سقوط جميع الاقنعة .................................................... كرستينا... جنوبية...نحيفة...طويلة ...بيضاء اكتر من البروف وبعداك هى جنوبية على حسب تصنيف الطيب مصطفى والبروف شمالى على حسب تصنيف باقان اموم...هى زنجية والبروف عربى...اتلاقينا فى معهد السودان القومى للغات(selti) حوالى الف من المترجمين الشماليين والجنوبيين...دربونا عشان القمة الافريقية التى عقدت فى الخرطوم سنة 2006...قاموا صفوا مننا البنات كلهن ...قالوا الافارقة ديل ما عندهم اخلاق عشان كدا بناتنا ما مفروض يشتغلن معاهم مترجمات ومرافقات...سبحان الله حتى كرستينا زاتها صفوها مع البنات بالرغم من انها افريقية وبتلبس بنطلون وفاكا شعرها...فى القاعة بنجلس مع بعض...قضينا اجمل 90 يوم...علاقتنا ما فيها دين...والدخل الدين شنوا؟...علاقتنا ما فيهوا لون...والدخل اللون شنوا؟...علاقتنا ما فيها جنس...والدخل الجنس شنوا؟...كان بتجينى فى قاعة الصداقة بالرغم من انوا ما شالوها معانا...بنشيل الوفود من قاعة الصداقة وبنوديهم الفلل الرئاسية ومن الفلل الرئاسية بنوديهم قاعة الصداقة...مرة واحد من الوفود قال لى ...دى القيل فريند حقك؟...قلت ليهوا نحن ما عندنا قيل فريند...دى زميلتى...كنا على تواصل ...تلفون كرستينا مقفول دايما...انفصل الجنوب...قرنق الشاب الكان بصلح لينا الدقيتال فى الازهرى عاد الى الجنوب...ميرى جارتنا الكانت ساكنة فى القطعة الفاضية الجنبنا والكانت عايشة على غسيل الملابس عادت الى الجنوب...الطيب مصطفى عمل ليهوا جريدة وسماها الانتباهة دعما للانفصال وقال الجنوبيين ديل ما بشبهونا ...باقان اموم عمل ليهوا جريدة دعما للانفصال وقال الشماليين ديل ما بشبهونا...سبحان الله كرستينا كانت بتشبهنى يا الطيب مصطفى ويا باقان اموم...طيب لو ما بنتشابه الخلانا نمشى مع بعض شنوا؟...الطيب مصطفى قال الجنوبيين ديل اخلاقهم ما زى اخلاقنا...سبحان الله قرنق كان اخلاقوا احسن من اخلاقنا...قرنق كان بصلح الدقيتال وبطلع فى راس البيت لمن الدقيتال يظبط حتى بعداك بنزل وبدون مقابل...ما كان بصلح للجنوبيين بس...كان بصلح للناس كلها...عمروا ما قال داير قرش...لمن قرر انوا يرجع الجنوب شباب الازهرى عملوا ليهوا حفلة وداع ابكت الازهرى كلها...ميرى كانت بتغسل باخلاق ...الناس كانوا بحجزوها وبعداك الطيب مصطفى قال الجنوبيين ديل ما بشبهونا لا خلقة ولا اخلاق...راح الجنوب لحالوا...راح الشمال لحالوا...الشمال باخلاقوا وعاداتوا...والجنوب باخلاقوا وعاداتوا...لا اخلاق الشمال منعت الشماليين من الاقتتال ولا اخلاق الجنوبيين منعت الجنوبيين من الاقتتال ...عدد الحركات المسلحة فى الشمال اكتر من عددنا لمن كنا فى معهد السودان القومى للغات...عدد الموتى فى الجنوب بايادى اخوانهم الجنوبيين اكثر من خيالك يا كرستينا...انتى وين يا كرستينا؟...وقرنق وين يا كرستينا؟ وميرى وين يا كرستينا؟...ماتوا بنيران صديقة؟...ابتلعتهم الحيتان وهم فى طريقهم الى اوروبا؟...ماتوا جوعا؟... لو كنتى حية يا كرستينا تعالى اسمعى الخبر دا...الحركة الشعبية اطلقت سراح 125 اسير...وصلوا عبر مطار الخرطوم...انتى عارفة الكان فى الاستقبال منوا؟...مافى حزب...مافى دين...مافى لون...مافى طريقة دينية...ما فى سياسى...مافى شعار...مافى نفاق...مافى كذب...الحضور امهات...خالات...عمات...اخوان...اخوات...ابناء...جيران...اصدقاء...سقطت جميع الاقنعة يا كرستينا...القناع الوحيد الذى لم يسقط هو قناع الانسانية...فى تلك اللحظة كانت كل اسرة فقدت ابن من ابناءها تمنت لو ان الدنيا كلها طائرة...طائرة تحمل كل الذين سقطوا فى الجنوب موتى واسرى وجرحى...اطلاق سراح 125 اسير اسعد جميع اهل السودان وفى نفس الوقت فتح جراح الاف الاسر التى فقدت ابناءها ...كل الاسر بتسال سؤال واحد...منوا الساق اولادنا للحرب؟وعشان شنوا؟ ... منوا الفصل الجنوب؟وعشان شنوا؟....
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عبير سويكت
فيس بوك
تويتر
انستقرام
يوتيوب
بنتيريست