ياخوانا دا موضوع بعيدا عن السياسه ومن ابداعات الشعب السودانى كانت تلك المقالب التى يقابل بها الطلاب اخوانهم الجدد القادمين من الاقاليم والمقالب الظريفه التى تحدث فتلطف الجو الاكاديمى الجامد وتصبح قصصا مضحكه يتناقلها الناس ...وادعو الجميع للمشاركه وان يسردوا المقالب التى عاشوها او سمعوا بهاوكذلك اى مقالب اخرى
وسابدأ بهذا الذى جاء من الاقاليم يحمل شنطته الحديد ويخطو خطواته الاولى فى الداخليات ومان شاهده البعض حتى صعدوا الى الطوابق العليا وبدأوا التصفيق وسمع البقيه التصفيق فاصطف الطلاب على الطوابق العليا وهات ياتصفيق وصاحبنا اصابته الدهشه وبدأ يتلفت الى اعلى ومندهش من هذا التصفيق الحار والاستقبال المدهش وكل ماتقدم ازدادت الجموع على السطوح والصفقه ....
ودخل البلارمه الى اول محاضره وجاء واحد سينير ضخم الجثه ولابس تمام وكرفته ودخل هذا السينير قبل دقيقتين او ثلاثه من دخول الاستاذ واعتذر لهم من انه قد الغى محاضرة اليوم ...وتكلم على اساس انه الاستاذ فخرج اليلارمه جميعا من المدرج ودخل بعدها الاستاذ ليجد المرج خالى !!!
ومره وجد واحد سينير البلارمه جايين يسجلوا فوقف فيهم خطيبا بهندامه الحسن ليقول لهم ان التسجيل قد تم تحويله لمكتب فى الحاج يوسف ووصف لهم بيت هناك ووصف لهم محل مواصلات الحاج يوسف فاندفعوا نحو الحاج يوسف !!!!
وفى مصر فى المنصوره كان هناك اخ مشهور فى هذه المقالب فمره جوا بلارمه طلاب فى كلية الجولجيا فذهب لهم فى الشقه وسلم عليهم وقدم نفسه على اساس انه سينير فى جولجيا وسالهم انشاء تكونوا جيبتوا الحجر معاكم فقالوا بدهشه حجر شنو؟ فرد عليهم الحجر الحتدرسوا عليه امال حيدرسوكم كيف؟ فقالوا ان احد لم يخبرهم بذلك فسالوه عن الحل فوصف لهم منطقه بعيده خارج البلد حجريه ليبحثوا فيها عن الحجر وفعلا ذهبوا فى ذلك الليل وكل منهم اتى بحجر كبير وفى الصباح حمله معه للكليه!!
ومن جامعة المنصوره عندما حضر بعض البلارمه بالقطار الشعبى المشهور القشاش وهو قطار رخيص جدا ولكن يتوقف فى كل سنده ومحطه وجاء من ضمنهم الرحوم احمد عوض فاشاع عنهم انهم عندما وجدوا ان التذكره رخيصه قطعوا تذكرة العوده خوفا من ان يرتفع ثمن التذكره ومن يومها اطلق على المرحوم احمد القشاش حتى غطى ذلك على اسمه
وجاء بعض البلارمه لجامعة المنصوره وذهب اليهم هذا الظريف فى الشقق التى سكنوا فيها وهو يسالهم ان سجلوا فى الجوازات فاجابوا بالنفى فقال لهم بدرى الساعه 6 تمشوا الجوازات وتقيفوا فى الصف عشان تسجلوا عشان ماتحصل ليكم مشاكل ووصف لهم محل حلوانى راقى جدا ومن الساعه الخامسه كانت هناك صفوف امام الحلوانى الذى اندهش عندما فتح الدكان فوجد هذه الصفوف وعندما دخل البلارمه مد كل منهم الباسبورت واكتشفوا انه مقلب
شكرا على المداخله ومفردها بلروم لكن الجمع بلارمه والا برالمه دى دايره فتوى ...وياتراجى بقية القصه ماكملتيها لما بقيتوا سناير الاوضه (الثلاجه) سكنتوا فيها برلومات؟؟! السنجك
