؟ | Nada Amin | 05-13-04, 09:50 PM |
| Re: حنان ..أنثي ولا دستة رجال .... ( ولكن ) ..!!!؟ | newbie | 05-14-04, 07:37 AM |
| Re: حنان ..أنثي ولا دستة رجال .... ( ولكن ) ..!!!؟ | manubia | 05-14-04, 08:50 AM |
| Re: حنان ..أنثي ولا دستة رجال .... ( ولكن ) ..!!!؟ | ودقاسم | 05-14-04, 09:24 AM |
| Re: حنان ..أنثي ولا دستة رجال .... ( ولكن ) ..!!!؟ | خضر حسين خليل | 05-14-04, 10:38 PM |
| Re: حنان ..أنثي ولا دستة رجال .... ( ولكن ) ..!!!؟ | Adil Kadees | 05-14-04, 11:51 PM |
|
| |
samo
فيس بوك
تويتر
انستقرام
يوتيوب
بنتيريست