|
|
 درر الحقيبة ...أجمل ما سمعت
|
كل ما اسمع لي اغنية بتاعت حقيبة احلف واقول والله دي اجمل اغنية اسمعها في حياتي..
كل مرة مقطع شعري عبقري يستوقفني من اغاني الحقيبة وكل مرة اقول خلاص انا حا اعتبر ده اعظم ما قيل في الشعر سواء جاهلي أو معاصر..
لمن والله إتعقدت من روحي وبقيت ما عارف احب شنو من الحقيبة وأخلي شنو ..
هي دعوة أحبائي إنو اي واحد حافظ مقطع من مقاطع الحقيبة وتثير فيه شجون أو يعبرها من اجمل ما كتب بالله ما يبخل علينا بيها فانا حقيقة استمتع جداً جداً بكتابات الحقيبة ..
عن نفسي احب جداً جداً جداً أغنية " قلبي همّالو " وهي أغنية عزيزة وقريبة جداً إلى نفسي وبقيف عندها كتيييير وما بيمر يوم ما بكون دندنتها بي صوتي الكعب ده 
كنت بحب اسمعها وانا صغيير بي صوت الفنان حسين شندي والغريبة بعد كبرت احببتها جداً بي صوت الفنان الراقي الفنان الشاب اسامة الشيخ ..
زمان كنت بنجر كلماتها من راسي وكلها غلط وحتى الان اشك في انني احفظها كما كتبت واحس ان الفنانين معظمهم يغنيها غلط ..
مثلاً زمان كنت بدندن :
جوهر البردي الما إتلقى مثالو ووالله البردي جاتني من وين ما عارف (يا ربي يكون من رهيد البردي؟؟) ..
كانت تستوقفني جداً هذه الوصفة (يا دكين ما تفهمني غلط)
| Quote: اخفى جوز تفاح صدرو لولالو .. |
ما عارف لكن بالجد قاعد أحس إنو ده وصف عجيييييييب بغض النظر عن الغاية منو وبالرغم من إنو بسيط لكن بالجد وصف شاطح جداً جداً جداً ..
انا متأكد إنو ماف زول ما سمع الأغنية دي لكن ادعوكم تتمعنوا في كلماتها فعن نفسي اشعر بأنها من اجمل ما كتب من شعر الحقيبة وطبعاً عارف زوقي مشاتر وما سمح وبما إنو قلت الأغنية هي الأقرب لي نفسي فمعظمكم حا يكجنها
Quote: بدري حسنك لاح والقلوب مالو ..
لي هواك والشوق قلبي عمالو ..
يا فريع ياسمين متكي في رمالو ..
قولي عاشقك وين ضاعت امالو ..؟ |
يعني بي الواضح كده الزولة دي شديدة من هي شافعة ومن بدري اولاد الحلة إتكسروا فيها وتلقاها النوع المحجوزة من هي في الروضة ..
ويكفي إنها موصوفة بي فريع ياسمين متكي في رمالو ..
Quote: شعرو حاك الغيم حاجبو هلالو ..
فر بسمو نغيم والبروق لالو ..
مافي مانع لو قتلي حلّ لو ..
اخفى جوز تفاح صدرو لولالو |
اسة ده يقولوا فيهو شنو عليكم الله ؟؟؟ شي ابيض وشي اسود شي غيم وشي بروق ..
وما عارف الحناكيش بيكون قادرين يعرفو اللولاي ده كيف ؟؟؟ يعني اسة لو في شافع بيبكي وقالوا لي حنكوشة لوليهو عشان يسكت باقي ليكم بتفهما؟؟؟؟
Quote: الجوهر الفرد ما اتلقى مثالو ..
قلبي ليهو يلين وقلبو يقسالو ..
حبو صابحني حسنو مسّالو ..
غير وسيم خدو دموعي ما سالو |
إتخيلوا معاي زول تكون فاصل معاهو للكتاش ويكون قاطعوا معاك قطع ناشف وتنوم وتصحى في حبو ..
تبكي بس ..
Quote: الشادن المكحول قلبي يصبالو ..
اخشى من لحظو ومن رمي نبالو ..
كم جريح أسهام عينو ضاربالو ..
بيها لا يدري ولا على بالو.. |
والعيون دي كلام تااااااااااني ..
والشي الغريب وعجيب تكون ما جايب خبر ...وناس بهناك زيتا طالع واخر جلسرين ..
بيها لا يدري ولاااااااااااااا على بالو ...
ياخ ده كلام مبالغة ..
Quote: فريع السيل دمعي سح لو ..
يا نسيم ارجوك شوفو كيف حالو ..
خصرو ناحل وزاد جسمي إنحالو ..
طرفو ناعس ونام وطرفي يصحالو |
بالله شوفوا الفرق في النحول ده ..
ناس ينحل خصرها بس وناس جسمها كللللو ينحل ..
امانة الحب ده ما صعب خلاس
والغريبة لمن تجي الساعة 8 مسا زولتنا تجر ملايتا ولّا توبا وتتغطى واخر نومة وبي مزااااااج وزولنا يشيل ويعد في النجوم وصاحي الليل كلو وبكرة لمن تجيهو ملاريا يقول لي ده كلو من البعوضة ..
Quote: شوف لحاظو سيوف حاجبو حدّ لو ..
حرسو حولوا يدور إستعدالو ..
شوف خديد يلصف حسنو يندى لو ..
البدر لو غاب حبيبي يضوي في بدالو .. |
غايتو وصيف العيون ده بي السيوف شي صعب خلاس..
والسيف في غمده تخشى بواتره وسيف عينيك في الحالين بتار ..
اها ده ياهو جنس العيون دي ..
لأ وكمان جابت ليها عساكر ودرادر ويانكي وحراسة مشددة ياخ دي رموش ولا جهاز أمن ..؟
ختاماً وقبل ما تنوم عاين للسماء وصدقني حا تلقىصورة محبوبتك هنااااااااااااك محكككككككككككرة فووووووووووووووق ..
تخريمة :
لسة حاسي إنو بكتب بعض كلمات الأغنية غلط فكتابتي لها كتابة سماعية ...
اها ادونا من درر الحقيبة ..
|
|
 
|
|
|
|
|
| العنوان |
الكاتب |
Date |
| درر الحقيبة ...أجمل ما سمعت | عمر الفاروق | 09-17-06, 04:36 AM |
| Re: درر الحقيبة ...أجمل ما سمعت | عاصم ابوبكر حامد | 09-17-06, 04:51 AM |
| Re: درر الحقيبة ...أجمل ما سمعت | عمر الفاروق | 09-17-06, 04:53 AM |
| Re: درر الحقيبة ...أجمل ما سمعت | مجاهد عبد الرحمن | 09-17-06, 05:03 AM |
| Re: درر الحقيبة ...أجمل ما سمعت | عمر عبد الخالق سعيد | 09-17-06, 05:09 AM |
| Re: درر الحقيبة ...أجمل ما سمعت | خدر | 09-17-06, 05:26 AM |
| Re: درر الحقيبة ...أجمل ما سمعت | عمر الفاروق | 09-17-06, 12:48 PM |
| Re: درر الحقيبة ...أجمل ما سمعت | عمر الفاروق | 09-18-06, 03:14 AM |
| Re: درر الحقيبة ...أجمل ما سمعت | حمزاوي | 09-18-06, 06:02 AM |
| Re: درر الحقيبة ...أجمل ما سمعت | Tabaldina | 09-18-06, 08:26 AM |
 Re: درر الحقيبة ...أجمل ما سمعت | ناذر محمد الخليفة | 09-18-06, 09:10 AM |
| Re: درر الحقيبة ...أجمل ما سمعت | Bakhaf | 09-18-06, 09:19 AM |
 Re: درر الحقيبة ...أجمل ما سمعت | ابن الرشيد | 09-18-06, 09:17 AM |
| Re: درر الحقيبة ...أجمل ما سمعت | nazar hussien | 09-18-06, 09:46 AM |
| Re: درر الحقيبة ...أجمل ما سمعت | محمد الأمين موسى | 09-18-06, 09:53 AM |
 Re: درر الحقيبة ...أجمل ما سمعت | ابن الرشيد | 09-19-06, 03:46 AM |
| Re: درر الحقيبة ...أجمل ما سمعت | عمر الفاروق | 09-18-06, 11:34 AM |
| Re: درر الحقيبة ...أجمل ما سمعت | عمر الفاروق | 09-18-06, 11:44 AM |
| Re: درر الحقيبة ...أجمل ما سمعت | Gazaloat | 09-18-06, 05:16 PM |
| Re: درر الحقيبة ...أجمل ما سمعت | عثمان عبدالقادر | 09-19-06, 00:12 AM |
| Re: درر الحقيبة ...أجمل ما سمعت | عمر الفاروق | 09-19-06, 02:29 AM |
| Re: درر الحقيبة ...أجمل ما سمعت | عمر الفاروق | 09-20-06, 04:16 AM |
| Re: درر الحقيبة ...أجمل ما سمعت | Emad Abdulla | 09-20-06, 05:38 AM |
|
| |
عمر الفاروق
فيس بوك
تويتر
انستقرام
يوتيوب
بنتيريست