|
|
 عمـر......قرنـق.......و...حبـوب الضغط
|
برنامج دكتور عمر صحة وعافية من البرامج الناجحة.....وكمان بيقدم الاستشارة والعلاج المجاني....والدكتور عمر الله يطول عمرو يبداهو بي دوبيت وينهاهو بي دوبيت....اول مايدخل على البرنلمج.....يركب العنافي ويخت ايدو فوق اضانو وهاك يا دوبيت.......
الليله هوووووووووووي........
الازاني وخلاني انضم كُتُر كـتُر
جدي الريل اب سفنجاتاً .... خُدُر
تبري انتي من مشي الكرعين
.....وتبري انتي من دق الكُدُر
ما يكمل دوبيتو عديل يدق التلفون.........
---- الو.....الو..... دكتور عمر..... والله يا اخي الوالدة.... عندها وجع راس طوالي...ووجع بطن....وعندها ضغط....وسكري.....وملاريا..... وابو اللغود....
اهه...قبل اسبوع وديناها للدكتور...... وكشف عليها وادانا ....دويات ليها.... اههه..... الو الو...... اهه حسي اول البارح ماتت....
---- طيب وقت ماتت متصل مالك؟
------ متصل مالي؟ ابدا قلت بس يكون عندكم خبر
..... ويقفل الخط.....وتلفون تاني.........
------ الو.... الو.... بالله ممكن اكلم دكتور عمر..... ايوا انت هو؟ سمح....معاك عبدالله ود جادين من الكلاكلة الدكتور وردي.
يا اخي والله انا طواااااااااااااالي عندي دوشة.... وعيوني يطششن....و حيلي ما شايلني.........وبعدين....طوالي عندي حصر في البول.....
----- يا عبدالله انت عندك سؤ تغذية ولازم تاكل كويس... يعني تاكل بيض..وسمك ودجاج...وكبدة
------ يا دكتور.... يا دكتور الاكل دا عند اهلي ولاّ عند اهلك؟.....ان بقى عند اهلي قطع شك.... ماني لاقيهو.......
-----وبعدين يا عبدالله...... يا عبدالله....... وبعدين حصر البول ممكن يكون من البروستاتا.....
----- البروستاتا دي شنو ووين يا دكتور؟
----البروستاتا دي... غدة...... جنب محل البول
-----جنب محل البول؟..... لا اله الا الله محمد رسول الله...دا بكان ختري خلاس
----وتجي يا عبدالله التلفزيون عن تاخد خطاب لمستشفى الدكتور احمد خمدين اخصائي المسالك البولية..... عشان يكشف عليك مجانا......
--- سمح بارك الله فيكم.....علا يا دكتور عمر....ما في طريقة.... تدوني حق الكشف دا كاش؟
تلفون تاني........
----الو....الو....الدكتور؟... الدكتور؟... كيفنكن؟ نعلكم طيبين؟ كيفنكن؟ نعل ما عنكم عوجة؟... معاك السُترة بت عوض الله...من الحاج يوسف... الحاج يوسف الجايي يقعد فيها قرنق... قرنق دا اول الحاج يوسف دي مابيشوف فيها؟.. يطّمش وقتو كلو بي كينيا وبي اغندا...والله يا دكتور انا تعبانة خلاس ومتالمة خلاس..... اولك بالتبادي... عندي وجعه في السدر دا طوالي قايمة علي..... اهه النذير ولدي قام وقت رسل الهناي ....السريفر... لي مرتو ... القاعدة جنبي دي... رسل لي معاهو ... حبيباتاً ما عندهن طعم..من السعوديه..ما جابن فايدة....اها عصام ولدي من ارميكا.....اريت ربي يضربو ياها بيضا..ويعدلها عليهو محل ما يقبل ويديهو بت الحلال الما تحميهو اهلو....رسل حبوباً ما ليهن حد....الا حسي قضن...وقدر ما كسنالن هنا ما لقيناهن...حسع الوجع تاورني تاني.....
------- طيب يا حاجة.... تمشي صيدلية الشفاء بمدينة الطائف تلقي الدواء دا هناك..... وغالبا يكون عندك مشكلة في القلب
------- مشكلة وين؟ في القلب؟...لا لا..... يا اخوي لا قلب لا شيتين...... عاد كان كدي.... يخربكم ما بتعرفو شي.....
