|
|
 باختصار : كيف كان حال البلد الأمني والاقتصادي قُبيل 30 يونيو 89 ؟ بقلم راشد يحى مدلل
|
03:01 PM July, 02 2017 سودانيز اون لاين
مقالات سودانيزاونلاين-phoenix Arizona USA
مكتبتى
رابط مختصر 
المهم ياشباب
وقتها كُنت صغير لكين ما صغير شديد يعنى بتذكر تفاصيل كويسة ممكن تنحكى ... العام ٨٩ يونيو على نهاية الشهر يومها كنت بقضى الاجازة السنوية في قريتنا ومسقط راس والدي قرية ابوحجار الراقدة على ضفاف النيل والتابعة حينها اداريا لمُديرية النيل الأزرق , الدنيا كانت على بدايات الخريف وكان في مطرة كويسة مازالت زخاتها متواصلة حتى الصباح والأرض مُبتلة والخور الذى يجرى بجانب بيت جدى النور جارى ليلتقي بخور اكبر قليلا ويواصل مسيرة الى النيل , اذكر جيدا إنني ساعه ان سمعت الخبر المشئوم كنت أحاول صنع شيء من الطين اللزج الذى يُميز تلك المناطق قد يكون مُحاكه لبابور او تمثال بتاع طين او أي شيء جميل اخر لكنه مصنوع من طين حتما سألقيه من يدى حالما يُرسلون في طلبي لأكل العصيدة التي كانت تنضج على النار ......
.........
.............
..............
سمعت صوت المارشات العسكرية من راديو في بيت محمد محمود وعرفت ان ثمة انقلاب عسكري حصل، شعرت بغضب وحزن وخوف، نعم كُنت طفل لكنى كنت اعرف من والدى انو حُكم العسكر ما بتشكر وسبب الحُزن إني كنته خائف ان استطيع مواصلة لعب كُره الطاولة (البنق بونق ) في دار القوى الاشتراكية بالبراري , وخفت انو الجو المكهرب والسجن يرجع تأنى , لأنه في ناس كثار كانو يسجنوهم نفس العساكر بدون سبب , بتزكر تماما انو سالت اسالة كتيرة لى الناس المتحلقين حول الراديو لكين مافى زول كان مُهتم يجاوب على أسئلتي قدر اهتمامهم بإسكاتي ليتسنى لهم متابعه الاخبار العاجلة والبرقيات ......
حامية النيل الأزرق العسكرية ترسل برقية تأييد للانقلاب ,,,,, حامية الأبيض ايضاُ
الفرقة كم كدة مشاة ترسل برقية تأييد
اذكر جيدا إنني حينما لم أجد أجوبة للأسئلة اللتي تشغل تفكيري لحظتها انشغلت عنها بكتابة كلمة تأييد على الارض المبلولة وسالت من كان بجانبي ان كان يستطيع ان يتهجى الكلمة!
في انسان مُزعج من الحاضرين كان بقول انو لو ما الانقلاب ده كان المتمردين دخلوا الدمازين ويمكن يحصلوا ابوحجار او مدينة سنجه عشان كده الحامية ايدت الانقلاب وقال انو العساكر ناس منضبطين ....
بس انا ماكنت مصدق كلام الزول ده، لانى عارف وواثق انو نميري ما كان زول كويس ولا رئيس زين
لانو كان بسجن الناس ومنهم واحدين أصحاب أبوي وانا كنته عارف ومتأكد انهم ناس لطيفيين وما مجرمين ’ والدي
فكرت حينها إنني يمكن ان اسال الناس بتاعين الندوات او ممكن اسال الأستاذ في المدرسة .... لى شنو العساكر عملوا الانقلاب
على منتصف النهار وقبل مواعيد الصلاة أرسلوني للطاحونة عشان ادقق تحوصا للأيام الصعبة، الطاحونة كانت جمب المسجد واليوم جمعه وكان حديث الناس بعد الصلاة كله عن الانقلاب حاولت الاستماع لي كلام الناس الكُبار عشان اعرف اكتر، في راديو كان شغال بس غير برقيات التأييد ما كان بذيع حاجة حتى دي ماكنت قادر اسمعه كويس بسبب ضجة صوت الطاحونة، لكين لانو القرية هي احدى مناطق نفوذ حزب الامه لم يحظ الانقلابين بكثير أصوات داعمه للإطاحة بزعيم حزب الامه ورئيس الوزراء المنتخب
..........
