|
|
 Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين (Re: Ibrahim Adlan)
|
يا سلام ....
فانقف اجلالا وتوقيرا لشعراء بلادى
والذين لايزالون يضخون فينا دماء التفائل والصبر على المعاناه
اليك يا محمد تحيه وسلام
وما لدى اروع من استقبالك بكلامك زاتو
كرويات الصبر البيضاء
كرويات الصّبر البيضاء انهزمتْ
ووجمتْ
وخرّ جوادَك ... قبل يقرِّبْ
حمُيّات الغُلُب السّوداء
إنلمّتْ
وضمّتْ
وغَزَتْ أجسادَك .. وبتّ تهضْرِبْ
من هضريبك ومُر تعذيبك ..
بين النخلة ومجرى النسمة
انساقط طاير ...
فَتْفَتْ
حَتْحَتْ
ريشو قُصادَكْ ...
وكان ده حبيبك ... وقُمت تجقلِبْ
بين القيفة وباب النّهر ..
دبيب الرِّيح من دَبَش القهر ..
اتلوّى اتلبّدْ ولَدَغ الشّيمة
الشّيمة انكفتْ ..
البحر انخجّ ..
الزبد انعجّ ..
الطين انحتربْ ..
ومرقت عقربْ
ورفعت شارة ..
اندفعت فارة
تجاه المركبْ
ووقعت سارة على صنقور رواسي قريبك
وقام مِنْوهدِبْ
وكابسو الجندبْ ..
وكان دي امجادك
بين الميضنة والإرصاد
انجرحت غيمة ..
الغيمة الطيبة وحاملة حلالْ
من ألق البسمة الفي الأطفالْ
من عَرَقْ النسمة الفي العُمّالْ
والنّاس الفَالْ
انسرحت فيها شظايا آذان الوقت الواقع
بين تغريبك ... وسرقة زادكْ
مَدّتْ إيدك تالا القبلة ... رشاشها يصيبكْ ..
تسبي نديهتك ..
تفقد جيهتك
تنزف تنسف دانات دعة الهوس الديني
الطيني
الجيني
قوافل اورادكْ
تقضف ..
تركُض تالا جنازك ونعش أولادكْ
باري نحيبك ..
ترجف تتعب ..
تغضب تهتف ..
تلقى قُصادَك سدُّ مرابي
أرزقي ..
رباطة
وكور همباتة ..
لحى ونخاسة ..
وكل السّاسة الباعو نصيبك باستشهادكْ
عاد ان شاء الله تكون الجنة الماهلة ميعادكْ
إلا الحاصل ديل حُسّادكْ
بعضِ يقول الله لا عادكْ
وبعض إن لاقي طريقة يعيدك
تاني عشان الموت يصطادكْ
يا مجلوب في سوق الآخرة ..
ويا متمقلب تحت جهادكْ
خرّ جوادك ..
مات الطاير ..
لدغت شيمة
كرش الغيمة إنبعجت
دمّت ..
عينيك طمّت ..
وغمّ قليبك .. وكان دي بلادكْ
وين مستغرب .. ؟؟؟
تقدر تكسر حمرة عينك ..؟؟
تنكر سيفك ؟؟
تابى جفيرك .. ؟؟
دابك تقوى
يا بني آدم .. تفقد مرة .. مريرة ..
ضميرك تكسب ثروة ..
وتلقى العالم تحت سريرك
تشبع
تروى ..
وترضع ذاتك ..
من لذّاتك ..
وحلو الحلوى
من ما تبلع يوت تتبرع ..
وكلك نخوة ..
صدقة لعمرك .. وباقي حياتك ... ونصر الدعوة
حبّة جوامع ..
وقبة صوامع ..
وكوتة
وكوتة
تفوت الفوتة
بأسرع صهوة
عُمرة وحجة ... وتسأل ربّكْ
يقبل توبتك يغفر ذنبكْ
يمسح سفّكْ ..
خيرات شعبكْ ..
اصلها كانت عترة في دربكْ
لما تعبت ... وفاتك حزبكْ
لما ضهبت ...وخانك قلبكْ
كانت هفوة في لحظة سهوة
عن الإنسان والحال الأسوأ
ودابك فُقتَ ..
وجاتك صحوة
وجيتَ تكفّر ..
يا رب تغفر ..
اغفر ..
اغفر
عبدك خاسر شيء ما بيسوى
انت القادر ... إنت الأقوى
؟؟؟؟؟؟
يا البتخادع حتى الله .. !!!
وين الشُّهرة .. المال ... والجاه ؟؟؟؟
وين السّطوة ..؟؟
الجّشَع .. ؟؟
القسوة .. ؟؟؟
اركزْ ..
اركِزْ
لا تجيب رَخْوَة
يا مِتلبّك في الأدران ..
الحجر الأسود ما هو البروة
وما ها مكاوى الكعبة تجيها ..
حين ينكَرْفَسْ توب التّقوى
ومافي خُرَط لي الجنّة تودِّي ..
لا في خُطط ممهورة برشوة
والمشروع الديني الخالِصْ ...
ما محتاج لدراسة جدوى
يا من قال يارب من قلبو ..
رد الخالق دائماً أيوة
اركز ..
اركز ..
لا تجيب رخوة
اركض ..
اركض ..
تالا اشجار العملة
واقصِفْ ..
اقصِفْ من اوراقها ..
يمكن تستر عورة شينك ...
وما سواهو زمانك جملة
اركز ..
اقوى ..
ولِفْ بشكيرك فوق الرأس ... النشّف غيرك !!
لا تستهوى ..
قضّي منافعك وتم العُمرة
وفوّر موية زمزم قهوة
اركز .. اركز .. لا تجيب رخوة
ماك غلطان .. !!!
غلطان الشعب الجزّ جراد الغفلة كفاحو
الجنى أرباحو .. ضياع أرواحو
وجيد للحاصد ...
وبخت الحاصد
ماك غلطان !!!
غلطانين الشهداء الراحو ..
الواحد ..
واحد
ماك غلطان !!!!
غلطان الحزب الجمّ سلاحو وخيلو تناهد
ماك غلطان !!!!!
غلطان زمنكْ
واصلاً وطنكْ
ياها جراحو وعندك شاهدْ
رَفْضَك .. سَجَنَكْ ..
شان الكادح
والمتكادح
يلقى صراحو .... ويبرأ السّاعِدْ
تهتف لامن تقضف دم ..
وشارعك هازيء ..
يهز اصفاحو .. وبرضو تجاهدْ ؟؟؟
لامن صَقّرْ سن منقارك ....
لامن طايرك قصو جناحو ....
وخرّ يكابدْ
ما حَسّابَكْ ... إلا عذابكْ ..
وليلاً دائماً كارمه صباحو ..
ونجمك ساهدْ
لما بديت تفرز لي عيشتك ..
لاكو عويشتك ..
واجمعوا جملة بأنك تالفْ
وانو سقطت .. مع أنك واقفْ
فوق اسمنت وتحتك عملة
هم ساقطين في البرد الناشف ..
وجاهم زاحف قوز الرملة
الإملاق العيش الشاظف ..
وفي ظلمات الزمن العاصف ...
قاسي عبور اليم ... يا نملة !!
وهسه غلابا الدنيا الكنت بتتعب غنية عشان يرتاحو ..
المنك راحو ..
الكجنو حِنّك ... وعنك أشاحو
ضراعم غادي
عليك يتجارو .. بدون ما تنادي ..
وصاروا نفيرك وقت حصادك .. ورابى نصيبك
هرِّب ..
هرِّب ..
خير بلادك برة وسيبكْ
يا أوعية البلد القطّتْ ..
ما بيسقيك الدم الفاسدْ
ويا أودية الولد الشطّتْ ..
ما بيشفيك اليمّ الراكدْ
إلا الدم البدأ يلقّط ..
واحد ..
واحدْ
إلا اليم أب غيماً نقّط .. وجاييك قاصدْ
يا محبوبة في وضع خريف ..
شالع دجلو ..
وكضباً راعدْ
بيت راكوبة ..
وحوشو صريف ..
سَوّسْ مِرْقو ..
وسقفو يناهدْ
احسن تحت المطرة نقيف ..
بي كفيك ..
كفّي ..
والسّاعدْ
وراسنا ...
نضاري الطفل الواعدْ
لامن يبقى سمانا نضيف ..
من تخويف ..
تسويف ..
من زيف
ونلقى الوطن الحِنْ ..
مو الطاردْ
واللا الموت
الدغري
الواحدْ
|
|
 
|
|
|
|
|
| العنوان |
الكاتب |
Date |
 محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | Ibrahim Adlan | 08-09-06, 06:06 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | Sabri Elshareef | 08-09-06, 06:41 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | عزالدين محمد عثمان | 08-09-06, 08:18 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | عمر ادريس محمد | 08-09-06, 09:00 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | أبو ساندرا | 08-09-06, 11:34 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | Tragie Mustafa | 08-09-06, 11:39 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | Masoud | 08-09-06, 11:45 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | يوسف الولى | 08-09-06, 11:48 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | shazaly gafar | 08-10-06, 01:45 AM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | ابراهيم برسي | 08-10-06, 02:39 AM |
 Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | ahmed haneen | 08-10-06, 02:40 AM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | هشام آدم | 08-10-06, 04:41 AM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | عصام عبد الحفيظ | 08-10-06, 04:46 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | عصام أحمد | 08-10-06, 05:18 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | عصام أحمد | 08-10-06, 05:23 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | عبد المطلب خضر عبد المطلب | 08-10-06, 05:21 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | Sabri Elshareef | 11-11-06, 11:34 PM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | abdulhalim altilib | 11-12-06, 02:46 AM |
| Re: محمد الحسن سالم حمـــــــــــيد و راشد ود الزين ود حامد أخيرا في سودانيزانلاين | Sabri Elshareef | 11-12-06, 07:13 AM |
|
| |
يوسف الولى
فيس بوك
تويتر
انستقرام
يوتيوب
بنتيريست