|
|
 ياجماعة باركوا لينا 00 أكملنا اربع سنوات بدون مشاكل
|
مابين كلابنا التي تريد أن تهاجر للخليج
والسوداني صاحب السروال المقدود بون شاسع
اربع سنوات هي عمري بسودانيز أون لاين
اربع سنوات خرجت فيها من أهل العوض أمتطي صهوة حبي
لأزرعها فيكم كما النشوة !!!
كثيرون أحبوني
ومثلهم كرهوا سخريتي
وبين هؤلاء وهؤلاء ماء عذب فرات سائغ شرابه
والمؤسف حقاً أن يكون في كل هذا العمر من العطاء لك معجبين
لكنهم رجال بكامل شواربهم وقواهم العقلية
وبعضهم انتهت مدة صلاحيته فآثر أن يعشق كتاباتي المتواضعة
ربما هروباً من القهوة اللذيذة التي يتمنى الانسان ان يشربها في كل الثواني
وربما وربما وربما !!!!
لكن 00 أكيد تتفقون معي عندما يكون لك معجبون من الجنس الخشن تكون دائماً مصاباً بالاحباط والكآبة
**************
*سعدت كثيراً عندما قال لي أحدهم
{ انت مثل بروة الصابون يومين بس وتاني ماحاتقوم ليك قايمة }
**************
* وطبيبة بالبورد دخلت معي على المسنجر وكانت معها صديقتها الطبية على الخط وقالت لها اريد أن اعرفك على ابوحراز طوالي قالت ليها بالله عليك الله ماتجيبي لينا الترمس المسيخ دا كفاية علينا غربة !! طبعا هسي لمن اشوف أي طبيبة بقوم جاري منها صوووووووف 0 صراحة بعضهن مسيخ جداً 0
**************
* وسمعت بي أضاني دي في حديقة في الطائف مجموعة بتحدثوا عني وكانوا مختلفين على كتاباتي 00 واحد قال ليهم والله الزول دا بيكتب كويس لكن مشكلته مما يشوف ليهو بوست فيهو ريحة أنوثة لازم يحشر أنفه فيه 00
**************
* المشكلة في اجتماع جدة أحدهم لم يكن يعرف انني وسط هؤلاء الرائعين فقال لهم مشكلتكم ياناس سودانيز تتصفحوا المواضيع استناداً الى اسم الكاتب 00 يعني أحياناً مما تشوفوا اسم ابوالقنفذ طوالي الواحد يفتح الموضوع رغم انه موضوعه في كثير من الأحيان لايستاهل كل هذه الضجة والاهتمام 0طبعاً الكلام هذا في بداية ابداعنا المتواضع قبل مانلحق أمات طه 0
**************
* واحدة مرة كتبت بالله عليكم الله دا شنو كل يوم لاخمنا دا قرد ودا كلب عضى ليهو دكتورة !!!
