شكرا الاخت نبرةوالله شرف عظيم لينا إنو يكون عندنا قامة علمية زى البروف وما ينسى اهله ويكتب شعر يحرك المشاعر من جوه الاعماق, ويحكى تاريخ النوبة احسن من اى موسوعة تاريخية. ويمسح التاريخ من بداياته لغاية احزاننا المعاصرة.
تصورى انا لاحظت المضايقات من الجماعة اياهم عندما انزل قصيدة فى كجبار بالعامية من اجمل ما يكون. جو يقولوا ليهو كجبار حجار وجبال ومافى ليها مستقبل فإتصدى ليهم الارو النوبى واعى وفاهم ومعاهو نوبيين ثانيين سكتوا المرتزقة دول وجابوا ليهم صور جناين كجبار وجمال الطبيعة على النيل.
وانا احتفظت بالقصيدة بتاعة كجبار. بالله شوفى البروف بيقول شنو:
كـجـبار قــرن وربــع مـن الصـمـود
**********************
ضراعى الينبتر لو إيديىّ ما تسندكـم
وعـقلى اليطـير أن ما دوام فـاكـركـم
لسانى الينقطع لو يوماتى ما مجدكـم
وقلبى الـيقيف إن أركانه ما جـمعتكم
ما من يوم إتولد جـواه كان مسكـنكم
وفى كجبار تـانى إتولد مـع وقـفـتكم
ما الليله الخلوق شهدت على عزتكم
شافت صـمود زى الأربعة الفادينكم
كان بلانه أو من دال الفيها سـاقيتكم
كان فريق سـمت مشكيلة أو دفويكم
ماالكل أرضـنا الياهـا أم تـاريـخكـم
تطير السـدود الما فيها شـى ينفعكم
كل ســد بنوه جـاب الدمار شـردكم
مية سـنة وربعا شر الجـحـيم شتتكم
ورغم القمع حـب الأرض صـمدكم
وبالغالى وعزيز كل نوبى بيآزركم
قسـم أولادكم الفى الغربة ماناسـنكم
ذرية عظام عزة اسود مسقية بنيتكم
أصل الحضارة وأسس العلوم منكم
إنتو الأسود وربى العظيم ينصركم
الله ينور طريقك يا بروف ويحفظك لينا ويرفع من مقامك اكتر واكتر.