يقول الملياردير العصامي السوداني في مذكراته الواتسابية: يا زول اقول ليك قول : ما تتعقد من أي عمل تافه فأي عمل ما عيب ، العيب السرقة .... جمع وتكويش الثروات الكبيرة بجي من الحاجات الصغيرة البسيطة المجدوعة في الواطة والبتجاهلوها الناس .... انا بديت بجمع الثروة بتاعتي لمن كان عمري سبعة سنوات ، كنت لمن ارجع من المدرسة للبيت القط الجركانات والصفايح الفارغة المجدوعة في الكوش وامشي ابيعا للحدادين .... الاولاد الصغار والناس الكبار كانو بضحكو فيني وسموني سيد الفارغة ..... بعد عمري بقى 30 سنة بقيت اكبر ملياردير في السودان!! شايف كيف؟!!! لمن توفى خالي الملياردير الما كان متزوج والكان مسؤول حكومي كبير من النوع الكاتل الجدادة وخامي بيضا ورثت ثروته كلها براي وبقيت ملياردير!! شايف كيف؟!!! آخر حاجة اقول ليك: لو انتا افتكرتا إني بقيت ملياردير من لقيط وبيع الفوارغ تكون اكبر داقس في العالم، ياخي ديك ايام الله لا عادا تاني .... تقولي منو وتقولي شنو، انعل ابو الفلس ظاتوو!!!!! فيصل الدابي/المحامي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة