في لقاء بورداب المنطقة الشرقية .. بالســــــــــــعودية .. تحدث الاستاذ جبر الله عمر الأمين الصحفي المخضرم والمحلل السياسي بصحيفة اليوم السعودية في محاضرة .. قيمة .. عن هموم الوطن .. وتداعيات السلام .. وتطرق .. الي التربية الوطنية .. لدي ابناء المغتربين .. وحجة الامر .. ان السودان لم يقدم لهم شي ..
واتوقف هنا ..
فالسودان .. وطن .. ويكفي .. اننا سودانيين .. ولا ننتظر القليل .. ولا الكثير ..
ولكن بمنطق أخر .. ماذا فعل الذين قدم لهم السودان كل شي .. ولماذا كل ما ذكرت جامعة الخرطوم .. اقترنت .. بسفرة الطعام الممدود .. وكباية اللبن الشب .. وخمسة وعشرون سنة او يزيد من الغربة ..
فيقولون انها السياسة .. وندخل في " جوطة " الديمقراطيين والعساكر .. لو لا عبود .. كنا ضعنا شمار في مرقة .. او العكس لا ادري .. ويانميري .. ضيعتنا .. وضعنا معاك .. وللترابي .. " اونكل توتو الشين ما عاجبنا ولا حاجتين "
وهذه الايام .. يطالعنا كل صباح .. مات الاستاذ .. عاش الاستاذ .. جاءت بنت الاستاذ .. بالله عليكم من هو الاستاذ .. وفي اي سنة جاء .. وماذا قال .. ووالله العظيم .. نحن لا ندري ولا ندري اننا لا ندري ..
سألني احد اخوانا العرب مرة .. انتو السودانيين بتحبوا السياسة .. انت من أي حزب .. فسارعت .. بدون لعثمة .. انا حزب قريعتي راحت .. ونطقتها له بلكنة فرنسية .. لكي يشعر بأهمية الموضوع ..
وقررت من يومها .. ان انتمي لاحد الاحزاب .. من باب .. الوضع الاجتماعي وكدا .. فوجدت حزب الامة .. قد توقف من سنة "دو" والاتحادي .. في المتحف .. والشيوعية .. انتهت في روسيا .. والبعثيين .. ماتو في العراق .. والناصريين .. مقرهم في حدائق بابل المعلقة .. وهي بعيدة بعض الشئ .. وحاولت ان ابقا كوز .. " عشان يدوني موتر " فرفضوني .. " رضينا بالهم والهم ما راضي بينا "
واقتنعت انني فاقد هوية .. ! واصبحت كل يوم في شأن .. فتارة .. ثوري انقلابي منغلق .. وتارة انفتاحي علي دول الشمال .. وخامسة .. انا افريقي .. وسادسة .. الله يلعن ابو دي بلد ..
أتدرون لماذا .. لاننا لم نجد القدوة الحسنة .. كل ما نسمعه .. تاريخ البطولات .. وربع قرن من الغربة .. وبيت ناصية .. وعربية كريسيدا .. وملاريا .. في كل أجازة في السودان ..
اخيرا .. خضر بشير .. مات من المرض والفقر .. مصطفي سيد احمد .. نفتخر بقبره في السودان .. بعد سنين الغربة .. وردي .. الله شافه .. الطيب صالح .. " طبعا انا معجب بيهو جدا ولحدي هسع ما قريت ليهو كتاب " .. الموصلي وتماضر .. اين انتم ..
وبعد دا .. برضو ما عندنا وطنية ..
عذرا جات كدا .. لعلها غير مفهومة .. ولكن هذا ما أردت قوله ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
humida
فيس بوك
تويتر
انستقرام
يوتيوب
بنتيريست