الرياض *مدخل أول*... سيدنا سعيد بن المسيب رضي الله عنه كانت عندُو بنت جميلة جداً وورِعة وفقيهة إسمها (الرباب)، زينة بنات المدينة المُنورة بلا منازع... والكُل يتمنى الزواج بها لحسنها وأدبها وحسبها... وهي صاحبة التساؤُل الدقيق عندما قرأت قول الله تعالى: (ربَّنا آتنا في الدُنيا حسنة وفي الآخرة حسنة وقِنا عذاب النار)... صدق الله العظيم.. جاء أبُوها من لا برَّة لقاها حارساهُو ما نامت... قالت ليهُو يا ابوي أنا قريت الآية دي وعرفت حسنة الآخرة.. لكن حسنة الدُنيا دي شنوووو؟؟؟ قال ليها حسنة الدُنيا يا بتِّي الزوجة الصالحة للرجل، والزوج الصالح للمرأة😋... وهُنا تأكَّد بأنه لديه بنت توزن أُمَّة تَبْ... يقُوم الطاغية عبد الملك بن مروان يسمع بالرباب دي وسيرتها الطيبة من عيُونُو الفي المدينة، وتراودُو نفسُو الأمارة بالكدي والكدي و(يهِم) بتزويجها لأحد أبنائه السُفهاء!!! أرسل أحد خاصَّته الى المدينة لطلبها من أبيها، المُرسَال *(مُو المِريسيل)* عشان الفرق كبير وبتعرفُوهُو بعد شوية!!! قال ليهُو الملك المُبجَّل عبد الملك بن مروان بن الحكم بن العاص عاوز بنتك الرباب لي ولدُو وولي عهده الوليد!!! أها شِن قُولك؟؟؟ قال ليهُو قُول للطاغية بتاعك دا أنا ما عندي بنات لي زواج!!! ايه كيفِن آ مولانا وهُو عارف إنُّو عندك بنت جميلة وزينة يتمناها كل شاب.. ومرسِّلني عشان اخطبها!!! دا ماهُو رد يقُولُوهُو لي أمير المُؤمنين!!! قُلتليك يا ولدي ما عندي بنت قنعان منها ادخلها باب الامارة بي رجليها!!! دا آخر كلامك يعني يا حاج؟؟؟ أي ما عندي غيرُو وأقُول ليك كلام... بنتي دي كان قطعتها قطعي قطعي ورميتها للكلاب في خُور جبل أُحُد آب أدِّيها ود الطاغية دا!!!👿 ومحل رقيقي التِتْقَطِع.. المُرسال بدأ في التحنيس والترغيب... ما عرف شي... شويي شويي بدأ في التهديد والوعيد.. وضربُوا الراجل الكبير دا 100 سوط في البرد ورشُوهُو بالموية الباردة.. وبرضُو رفض يزوجُن بنتُو!!! (مُوش قلتلكم ماهُو مِرِيسِيل)!!! أها.. لمَّن خلاص قنعُو منُّو خلُوهُو يسوُّولُو شنو بعد التعذيب دا تاني... الا يكتلُوهُو وهُم ماهُن ناقصين شي فدولتهم اصلاً تحكم بالحديد والنار والارهاب!!!😡 يمُر الزمن عندُو واحد من تلاميذو مسكين جداً وفقيرااان إسمُو ابن أبي وداعة... غاب من الدرس كم يوم... لمَّن جاء شيخُو سعيد سالو.. مالك ليك كم يوم غايب من الدرس... انشاء الله عافي؟؟؟ قال ليهُو والله زوجتي اتوفَّت وكنت مشغول في العزاء.. نان آ ولدي ما كان ترسل لينا نجي نشارك في الدفن والعزاء معاك.. والله يا شيخنا ماني داير اتعبك وهسع تراني جيتك تعزيني واواصل معاكم دروس العلم... بعد الدرس انتهى قال ليهُو يا ولدي رايك شنو اعرِّسلك بنتي الرباب؟؟؟ رباب شنو يا مولانا وانا لا املك غير درهم ولَّة درهمين بس!!! ديل مِي ياهِن البركة ذاتها يا ولدي؟؟؟ عقد ليهُو على الرباب وتم العرس بالدرهمين ديل وعاشُو في أحسن حال💝... *مدخل ثاني*... يحكي لي احد الاخوان مشى تم زواجُو قبل فترة في السودان وجاء راجع... قال لي والله يا جمال العرس بقى مُكلِّف خلاااااااااس... تتخيَّل ايجار الصالة البيتم فيها العرس بس بي 180 ألف جنيه بي عشاها وفنانها!!! يواصل في حكيهُو بي حُرقة... كبيت القروش ديل في الصالة وتميت العرس وبعد اجازتي تمت رجَّعت العروس لي بيت اهلها وجيت مسافر.. أها جيت بي جاي (علي شقاوتي) لقيت وظيفتي سعودُوها.. هسع ان كان دخَّلت القريشات ديل في أمجادايي ولة رقيشة كدي ساكت ما كان سترت حالي؟؟؟ واسيتُو المسكين بي حنيَّة (يا حليلُو)😿 ضيَّع شقى عمرُو في ليلة صالة وترك عروستُو وحلُوها بي غادي وجاء بي جاي لقى نفسُو بلا شغل، وقلتليهُو الله يعوضك آ اخوي المال كتيرُو رايح وقليلُو رايح البركة في بسطتك دي وفي فرفشة زينة الشباب الانبسطت وسط زميلاتها وحسستها بانها ملكة زمانها وما نقصت ليها فرض!!😋 وربنا يبارك في ايامك تاني القروش بتلمَّهِن... يا ربي اليمنع شنو الناس تبدأ هذا الرباط المُقدَّس ببساطة مُباركة وتترك هذا الجَخْ والفشخرة والشُوفُونية والمُزَابَاة بالصح وبالكضب خصوصاً مع الوضع الاقتصادي المتردي دا؟!🙉 عناية أولياء الامور... يسِّرُوووووو فالعنوسة تطل بظلالها على كثيرٍ من البيوت... فاتقُوا الله في أبنائكم وبناتكم🙈... عناية عُلماء الأُمَّة... اهتمُّوا في خطبكم بفقه السلُوك والأخلاق لتصحُو الأُمة من هذه النفخَة الكضَّابَة! عناية حيكُوتنا المُوقَّرة مع الرأفة... في حال تاهَ ولي الأمر حول رغباته المُبالغ فيها وزاغَ العالِم من واجباته تدخلُوا يرحمكم الله بسنِّ القوانين المُيسِّرة للزواج بدل المثنى والثلاث والرباع الشغالين فيها دي ومُو سادَّالَها فَرَقَة😡... . . . # *قال رسول الله صلى الله عليه وآله وسلم: أَعظم النساء بركة أَيسرهن مؤنة*...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
جمال أحمد الحسن
فيس بوك
تويتر
انستقرام
يوتيوب
بنتيريست