|
|
 حنان ..أنثي ولا دستة رجال .... ( ولكن ) ..!!!؟
|
زمااااان ....
لمن جينا راحلين من الولاية الشمالية الى الخرطوم ..بي لوري نيسان .. قطعنا المسافة ...الف وشوية كيلو في 7 او 8 يوم .. نفس المسافة دي بيسافروها الان في 8 ساعات ..وما عارف سبب الفرق الكبير في الزمن بين السفر زمان وحسع ..هل تم اكتشاف طرق (اكثر اختصارا ) ام العربات بقت احدث ..ام المسافة انكمشت ..
وصلنا الخرطوم ..وسكنا في الكلاكلة القلعة ..والحلة كانت عبارة عن شليليات او عصابات ..كل الاولاد .(طبعا انا واخي البيكبرنى بي عام كنا شفع لسه) يعنى اخوي كان في اولي ابتدائي وانا كنت لسه مادخلت المدرسة ..كل اولاد الحلة كانو متكتلين وعاملين عصابات ..كل حلة فيها عصابة ..كان قنعان من روحك امشي للحلة التانية ..واول سنة كلها ونحنا دايشين ..محل مانقبل يمسكونا ليك ويكسرونا ..الوالدة لمن ترسلنا سوق الزريبة الجنب السهريج وجنبها كان في خلوه اسمها ود المريوم على ما اظن ..اولاد الخلوه ديل كانو صعبين ..وناشفييين ..لمن ترسلنا الوالده كنا بنتسلح بي طوب وسيخ ونبل حتن نمشي ,.. وبعد ده نجي مدقوقين ومدشدشين والخضار واللحمة ممكن يصلو البيت او نخليهم وقت المعركة وتقوم جارين صوووف . . كان في واحد من اولاد الحلة اسمو (ود الداية ) وامو لا داية ولا حاجة ..بس اسم ..اها الزول ده كان رعديد شديد ...وبيخاف من ضلو ..لكن ماكان مع أي شلة ..وارجل راجل ماكان بيقدر يلمسو ..ده لانو عندو اختو اسمها حنان ..شرسة جدا ..وكل اولاد الحلة كانو بيتدقو منها .. مع انها كانت في نفس عمرنا لاكن كانت شرانية ومعضلة كمان ..ولو واحد هبش ود الداية ...يكون يومو منيل الهبشو ده ..تمرمطو ليك في الواطه وتوريهو النجوم في عز الضهر ..يعنى الزول ده كان محصن ..
اتزكر مرة ناس ود الداية وبيتهم مرقو لي مشوار ..والبيت فاضي ..اها نحنا تلبنا ليك في البيت ..والتلاجة كانت في البرنده المفتوحة ...ولقينا ليك في التلاجه الفواكة الحلل الخضار ..وهاك يا خراب ..اول شي اكلنا ليك الفواكه جت ..والخضار لعبنا بيهو ..اما الملاح ناس الويكه والخضره ..بقينا نمسك الحلة وشوووو في السرير كشح ..وقمنا اتخارجنا ..بعد جو من مشوارهم الزوله دي عرفتنا ليك . كيف ماعارف ..؟؟.ولا كلمت زول ..بقت كل يوم تنفرد بي واحد فينا ..وشلاليت من طرف .. ويوم انا راجع من ميدان الكورة مغبر مع المغربية ..لقيتها ليك واقفة فى نص الطريق زي الاسد ..واول ماشفتها ...فوووو فحطت ليك ..وهى وراي ..والله جراية جري ..انا زاتى كنت فحاط شديد وسكتنى ليك ..ماقبضتنى الا جنب البحر ..والله شربتنى جنس كاسات ..تشيل وتغطسني في البحر ..لمن كوركت وجا لحقنى مزارع . .
