|
|
 دعـوى ضـد الفضـائية الســـودانية
|
بما انني من دافعي ضريبة الفاضئية السودانية...وزول ما قاعد اعاين لاي قناة تانية..... ليس اعجابا بفضائيتنا الفاضية... ولكن عشان اخلص حقي الدفعتو.... يظهر غيري كتار.... عشان كدا ناس تلفزيونا حلفو بدينهم وايمانهم.... علا يطرشونا ليها...ويطفشونا منها....احسن برنامج فيها صحة وعافية..... لكن وحات الله البرنامج دا سوى لي هلوسة...... يجيبو ناس الكلي....ويقعدو ينضمو فوقها..... تلقاني اليوم كلو وانا ماسك صفحتي وضهري من تحت واقعد اجس.... وكل دقيقة امشي الحمام واقعد اتفرج في بولي .....لونو يا ربي مالو بقى كدي؟.....البارح كان صافي وفي امان الله ... بس خلاص فشل كلوي..... عليهو العوض ومنو العوض.....ولو جابو ناس الباطنية...وقعدو ينضمو في السكري.... يمسخو علي كباية الشاي القدامي... واكورك فوق المرا علا تسوي شاي تاني وتقلل السكر.... انتي ما يتسمعي في النضم دا؟.....وبقيت كل يومين..... شايل اصبعي وما ديهو لناس المختبر عشان يشيلو منو دم ويفحصو السكري....ودا كوم وناس القلب و العروق والشراين كوم.....بقيت ان كراعي خدرت ساكت... اتمدد فوق العنقريب...واشهّد واستغفر....واوصي الوليدات وامهم ما يدفننوني في البلد دي.... عشان ما اقوم يوم القيامة..... وانا اقعد افتش في جيوبي كايس للاقامة.....والله الرخصة... وان صبحت علي الواطه جري علي المستوصف.... والفحص....وبقروش برضو.....برنامج صحة وعافية بقى لي برنامج هلوسة... وهضربة.....
والله برنامج حبيبنا ...حسين خوجلي..... هو ينضم.... ..والمرا قاعدة جنبي و تعاين للستائر الوراهو.... وتقول والله حلاوة ستائر..... عليك الله يا سجيمان باكر من الصباح تمشي تشتري لنا زيهن.....بعد شوية تعاين للترابيز القدامو.....الله والله طقم ترابيز يجنن... عليك الله يا سجيمان باكر دي تجيب لنا طقم زيو.....الترابيز قزاز.... انا اجيب ترابيز قزاز؟....وعندي اربعة شفع....امهم متوحمه بهم علي كدايس طواااااااااالي مشعبطين ومتشعلقين.......وطقم الشربات القداهم... الغريبة نفس لون الشربات ليهو ستة شهور.. ويوم واحد لا شفت حسين ولا شفت واحد من ضيوفو....مدا لو كباية علي خشمو..... غايتو يا حسين ان بقت شربات بلاستيك ... الختيتها رقدت...والله ترامس الشاي.....ما بعرفهن مليانات والله فاضيات ... وبرضو المرا دايرة ..... زيهن..... وقلبي في ايدي..... تقوم يوم تقل عقلها وتقول لي دايرة لي عمة زي دي........والله تحلف علي طلاق الا اشتري عمة قدر حقت حسين وعكاززي عكازو......ديل هينات يا بت الشيخ علا الوشي اسوي عليهو كيفن؟....
.والمذيعات الواحدة قبال ما تقعد قدام الكميرا... يكون ادوها علقة وتجيك وشيها يلعن قفاها...وتقرا الخبر... انفجرت قنبلة في بيروت وهي في سرها تلعن فينا انشاء الله القنبلة التتفجر فيكم كلكم يا المشاهدين وتقطعكم حتة حتة وما يفضل فيكم زول....والله خبرعن السارس في الصين.... وهي في سرها تقول... ان شاء الله يابركة المكاشفي السارس اليكملكم لي حدكم تعاينو لي شنو؟ عيونكم بالتقددن.......والله لما تقول انتهت النشرة.... وهي في سرها تقول لنا ... اهه انتهت النشرة.... ارتحتو؟ كان عندكم شغلة قومو شوفوها..ولا لو عاوزة تنقلنا للاحوال الجوية... تقول الان مع الاحوال الجوية...وفي سرها تقول ان شاء الله يا بركة الما نام ولا اكل طعام..... زلزال ومطر وسيل..... يغرق البلد دي لي حدها..... وتصبحو تلقو عناقريبكم وحللكم وكواريكم. وكروركم.... في شلال السبلوقة.... كل الدعا والنكد دا تقراهو في وشيها
والمذيعين الجداد البيقرو نشرة الاخبار....... ديل ما اختاروهم على اساس ... الصوت والصورة....... ديل اختارهم على اساس الاضنين....اي واحد ما عندو اضنين كبار ما ينفع مذيع....يا ربي تكون الاضنين ديل عشان تقوية الارسال؟..... غايتو هم عندهم فيهن حكمة.....
