|
|
 الله لا كـسـَبـك يا التايـة .. يا أختي
|
أمي قاعدة تعوس في التكل .. أنا والتاية أختي .. والسرة خالتي .. قاعدين في الضل .. بنشرب في شاي لبن .. الزين أخوي رسلناهو يشتري لينا لقيمات .. ساعـة كاملة و ما جانا راجع .. بي شرمة الحيطة شايف ابوي .. يدو تمشي لي فوق وتنـزل .. يلم في الغنم عشان يسوقن للراعي .. أبوي كملان من لحم الدنيا ما بقدر علي قديم الغنم .. لكن أنا لو ما ضارباني الطورية في كراعي .. أكان تلقاني كارَي الغنم قدامي .. أوصلهم لي قدام الحلة .. جنب الطاحونة .. هناك تلقي اللمة .. أي زول دافر غنيماتو قدامو .. أنا مافي حاجة جابراني علي قديم الغنم .. الزين أخوي ممكن يقدمهن .. بس بتوديني شوفة وصال بت حاج اللمين .. أصلي بريدها بلحيل .. مما أخوها سافر السعودية .. وصال بقت تقدم الغنم
.. الزين أخوي لمن جانا راجع .. لقي ضل الضحي كمل .. لقانا جرجرنا عناقريبنا ودخلنا الراكوبة .. مد لي اللقيمات ملفوفة بي جريدة .. عاينت ليهو قوي وصريت ليهو وشَي ..من طرف لسـاني قلت ليهو .. أوكلن إنتا يا الأبله .. انشاءالله ينفعنَك .. في الوكت دا أمي جات مارقه من التكل .. شايله ريكة الكــسـرة .. في يدها التانية ماسكة جردل العجين .. التاية مسكت منها الريكة .. بسراع بسراع لفت ليها كم طرقة .. ختتم في صحن الطلس الكبير .. السرة خالتي اتناولت حلة الملاح من الكانون بي طرف توبـها .. كبتها فوق الصحن .. سـمعت بطـني كوركت .. أصلي بريد ملاح الشـرمـوط الأبيض شديد .. بمـوت فوقو بلحـيل .. ضربنا ضرب تمام .. أكـلتا لا من إدشــيت .. قشيت ايدي في طرف العراقي .. قلعت مركوبي و إتمددت في العنقريب .. جريت توب أمي ختيتو تحت راسي .. ما صحتني إلا الخلعة .. شـوفتا الناس كلها تكورك وتتجاري .. صـحت بي أعلي صـوطي .. الحاصل شنو يا ناس .. المـات منو ؟؟ موت شنو يا زول .. قول بسم الله .. دا عوض ود الشامي جا من السعودية .. وقالو جابلهو جواب من أخوك حامد .. طبقت مركوبي في يدَى وقمتا جاري صـوف .. لمان وصلت بيت ناس الشامي .. لقيت اللوري واقف يادوب .. مكنتو تقسـَم .. والناس تنـزَل في الشنط .. جا الشامي طالع جارَي ليهو خروف فحل .. تكاهو وضبحو قدام الباب .. حامد نطَ الخروف .. نحن نطينا من وراهو .. ادعَيت في سرَى وقلت .. الله لـينا بي حال عـوض .. قـعدت معاهم لمن الواطا ضلَمـت .. الناس اتسلسلو واحد واحد .. منهم الفات يينوم بدري عشان يمشي الحواشات بدري .. ومنَهم الفات يحضر المسلسل في بيت ود الشـريف .. عوض ود الشامي طلع خلَاني قاعد براي .. تاوقت ليهو .. شفتو دخـل الأوضة الورانية .. بعد وكت جاني راجع .. قال لي تعال معاي يا النجيض .. ساقني وراء الأوضة وقال لي .. حامد أخوك زين وايد .. و بسلَم عليكم .. رسل ليكم الكيس والجـواب ديل .. ابقي عشرة علي الجـواب .. فيهو ريالات قال ترسلو بيها أبوك الحـج .. الوكت ضايق .. إنتو من بكرا لازم تقومو الخرتوم .. ما خليت عوض يتم كلامو .. خـطفتا الجواب والكيس .. عايز أموت من الفرح .. يعني أبوي بـمشي الحـج .. ندق النوبات وناكل الفـته .. ويجينا راجع معاهو الشنط الكبار .. قمت جري علي بيتنا .. وأنا داخل بيتنا .. عتَرت لي عتـبة الباب .. ضربتني في نفس مكان ضربة الطورية .. لكن أكلتها ساكت .. وقطعـتها في حشـاى .. من الفرحة عايز أطير .. ما حسيت بالضربة .. لقيت أمي واخواني والسرة خالتي متلمين .. ما عارف السهرن لي قدر دا شنو .. قبال ما اصلن كوركت بأعلي صوطي .. أدوني البشـارة .. ردوا كلهم بي صوت واحد زي أولاد حاج الماحي .. بشارة خير .. يللا بشرنا .. رديت عيهم .. حامد رسل لي أبوي عشـان يزور بيت الله .. قال تجيبوهو للحج بسراع .. كلهم صنَو زي الكبت