.شوية شوية عرفنا انو الشغله دي كده مابتجي ..وانو لازم نعمل عصابة نحنا كمان .. ولازم نعمل تحالفات مع الناس البراهم زينا ....وعملنا عصابة وسميناها (اولاد النمر ) ماعارف ليه التسمية دى .. لكن اظن انو كان في مسلسل اطفال بالاسم ده فى الوقت داك ..اخوى كان هو زعيم العصابة.. وانا طبعا اخو الزعيم ..المدلل ..اها شويه كده وبعد معارك طاحنه مع العصابات الاخرى ..عملنا لينا اسم في الحله ..وبقينا مرييين .. ونمشي نتقدل في كل الحلل الباقية بدون ما واحد يعاين لينا ... بس ..الواحد مايمشي مطرف براهو ..ياويلك لو لمو فيك اولاد حلة ابكر او حلة السوق او اولاد البحر او ...دي اسامي العصابات ..وكلهم كانو بيلاوزو من حنان دى ..واذا لمو فيك الناس ديل مطرف ..والله الا يعرفوك بالهدوم الداخلية . .اها نحن بقينا الزولة دى الرئيس الفخرى للعصابة ..وبقينا ليك ود الداية اخوها ..عضو فعال في المافيا ..المصغره ..وبقينا الولد المابنقدر عليهو نمشي ننادى ليهو حنان ..وكده ..
لمن دخلونى المدرسة ..مدرسة العزوزاب الابتدائيه (بنات).. ايوه بنات .. لانو لمن جيت عشان يسجلونى في المدرسة ...لقو المدرسة بتاعة الاولاد قفلت ..يعنى قالو ما بنستقبل أي زول تانى .. العدد اكتمل .. اها مدرسة البنات متلصقة معاها طوالى ..ولقو ليك خانة فاضيه هناك ..وقامو سجلونا ليك نحن 10 اولاد في مدرسة البنات .. طبعا انا خرخرت خرخره شديده ..وقلت ..افو ..انا زعيم عصابة اولاد النمر المرتقب ..يختونى في مدرسة بنات ..؟؟ ورفضت ..وكل ما ابن عمى يجيبنى المدرسة ..اجري اخش مدرسة الاولاد ..والاساتذه يحنسو فينى (طبعا بيحنسو عشان لسة ما سجلت ولو كنت طالب ..كان اكلونى شجرة النيم كلها ) اصلو ابيت ..في النهاية رضخت للامر الواقع ..وبقين 10 اولاد ..كنبتين ..في مدرسة فيها 12 فصل بنات ..ولكم ان تتخيلو الحالة ...10 اولاد في وسط 1000 بت ...
اها بعد شوية اكتشفت ليك انو الشغلة بتاعة العصابات دى موجوده داخل المدرسة كمان ..يعنى وسط البنات .,.. هيا اهلنا ...عصابات بنات ..؟؟ في البداية ..بعتبار نحن اقلية ..البنات ديل مسكونا ليك معيييط من طرف ...يومى دقة .. ولي شلاقتى ختونى في نفس الفصل مع حنان زولتنا الزمان ...كانت محقرانه شديد ..والله كانت صعبه لي درجة.. انا بالتحديد. يومى تجلدني ليك جلد نضيف ..وكانت نااااشفه شديد ..لمن عقدتنى ليك ...اها نحن اتفقنا العشره اولاد نعمل تكتل ضد قوات العدو المتمثله في الالف بنت ..وبقينا نمسك البنات الصعبات ..الرؤوس الكبيره ....وننفرد بيهم واحده واحده ..في فسحة الفطور او لمن يفكونا (بيوت )اخر اليوم . وهاك يا جلد ...وجضمنا ليك كل البنات ..وبقي يتعمل لينا الف حساب..بس حنان دي ماقدرنا عليها ..وبقت لي عقدة في المدرسة كمان ..بتزكر في اليوم المحدد لي جلدة حنان ..كان في درس عصر اليوم داك ..وهى ماكانت بتمشي البيت لمن يكون في درس عصر ..يعنى بتقيل ..المهم اتفقنا 6 اولاد انو دى فرصتنا ولازم نادبها ..وحوالى الساعة اتنين ونص والمدرسة صااانه ..جينا داخلين المدرسة من البحر ..الكنا مقيلين فيهو ..واول ما شافتنا ليك ..جات علينا هى ..واتلمينا حواليها كلنا ..انا قلت ليها ..هوى انتى عاملة فيها راجل والا شنو ..؟؟ والله الليله حقك راح ..البيحلك مننا شنو ..؟؟ وهي ساكتة ساكت ..نحنا قلنا البت خافت ..الجنبي كان معاهو سوط ..وضربها ليك كده برااحه في رجلها ..جس نبض يعنى ..بس الزوله دى لفت عليهو ..وصااااج .. قطعت فيهو كف ..لمن صاحبنا اندهش ووشو بقي احمررر ..وختفت الصوت منو ..وناولتنى ليك واحده في نص راسي ..وادت واحد تالت بنيه في بطنو لمن قطع صوت .. وبس قمنا ليك صووووف ..جري ...وسكتنا ليك السته ..لحدى باب المدرسة ..
بعد داك عملناها زعيمتنا .. .. عشان نتقي شرها . حتى المدرسين كانو شوية كده بيهابوها ..لانها حقانية شديد ..متزكر كانت في مدرسة استاذه في المدرسة يعنى ..كانت كل يوم تجي وهى مجلطة وشها بالمكياج الاصفر والاحمر .. بشكل يوضح عدم معرفة باستعمال المكياج بصورة صحيحة رغم الكمية الكبيره من البودرة والالوان..اها قامت المدرسة دي عاوزه تجلد ليها كم بنت كده من ضمنهم حنان ..وكانت في يدها قايمة ليها حرارة ..والمدرسة اصرت لازم تتجلد في يدها وحنان تقول لا ...كان عاوزه اجلدينى فى كرعينى او زى الاولاد (الحركة بتاعة الكرسي) تجي للكرسي من الخلف ..من جهة مقعد الضهر ويقول ليك الاستاذ امسك هناااك ..في المقعد ..وطبعا المؤخرة بتكون مشدوووده ..سوط واحد تحس بيهو فى نص نافوخك ..المدرسة اصرت وهى اصرت ..قامت المدرسة ضربتها كف ..وهاجت ليك حنان ..ومسكت ليك المدرسة من شعرها وجرتها ليك ..و ..وعرفنا اليوم داك انو الاستاذه بتلبس باروكة ..الجوطة قامت ..وجا المدير وقالو يفصلوها ..تانى ابوها جا واتناقش وطلعو الاستاذة غلطانة ..وانتصرت حنان ..
وحنان دي كان كل التلاميذ بيخافو منها ..ويحترموها ..ويحبوها كمان في نفس الوقت ..شخصيتها كده حاجة مامفهومة ..قوية ..وحنونه ..حقانية لابعد حد ..وشرانية في زات الوقت .وبتحب تساعد التلاميذ البلدة في الفصل ..كل امتحان او اختبار كانت بتحلو لي كم واحد حتن تحل ورقتها ..ويوم التسميع كانت بتملى التلاميذ القصيدة او السورة .. عشان كدة كانت بتتدق كتير ..وفاااهمة ..كانت بتقول كلامات كده ماكنا بنفهمها ..ودايما كانت بتقرا ..24 ساعة بتقرا ..كتب غريبة كده ..احسان عبد القدوس ونجيب محفوظ وطه حسين .. بعد خشيت المتوسط وقرونا كتاب الايام بتاع طه حسين ..كنت بندهش لمن اتزكر الزوله الكانت بتقرا الكلام الغير مفهوم ده في الابتدائي .