اها ندفع قروش عشان......نهلوس...وندفع عشان.... نشتري طقوم. عشاء وشاي وترابيز.....وندفع.. عشان يداعونا وينعلو ابو خاشنا.....وندفع عشان شاشة التلفزيون تتملي كلها اضنين.......... الشكية لي اب يدا قوية
|
|
 
|
|
|
|
|
|
|
 Re: دعـوى ضـد الفضـائية الســـودانية (Re: سجيمان)
|
الاخ سجيمان
مش دعوى واحدة ، الفضائية دي عاوزة دعاوي بكميات تترفع عليها ، مش كفاية رفع الضغط والعذاب الابدي الدخلونا فيه
بس الحاجة المدهشة في برنامج ساحات الفداء بيجيبوا واحد ويركزوا عليه الحلقة كلها ثم بعد ذلك يتكتب الشهيد فلان بس هم بيكونوا عارفين كيف ان الزول ده حيموت ؟
| |
|
|
|
|
|
|
|
|
|
Re: دعـوى ضـد الفضـائية الســـودانية (Re: سجيمان)
|
سجى مان يا مبدع
سجمكم يا البتدفعوا للفضايحية
رفيق الحريرى دة زول براهو عندو
فضائية ؟
و الله مشكلتكم مشكلة ناس
كفيلك , عكاز المغتربين
داقيكم و الفضايحية وناس
منو كدة ما عارف
دى حكومة ولا همباتى ؟
الله يكون فى عونكم
تعالونا هنا , الدولة فيها
53 فضائية وبتدفع للناس
فى مسابقات بالملايين
بدل يدفعوكم
لكن ما شفت انقلاب كوستا ؟
دة حايرجع ليكم حقكم
| |
|
|
|
|
|
|
|
|
|
Re: دعـوى ضـد الفضـائية الســـودانية (Re: خالد)
|
الرائع سجيمان
للأسف فضائيتنا السودانية
معظم برامجها أخبار مؤتمرات وتصريحات
لجان منبثقة ولجان منسدحة ولجان تمضغ اللبان
ومصفقون يؤيدون كل شيئ . ومحاورون جبناء لا
يستطيعون قول كلمة قبل الرجوع إلى المسؤول الأول
ومحاورون خائفون من السؤال فما بالكم بالإجابة
وحتى فضائية الشيخ صالح كامل التي تعمل في اليوم
ساعتين لم تأتي بجديد
وبيني وبينكم بي سجمنا أحسن من بقية الفضائيات العربية
و الكبريهات اللبنانية إعلان وراء إعلان
حليب ومكرونة وحفائض أطفال وسيدات ولبان والكولونيا
ورررررررررروك
| |
|
|
|
|
|
|
|
|
|
Re: دعـوى ضـد الفضـائية الســـودانية (Re: سجيمان)
|
الاخ العزيز سليمان
والله كلام فى محلو والزول البشوفا هايصة كده يقول البلد ما فيها اى مشكلة لا زالت بوق هزيل لنظام ونحن بنقترح انو يشفروها ومطممة بطن السودانيين فى الخارج اما سودانيين الداخل فحالتم ماساة حقيقية لان الرسيفرات ممنوعة ذى العرقى والبنقو .....وهنا الشفع يبيعوها فى جولات السيارات وفى البقالات...وعشان الناس البطنا طامة فى السودان اتفقنا مع ملك الليمون منوت انه يستورد 5 طن من الليمون من استراليا عشان نوزعو للشعب السوداني فى الداخل مع عدم ذكر الاسباب
