|
|
 مدني مدينة المطر
|
للمطر علاقة تآمرية مع الغربة، يمسح عنها غبار التناسي ،نعم، حين المطر
يتلالاء بريق وحشتها !!
ويعيدني قسراً الي مدني يا وطني . .
يعيدني الي مدني ، رغم انه -اصلاً (المطر) - لا وطــــن له:
لا أصل له :
المطر يقلّم اظافر الانتماء أينما أرتما .
المطر يعيدني الي مدني - رغم انه في مدني لا يتصالح مع مدني - .. جداً يعكر مزاجها ، من شعرها بحي المكي الي اقدامها بحي الاندلس ويصيب ام بارونة ببكتريا التحلل .
ام بارونة اصلاً لا تطيق الماء فهي وادي العطش ..
تدفن برمالها عجرفة النيل الأزرق .
النيل الصبي ..
ام بارونة رمالها حارقة لمن لم يخبرها
لذا لا تراود الا الغرباء عن نفسها .
الغرباء والنيل ..
ما ان تندمج وسط احضانها حتى تشعل عود شهوتها الحارق وتجد من اغوتهم يجرون خلفاً خلفاً نحو الوادي . الوادي طوى احذيتهم .
نهاراً تمتلئ حد التخمة ، الي حلقها ، بالغرباء :
تتقياءهم مساءً ، ويصفو ذهنا ..
على الاحياء تتساوى السقالة والشهادات العليا (كل الونسات تؤدي الي نكهة المدينة ) بما ان رائحة
الفول والاقاشي تستعمر كتمة ما بعد المطر ..
عثمان حسين ينطلق من شريط مهتري من سينما وطنية كفرض استماعي قبل العرض .
والاطرش قاطع التزاكر يؤدي عمله بمنتهى العسكرية والشك (رغم معرفته لمشاهدي العرض الثاني فردا فردا) ..
تتخد المدينة شكلها المسائي ، تعتدل جلسة المساحيق على وجهها . تعتدل بشكل لا يسمح للمطر بالعبث بمزاج المدينة الليلي..
اماكن الضجة بالسوق الكبير تخلد للسكون الا من صوت صواني المخابز و صراخ كشك الفوال بصوته المستف بحشرجة عدائية للزبائن .
ميدان الاتحاد يتحول مساءً وبأتقاق علني مبرم بسرية الي حمامات يتبول فيها العبور دون شبهة قطع حبل الونسة الممتد من حديقة وقيع الله الي نادي الاتحاد الحالم بتخطي الأهلي .
عدا ذلك فأن السوق الكبير مقبرة لضجة النهار الا من عساكر يتصيدون السكارى والعشاق .
مدني لا تحب المطر . لكن المطر دائماً ما يعيدني اليها ..
المطر يجبر نادي الجزيرة على ازاحة رجله اليسرى
والتخلي عن جلسته الكبريائية الأثيرة (رجل على رجل).
نادي الجزيرة دوناً عن تفاصيل المدينة يتملق المطر .
ينحني للماء حتى يتساوى معها (يتساوى معها المركب بالمركب) .. الكراسي الخلفية المحكومة مدى الحياة بالاسلاك الشائكة تمسح كتف الماء بمنتهى الرياء ..
السوق الكبير يصاب بالفتور فهو يكره الخوض فيه ..
المجانين يتجمعون على ركن مكتبة الوطنية يجرون في بؤس صمت العقلاء ..
لا أحد يطرز ضحكة - عدا منتصر ديسكو صديقي المختفي خلف السماعة في مطبعة النيل الازرق يروق له تسمية وجع المطر بـ(الطقس) - .
تلاميذ مدرسة الآميرية يشقون السوق وهو يدفعون دراجاتهم باياديهم وينفضون عنها مخلفات المطر كلما سنح الشجر ..
عبد الاي بائع الشاي يقف متكئاً بيده اليسرى بقوسية كراقصة بالية في سهو اصيل ..
(تعبان) الترزي لا يجد مبرراً ميتافيزيقياً لضرورة الآمطار في مدينة يطعنها النيل الي نصفين . ومدينة الأبيض -كما يقول - لا نيل لا ماء . ماجدوى المطر يا اله .
(لا لا) الهندي يغلق دكانه نصف اغماضة موحيا لسماسرة العملة بأنه موجود لولا العدو المطر .
مدني لحظة مطر تشبة ماكندو كما وصفها ماركيز ذات صيف .
فالمطر يتآلف مع الظلام لحتمية انقطاع التيار . .
حلق المطر يشهق الهواء ويزفر العتمة . .
يشتد عهر انثى الانوفلس ..
المطر يفضح الخمر في عقر تمرها تكشف البيوت السرية عورتها ، يصبح امر معرفتها سهلاً لمحي الدين ابوعاقلة .
رغماً عن ذلك قطرة من مطر تعيدني الي مدني ..
يا مدني ..
|
|
 
|
|
|
|
|
|
|
 Re: مدني مدينة المطر (Re: mutwakil toum)
|
و يا لجمال الحكي عن مدني
لم اعش فيها مثل كسلا
و لكنني زرتها مرة
و في ثاني مرة..
خططت لزيارتي....
استبقتني اختي..
و انا لم اصل....
و صلنا الداعي يخبرنا
و يزف لنا
نبأ الافراج عن ابي من معتقلة
في المرة الثانية..
و لم ازرها, او السودان نفسة ثانية
يا مدني ..
و يا جمال اهل مدني..
و لمدني و كل ربوع السودان
الف سلام..
متوكل,
كل عام و انت بخير
غادة
| |
|
|
|
|
|
|
|
|
|
Re: مدني مدينة المطر (Re: غادة عبدالعزيز خالد)
|
الأخت غادة ع خالد ..
تحياتي ..
عرفتك جداً من خلال بوستك الشهير والذي توقفتي عنه قبل ان يكتمل . فالكتابة التي تعتمد على الذاكرة والحنين لا نهاية لها ، رغم ما واجهتيه من بتر للاحلام ..
أها عرفت كسلا برًه السودان ، إنسان كسلا مختلف وشايل نكهة (براهو) ، حتي بقت زيارتا مخطط معلن وخفي .. رغم قناعاتي أن كسلا التي عرفني بها السموأل ابوسن ليست نفس الفاتنة التي في ذاكرته .(عمايل) الذاكرة أحلى من الواقع .
تحياتي
| |
|
|
|
|
|
|
|
|
|
Re: مدني مدينة المطر (Re: mutwakil toum)
|
الأخ / متوكل
كل سنة وانت ومدني في أرقي مصاف الترقي والجمال
إصراركم على ذكر مدني يؤرق كل مضجع لي في الغربة والبعد عنها
وأحبكم لأنكم تذكرونها لتذكروني بها رعماً عن أني لا أنساها أبداً
وأحبكم لأنكم منها.
الله برد غربتنا وغربتكم ويرفع مدينتنا مدني عالياً.
(إنت من وين في مدني)؟؟
الصادق ابوالجاز (أبوفتحية)
| |
|
|
|
|
|
|
|
|
|
Re: مدني مدينة المطر (Re: الصادق صديق سلمان)
|
الصادق . سلامات . اسمك يدق دق في راسي لكن الشيخوخة تشيلوا بعيد ،،
تشبه ناس مربع حداشر ..
من دردق -انا- وجذور مفرزعة بين القسم الأول والمدنيين ..
ابقى راجع ..
متوكل ميرغني حسن التوم
| |
|
|
|
|
|
|
|
|
|
Re: مدني مدينة المطر (Re: mutwakil toum)
|
إزيك يا متوكل
والعيد مبارك عليك والسنة الجايه نقط نقط نقط
المهم مشتاقين والله
تعرف زمان ونحن صغار، كنت مفتكر المطر فى مدنى بجى من جيهة "التجارب" أو الأبحاث الزراعية، وارتبط عندى كده ليه ما عارف
من زمان وأنا بريد المطر وشايف إنه أحسن وأهم شى فى الدني، وحاليا سميتو "مداد الآلهة" لأنه الحياة كلها مكتوبة بيهو
الجماعة كلهم ما كانو بريدوهو لأنه نزل مطر معناهو خلاص التمرين فى "ميدان بانت" باظ، والجدول المحفور شمال سور "مدرسة الدايات" حيتملى والمويه تقعد فيهو كم شهر ويغزونا الباعوض ويحيمنا النوم، ثم الأهم من ده كله، إنه "عبد الصمد" و"السر" ما حيختو الطرابيز بره المطاعم فى "سوق بانت" وحنضطر ناكل الفول ونحن قاعدين جوه الحر، بعدين "عوض العجلاتى" ما حيكون عنده مساحة كافية قدام الدكان عشان يوقف فيها عجلات الإيجار، عكس دكان "عنكاص" لأنه تابع للجامع وقدام الدكان كله أسمنت
مره واحد علاقتى باظت مع المطر واتزاعلنا، كان عيد مايو وعندنا حفلة عرس بى "عركى"، عركى والعود بس والغنا جوه البيت، أول شى قالو يعملو صيوان والشغلانة تكون لامه، ونحن فرحنا وجهزنا" الشارلستونات" وقلنا الليلة خلاص شباب "القسم الأول" كلهم بجونا، وهاك يا حفر، من بداية "بيت ناس الركبى" لحدى زاوية بيتنا، ومشوا جابو الكراسى من "ود بيضه بيضه"بس قومى يا المطره انبهلى وبوظى الحكاية كلها، واضطر عركى يغنى جوه الديوان، ولا جونا ناس من القسم الأول ولا شى، بس ياهن ناس الفريق البنعرفن، شوية كوارته وشوية سناهير وحبة شرامه من ود أزرق
آخر مره اتزاعلنا أنا وصديقى المطر، مشينا "سينما أمير" لا، والفلم شنو "الفك المفترس" "استيفن سبلبيرج" والصفوف دى والله يا متوكل من ابواب السينما داقه فى حيطة نقطة البوليس، والناس بى هناك آخرهم جوه ميه واربعطاشر، ويا الله ويامين لمينا فى تذاكر، بالله بس المناظر انتهت كده، وتعال شوف السما بس تقول اتقدت
انقر ما جينا تانى يوم تانى، وعين فى الشاشة وعين تعاين لى فوق
وبعد الفلم قلنا اليوم داك نرفه ونتهور شوية، وكل زول عزم روحو باسطة فى "سنترال"
يا حليلكن والله يا ابو العاص وكسلا وداود وعادل القوس
يا ربى هسه يكون وين
وإنت برضو وين يا متوكل
| |
|
|
|
|
|
|
|
|
|
Re: مدني مدينة المطر (Re: أبوذر بابكر)
|
اباذر آ خوي . انت بتدور تفكني آخري مالك..
تعرف لم الشمس تنزل جهة التجارب نهاية دورتا كنا مفتكرين دي باب السماء آ . وكان واحد من السكاري لم الدنيا تضيق بيهو يقول ماشي اشتكي للكريم ويتجة جهة الشمس نازلة ناحية التجارب باب السما . أها يا ابي ذر الزول ده بعد 89 في سنه من السبعطاشر العجاف جات مطرا وفيضان قام ناس المشروع الحضاري أعلنوا عن صلاة ، لم دعوه للصلاة قال ليهم انا ماشي ليهو عديل جهة التجارب (فيس تو فيس) .. نعرف يا ابي ذر (قالوا) قالوا ليهو يا فلان يا هووي يالسابح عكس المشروع الحضاري انت سيب السكر والبهدلة دي وواحد حكيم منهم قال ليهو .. تعرف يا شيخنا في ليلة الاسراء والمعراج خير الرسول بين الخمر واللبن . لكنه إختار اللبن.. (تعرف زولنا بتاع التجارب قال ليهم شنو) ..قال ليهم لو الرسول شرب الخمرة انا كان شربت اللبن ده جنس شراب ..
أها دي حكاية كدي برة المطر ، تحت شمسية ,,
واللهي جد مشتاق ليك ولي نضميك الما متل نضمي البشر ..
انا قاعد لكن لو دخلت النت ماح اشوف الجرزان في بيتي ..
| |
|
|
|
|
|
|
|
|
|
Re: مدني مدينة المطر (Re: mutwakil toum)
|
متوكل التوم/ تحياتى لك بكل الروائح والروائع المنبعثه من سردك الجميل وكل سنة وانت طيب ومدنى طيبة وكل من يحب مدنى طيب ،،،، وروحى ليه مشتهية ودمدنى
| |
|
|
|
|
|
|
|
|
|
Re: مدني مدينة المطر (Re: celecon)
|
الكاميرا ضاعت في القاهرة الشهر الماضي
لكن بحاول قريب
بس
| Quote: متوكل ميرغني حسن التوم |
ممكن اقول سلم علي مي
تحياتي للاسرة الكريمة و كل الاهل
و ترانا بقينا اخوان لزم
تحياتي للجميع
| |
|
|
|
|
|
|
|
|
|
Re: مدني مدينة المطر (Re: sudania2000)
|
الأعز بالله متوكل
ما أروع عودتك
مشهد أول :
بعد يومين قضيناها فى حلة حسن وبعد انتهاء أيام العزاء
فى فقيد مدنى الأستاذ عوض الكريم قدورة، أنفتحت أبواب السماء فى ذلك الصباح
كأنها أرادت أن تقول لم تبكوا الفقيد بعد...
أصر محمد السيد الليثى أن نذهب الى دردق حتى يقوم بالواجب وتجف دموع السماء،
خرجنا فى عصر ذاك اليوم وقدج تبدل حالنا .. ملابسنا مكوية وفوق ذلك وجبات شهية..
أجيك للمطر.. طبعا ونحن فى حالة زوغان من الموية والطين حتى نصل شارع المواصلات
والناس تقف على الأبواب وزوايا المنازل أطلق مصطفى أمين تعليق ساخر قاصدا محمد
الليثى : "الليلة ح تقشر بينا و تسلم على ناس الشارع كلهم "
وتردت صوت ضحكاتنا فى فضاء دردق بعد المطر..
منتصر أبوالجود ، محمد جميل، مصطفى أمين ، عمر الجعلى ونزار يوسف.
مشهد ثانى:
المطر فى البنجاب و لاهور تحديدا
فى جامعة الهندسة
و مصطفى سيد أحمد يغنى ..الدنيا ليل غربة ومطر..
ودمت ..
| |
|
|
|
|
|
|
|
|
|
Re: مدني مدينة المطر (Re: sudania2000)
|
سودانية 2000 . سلام عليكم ..
انا كنت شامي ريحة القرابة دي .. بس الصورة متوهاني وما عارف اذا كانت دي صورتك ولا صورة التركية الزولة العملت مشاكل في البرلمان ديك بسبب الحجاب ، لو دي صورتك فبتشبهيها ولو دي التركية فسودنتيها بقت زولة زولة ..
الأهل بخير . ومي -كمان- بخير ..
والجاتك في كاميرتك سامحتك
| |
|
|
|
|
|
|
|
|
|
Re: مدني مدينة المطر (Re: mutwakil toum)
|
هذاالحكي المتواتر والمحب الي النفس ...
انعش برذاذه انسياب الذكريات في الدواخل..
فاحال كل المدن الي مدني,,,
مستمتع جد بحكاويكم عن مدني يا متوكل وابوذر وسودانية و غادة..
واسمحو لي ان احي اطلالة مزن ابوعبيدة علي البورد بعد فترة انقطاع..
ونرجو ان يكون مداد قلمك قد اثارة فيه غيوم مدني لذة الكتابة الينا من جديد..
عيد سعيد مع خالص الود,,,
| |
|
|
|
|
|
|
| |
غادة عبدالعزيز خالد
مزن ابوعبيدة النيل
nashaat elemam
أبو عبيدة البصاص
الصادق صديق سلمان
أبوذر بابكر
Nazar Yousif
Ehab Eltayeb
فيس بوك
تويتر
انستقرام
يوتيوب
بنتيريست