**************
· أحد أقربائي كان يقرا لي كثيراً وقال لي : أعجبتني كتاباتك ومواضيعك واحياناً مداخلاتك أجمل من بوستاتك التي تطرحها للنقاش ولكن لم يعجبني اسمك نهائياً 00 قال بطنو طامة من اسمي 00
· صدقاً لقد قدمتم لنا واضفتم لنا الكثير واستفدنا منكم ومن حروفكم المضيئة وكنتم لنامدرسة متفردة وشمعة شامخة أضاءت لنا كل دروبنا المعتمه 0
****************
كلمة اخيرة :
نفتقد في سودانيز أون لاين التقويم قبل التقييم وحتى تكون مواضيعنا ناضجة وذات حضور مميز وكاريزما خاصة فيجب ان يكون هناك اشخاص ذوي كفاءة وخبرة بالبورد وهم كثر ليقومونا ويعالجوا أخطاءنا 00 وذلك من اجل المزيد من الابداع 0
***************
كعكة أخيرة :
تقبلوا تحيات ست النفر وتحيات الصغيرات { مآرب } و { نون }
الأخيرة دي قلت ليهم سموها { ترتيل } قاموا أكلوني حنك ساي وأطلقوا عليها { نون }
|
|
 
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: لؤى)
|
شكراً لؤي على القهوة
طبعاً كان في استطلاع قامت به قناة المستقبل
استطلاع على الهواء مباشرة
واغلب الأسئلة تم توجيها للنساء
كان المذيع يضع مسحوق قهوة داخل مغلف
ويسأل المراة { كم مرة تعمليها مع زوجك في النهار } ؟؟
السؤال فهمه الناس بغير مايعنيه المذيع
هو كان قاصد القهوة طبعا
أجمل اللحظات عندي لحظات تناول القهوة مع ست النفر
تتخللها قفشات سريعة
لكن قرات أخيراً أنها تميت القلب
خاصة لأولئك المتزوجين
والحمد لله أنها لاتقتل اشياء أخرى
لهذا عرفت السر في اهتمامها لي بالقهوة
عاوزة تكتل قلبي عشان ما أعرس تاني
لو كان ولابد عاوزين أغنية اربع سنين
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: ابوحراز)
|
حبيبنا ابوحراز
لك التحية
والله ياخوى اهنئك انك مواصل حتى اليوم بدون اى مشاكل
فاخوك لم ينجح فى هذه فما ان اعلق على موضوع حتى اسمع العجب العجاب
حتى اكان قلت دى حلوة يقولوا ده كلام تقولوا هنا وانت بتنشر الرزيلة
تصدق الواحد يمرق بالسلامة دى معجزة عديل كده والله
الله يديك العافية يا سيدى وعقبال ما تعمل ليك بورد خاص بيك كمان
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: ابوحراز)
|
حبيبنا ابوحراز
لك التحية
ياخوى الاربعة والله فى الخاطر لكن العين بصيرة والايد قصيرة
ذكرتنى بحكاية اصلى بالجماعة دى حكاية طريفة
حينما اتينا من السودان حديثا كنا فى مكة فى حى التنعيم وكان هنالك مسجد لا امام له ..
المهم كنت هناك وقدمونى لكى اصلى بهم حسن نية وظن منهم ( وجلهم بنغاله ) وصليت كما اراد الله ولكن بعد الصلاة اخبرنى احد الاحباب ان كل من فى المسجد غاضب على وعلى صلاتى وحينما سالته لماذا؟ هل اخطأت فى القراءة ام فى الركعات ام ماذا؟؟ اخبرنى بأننى لم اكن قابضاً .. ساعتها لم اعرف انى اصلى فى مسجد وهابى فقلت له ياخى ثانى خليهم يشوفوا ليهم امام غيرى ...
ياخوى حب الجمال ده فطرى واحتار كيف الزول يخليه ... ياخى الروح تروح معاه ..
الناس ديل ما سمعوا بالعشاق الماتوا من اجل الحب ياخى ..
الم يسمعوا قولنا الاثير القديم " ان كان حب الجمال جريمة فاليشهد التاريخ انى مجرم" ؟؟؟
لك تحياتى
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: Haytham Abdulaziz)
|
ود القوز 00 سلامات
وشكراً على الدعم المعنوي
وان شاء الله تكمل انت برضو الاربع سنوات
شايف معنوياتك مرتفعة
وفاكي ليك بوست ظريف فيه الوصايا ال 13
قال عشرة قال
طبعاً وصاياك دي الا الواحد يستعملها على جرعات
أو بخرات زي بخرات الطلبة وكل ماشاف المدام صارة وشها يقوم يطلع بخرة
والأفضل من هذا وذاك أن يتعامل معها مثل بخرات الشيوخ
يعني يكتب كل وصية في بخرة
ويتبخر بيها بعد صلاة العشاء
انا قلت العشاء لأن أغلب المشاكل تأتي بعد العشاء وقريب النوم
لأن كثيراً في هذه الأوقات تكون الكرة في ملعب الزوجة
بينما الزوج يشوت ضفاري في هذه الأوقات
لكن ياصاحبي والله وصاياك دي مرات ماتسقيك موية
بس كدي التقول ليك { دق } لي دهب
وانت تقوم ماتنفذ الموضوع دا
اها ياها القبلت على الحيطة واتكرفست ليك
والله تاني مية وصية ماتجيب فيها خبر
قال تحردون قال !!!