لمن حصلنا سنة سادسة ..بقت تظهر وسط التلاميذ حركات كده ..بتاعة جوابات وفلان بيحب فلانة.. ولاننا عشرة اولاد قصاد 1000 بت كان طبيعي انو يتشاكلو فينا البنات ..يعنى اى واحد فينا كان قصادو مية بت ..انا براي كنت بحب تلتاشر تلتاشر  ..ازهج منهم احب تلتاشر غيرهم ...نعييييم مش كده ..؟؟ حنان الوحيدة الماكانت راكبة ليها الحركات دى في راسها ..وكانت تستغرب فينا ..وتضحك فينا مع كل شاكوش بل مرات كانت بتدينا نصايح في كيفية ممارسة هذه الاشياء باحترافبس هي اصلا ماكنت بتخش في الحاجات دى .. ممكن لانو ماكان واحد فينا مالي عينها ..انا الشليق قلت احب الزوله دى عشان اكسر عينها .. وعشان اتحرر من سيطرتها على .وبينى وبين نفسي كنت مقتنع انها الاجمل في المدرسة ...وحقيقي كانت جميلة جد ..بس شراستها كانت بتقطي على الجمال
.بس يوم كده ..وكنا في رحلة لجبل اولياء كل المدرسة ..وفوق الاستراحة الفي الجبل الكبير داك مع المنظر الجميل للخزان.. كبيت ليها المكنة المجهزها لي شهر ..انا ..وانا ..وانا .. وانا اسك في النمل بي رجلى .. وهى تعاين لى سااكت ..بعد ماكملت كلامى بالتلتله ..قالت لى ..قلت شنو ..؟؟ وعيونا محمرة ..قطمت انا ومارديت .. قالت ..الحبة التقوم ليك في ..انا لمن احب احبك انت يا..وطاااخ بالشنطة في وشي ..انا تضايقت شديد ولزيتها ليك لمن وقعت في حوض موية ..وجات طالعه من الحوض وهاك ياشكل وياضرب ..والمدرسين جو جاريين وحلحلونا بالعافية ..والغريبه انها ماقالت سبب الشكلة .. والمدرسين لمن رفضنا نقول ..اليوم التانى طلعونا في طابور الصباح .. ورفعونى ليك بي اربعه كبببااار ..ومعط شديد والله كوركت جنس كواريك . .وهي جلدوها في يدها ورجلها واكلتهم بدون ما تتململ ..
ولحدي ما انتهينا واتخرجنا من الابتدائي.. وحنان دي ...في حالها ..لاتقبل الغلط ولا كلام الخمج ... واليرفع عينوعليها ..بتقدو ليهو ..ورغم كده كانت اولة الفصل .وكانت فالحة في أي شي ..اتزكر في الجمعيات الادبية ..كل يوم تلاتاء ..كانت هي البتقدم البرنامج ..ومرة الفت اغنية جميلة للمدرسين والمدرسة ..ولمن تطلع المسرح وتمسك المايك ..تتكلم كلام قوى ومرتب وبي لهجة صارمة ..كانت نجمة المدرسة بلا منازع ..بعد امتحان الشهادة الابتدائيه يوم النتائج ..كانت اعلى نسبة فى الدفعه ..بس ماجات ولمن سالنا قالو سافرت مع اهلها لاحد الدول الخليجية ..ابوها كان موظف فى الخارجية . وانقطعت اخبارها من ديك ..
بعد الابتدائي رحلنا الحاج يوسف . . لمن دخلت الثانوي (قريت الثانوي في 4 مدارس ..لانى كنت كل 6 شهور بنطرد من المدرسة وامشي اسجل في مدرسة تانيه ) ..قريت تالته ثانوي في مدرسة الشعب الثانويه .ببحرى .وبي سبب زحمة المواصلات الرهيبة ..قررنا ناجر حافلة من والى الحاج يوسف ..وبي سبب قلة ععدنا دخلنا البنات معانا .. شوية شويه دخلو معانا في الترحيل ده شلة من البنات ساكنات كوبر ..وبقو يترحلو معانا وكانو بيقرو في مدرسة بحرى الجديده بنات الجنبنا في شارع المدارس المتفرع من شارع المعونه ..طبعا في الحافلة قامت علاقات بين كل ضكر وانتاية ..الا وااحده كانت تجي تقعد جنب شباك وااحد وما بتتكلم حتى مع البنات .. وكل مرة الاحظ ليها ..واتمعن في تفاصيل وتقاطيع وشها الجميل الدقيق اقول البت دي ماغريبة . لحدى مايوم وانا قاعد في الحفلة منتظر الباقين براي جات ركبت ..واتململت شوويه كده ومشيت قعدت جنبها ..اسمك منو وساكنة وين وبتقري في سنة كم و..و .. وهي تعاين لي ساكت ..وما ردت نهائي ..احترمت نفسي وقمت زحيت منها ..جات واحده من البنات البعرفهم كويس وسالتها منها ..قالت لي دي اسمها حنان ...ابوها سفير ..ساكنة كوبر ..قلت ليها حنان منو ..قالت حنان فلان الفلانى ..لاحولاااا ..ياهى زاتها سبحان الله ...نفس الزولة لا اتغير الشكل ولا النظرة المرعبة .. وللاسف ..من تاني يوم ماركبت الحافلة ..
