وأنا اقول شوفتك وين؟؟

Quote: لكن يا وفو.. انا والله بكيت بكي معاكم! اتخيلت منظركم وانتو حاضنين بعض ونازلين وجعير شديد.. كانت لحظات عجيبه تنفع مشهد لى مسلسل مش كده ؟ اها طبعا ناس رشيده وصاحباتى كلهم كانوا بجونا فى الفندق وعرفته من جارتى انو الامور بدأت تهدأ وتاخذ شكلها الطبيعى وماما مشت الشغل . وفى يوم جاتنا رشيده فى الفندق وقالت لى الفاتح شقيقتهم اتقدم ليها عريس وهو قريبهم وقال مستعجل وطوالى الفاتح فكر وقال ليها خلاص نعمل دعوة الزواج لينا احنا الاثنين مع بعض وفعلا الموضوع ما اخذ كتير ورجعنا احنا من شهر العسل على شقة الفاتح الموجوده فى منزل الاسره وكان باقى لى حفل الزواج كم يوم واطرف ما فى الموضوع انو انا والفاتح ختوا لينا الحنه مع بعض طبعا دى ما بتكون حصلت الا لينا احنا انو العريس والعروس خاتين ليهم الحنه سوا وحفل الحنه واحد. بعد كده جا يوم الحفل وارتديت انا فستان العرس بس المره دى فستان احمر مازفاف بلدى وكده.وبعد انتهاء الحفل قلت لى الفاتح انا لازم امشى لى ماما قال لى الدنيا ليل طيب امشى معاك واصريت ان امشى لوحدى فالموقف اكيد ح اكون صعب بعد غيبة شهر العسل والفتره الاتقطعت اخبارى عنها . المهم مشيت وفتحت لى الباب واترميت فى حضنها وتانى دورنا فى الجعير وفى الاخير استغفرنا وما حبت تتكلم معاى كتير كل القالتوا لى بعد كده قومى امشى عشان ماتتأخرى ما قلب الام وكده . وفلا من اللحظه دى بقيت انا يومى امشى ليها فى المساء الى ان ينتصف الليل ثم ارجع. بعد كذا شهر حملت فى السيد ناجى وكلمتها فرحت لكن مابينت اها انا مازلت مواصله فى مشوار المساء الى ان مرت فترت الحمل وبقيت على ولاده وبدأت اتعب ومرات اغيب ما اقدر امشى ليها فاتصل بالتلفون , كل ده وهى ماراضيه تقابل الفاتح ولامره. وفى يوم الولاده اتصلت بها وقلت لها انا ماشه على المستشفى فقالت لى انا ح انتظر امام البوابه . وفعلا مشينا وكان معى اخوات الفاتح وبعض من جاراتى ولقيناها واقفه امام الباب طبعا هى قلبها رقيق جدا وبتخاف على شديد اه ركبت معنا العربيه ودخلنا المستشفى بعد فترة انتظار دامت ساعات شرف السيد ناجى طبعا فى الساعات دى انا ماعرفته الحصل بينهاوبين الفاتح شنو ؟ ما لقاء للاول مره بعد الزواج بسنه تقريبا . لكن عرفته من الفاتح انو جاب ليها كرسى ابت تقعد وجاب ليها اكل برضو ابت وحاجات ذى دى . المهم بعد الولاده (الله يسلمكم) طلعونى للغرفه وحقيقى شفته كمية السعاده فى عينها وهى تحمل ناجى بين يديها وهو عمره ساعات. وخرجنا تانى يوم الى البيت وطبعا مشيت بيت امى ما اول ولاده وكده. اها قام بعد يومين ناجى جاهو (يرقان )ورجعنا بيهو المستشفى وقعدنا حوالى اسبوعين الى ان شفى ناجى والحمدلله بعد كده طلعته على بيتى ولاول مره ماما تجى تزورنى وكان اسعد يوم ومن الزمن داك بقت ما بتتحمل يوم يمر عليها ما تشوف فيهو ناجى يا تجينا يا تتصل تقول جيبوى ناجى وطبعا الجمع والعطلات الرسميه بقضيها كلها معاها وبعد ثلاثه سنوات شرفت الانسه نشوة .وفى الفتره حدثت بعض الاحداث انو خالى الذى كان قاعد مع ماما فى البيت اتوفى واصبحت هى لوحدها فجينا انا والفاتح وقعدنا معاها وهسع ناجى ونشوة مالين عليها البيت ولما تجى من الشغل يستقبلوها بفرحه بالغه وهى ايضا دائما ما تحضر وتحمل لهم معها الهدايا ويكون الجميع فى فرحه غامره. وتوته توته خلصت الحدوة واتزوج الشاطر (الفاتح) ست الحسن والجمال (وفو) وعايشين فى تبات ونبات وخلفوا صبى وبنيه الله يخليم ويدهم العافيه. اها انا تحت امركم فى اى سؤال اى استفسار اى تعليق ودمتم ... وفو

يا سلام عليك يا وفو..
عارفه بقيت ماعايزه الحكاوي تخلص!
وحاسه تماما باحساسك واحساس والدتك والفاتح..
عمق علاقاتنا العاطفيه يقوي ويزيد بما نمر به نحن ومن نحب..
فان ضعفنا ورسبنا في امتحانات الحياه والمواقف التي تمر بنا..
فهذا يعني أن الحب لم يكن حقيقي..أو كان كافي ليواجه المتاعب ويتصدي لها..
أعتقد ان العشره التي تنشا بعد كل هذا الحب الذي جمعكما..هي أنضر عشره..
والعمق فيها العلاقه مختلف تماما من العلاقات الزوجيه الهامشيه عند البعض الآخر..
والهامشيه لا تعني المرور بمتاعب..
ولكن تعني العيش متباعدين عاطفيا وفكريا..
تعني المظهر فقط في الأرتياط..
وأنتم عاطفتكم وعلاقتكم عميقه..

شكرا يا وفو علي الأستجابه للطلب..
علي شرح ما قد يعده البعض سرا..
علي الطيبه والتلقائيه في السرد...

لم ينته مشوارنا بعد...





انتو رشيده وينها؟؟