********
هذا النوع من الاعلام سيتحول بمرور الزمن الى انشوطة تخنق النظام نفسه
ونحن السودانين كنا مفروض نكون الاولى فى الاعلام الحر بالقدم والعراقة مش قطر الصغيرة دى تفوق علينا بالجزيرة
| |
|
|
|
|
|
|
|
|
 Re: دعـوى ضـد الفضـائية الســـودانية (Re: elsharief)
|
الاخ سجيمان
السلام عليكم ورحمة الله وبركاته
يا اخي والله التلفزيون عملينا وهم انا قايتو كل يوم ماسك صفحتي اقول فشل كلوي ومرة امسك بطني اقول دا شنو
الشي التاني يا اخي كمال حامد كرهنا الكوره لو كان في كوره في السودان ممكن يتكلم عنها لكن كل يوم مقلوبين وحالتم زايده سوء
ومهازل ومشاكل بين الاتحاد والاندية
| |
|
|
|
|
|
|
|
|
|
Re: دعـوى ضـد الفضـائية الســـودانية (Re: سجيمان)
|
اخى العزيز سجيمان
اضحكتنى حتى دمعت
الله يجازيك
لاحظ انو الضحكة المن القلب فى بلاد الخليج للمغتربين غاااااااااااالية
ذكرتنى الفضائيةالسودانية لانى اليومين دى ممنوعة منها بامر الطبيب
عشان الاكتئاب النفسى و كدة
و ذكرتنى بالمذيع البذيع الاخبار و كانو نازل سلالام كل تلاتة سلمات سوا
بالله عليك الله ما تتلفت لينا على ناس البلو نايل
| |
|
|
|
|
|
|
|
|
|
Re: دعـوى ضـد الفضـائية الســـودانية (Re: سجيمان)
|
الاخ سجيمان
كان الاستاذ ياسر عبدالفتاح صاحب عمود شقشقة في جريدة الخرطوم
يكتب دوما عن حال تلفزيون السودان الكئيب ، فيعطي لكل مذيع وصفا يتناسب مع ما يقدمه لجماهير المشاهدين من جرعات هائلة من وسائل رفع الضغط والرغبة في الهرب الى ابعد مكان في الكرة الارضية لايصله ارسال هذه القناة فمثلا هناك المذيع المروحة ، والمذيع الطاووس ، وكل مذيع بيقلد التاني
لكن برضو ما رديتوا على سؤالي هم بيعرفوا الواحد حيموت كيف عشان يركزوا عليه طول الحلقة؟
سؤال يتردد في ذهني كلما وقعت عيناي عن طريق الخطا على برنامج ساحات الفداء
الله يعسنا ساكت بس !!
| |
|
|
|
|
|
|
|
|
|
Re: دعـوى ضـد الفضـائية الســـودانية (Re: سجيمان)
|
الأخ سـجيمان
انت البيوديك قدام التلفزيون شـنو ؟ اما عن اشتراكك فأعتبر المسألة ياخى سلامة كرامة,عشان بعدين ماتندم لمن الوليدات يجيهم تخلف عقلى من جراء مشاهدتهم للقناة الفضائية.