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: Tragie Mustafa)
|
استاذة تراجي
شكراً على الاهتمام
كلماتك هي التي تجعلنا نقف على اقدامنا
وحروفك المتوهجة هي التي تولد فينا الابداع
| Quote: احب كتاباتك جدا,وحزينه انك صرت مقل. |
السبب المسئوليات الكثيرة
وعدم بناء بيت في السودان
وعدم الاستقرار
وارض ماعندنا
ومستقبل مظلم ومجهول
وظلم تراه امام عينيك ولاتقدر أن تدافع عنه
وبلد مليئة بالخير
ومليئة بالعطاء
ومليئة بالخضرة والغيث
ومليئة بالأنهار
لكنها مليئة بالفساد الاداري
موارد في كل مكان
لكنها لاتدار بالطريقة القومية التي تكفل اعطاء الحق وتوزيعه على الجميع
اراضي زراعية خصبة في كل مكان
وعندما تريد لك تصديق ماء عليك أن تنتظر عامين أو ثلاثة
اجراءات بروقراطية
واداريين عفا عليهم الزمن
يحتاجون للكثير من فنون العلاقات العامة وكيفية التعامل مع الآخر
اقنعت عشرة سعوديين بالتحضير في الجامعات السودانية
ولم نوفق طيلة الاجازة من التقديم الا لواحد فقط بعد معاناة 90 يوماً مع مسجل الجامعة
الذي كان ينظر لكل من يراجعه على أنه بواب لايفهم شيئاً
وأخيراً خرجت منه وقلت له
يؤسفي انك تحتاج للكثير من جلسات العلاج النفسي المكثف
الابداع يحتاج الى استقرار
استقرار نفسي
وأسري
ومادي ايضاً
تقول الحكمة : اذا كنت تمتلك الكاس بامكانك أن تشرب بها
اما اذا كنت لاتمتلكها فلابد أن تستأذن قبل أن تشرب
ونحن في السودان ترى كأسك أمامك ولاتستطيع أن تتناولها لتشرب بها
السودان بلد جميل
لكن والله قتلته السياسة
وقتلته القوانين الادارية المهترئة
قتله سوء التخطيط
والمشكلة أنه كلما حاول أن يقف على اقدامه
تجدهم يذبحوه ويحملونه الى مثواه الأخير
والله كل ما أتمناه
أن تكون هناك خطط في بلادي من الآن وحتى عام 2025م
محور كل هذه الخطة : أن لايهاجر سوداني واحد للعمل
حتى لايقع ابناءنا في نفس الأخطاء
حتى لايتعرضوا للعنصرية والاضطهاد
وحتى لايتشتتوا في بلاد الله الواسعة
لدي رأي في كل المحليات بالسودان
فهي تحلب المواطنين دون أن تقدم لهم البرسيم
| |
|
|
|
|
|
|
|
|
 Re: ياجماعة باركوا لينا 00 أكملنا اربع سنوات بدون مشاكل (Re: ابوحراز)
|
ود ابو حراز ســلامـــــات
Quote: وفاكي ليك بوست ظريف فيه الوصايا ال 13
قال عشرة قال |
(الله يجازي اخونا كوليل)
يا ولدنا انت حاكيها مالك خلاص انت اقرا عشرة و التلاته الباقية دي احتياطي لزوم النفس القصير و عدم اللياقة.
