|
|
 حميد كمان وكمان مهداة إلى أبويسرا وأبوعثمان والأبنوسة وبكري وإليكم جميعا
|
في إطار توثيق تجربة هذا المبدع الجميل محمد الحسن حسن سالم، والتي وبعد إلحاح قد شرع بالفعل في إصدارها في كتيبات، واجهته ونحن معه أنه لا يحتفظ بنصوص مكتوبة، وقد بذل فيها نفر كريم من اصدقاء ومعجبي حميد مجهودا في تفريغها من أشرطة، وقد سبق أن قمنا بهذه المحاولة إبان فترة الديمقراطية، وتخيلوا أنني إكتشفت وقتها كم لهذا المبدع من قدرات على الإرتجال بالإضافة للنص الاصلي وهو على خشبة المسرح، وما أكثر ما وجدت أن نصا قد قرأه في كوستي برؤية وإضافات تختلف إلى حد كبير عن النص الذي قرأه في ود مدني، وخاصة نص خطابات ست الدار بت احمد فقد سمعت له قراءة تحوي أكثر 20 تلغراف متبادل يشرح فيهم حميد كل معاناة وجمال الإنسان السوداني
إليكم جميعا أهديكم هذا النص الذي اعتقد هناك كثيرين لم يقرأوه أو حتى يسمعوه، ولنواصل مشروع جمع تراث هذا المبدع، وأدعو الأخ بكري بإعداد ملف خاص لهذا الشاعر وأنا على إستعداد أن آتيك بالإذن منه وبما يتجاوز الخمسين نص له
سلامات يا أحنَّ الناس
سلام ما سلموا العبّاد أواخر الليل قليبن حاس .
سلام والفيها شن بوفيها وإنت حجابي والوسواس ..
سلام ما خشَّ خيط النور على إبر النهار ومقاس
مشاعر قلبي عند زرزور يلاوي الريح بلا أنفاس .
يلم الصور يسوِّي قصور وما من خرطة ما من ساس ،،
يسايسوا الريح ، يساومو صريح ، مع إنو جريح وما ينساس .
سلامات يا أحنّ الناس ..
ما قهى القمر مبهور مع الوز النزل رقاص ..
وبين الصفقة والطنبور جزيرة غزيرة بالإحساس .
بلدنا متور ومو عتمور أرضنا قريرة مو حصحاص .
إذا إنسقت القلوب البور يشب شدر الولف ميّاس .
ياالجرف البعد عشرو ودبش وكرو وشدير الفاس
نزل بحرو الطلق ضهرو ،، وفتق ظهروا الحلو الأنفاس .
سلامات يا أحنّ الناس ..يا درة ،، قانقوليس ،، أناناس .
سلام والغربة لافي مدر فكر تحراها لاب تنقاس ..
قدر والفيهو ما كسناهو وين بعد الوطن بنكاس
يا حاحاي مسور الغير مسورنا الطير عليها كباس ..
سمانا شتا وهجير مطِّير بحرنا يحيِّر الغتاس .
إن قلت النخل في نوري جنة يقوقي فوقه دباس .
وإن جيت للسهل باللوري تسري ليالي لا آخر كاس .
خيرنا كتير وكان بيطير دي عين والله ما هو يباس .
إحنا أسياده وإحنا بخير ،،، ولا تقولي الزمن عاكاس ،،
تمرنا ولا حلاوة الغير فقرنا ولا غنا الإفلاس .
دلقاً بالعرق ينبلَّى يلبك في الضهر والراس ،،
ضارب في الشمش ينقلَّى أرفع هامة وأحلى لباس
ولا بدّ الشبك تنحلّى يوم الناس تقوم هي الناس ،،،
والينعلَّى ماب يندلَّى لا ننذلّه لا ننداس ..
يا رسن الأمل عنْتِلِّي ساب الحلي ركب الباص ..
وين يلقى الأهل والخلِّي لو لمَّ الدهب والماس .
