في نهاية الخمسينات كنت اذهب مع اخي الدكتور الزراعي فيما بعد بدر الدين عبد الرحمن لطعام الفطور في مخبز جده الامين آدم وهو المخبز الوحيد في ملكال . وتصادف مشاركة تاجر وجزار من بحر ابيض امي ولكنه تفتيحة . فقال عني ....الولد ده من ناس امدرمان . وبالسؤال قال انه قد عرف من طريقة كلامي انني من ناس امدرمان . لاننا نقول حنمشي وحنقول ... الخ والعادة ان يقول الناس قديما بندور نمشي وبنقول الخ
البشيروجماعتوا كلامهم مع الشعب كلو حنعمل وحنثبت سعر الجنيه وحنوفر العلاج والكهرباء وحنجيب استثمارات وحننهي التمرد الخ . اهو كمان لواء ركن قبل يومين قدام الكاميرات بيردد حنمسح حنكسح . وانتو سبورة ما تمسحوها . الجابر البشير علي الكلام شنو ؟ في حد جابروا ؟ عميد في الجيش السوداني دقوه صعاليك في بلده ذي جمل العصارة . والبشير ولا اللواء قدر يقول ...عشا حبيبتا سار. عفيت من حرامي الحمير .
حلايب ما محتاجة لي عيتنوبة . امشوا سجلوا بلاغ في تمنة مجلس الامن . المصريين عارفين انه ماعندهم حق في حلايب . لكن البشير جبان والمعاه جبناء فلاحتهم في شعبهم . الاسد النتر والتور النطح يوم في يوغندة ويوم في اثيوبيا . كل ديكا في بلده عوعاي . دي دول الفيها مكفيها ومحتاجة للسودان ... يوغندة مع جيش الرب ... واثيوبيا لسد النهضة , امشي اوربا وتعال اتفاصح . النقوي التعبانة .. قالت للبشير بتجي الكلباش مستنيك . طار طيرة ابريش من الدريش . ملاوي ما عندها مصلحة مع السودان . الكلام ختتو علي بلاطة .
اليوم نقرأ عن مستشفي البشير في جبوتي . واطفال هيبان يدوهم البارود والقنابل . هذه مسخرة .
اقتباس
وعد وزير الدفاع السوداني، الفريق أول ركن عوض محمد أحمد بن عوف، بإكمال كل النواقص وتطوير مستشفى المشير البشير العسكري بجيبوتي، حتى يصبح أنموذجاً ليتمكن من تقديم خدماته للعسكريين والمدنيين، خدمة للشعب الجيبوتي الشقيق وتوفير فرص التدريب للأطباء.
نهاية اقتباس
اقتباس من موضوع حلايب نقاط للتفكير
عندما تريد ان تبني دارا، عليك ان تقدم شهادة بحث ووثائق من المساحة تحدد مكان الارض ومساحتها وخريطة . بعد اجازة دستور الامم المتحدة في اكتوبر 1945 انضم الي المنظمة اكثر الدول . وانضم السودان بعد الاستقلال ، وحددت الدولة وحدودها ومكانها ومساحتها . ولكل خارطة كود للحفظ . ولم تعترض مصر واعترفت باستقلال السودان . وانضم السودان بنفس الشروط الي منظمة الوحدة الافريقية وجامعة الدول العربية . واجري السودان ثلاثة انتخابات برلمانية بحضور من الامم المتحدة في حلايب . وقامت منظمة الصحة الدولية وبعض منظمات الامم المتحدة بزيارة حلايب كارض سودانية .
نهاية اقتباس
في مقابلة تلفزيونية يعترف المصريون بانهم وجدوا حلايب داخل السودان في خرط الامم المتحدة . وفي خرط بريطانيا وخرط امريكا . ولكن الاسد النتر وبقيه اسود الانقاذ لا يستطيعون الكلام وفي ايديهم احسن الكروت . مياه النيل وستة بليون متر مكعب تذهب الي مصر سنويا من ال18 بليون نصيب السودان من اتفقاقية مياه النيل ، وسد التهضة . البشير تمام اسد !
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة