في لحظة قاسية فارقنا الوطن غصبا علينا خلينا ورانا الأهل والأحبة ورحنا في دورب مفتوحة ما ليها آخر كل شيء اصبح باهت لا ريحة ولا طعم مشينا في دروب الغربة وشربنا كاساتها المرة بقينا ناس أغراب في صحراء العدم لا أم تغمرنا بحنانا ولا الناس الحبيناهم شفناهم معانا سرقتنا الغربة وتاهت خطانا بس في لحظة حلوة طليت أنت يا جميل في عينيا إيقظت مشاعر فرح دفينة معاك حسينا الدنيا حنت علينا لما جابتك لينا قابلناك بلهفة وحنان ومشينا معاك سكة حياة جديدة بإخلاص وصدق توهناك في بحور الغرام اهديناك ورود وأحلى القصائد سقيناك أحلى كاسات العشق عشنا معاك بإخلاص وصدق خليناك تقول: انا في يقظة ولا حلم...؟ لانك ما كنت مصدق تلقى ناس يعطوك حنان زينا دارت الايام وفجأة إختفيت من حياتنا أسودت الدنيا في عينيا من جديد واكتوت مشاعرنا بنيران العشق غربتنا بقت غربتين غربة عن وطن وغربة عن عينيك يا جميل انت لو عارف حتسيبنا يوم ليه سقيتنا أحلى كاسات العشق ...؟ ليه يا حبيب الروح ...؟ أهو نحن ناقصين جروح ...؟ نحن ما خناك يوم ولا قصرنا في حقك لكن صدقني .. بالعرفناه فيك والعرفتو فينا ما بتلقا يوفيك الوصف حرف حرف زينا يا نور حينا بقول ليك مع السلامة ودواخلي بترتجف اعمل ليك أيه ...؟ والحياة مصرة كل يوم تعلمنا درس. الطيب الزين
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة