وقفت تسلم من بعيد خاتة المسافات احتمال.. كاسرة المشاعر بي الحذر نص نص... نص ينزلق توب الغزل يكشف شموس ونص ترفع التوب تدرع رصاص الرغبة في عيون الحبيب... اللعبة في جدعة التوب بي كسل ترميه بين السما والأرض بين برتكانة وبين عسل.. وتقيف تسلم من بعيد... تكويك بي الشوق للمواني عارفاك مهزوم من زمان... عارفاك قابل للكسر... عارفاك من عينيك متيم بي زهرة القاش البنفسج وريحة الطين والحقول.. تديك هدية.. وتدرع التوب في حشاك.. تديك رضية.. هاك مني شي.. آه يا صبية.. عاين لكن من بعيد... دة وعدي ليك... أغزل نواصيك كل عيد.. من كل قراك الميتة يطلع قوس قزح... يخضر في الروح اليباس.. تدرع التوب بالنعاس.. وتبعد بعيد.... من غير كلام.. تبعد تجرك للمنام... لا انت ميت لاك حي... إنت زول.. زي أي زول... زي أي زول...
---- الخميس 15 أغسطس 2019
--- سفر الرؤيا- --- قالت لي: (بهديك وطن... يحميك من برد الصقيع الفي المدن).. القلب رفرف..احتشد.. بعدين ... رطن...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة