|
|
 المسطول الميكانيكى
|
ياخ لو سمحت ممكن تودينى معاك السوق الشعبى ام درمان ؟
السواق : ممكن
المسطول : لكن انا ما عندى قروش !!
السواق : ياخ ما مشكلة اركب ساى
المسطول : بالمناسبة نحنا فى المهنة بتاعتكم دى زاتا
دخل المسطول جوة الحافلة ولخبط ليك الركاب واحد واحد
شوفو يا شباب ممكن اقرأ ليكم بعضاً من كتابات حبوبة بت الكلب ؟ ..... لا حولة ولا قوة الا بالله !! يا زول دة كلام شنو البتقول فيهو دة ؟ .... اى زول ما عاجبو كلامى دة ينزل هنا ويدينا الحساب ..... تدخّل الكمسارى وحسم القضية يا ابو الشباب انت الركبك الحافلة دى منو ؟ ... لكن دى قصة عجيبة ياخ , انا من قبيل راكب فى حافلة قايلا ركشة ؟
وطنّش الكمسارى من جديد .... بس لحظة اربط نخرة السفنجة دى واواصل ليكم القصاصات التى تنضح ألقاً من رؤية غبارية اكل عليها الحمار وشرب .... يعنى زى تقوم تقول جبت الجرابوكس وفرتقتو حتة حتة وخليتو يتكلم فى الواطة براهو زى المجنون , فيكم واحد يدينى مفتاح لكلمة متقاطعة زى حبوبة مرّة قلت ليها ادينى كلمة بمعنى يكره قالت لى يكجّن يا ولدى .... لكن حبوبة بتبالغ عدييييل كدة .... بالمناسبة منو الفيكم قال لى انت الركبك الحافلة دى منو ؟ ... ياخ دة زول واعى كدة ؟ الواحد تلقاهو كلو زيت فرامل يقوم يخلص العربية لو لابس شياكة زييى كدة سيهزم فيك الموضة بالدبرسة .... رجاءاً مافى زول يضحك عشان الضحك داخل الحافلة على مسئولية صاحبه ... يا السواق ممكن تشغل لينا شريط السكارى الستة ؟ ... يا ابو الشباب اسمها السهارى الستة .... ياخ نحنا بنقول ليها السكارى انت مالك ؟... انتو منو ؟ ... نحن فى مدنى ... بالله انت من مدنى ؟ .. ايوة من مدنى ... وين فى مدنى ؟ ... مدنى حى الباعوضة .... اسمها عووضة مش باعوضة ..... خلاس انا زهجت من تعريفكم لما تحاولون ان تجهجهون به لغتنا التى نحب ...بعد دة ممكن اقرأ لكم من دفاتر حبوبة بت الكلب ... وهى باللغة العربية الفسحة .... زى تمشى للدكتور ويقوم يقول ليك هاك الفتيل دة وجيب الفسحة هنا وبعد الكشف عليهو يقوم يقول ليك بولك دة فيهو قندران يعنى المسألة كلها لغة فسيحة ..... ودة المدخل للقصاصات يا ناس الركاب ...
عنتر .. عنتررررر ....ايوة يا عبلة ... عبلة ... اين كنت يا عنترررر ...كنت فى الصيد يا حبيبتى .. كنت فى الصحراء امارس فروسيتى يا عبلة .... ياخوى فارس الصحراء الليلة اللاندكروزر ... بعدين حكاية فارس مفلّس دى ما بتخارج معاى يا عنتررر ... انت لازم تدخل السوق ... سأدخله يا عبلة وسأثبت لك اننى جدير به .... وبعد شوية حبوبة قالت عنتر بقى يبكى ... وااامصيبتااااه ... واامصيبتااه ... عنترر يبكى ؟ ... ياخ زحّو لى كدة خلونى اجوعر كلو من عبلة بت الكلب دى غطست حجرى ... يا عنتر يلا معانا للسجن ... بعدما كنت بتكتب شعر بقيت تكتب شيك طائر ؟ ... وااحراستااه ... يا جماعة اعملوا لى كشف عشان اطلع منها ...
|
|
 
|
|
|
|
|
| |
alfatih
فيس بوك
تويتر
انستقرام
يوتيوب
بنتيريست