..........
...........
لاحقا والدى ادانى سبب اخر لرفض الانقلاب لانو فهمني انو الانقلابين تابعين لي ناس الجبهة الإسلامية القومية وماكنت بحبهم وكذلك ماكنت برتاح لى أستاذ التربية الإسلامية الذى يُلزمنا بحفظ ما يستفاد من الحديث المكتوبة تحت نص الحديث الشريف ومكتوب فوقها للفهم والاستيعاب وهو نفس الشخص البيستغل حصه الدين و ويتكلم عن الجبهة الإسلامية ناس ( لا ولاء لغير الله ,,, ولا تبديل لشرع الله ) وهى من الشعارات التي كانت تملاء شوارع برى دعما لمرشح الجبهة عثمان خالد مضوي واذكر انى وصديقي أمجد حاولنا اذاله واحد من هذه الملصقات من مظلة المواصلات في محطه خمسة ونص قريب من بيت ال الأمين على خليفة اكبر رجالات الجبهة في برى , للأسف المُلصق كان مُلصق بى غراء قوى على حسب امجد , سمعت والدى يتحدث مع احدهم انو صحبان أبوي كان متوقعين الانقلاب ده وتكلم عن اتفاق ومظاهرات وسمعت عبارة" ميثاق قوى الانتفاضة" حينها عرفت انو صُحبان ابوى ماحيرضو بى الانقلاب وانهم حيكلمو الناس انو يطلعو مظاهرات تانية ويشيلو الانقلاب . حينها حسيت بصدق شديد انو الموضوع بسيط لانو قبل كدة الناس كلها طلعت الشارع ومن ضمنهم صحبان أبوي وانا برضو طلعت في المظاهرات ديك ةكنت بطلع في الشجرة اقطع فروع شجر النيم واجدعه للناس لاتقاء شر البمبان وكذلك خرجت والدتي ست الاستاذة والدتي اللتى كانت حُبلى بأصغر أخواتي عزه وقد ولدت بعد ذلك بقليل والان هي ام لطفلتين ولم يطلع الناس في مظاهرات شبيهه بتلك اللتى حدثت في ابريل ...
وهذا لم يحدث للان مش لانو القوى الحية من الشعب السوداني ومن ضمنهم صُحبان أبوي ولاحقا صُحباني انا زاتى بطل يتكلموا وتقاعسوا ... بل لأسباب اعقد من ذلك بكثير ولا يمكن كتابتها في ذكريات عن يوم مشئوم من تاريخ السودان.
,,,,,
,,,,,,,,,
لاحقا زاد الأمين على خليفة وبعض افراد ثراء على ثرائهم واستعادوا ثمن الغراء التقيل اللى دفعوه لتثبيت مُلصقات الجبهة. صار استأذى مسئولا كبيرا في وزارة التربية وصاحب مدارس خاصة. ضمن التلاعب اللذى طال جغرافيا وتاريخ الوطن أصبحت ابوحجار تابعه للولاية الوسطى ثم الى ولاية سنار قبل ان تنتقل اليها رئاسة محلية سنجه
.......
........
.........
لاحقا حاولت الإجابة على بعض أسئلة الطفل بداخلي.. الان أدرك ان العودة الى ما قبل الثلاثيين من يونيو مسالة احتج اليها للعودة الى زمن الطفولة الجميلة وكذلك يحتاج اليها الوطن .... تخيل ان يحكمك شخص واحد كل هذه السنين وغصبا عنك تمتلئي ذكرياتك مختلطة بما يفعله هو وتنظيمه بالوطن ... ياخ ٢٨ سنة ذكريات بايخة وماحلوه كتيره ياخ ولا شنو ؟
|
|
  
|
|
|
|
مقالات سودانيزاونلاين
فيس بوك
تويتر
انستقرام
يوتيوب
بنتيريست