|
|
 ... السودان ... جمهورية البيتزا والهوت دوغ .. ياسر قطيه
|
... السودان ... جمهورية البيتزا والهوت دوغ ..
ياسر قطيه .
وليس بالخبز وحده يحيا الإنسان .
لازم يكون معاهو بيتزا ... وهوت دوغ كمان ... والتحليه يا أيها الشعب البهم يجب أن تكون عصير أبو مصاصه .... إتفضلوا وبالهناء والشفاء وكلوا وأشربوا من طيبات الإنقاذ ... الله يخلى الحكومه .
حكومة الهوت دوق والبيتزا والعصير ابو مصاصه .
الإسبغيتى كيف ؟ ... الكافيار طيب ... لا خلاص
شبعنا .
لقد شبعنا .... يا ايتها الحكومه .
شبعنا طب... ( عاااااااااااااع ) الحمد الله ....
وبفضل حكومة البيتزا وثورة الهوت دوغ لم يبقى فينا ###### لا يقوى على النباح . حلاقيمنا بقت كبيره .... تكبير .... !
تهليل .... ! محمداً رسول الله . أوداجا منتفخه من الشحم واللحم وحلاقيم تريبل إكس XXXL
وصونى عقورك عنا إننا شعبٌ يهوى النباح وهذا ال###### شرانى ... أو أبتغى له أدبٌ كى لا يقوى على عضنا تانى !! .... الله أكبر .
تكبير ... !
تهليل .... ! .... والله يطول لينا عمر الحكومه . حكومة أرفع . حكومة ترفع الدعم عن الوقود لينخفض سعر طشت البيزا فى السوق المحلى . ولا البيتزا دى يا مولانا بتتباع بالعبار ؟ أفتونا يا من بيدكم مقاليد كل شىء .... البيتزا شأنها شأن مردافها المحلى الأقاشى توزن بالطشت ولا باللتر ؟ .... بلاش دى .... كنتاكى كيف ؟ .... كنتاكى بالجردل ! نحنا عايزين كنتاكى يا حكومه . ثم أنو كل يوم ملاح خضره ؟ أقصد كل يوم ومن سنة 89 هوت دوغ . ! والهوت دوغ لمن فاتهم الإستماع هو النقانق ! ينحدر هذا الطعام الشهى من عائله شهيره جداً فى دنيا اللحوم وهو إبن عم المارتديلا ! سمعتوا بالمارتديلا يا ايها الشعب البهم ؟ ... واقعين لى فى البيرقر . جنكم بيرقر .... الحكومه تبذل قصارى جهدها فى محاوله يائسه لتثقيفكم غذاءياً وإنتو أعمى ومسكوا عكاز ..... بيرقر بس ! ونكاية فى الحكومه عملتوا البيرقر ذاتو نوعين .... بيرغر عادى والتانى جامبو ....! أمه بهم بصحيح فى وجبه تسمى جامبو ؟ صدمتونا والله .... شرطوا عينا مع حكومة عصير مصاصه دى .... يصدمكم جامبو يريح الحكومه المسكينه دى منكم . حكومتنا السنيه .
تكبير ... ! ... تهليل ... ! والله أكبر . حكومتنا يا ايها الشعب البهم وفرت لكم وبفتحٍ من الله ورضاه ورضوانه طعام الجنة فى الحياة الدنيا ... فلماذ ترتفع اصوات الإحتجاج ضد قرارات رفع الدعم عن الوقود ؟ لماذا ؟ يعنى من عرباتكم الكابريس الثمانيه سلندر ولا من الكندكروزرات العندكم ؟ مشكلتكم شنو مع البنزين وحكومتوا ؟ لماذ تحشرون أنفسكم بين البصله ووقودها .... (( النووى )) . هل رفعت هذه الحكومه الطيبه المسكينه أسعار البيتزا أو النقانق فى السوق الشعبى ؟ أو لم يثبت سعر التداول الرسمى لوجبتكم المفضله من البيتزا بشقيها ( بيتزا إن وبيتزا هت ) فى بورصة قندهار وسجل موشر ثبات تراوح مابين 5 الى 9 فاصل 7 من عشره SD لمزيج الجامبو بحسب مؤشر نيكاي عند الإغلاق ؟ ... طيب الـــمـ .... فى شنو تانى ؟ ... ده شعب بطران يا حكومه يا منقه .
شعب جاحد يا حكومه مصاصه .
.... قلته لى فى سنة 90 الحصل شنو يا سعادتك ؟ .... سنة 90 دى يا مولانا إنته كنته شغال شنو ؟ وكم كان يبلغ سعر جالون البنزين وقتها ؟ والى ذلك الوقت المبكر من عمر حكومة الإنقاذ هذه والتى يؤرخ لها رسمياً الأن بتاريخ إكتشاف الشعب السودانى الفضل للهوت دوغ كانت الدوله والى ما قبيل سنة المفاصله بتفطر فول وتتغدى عدس وتتعشى بوش ! يحدث ذلك فى الوقت الذى يجوب فيه معاليكم أربعات العاصمه المثلثه وقبل أن تكون الأن العاصمه المخمسه بناس الأطراف ... ( ودى يا حسين خوجلى جاييك ليها قريب ) ... تفطر الحكومه فول ومعاليكم يقلب العاصمه رأساً على عقب بحثاً عن عصير أبو مصاصه بناءً على رغبه ملحه من إحدى كريماتكم .... لقيت بنزين لفيت بيهوا قدر وين ؟ ..... ما تقول لى كنته راكب المواصلات ! ... حيو معى هذا الرجل الشفيف والحساس والمكتنز بالعواطف الجياشه والذى سخر نفسه وبنزين الحكومه لأجل البحث عن عصير أبو مصاصه ... تهليل .... تكبير ! والله أكبر .... ( ده عصير ده ولا نقد الله يرحموا البفتشوا كده ده ) ... ونظراً للندره التى كانت تعانى منها كل متاجر الدوله وبقالاتها ودكانيها ومولاتها الفاخره فقد دعمت الدوله قطاع صناعة الأغذيه والذخائر .... ( ذخائر مين كمان الله لا كسب ناس نيالا الخلونا نهضرب كده ) ... دعمت الدوله وشجعت كبار وصغار المنتجين وفتحت أبواب الإستيراد عبر كل المنافذ البريه والبحريه والجويه بغرض سد العجز فى هذه السلعه الحيويه والإستراتيجيه ووطنت بذلك هذه الصناعه الأمر الذى أدى لحدوث إستقرار كامل لهذه السلعه ووليس ذلك فحسب بل تفنن كبار رجال المال والأعمال والمستثمرين فى هذا القطاع وأنتجوا العيد من الأنواع النادره ورفدوا الأسواق ومراكز البيع فى قلب العاصمه القوميه وفى الأطراف بتشكيلات رائعه وخلابه ولذيذه ومنعشه وباتت هذه العصائر الأن على قفى من يشيل .... ظهر الصن توب وظهر عصير لايكى والعصير بنكهة الشوكلاته ... وبنكهة الفراوله وكل عصير من هذه العصائر اللذيذه المنعشه التى تمدك بالطاقه الجباره ( إنيرجى ) يأتيك بمواصات فل أوبشن مطابقه لقوانيين المص الدوليه وبدون ( كربريتر عشان ما تتشرق ) ومزود بفتحة سقف ، ومكابح مانعه للإنغلاق CBS مع إيرباك للشارب والراكب الأمامى ، 36 صباب ومزود بمصاصه تعمل بنظام التوين تيربو وعصير إنجكشن بخاخ مع دبل كام شفط ... يعمل على رشح الوقود المصنع بنكهات طبيعيه مع ضغط ماكينة مص تبلغ قوة دورانها داخل العلبه عشره ألف RBM فى الدقيقه ! بهذا يا ايها الشعب البهم وبفضل حكومة السح الدح امبو هذه إنتقلنا ولله الحمد من مجتمع الكفايه فى تصنيع وإستهلاك العصير أبو مصاصه لمجمتع الوفره والرفاهيه..... تهليل .....