يقطع الخط.... تلفون تاني
-------- الو ....الو.....مين معاي؟ التلفزيون؟....... دكتور عمر...... انا عثمان من بري المحس.... والله يا دكتور.... انا اشيد ببرنامجك الناجح المفيد...... واتصلت والله بس عشان كدا.....وبرضو لو سمحت.... عاوز اهدي دوبيت الختام........ للخطيبة سعاد....وصاحبتها نهي ...وسهى....وسوسو....وسلوى.... بكلية التقانة....وللوالدة مريوم.... بمناسبة عيد ميلادها....ولكم انتو يا دكتور
-------مشاهدي الاعزاء..... نصل الي نهاية البرنامج......وهاكم دي
الليلة هوووووووووووووي
يا شعبا........ نصو برا مشتت...
يا شعبا......... نصو برا مشتت
والنص الجوا من الملاريا مغتغت
رجالو صلع.... نسوانو صلع
من الهموم شعورها.... اتحتت
والي اللقاء في حلقة قادمة من برنامج.... صحة وعافية
|
|
 
|
|
|
|
|
|
|
|
Re: عمـر......قرنـق.......و...حبـوب الضغط (Re: عزيز)
|
سجى مان.ام acg.man
تحياتى
دكتور عمر دا مثقف شديد من اندنا ناس الجزيرة وبعدين شاعر
كان بكتب للبلابل..يطير الشعر دا ياودمى بقى تايه بين الصيادلة والدكاترة والمهندسين..والهاربين من الوطن...وناسو بقو مسطحين ساكت
الزول دا اجمل حلقة حضرتها ليه كانت عن العيون
بداها ب
العيون الفى طرفها حور
ونهاها ب
عيونك زى سحابة صيف تسقى بلاد وتجافى بلاد...دى زى عيون خطيبتى
بس بقولو الزول دا تزوج ..الفنانة عابدة الشيخ..حظو يكتب القصيدة موما تصبح الوطة تلقاها غنوها...انا كتبت قصيدة اسمها فتاة الهاتف
لى هسع مافى فنان سالنى منها..ممكن تشوفها فى بوست د.بيان لودرميلة عن شعر البحور...وذات العطور
وتسلم ياودطنى
| |
|
|
|
|
|
|
|
|
|
Re: عمـر......قرنـق.......و...حبـوب الضغط (Re: abuguta)
|
ابقوتة....والله الفناين الهنا ديل انا زاتي لايمهم....... مافي زول شال مني اي قصيدة.....ولا فيهم واحد رسل مقاسو نفصل ليهو واحدة....... لكن كراع البقر جيابة
المطنشني ان شاء الله ما يطنّش
مهمشني..........وخلاني اطمّش
عشان عيونو سمحات يا ربي؟
| |
|
|
|
|
|
|
|
|
|
Re: عمـر......قرنـق.......و...حبـوب الضغط (Re: سجيمان)
|
* إزيك يا خالى
* أهلاً يا إبنى، كيف أصبحتو، وناس البيت إن شاء الله كلهم كويسين
* الحمــد لله، كويسين، إلا عمتى أمبارح تعبت شـويـة...
* يا سلااام ومالا إن شاء االله خير
* والله يا خال جاتا شـويـة حمـة كدا، ووديناهـا المستشفى بى ليلا داك، والدكتور
ما لقى عنـدهـا حاجة يقولو عليهـا خطــر.. لكن مجـرد ما رجعت البيت جاتا
الحمـة تانى، فإضطـرينا نرجعا المستشفى، وإنتظرنا هناك والله لحـد الساعـة
واحـدة صباحـاً، عملوا ليهـا أشعـة وكشـوفات كتيـرة خلاص، بعد داك أدوهـا شوية
أدوية، وحالتا إستقرت نوعـاً ما، والدكتور قال يعنى ممكن تمشى البيت، ولو
تعبت تانى جيبوهـا.. أهـا رجعنـا البيت، ونامت شـويـة، إلا قامت تانى
تشتكى من الألم زى حوالى الساعـة أربعـة ونص، ودينأهـا للمستشفى تانى، وبعد
الفحوصات، الدكتـور قال لازم يحجزوهـا فى المستشفى عشان يراقبـوا حالتا من
قريب.. لكن حالتا إدهـورت شـديد بعد داك، وفى حوالى الساعـة سبعـة
إتوفت.. الله يرحمـا
* أهـا وإن شـاء الله هسـى كويســة
| |
|
|
|
|
|
|
| |
سجيمان
عزيز
abuguta
Abureesh
فيس بوك
تويتر
انستقرام
يوتيوب
بنتيريست