Quote:
انا قلت العشاء لأن أغلب المشاكل تأتي بعد العشاء وقريب النوم
لأن كثيراً في هذه الأوقات تكون الكرة في ملعب الزوجة
بينما الزوج يشوت ضفاري في هذه الأوقات |
فعلاً لأنو زي ما بقولو بعد العشاء ما في إختشاء.. اها لو جاتــك التحت دي:-
بعد كدة بقت التحت دي :
| Quote: الكرة في ملعب الزوجة |
في ملعبـــك انت يا كابتن (الزوج)
خصوصـا لو نفذت طلبات الزوجة..
على العموم شكرا كتييير على المرور ... إلى لقاء آخر
هيثم
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: Haytham Abdulaziz)
|
هيثم
| Quote: في ملعبـــك انت يا كابتن (الزوج) |
قال في ملعبك قال!!!
والله أول ماتتشاكل معاها خاصة في الليل الفي راسك كلها تطير
ياخي ديل مرات عندهن حردة بطالة جداً
بعدين المراة السودانية زي أحوال الطقس
مرة درجة الحرارة مرتفعة
ومرة منخفضة
مرة تمطر
ومرة جفاف قاسي جداً
ومرات كمان تجيب ليها فاصل مداري
يعني برضو مرات في بعضهن يعجبنك
البارح بنلعب كوتشينة
عليك أمان الله واحد صديقنا جاتو مرتو في محل الكوتشينة
ونهرتو ليك قدامنا
وقام شتت الورق
وشتت هو برضو
ابن الذين تاريهو طرطور
لكنا بغلبنا كيف ماعارف ؟؟
| |
|
|
|
|
|
|
|
|
 Re: ياجماعة باركوا لينا 00 أكملنا اربع سنوات بدون مشاكل (Re: ابوحراز)
|
العذب أبوحراز
| Quote: بعدين المراة السودانية زي أحوال الطقس مرة درجة الحرارة مرتفعة ومرة منخفضة مرة تمطر |
طيب الأجواء الفوق دي كويسة لأنو انت من تدير الأمور كربان السفينة .. يعني ما تحرق رزك ياخي .. طول بالك النسوان السودانيات ديل .. راسهم خفيف ... و كلمة منك حلوة .. و كلو يهون من اجل ذلك بس لازم انت تطلع كسبان الرهان.
امـــا لو حصل التحت دة:
| Quote: ومرة جفاف قاسي جداً |
فأوصيك بالإكثار من السوائل يا لذيذ يا رايق ... ستيم تفــاح يابحراز لعبــك صــاح ... بس ما تنعكس و تبقا حقــك رااااااااااح
كل الود
هيثــــم
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: Haytham Abdulaziz)
|
Haytham Abdulaziz
انت الظاهر عليك ماعرست لسه
كلنا كنا بنقول كلامك دا لمن كنا في بر الأمان
| Quote: و كلمة منك حلوة .. و كلو يهون من اجل ذلك بس لازم انت تطلع كسبان الرهان. |
والله قبل مانعرس حفظنا كتب نزار قباني وفاروق جويدة
مسكناها من الرموش وانت نازل
وبرضو مرات ياها الحردة
وياها الكرفسة
لكن فعلاً هن ميزتهن بيرضن بالقليل
ومرات حبة لبانة صغيرة تغير الموضوع
يعني بصراحة المرأة طفلة حتى تبلغ الثمانين من العمر
وبرضو ماننكر انو ابو القدح طفل
ويحتاج الى دلال وغنج
اتمنى حياة سعيدة لكل من تزوج
وأن تكون كل الحياة الزوجية بنكهة اليوم الأول لشهر العسل
| Quote: ستيم تفــاح يابحراز لعبــك صــاح |
شربت يوم ستيم في مستشفى أم درمان
والله كأنه فيهو ديتول
من يومها وحرمنا الاستيم
قال يالذيذ يارايق قال !!!
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: ابوحراز)
|
أولا دخلت بي رجلي الشمال لأنني توجست خيفة من عنوان مقالك وخفت تتهابل وتعملها وتعلن إعتزالك عضوية المنبر وأنت في ريعان شبابك تشابك لأنو كتيرين عملوها وأحمد الله أنك لم تفعل .