تكبير ... ! والله يطول لينا عمر الحكومه حكومة الهوت دوغ وجمهورية البيتزا الديمقراطيه والتى بفضل جهود أمين بيت مال المسلمين فى دار أبى الأرقم قفزنا بالزانه من عالم الطايوق والفتريته وملاح أمتكشو ومن برنامج العواسه الى عهد العصير أبو مصاصه ...
وكتر خير أمنا الحكومه والتى بعد وفات أبونا تفانت فى تربيتنا وبذلت فى سبيل تثقيفنا غذائياً الغالى والنفيس ... الله يطول لينا عمرك يا أمنا الرؤوم الحكومه ونحمد الله شبعانيين بيتزا طب وهوت دوغ وهارديز كمان أمنا مدلعانه دلع فى الدنيا ... ونحنا عافيين من أمنا الحكومه والله يقدرنا على رد الجميل ده وفى اقرب إنتفاضه .... على بالطلاق ما نقصر معاكم كلو كلو ... ما حنقصر أبداً وبالذات من البيتزا حتجيكم بيتزا دلفرى على بالطلاق وحتجيكم حمولة خمسين دفار جامبو بيتزا صافيه لا فيها عضم ولا فيها شق ولاطق .. ( دايرنها سبايسى ولا عادى ؟ ) ههههههههههه لا خلاص .... أطمئنوا وأرقدوا قفا لكن يا الحكومه عندنا طلب بسيط جداً والله وما دايرين نزعجكم أكتر من كده وفى الحقيقه نحنا شوينا مكسوفين ... لكن بعد العواسه دى كلها ... اقصد بعد الشبعه دى كلها من بيتزا لهوت دوغ لكرسبى وكورن فليكس وبوب كورن ما تموا جميلكم مره واحد وعشان نهضم ما تجيبوا لينا مريسه !!
شنو إستغفر الله وبتاع باقى ليكم شنو تحشونا بيه غير المريسه ! ... نعم دولة مشروع حضارى ودولة شريعه وهى لله ما قلنا حاجه أصلوا لينا الشغله وعندكم عدد مهول من ترزية تفصيل الفتاوى حسب الطلب وسموها لينا مريسه كولا .
الناس سبقتنا فى مجال التأضيل ده يا مولانا وأخرجوا مسرحية مكه كولا !! وبعد سنه حيظهر وبحسب فتوى دينيه صادره عن البنتاغون مشروب حلال إسموا ويسكى كولا ! وبيره كولا كمان ! ( لكن على بالطلاق إنتو الحيرتوا أوباما ذاتوا ديل حيقوا يأصلوكم ويسموكم (( درا ... كولا )) .. نشفتوا دمنا يا مصاصين ... مصاصيين الصن توب . توب كولا !
خلاص ياخى عسليه ! ادونا عسليه طيب ... قول دى مكروهه كمان ؟ خلاص يا مولانا خلاص بلاش الحاجتين ديل ... لما هى لله ولا للسلطه ولا لجاه امنا برب هارون وموسى ورضينا الحكومة أماً لذلك أدونا معاكم مصاصه !!
أدونا مصاصه .... نمص ونسقيكم . أدونا بيتزتكم نشوف ويعميكم وأدونا هوت ضوكم ندوق ونديكم . هههههههههه .... دنيا فرندقكس . والدنيا أم سفاريك كن ما كتلتك تؤريك . واللهم عجل لنا بقيام الساعه
[email protected]
|
|
 
|
|
|
|
فيس بوك
تويتر
انستقرام
يوتيوب
بنتيريست