يا عنتلي كان ودناس ،،
كان سواي وموحداث لي ضهر الحبيب حرَّاس
ولي أتر البغيب قصَّاص تقلتو تخفف البكيات ،،
تتقل خفتو الأعراس ..
نفير للقلي وحدو نفير لمينة بيت مرق رصَّاص
كان عنتلي ،، علِّي آناس ،،
وكت ضحكةْ سترتو بكت ...
سكت منو وليه كان ونَّاس .
صحينا مع الدغش ذات يوم تبنا رقابنا ما من راس ..
حطب حتى الكلام ده حطب ،، حطب والحاطبو داسْ الفاس ..
تعب حتى السكات دا تعب .. تعب والتاعبو حاس الساس ..
يا عنتلِّي بير الحلي صد للحلي يابسي يباس ..
ويتلفت تميره تملِّي ماك واعد الصبر بي راس
روقي عيوني لا تنبلي بالدمع .. الدمع منقاص ..
لي صبراً حبيبة فضلِّي ،،درَّابة وبحر تنماص .
صلِّي على البلد بعد الله .. صلُّوا على الحبيب آناس ..
سلام لامن نلم يا خلة في الحلي الحنيني خلاص ..
عليها سلام سلام وسلام .. سلام عَد فيها من أجناس ..
بلد ما فيها أيِّ كلام بلد بالصح بلد بت ناس ..
إذا ما أذَّن الآذان .. إذا ما رنت الأجراس ..
سلامات يا أحن الناس ..
سلام لامن عشم في الشوق يلمنا نحنا ياك وخلاس .
|
|
 
|
|
|
|
|
| العنوان |
الكاتب |
Date |
| حميد كمان وكمان مهداة إلى أبويسرا وأبوعثمان والأبنوسة وبكري وإليكم جميعا | nadus2000 | 03-30-04, 09:09 PM |
| Re: حميد كمان وكمان مهداة إلى أبويسرا وأبوعثمان والأبنوسة وبكري وإليكم جم | فرح | 03-30-04, 09:12 PM |
| Re: حميد كمان وكمان مهداة إلى أبويسرا وأبوعثمان والأبنوسة وبكري وإليكم جم | الليندي | 03-30-04, 09:33 PM |
| Re: حميد كمان وكمان مهداة إلى أبويسرا وأبوعثمان والأبنوسة وبكري وإليكم جم | Amjed | 03-31-04, 01:02 AM |
| Re: حميد كمان وكمان مهداة إلى أبويسرا وأبوعثمان والأبنوسة وبكري وإليكم جم | عبدالسلام الخبير | 03-31-04, 01:11 AM |
| Re: حميد كمان وكمان مهداة إلى أبويسرا وأبوعثمان والأبنوسة وبكري وإليكم جم | nadus2000 | 03-31-04, 10:24 AM |
| Re: حميد كمان وكمان مهداة إلى أبويسرا وأبوعثمان والأبنوسة وبكري وإليكم جم | أبو ساندرا | 03-31-04, 12:18 PM |
| Re: حميد كمان وكمان مهداة إلى أبويسرا وأبوعثمان والأبنوسة وبكري وإليكم جم | الزنجي | 03-31-04, 02:53 PM |
| Re: حميد كمان وكمان مهداة إلى أبويسرا وأبوعثمان والأبنوسة وبكري وإليكم جم | خالد العبيد | 03-31-04, 04:30 PM |
| Re: حميد كمان وكمان مهداة إلى أبويسرا وأبوعثمان والأبنوسة وبكري وإليكم جم | nadus2000 | 03-31-04, 09:09 PM |
| Re: حميد كمان وكمان مهداة إلى أبويسرا وأبوعثمان والأبنوسة وبكري وإليكم جم | nadus2000 | 04-20-04, 08:41 PM |
|
| |
nadus2000
فيس بوك
تويتر
انستقرام
يوتيوب
بنتيريست