تراثنا بقول
الراجل ما بشكرو قدامو (يعني أشكروا أوف لاين)
والشكرو نبزوهو (طيب النبزو أو الشتمو ده بيكون عملو ليهو شنو)
ويوم شكرك ما يجي (وده طبعاً إبتكار نسوان أهل العوض ناس ست النفر وبت المنى لأنو لو مات كلب في الحلة يغنو ليهو ، الليلة يا العشاي الليلة يا سيد الرجال الليلة يا أب كريك ، وهو تلقاهو في أيام حياتو ما يسوى عندهن بصلة ولمن يكونن واردات البير أو جايات من الجزارة ويشوفوهو يقعدن يمصمصن ويعوجن في خشومن ، بس ده شنو ده الما بشبه رفاقتو المعولق إلى آخر الردحي)
وأنا ضد الكلام ده كلو ، يعني لمن أشكرك لازم تسمع ويوم شكرك لازم يجي إذا كنت فعلاً بتستحق الشكر ، أنت يا أب حراز تمزج في كتاباتك بين البساطه والعمق وقد حباك الله جلت قدرته ومن خلال معرفتي السايبرية لك بقبول عند الناس يعني بالرغم من شناتك أو قل جمالك النسبي – والنسبة هنا متروكه للأخ الزميل مصدق مصطفى لأنه بارع في فن الكاركتير – إلا أنك تتحب ومن مين من ملا عديل كده تصور ملا يحبك دي زي يحبك برص مش كده ، أكيد أنا ما بحب شكلك ولكن برغم أحترم كتاباتك وأقدر لك طرحك وطريقتك الساخرة الغير منفرة في الكتابة والمقدرة على إدارة الحوار والبكاء على الجكس ، إنت يا وهم هسع بالله عليك قايل فلانه ديك أنثي البضمن ليك كده شنو يمكن تكون راجل لمن غلط أها تمشي وين ، أنا مقدر إنك فاقد حنان وأن صقيع جبال السروات حيث تقيم مضافاً إلى ذلك البعد عن البلد وأهل العوض وأمر الكفيل ومسكولات ست النفر يجعلك في حاجة مستمرة للعطف والحنان لكين كمان ما تندرش يعني حاول وازن وخليك في النت زي لعبة شيل الليمونة بالملعقة ويديك خلفك ظهرك أنا في بوادينا كان بتلعبو شدت والتي يسميها أبناء المدن حنكشةً حرينا ، وحبي ليك لسه ما خلص شيل شيلتك
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: almulaomar)
|
الملا عمر
| Quote: أنت يا أب حراز تمزج في كتاباتك بين البساطه والعمق وقد حباك الله جلت قدرته ومن خلال معرفتي السايبرية لك بقبول عند الناس يعني بالرغم من شناتك |
حب 00 ومن راجل عديل كده 00 ياساتر
طبعاً كنت بالمرحلة الابتدائية أكره أي طالب وسيم
وكنت افتعل معهم المشاكل لأسباب تافهة جداً
واسوأ ماكان يغيظني أن بعض المدرسين يسمعون كلامهم
وإنت لو جيت قلت بيت ناس فكي يحيى حرقتو النار زول بيشتغل بيك مافي
كان أحدهم وسيم ومن عائلة غنية جداً
وأذكر أنهم كانوا في الصباح الباكر لديهم حمار مربوط في الخارج
لزوم الترفيه يعني
تصدق كانوا يأكلونه { التمر }
وعندما اكتشفت هذه الحكاية بدأت اذهب مبكراً للمدرسة
وذلك بغية أكل حبتين او ثلاثة خلسة من هذا الحمار
ووالدي عليه رحمة الله كان يشكرني كثيراً
لأنني أهتم بمدرستي واذهب اليها باكراً
بل بدأ يحكي لهم في الدواوين بانني سيكون لي مستقبل افضل
لأنني أهتم بالمدرسة
وهولايدري أنني اهتم بالكرتونة التي ياكل منها الحمار !!
