قبل يومين من حلول شهر رمضان الكريم أرسل لنا المحامي خفيف الظل (شخص) مجموعة من النكات التي تصلح لخم الرماد السوداني بالكوريك، فقمنا بادخالها في ورشة ود الدابي لسمكرة النكات فطلعت بالشكل الآتي: رباطابي قاعد يبيع في عدة .... علينا جاي علينا جاي .... جايبنها بالطيارة وبايعنها بالخسارة ... جاتو مرة عايزة تشتري وبعد ما قلبت الحلل كلها اختارت ليها حلة واحدة عجبتا شديد وعاوزة تشتريها منو . قالت ليهو: والله يا حاج الحلة دي بي سماحتا الشديدة دي ما تستاهل النار. الرباطابي زهج من فلسفتا وقال ليها: ياخي ما مشكلة ادفعي لينا حقها ودخليها الجنة !!!!
في حملة رش الباعوض في الخرطوم بغرض مكافحة الملاريا... ناس المحلية جو في بيت عمك راجل كبير رباطابي ودقو الباب... الرباطابي فتح الباب ناس المحلية : ازيك ياعمنا .. انحنا جينا نرش الباعوضة في بيتكم عشان الباعوضة ما تاكلكم... عمك الرباطابي عاين ليهم كدا وقال ليهم: ياخي انحنا الباعوضة مي ماكلانا.. الماكلانا الحكومة.. اكان بتقدرو امشو رشوها !!!!
مسطول سوداني قال اكتر شي محيرني في النسوان في السودان الواحدة تشيل قلبك كلو كان حبيتها, وتلحس مخك كلو كان فكرتا فيها, وتشيل قروشك كلها كان خطبتها, وتشيل مرتبك كلو كان عرستها، وتشيل معاشك كلو كان متا, وتشيل حالك لو فلستا وبعد دا كلو تقول ليك باعلى صوت : نحنا النسوان ديل شن لقينا من الرجال غير وجع القلب والدوشة والحاله الزفته دي .... انعل ابو الزفت ظاتوووو!!!!!
اثنين سودانيين بتونسوا واحد سأل التاني انتا مرتك بتتعامل معاك كيف بالله ؟! الأول قال ليهو : والله مرتي بتتعامل معاي برومانسية وعايشين تماام التمام ومتفاهمين تمام التفاهم .... يعني في اطار تدعيم ثقافة التعاون الاسري بقوم بطلع السراير وادخلا براي وبمشي الشغل براي وبقضي كل مراسيل البيت براي ... ولتدعيم ثقافة العمل المشترك انا لو صحيت الصباح قبليها بعمل الشاي وبلبس الاولاد للمدارس ولو جيت من الشغل بدري في نفس الاطار الذكرتو ليك بغسل العدة واسوي الملاح وبغسل العدة تاني بعد الاكل ...... ولتدعيم ثقافة الحراك الاجتماعي لو هي طالعه لي ناس امها او للجيران بمسك ليها الشافعة الصغيرة ولو قالت لي معزومة برة، بمشي اوصلها وبرجع ليها لما تتصل تقول لي تعال رجعني ..... ولتدعيم ثقافة المبادرة بعمل الخير لو كنتا تعبان وقتا ليها اعملي لي كباية شاي وقالت لي ابيت بقدر مجهودات الامومه والحاجات دي وبعرف انها تعبانة وبعذرا واقوم اسوي الشاي براي واجيب ليها كباية شاي معاي.. واقول ليها اتفضلي يا حلوه !!!! الاول سأل التاني وقال ليهو : اها يا فرده وانتا مرتك بتتعامل معاك كيف بالله ؟؟! التاني قال ليهو: والله بصراحة كده انا مرتي برضو بتخوفني لكن انا ما بعرف ارتب وارص الكلام زيك كده!!!! ياخي انعل ابو الخوف ظاتووو!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
فيصل الدابي المحامي
فيس بوك
تويتر
انستقرام
يوتيوب
بنتيريست