كلامك عن مذيعاتنا الفاتنات بيذكرنى بى واحد زهجان منهم ولمن شاف واحدة فيهم اطلت على الشاشة علق عليها قائلا يابتى وشك الفرحانة بيه ده والله نحن بنصحى بيهو من النوم
ودمتم
| |
|
|
|
|
|
|
|
|
 Re: دعـوى ضـد الفضـائية الســـودانية (Re: سجيمان)
|
سي جي مان
سلام واحترام
انت عارف يا صديقي افضل برنامج تتفرجو علي الفضائيه السودانيه شنو؟؟
برنامج اششششششششششششش
وبرنامج الوان الطيف البجيبوهو بعد التقفيل والتطبيل
وبكدا تكون خلصت قروشك كاااامل شامله ضريبه الشهيد الذي استشهد اثناء الفرجه علي مجروس السودان
اشششششششششششششششششششششششششش
| |
|
|
|
|
|
|
|
|
|
Re: دعـوى ضـد الفضـائية الســـودانية (Re: كوليل)
|
سلام مربع
سجيمان
وشفت البت ديك ام وش
لابساليها توب
اصصصصصفففففففر
عارف احتجنا في بيتنا
لرموت تخفيف حدة الالوان
وبعد دا كلو
قالت عايزة تتكلم عن
سايكولوجية الالوان
بين الدفء العائلي
والنفور العائقي
| |
|
|
|
|
|
|
|
|
|
Re: دعـوى ضـد الفضـائية الســـودانية (Re: سجيمان)
|
والله يا سجيمان يا خوي انا من القروش البدفعها فى السفارة السودانية كلها ما غايظاني الا قروش الفضائية دى ، والمزعلني بلحيل انو بدفع قروش الفضائية واوعك من امشي جنبها ، حرمتها علىّ مما اتخارجت من السودان لأنها سبب أساسي لامراض الضغط والسكر والقلب و(فقر الدم) والسارس وكل البلاوي
الله يرحم ناس ليلي المغربي ايام كان التلفزيون تلفزيون والابداع ابداع
الله يرجع العمالقة للفضائية
والا
حنخمخم عكاكيزنا ونمشي ليهم ونقول ليهم
ها يا ناس
حرّم يا قروشنا يا تغيروا شيتكم البتسووا فوقو ده
| |
|
|
|
|
|
|
|
|
|
Re: دعـوى ضـد الفضـائية الســـودانية (Re: سجيمان)
|
سؤال برىء....
لو قمتا أتكلمتا مع واحد صحبى سعودى ولا فلسطينى ولا نيجيرى ولا العجب لو كان خواجة... عن التلفزيون السودانى... وقلتا بالضبط الكلام ده...
يا ربى فى كم وطنى حا يدافعوا بأنه الحمد لله ليس كالكابريهات العربية وانه مازال بخير والخ.....
انا و تلفزيون السودان على البتاع...
وانا والبتاع فى الهوا سوا...
لك الحب يا سجيمان...
أنور
AnwarKing
| |
|
|
|
|
|
|
|
|
|
Re: دعـوى ضـد الفضـائية الســـودانية (Re: سجيمان)
|
الاخ سجيمان وضعت الاصبع على الجرح
لكن انت ناسى حاجه مهمه انو الناس ديل جو عشان اعادة صياغة الانسان السودانى من جديد عشان كده عايزين اعجنونا ويشكلونا من جديد
هنا عندنا فى مكان الاغتراب الفضائيه السودانيه بند من بنود العقوبات على الزوج المشاكس تهدده الزوجه بأنه اذا لم يلتزم باللائحه الموضوعه له من قبل الزوجه فانه سوف يعاقب بمشاهدة الفضائيه السودانيه واذا امتثل لللائحه سوف يسمح له بمشاهدة قناة ال بى سى وتحضرنى هنا مقوله ايضا سئل احدهم قال ليهو عرفنا قناة ال بى سى والام بى سى الفضائيه السودانيه اسمها شنو قال ليهو دبليو سى
| |
|
|
|
|
|
|
|
|
|
Re: دعـوى ضـد الفضـائية الســـودانية (Re: wadalzain)
|
الليلة بعد ما جيت من التمرين فتحت ليك الفضائية السودانية
الاقى ليك واحدة متشحطه بالتوب السودانى وواقفة ترد على التلفونات
اتاريهو برنامج مسابقات ومنوعات والمذيعة جديدة ما عارف جايبنها من وين
لاكن شكلها بتكون كانت استاذة فى الالزامية
لانو كل مرة بتكرر تقول ما قلونا البرنامج بخصوص عيد الثورة
ارقام تلفونات المسابقة كذا وكذا زى ما قلنا قبيل
وردها على التلفونات عينة براها
التقول فى بيتهم مافى تلفون ولا ما شافت ليها زول بتكلم فى تلفون
........
رفعت لى ضغطى والدكتور مانعنى من الانفعال
اخ انا من ابوات وامات اضنين ديل
نسوى ليهم شنوووووو
| |
|
|
|
|
|
|
| |
سجيمان
Ahlalawad
ابو جهينة
alfatih
خالد
EMU إيمو
adil amin
elsharief
انور عمر
lana mahdi
قلقو
shiry
AnwarKing
albagir altahir
benyya
OmDur
wadalzain
فيس بوك
تويتر
انستقرام
يوتيوب
بنتيريست