بسبب اقامتي وعملي في السودان لبضع سنين كان ولابد من استكشاف هذا البلد الكبير والعظيم وحابب انقل لكم بعض المعلومات اللي ممكن تأهل السودان لان تكون احد اهم البلاد في سياحه الطبيعه.
انا زرت كل المدن السودانيه الرئيسيه وكنت اتعمد اني اقود سيارتي بنفسي لاني كنت استمتع بالقيادة صراحة وسط الطبيعه. زرت بعض المدن زملائي السودانيين انفسهم وكذلك الاجانب ممن يعملون معي في جهة العمل مافكروش يزوروها واستغربوا جدا اني زرتها.
قدت سيارتي من الخرطوم جنوبا حتي الدمازين مرورا بسنجا وسنار وربك وكوستي واد مدني وشرقا للقضارف وكسلا وسواكن وبورتسودان. وشمالا لعطبره ومروي وكوش وحلفا وغربا للفاشر ونيالا ودارفور واللي ماعندوش فكره عن المسافات بين المدن وبعضها ادعوكم لفتح الخريطه.
اختلطت بالاعراق المختلفه واللهجات السودانيه المختلفه التي يسهل فهم بعضها ويصعب بل يستحيل فهم البعض الاخر. اكلت في بيوتهم ومن أطباقهم الشهيه. شعب جميل وطيب امام ابناؤه فرصه كبيره لبناء المستقبل. شعب متعلم جيدا ويحبون العمل ومايقال بخلاف ذلك اشاعات لا موقع لها علي ارض الواقع.
درجات الحراره تتعدي ال ٥٠ درجة مئوية ومن رحمة ربي بهم انه لاتوجد رطوبه مرتفعه بخلاف السواحل الشرقيه عالبحر الاحمر لدرجة ان مفتي الديار بالسودان كان يصرح لسكان الولايات الشرقيه بالافطار في نهار رمضان بسبب صعوبة الطقس.
البلد مليئه بالخيرات القويه وجاري استغلالها الاستغلال الامثل وانا متفائل بهم كشعب اعتز به.
السياحه الطبيعيه بدأتها بخروجي شمالا لشلال الصبلوقه مرورا بمدينة ام درمان ودي منطقه علي بعد ساعتين وربع تقريبا بالعربيه (دفع رباعي لاند كروزر) لان الطريق به اماكن غير ممهده والدخول في الصحراء. المنطقه جبليه جميله يقطعها نهر النيل وبسبب اختلاف المناسيب تتكون الشلالات. المنطقه بها كافيتريات كويسه واتغدينا هناك لحم الخراف والماعز المشوي (الشيه) وركبنا المركب في جوله نيليه بين احضان الجبال والصخور والزراعات. المنظر قريب من اسوان عندنا في مصر ولكن النيل هناك اكبر بكثير. بالمناسبه النيل الازرق والنيل الابيض يتقابلان في الخرطوم في منطقه اسمها المُقرن واحنا كمصريين بنقول عليها المُجرن.
بعد كده ظبطت ال GPS واتجهت شرقا في الصحراء ووسط الجبال ومن خلال مدقات وصولا لطرق ممهده لاصل لمنطقة اهرامات البجراويه. ايوه السودان بها اثار فرعونيه ونوبيه كتير ناس كتيره مايعرفوش عنها حاجه.
الأهرامات بتسمي (أهرام البجراوية) نسبة لقرية البجراوية قرب مدينة شندي اللي تبعد حوالي ٢٠٠ كيلومتر إلى الشمال الشرقي من العاصمة السودانية الخرطوم. أما اسمها العلمي فهو (أهرامات مروي) وهي من آثار مملكة نوبية عظيمة تدعى (مملكة كوش).
دي كانت اول تغطيه للسودان الجميل. انتظروني في تغطيات جديده لمعالم جميله وانشطة يمكن ممارستها عند زيارتكم للسودان.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أحمد حسن حبشي
فيس بوك
تويتر
انستقرام
يوتيوب
بنتيريست