08-03-2006, 12:13 PM
عاطف عمر عاطف عمر
تاريخ التسجيل: 11-26-2004
مجموع المشاركات: 11152
شكراً ياسنجك على البوست خفيف الظل توقفت عند كلمة ( بلارمة ) وضحكت كثيراً وتذكرت صديقي ( --- ) الذي يجمع كلمة عمود ، قيقول ( عماويد ) المهم يا سيدي
Quote: ومفردها بلروم لكن الجمع بلارمه والا برالمه دى دايره فتوى
اصل الكلمة أتى من الكلمة الإنجليزيةPreliminary Year بمعنى السنة التمهيدية أو السنة الأولية. لذا أصبح من يكون في هذه السنة ( برلم ) وجمعها ( برالمة ). ولن أترك هذا البوست الظريف دون ذكر حادثة أتينا برالمة لكلية الهندسة بجامعة الخرطوم ، وكعادة أبناء الأقاليم فقد حضرنا قبل يوم من التسجيل ونزلنا في داخلية ( ترهاقا ) المعدة لطلاب نهائي هندسة مع الأخ ( --- ) ، وهو شخص اشتهر في وسطنا بالجدية المفرطة ، وكنا نأخذ كلامه مأخذ جد حتى ونحن طلاب في الثانوي عندما كان يأتي من الجامعة في الإجازات ويقوم بتدريسنا . في اليوم التالي رافقنا في كل مراحل التسجيل وعندما طلب منا الذهاب لعمادة الطلاب لتوزيعنا على الداخليات قلنا له ( ببراءة ) إننا نود أن نسكن قربه في ( داخلية ترهاقا ) رد بجديته التي لا نشك فيها - هي داخلية للطلاب الـ Final لكن ما في مشكلة شيلوا المذكرة دي وامشوا لعميد الطلاب وأكيد سوف يوافق على سكنكم في ( ترهاقا ) شلنا ( المذكرة ) التي طلب فيها صاحبنا من عميد الطلاب تسكيننا في ترهاقا وانتظرنا عميد الطلاب لأكثر من ساعتين فقد كان في اجتماع وعندما سلمناهوا المذكرة لم يتمالك نفسه من الضحك الشديد وخاطبنا وهو يغالب ضحكه الشديد - يلا يا برالمة خلصوا إجراءاتكم وروحو شوفو داخلية في ( البركس ) اسكنوا فيها . داخلية ترهاقا دي بتجوها بعد أربع سنوات إذا أراد الله
08-03-2006, 03:37 PM
السنجك السنجك
تاريخ التسجيل: 05-27-2002
مجموع المشاركات: 2695
شكرا ياعاطف على هذا الكلام المهندس وقد افتيتنا وانا داير اغير عنوان البوست لكن قدرت ماحاولت اعدل فى العنوان ماقدرت واتمنى ياعاطف وبقية الاخوه والاخوات ان تتحفونا بنوادر البرالمه
السنجك
08-03-2006, 03:47 PM
Tragie Mustafa Tragie Mustafa
تاريخ التسجيل: 03-29-2005
مجموع المشاركات: 49964
ياتراجى برالمه عشان ماتزعلى... وداير اعدل فى العنوان وماعارف الطريقه كيف ... واحكى لينا عن كندا بالله ...اما الاسكندريه فانا احبها حبا خاصا واقضى فيها معظم ايامى فى مصر وخاصه فى كامب شيزار
السنجك
08-04-2006, 09:07 AM
السنجك السنجك
تاريخ التسجيل: 05-27-2002
مجموع المشاركات: 2695
واحد برلوم جاء الداخليه شايل شنطته لاقاه واحد قال ليه انت جديد ياخوى البرلوم قال ايوه قال ليه امال السرير والمرتبه وين والبطانيه امال حترقد وين البرلوم رجع السوق جاب عنقريب ومرتبه وبطانيه !!!
السنجك
08-04-2006, 03:11 PM
Tragie Mustafa Tragie Mustafa
تاريخ التسجيل: 03-29-2005
مجموع المشاركات: 49964
الاخ السنجك تحية طيبة خلى العنوان كما هو. البلارمة. طالما الحكى عن البلارمة! وفى رواية اخرى البلارمة هم سكان مدينة بالميرو الايطالية! لمدة سنة واحدة يتفرقون بعدها فى المدن الاخرى فى الجامعة. والجامعة المشار اليها هنا هى جامعة الخرطوم الكائنة فى قلبى وبين شارع النيل وشارع الجامعة ولها امتدادات الى شارع الجمهورية. ولها نادى لاساتذتها كان به بوفيه يعمل احسن صحن كبدة فى جمهورية السودان. وفيها نادى للعاملين بها وعليها كان به احسن كسرة وملاحات فى مديرية الخرطوم وضواحيها! انا احكى عن الثمانينات من القرن الماضى الذى كان الامام نميرى احد مجدديه! على قول الترابى وطائفته المتمكنة قليلا او كثيرا فى ذلك العهد الله لا عاده! ولو كنا نعرف ما فى رحم الغيب لكنا قلنا عائد عائد يا نميرى رغم احزان يوليو وسبتمبر وابريل!
برلمنى حاول حسّ بى
08-05-2006, 00:22 AM
السنجك السنجك
تاريخ التسجيل: 05-27-2002
مجموع المشاركات: 2695
ياعادل شنو كراهيتك لناس الجبهه قلبتك مايوى!!! وياتراجى نحن فى الانتظار ...وياخوانا قصص البرالمه او البلارمه انتهت يالا اتذكروا وفشونا شويه من هذا الهم الماسك بتلابيبنا وهذه الغمه التى ابت تنقشع
السنجك
08-07-2006, 00:56 AM
السنجك السنجك
تاريخ التسجيل: 05-27-2002
مجموع المشاركات: 2695
ياساده فالتشمل البرلمه كل شى يعنى برلوم فى ركوب الطياره او برلوم فى الاغتراب او اى مقالب اخرى واحكى ليكم واحده من قصص البرالمه
اصدقائى محمد وحسن كلنا جايين من مدينه واحده للخرطوم وكنا جداد فمره قالوا لى هم مفلسين ودايرين يزوروا قريبهم فى الثوره وتعريفه ماعندهم قلت ليهم ماعندكم مشكله تمشوا معاى وننزل نتعشى فى دكان فيه فول مكرب فى امدرمان وبعد داك امصرفكم وتمشوا الثوره ركبنا البص بتاع الاربعين وهم ماعارفين بتاع الفول وين وبتاع الفول كان فى محطة عابدين ولما جينا فى محطة بانت ونحنا كنا وقوف فى البص وهم على الباب انا اتحركت لانه فى واحد نازل وانا كنت وراء فهم اتخيلوا انا نازل بانت فطوالى الجماعه نزلوا وانا حبك لى المقلب خاصه انا عارفهم مفلسين فخليتهم نزلوا وطوالى اتقدموا وانا فضلت فى البص والبص اتحرك وكان آخر بص حوالى الساعه العاشره مساء والجماعه البص جاء بجنبهم وهم يتلفتوا وانا دموعى جاريه من الضحك المهم يومين زايق منهم وبعد داك لاقيتهم وهناك بقايا غضب وحكوا لى انهم اتلفتوا ورجونى مسافه لحدى ماقنعوا وبصات مافى الا يركبوا تكسى وتعريفه ماعندهم وماشين زايرين غايتوا قرروا يمشوا كدارى ولما تعبوا لقوا بتاع لورى تراب ماشى الثوره واقف فى طلمبه حكواليه قصتهم ركبوا معاه لحدى الثوره ووصلوا اهلهم زى الساعه 12 وهم جيعانين والوقت مزعج
المهم بعد كم سنه انتقموا منى بمقلب ساحكيه
السنجك
08-10-2006, 02:32 PM
السنجك السنجك
تاريخ التسجيل: 05-27-2002
مجموع المشاركات: 2695
وهناك مقالب بين الاصدقاء تصل احيانا الى مدى بعيد فقد كان هناك مجموعه من العزابه متخصصين فى عمل مقالب فى بعض مره قاموا بنشر صورة صديقهم فى الصحف فى اعلان يطلب من كل من يشاهده ان يبلغ ذويه وذلك بسبب انه مختل عقليا وتزوج احهم وسافر لشهر العسل وهو فى شهر العسل نشروا تهنئه للعريس وزوجته بمناسبة مولودهم البكر!!!!!
08-10-2006, 03:01 PM
hatim hatim
تاريخ التسجيل: 03-06-2003
مجموع المشاركات: 743
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
السنجك
Tragie Mustafa
عاطف عمر
Adil Osman
hatim
فيس بوك
تويتر
انستقرام
يوتيوب
بنتيريست