وبقو يرحلوها بي عربية خاصة براها ..وتانى ماشفتها ...
ونواصل ..
|
|
 
|
|
|
|
|
| العنوان |
الكاتب |
Date |
| حنان ..أنثي ولا دستة رجال .... ( ولكن ) ..!!!؟ | samo | 05-01-04, 08:56 PM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-01-04, 09:26 PM |
| Re: حنان ..أنثي ولا دستة رجال .... ( ولكن ) ..!!!؟ | Osman Hamad | 05-02-04, 00:39 AM |
| Re: حنان ..أنثي ولا دستة رجال .... ( ولكن ) ..!!!؟ | hala guta | 05-02-04, 01:10 AM |
| Re: حنان ..أنثي ولا دستة رجال .... ( ولكن ) ..!!!؟ | مريم بنت الحسين | 05-02-04, 01:24 AM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-02-04, 09:23 AM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-02-04, 09:33 AM |
| Re: حنان ..أنثي ولا دستة رجال .... ( ولكن ) ..!!!؟ | doma | 05-02-04, 12:45 PM |
 Re: حنان ..أنثي ولا دستة رجال .... ( ولكن ) ..!!!؟ | haneena | 05-02-04, 01:12 PM |
| Re: حنان ..أنثي ولا دستة رجال .... ( ولكن ) ..!!!؟ | حمزاوي | 05-02-04, 01:47 PM |
 Re: حنان ..أنثي ولا دستة رجال .... ( ولكن ) ..!!!؟ | samo | 05-02-04, 08:47 PM |
| Re: حنان ..أنثي ولا دستة رجال .... ( ولكن ) ..!!!؟ | Abdel Aati | 05-02-04, 11:37 PM |
| Re: حنان ..أنثي ولا دستة رجال .... ( ولكن ) ..!!!؟ | Osman Hamad | 05-03-04, 00:19 AM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-04-04, 07:31 PM |
| Re: حنان ..أنثي ولا دستة رجال .... ( ولكن ) ..!!!؟ | Nada Amin | 05-07-04, 08:58 PM |
| Re: حنان ..أنثي ولا دستة رجال .... ( ولكن ) ..!!!؟ | smart_ana2001 | 05-07-04, 11:29 PM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-09-04, 11:07 AM |
| Re: حنان ..أنثي ولا دستة رجال .... ( ولكن ) ..!!!؟ | خالد الحاج | 05-13-04, 06:38 PM |
| Re: حنان ..أنثي ولا دستة رجال .... ( ولكن ) ..!!!؟ | samo | 05-14-04, 09:39 PM |
| Re: حنان ..أنثي ولا دستة رجال .... ( ولكن ) ..!!!؟ | Nada Amin | 05-13-04, 09:50 PM |
| Re: حنان ..أنثي ولا دستة رجال .... ( ولكن ) ..!!!؟ | newbie | 05-14-04, 07:37 AM |
| Re: حنان ..أنثي ولا دستة رجال .... ( ولكن ) ..!!!؟ | manubia | 05-14-04, 08:50 AM |
| Re: حنان ..أنثي ولا دستة رجال .... ( ولكن ) ..!!!؟ | ودقاسم | 05-14-04, 09:24 AM |
| Re: حنان ..أنثي ولا دستة رجال .... ( ولكن ) ..!!!؟ | خضر حسين خليل | 05-14-04, 10:38 PM |
| Re: حنان ..أنثي ولا دستة رجال .... ( ولكن ) ..!!!؟ | Adil Kadees | 05-14-04, 11:51 PM |
|
| |
samo
فيس بوك
تويتر
انستقرام
يوتيوب
بنتيريست