فيهم مطرة .. إلا الولد الزين .. قام ينطط زي الكديس ويكورك .. الحاج حجا وجا .. شراب البيـ.. نهـرتو فرد نهـرة .. ما خليتو تمَ كلامـو .. أخلاقي جات في نـخــرتي .. فنيت وراهو مركوبي .. ما تسكت يا .. ماتميت كلامي .. لمن شفت صـنة أهلي .. الزين جري واتضاري بي ضهر أمي .. شبت أختي في حلقي .. هـو متين أبوي بقي علي الحج .. حـامد دا مو نصيح .. الله لا كــسـَـبك آآ حامد آآ خوي .. أبوي شديد ونصيح .. عاوز تكتلو لينا .. الله يرحمك يا بـوي .. أهـو دي جـزاتك .. تبيع بقراتك وغنيماتك عشان تسـفَرو .. يـجي يسوقك للموت بي يدو .. أنا أتوهطتا في نص العنقريب وبقيت أعاين .. أمي ساكتة .. ما فتحت خشوما … ما قالت بغــم .. خالتى السرة كانت بتمتم .. ما عارفا بتقول شـنو !! .. لكن صرة وجيها والدميعات الجارية في خدها معناها انها ما عافية من حامد أخوي .. فجأة .. التاية أختي نطت من بمبرها .. دخَـلت يدها في الكانون وشالت الرماد .. كبـتو فوق راسـا .. و دفقت الباقي فينا .. الرماد دخل لي في عيني .. مسكت طرف توب أمي الكنت متوسدو قبييل .. قشيت بيهـو دموعـي .. التايـة نطت لي فوق .. لحدي ما راسـا دقَـا المرق .. بقت تسكلب .. يا حليلك يا بـوي .. يا الهداي ورضَاي .. يا المـا غلطَـا علي زول .. يا الدايرين يسوقوك و إتـَا لي هسع شديد ولضيض تقـدَم في الغنم و تشتهي ملاح اللوبـة .. حامد أخوي الله لا كــسَـبو .. عـايز يـيتمنا ويشـمَت الناس فينا .. أنا لمـان اتذكـر اليوم داك .. شـعرة جـلدى تكـلَب .. ما بعـرف أضـحك ولَ أبكي .. بالجـد بكـيت لمن جـو الحـجـاج راجـعين .. حتَي ما قـدرت امسـك النوبـة و أدقها .. قـدر ما حـلفوني بي اسـم الله .. أبيت أجي بي طرف الحلقة .. من اليوم داك .. ما مسكت لي نوبـة جلـَدتهـا .. ولا أبوي شاف ليهو عافية .. لا حامـد أخـوي رســل لينا قروش .. ولا رجـع مع أولاد الحـلة لمن حرب الخليج قـامـت و إنتهـت .. ومن يوم داك .. ما سـمعنا ليهو خـبر ولا أتـر .. الله لا كـســَبك يا التاية يا أختي
|
|
 
|
|
|
|
|
|
|
 وصحي الفأل في خشم سيدو (Re: Ali Alhalawi)
|
ali alhalawi
طبعا جميله ونجيضه و تشبه الطيب صالح..قبل كم يوم قريت ليهو النخله و دي اجمل حاجه قريتها بعدها..
وصحي الفأل في خشم سيدو
شكراا شديد.. حقيقي استمتعت بيها
| |
|
|
|
|
|
|
|
|
 مع الــف شــكــــــر (Re: Ali Alhalawi)
|
أم شباء ( إن لم أخطأ فى كتابة الأسم) .. صحيح بتمس الروح .. و مازالت الصورة موجودة رغم الدش و الموبايل
توما .. شكرا كتير على الكلام الحلو .. بس الطيب صالح تفرقنا عنه مليون سنة صوتية
شكرا يا عم تنقو .. كمان إسمك رجعتى سنوات لى وراء .. عمك تنقو بقى دكتور .. شال سماعتو و عامل زول .. جاتو العازة كشف عليها و قال عملية .. فى العملية العازة إتوفت .. عمك تنقو قعد يتلفت .. و الله زمن
| |
|
|
|
|
|
|
|
|
 Re: الله لا كـسـَبـك يا التايـة .. يا أختي (Re: Ali Alhalawi)
|
علي الحلاوي..
سلالالالالالالالالالام..
قريت ليك (الفكي) وقصتك العجيبة وإختيارك الطريف في أن تتحول إلي بقرة..
ثم قرأت لك وأنت تتحول إلي (كلب) قلت الحلاوي ده حكايتو شنو مع عالم الحيوان..
اليوم أقرأ لك وأنت تكتب بروعة عن التاية والأهل والحج..نفس روائي جميل وإختيار رائع للمفردات العامية.
تعوس.
التكل.
لقيمات.
كارَي.
عناقريبنا.
الراكوبة.
ريكة.
طرقة.
تعجبني روح النكتة والسخرية في سردك
| Quote: بس بتوديني شوفة وصال بت حاج اللمين .. أصلي بريدها بلحيل . |
| Quote: حامد أخوك زين وايد .. |
واصل تنويعك الجميل ويظهر إننا موعودين بكاتب متميز.
| |
|
|
|
|
|
|
| |
توما
طيفور
Tumadir
فيس بوك
تويتر
انستقرام
يوتيوب
بنتيريست