قال مبكراً قال !!!
المهم يوم اتشاكلت مع الوسيم دا
واعرف جيداً أنه لو ذهب واشتكاني الى المدير فسوف تكون الطامة الكبرى
لأنه سيصدقه في كل الأحوال
لهذا ذهبت للمدير أولاً وانا ابكي
وقلت له : الفاتح دا قال لي { أحبك }
مات المدير وقتها من الضحك
وقال لي : عليك الله حصل أمك قالتها ليك ؟؟؟
شكراً أخي الملا عمر على دعمك الكبير لشخصي يكفي فقط انك تقرا لي وهذا سيكون مصدر فخري وتقديري 00 وكثيراً ما أجد مداخلاتك تهزم النص الأصلي 8/صفر وهي دائماً ماتكون اضافة جيدة ورائعة لما أكتب 00 ياليت لو تكون كتاباتي عميقة وبسيطة ومهضومة في نفس الوقت وهي في كل الأحوال مجموعة أنفاس مكتومة بالداخل نريد ان نبثها بعمق وأن نفضفض عن أنفسنا 00 والله كثيراً تأتيني { قرفة } وزهجة غير عادية 00 وأحمد الله ان هذه الزهجة عندما تأتي لايكون معي أحد بالمنزل لأنني يمكن أن أعضي كل من يقف أمامي في هذه الحالة وكثيراً ما عضيت ست النفر وأظرف شيء أنني لا أعضيها في وجهها حتى لايتشوه وأكثر العضات كانت في الكتف القريب مني 0 أحرجتني ابنتي الصغيرة قبل ايام عندما حضر الينا ضيف وكنا نتاول طعام الغداء فأتته خلسة وعضته في رقبته المطوطوة وهو من الأشخاص الجادين ولايضحك الا في نهاية الشهر عندما يستلم الماهية 00 غايتو عمك { وشو } بقى أحمر لكن خففنا عليهو بوضع صحن الشيه أمامه مباشرة 00 ربما لمست بيديك صراحتي المفرطة خاصة مع الجنس الناعم { الذي بدأ في الآونة الأخيرة يتحول الى جنس أخشن من الجنس الخشن } لكن صاحبك والله رغم هذا وذاك زي النعجة لمن يمشي السودان ولا اعرف اتحدث معهن وكثيراً ما أهزم في هذا الموضوع أكبر عوير في حلتنا 10/صفر وهو الذي تزوج بنت عمه الجميلة ويوم { الدخلة } قال ليهم لافندق ولايحزنون 00 المهم ضرب اقرب بيت وقعد فيه مع العروس لكن ماعارف كيف الطريقة التي يبدأ بيها الكلام حتى يمكنه التعمق أكثر في زوجته 00 أها قومي يا الجدادة المصابة بأنفلونزا الطيور أدخلي عليهم 00صاحبنا ماصدق 00قام قال ليها : بتنهري الجدادة دي وللا اقوم اقفل عليك الباب دا !!!! وذكرني برضو العريس العوير البهيمة بتاع يازول يازول كان ماشي شهر العسل أها الجماعة قالوا ليهو بترجع متين ؟؟ قال ليهم : كان قضيت الليلة دي بجيكم راجع 0
عليك الله دي أمة يعرسوا ليها
والشيء البغيظ مثل هؤلاء لايتزوجون الا أمثال اليسا وهيفاء وهبي !!!
تقعد بجواره تلقى مرتو جميلة جدا
وهو { يريل }
ويذهب عنك فتجد ريالتك قد سالت وملأت كل القميص !!!
قال يمصمصن قال !!!
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: انعام عبد الحفيظ)
|
الاخ الكريم ابو حراز
مبروك وعقبال المية،مع حبة مشاكل للتحلية وكدة
طبعا نحن اولاد حفرة من قبل افتتاح حوش بكرى، اتزاملنا برضو فى بريد قراء الشرق الأوسط
تحياتى لست النفر وللامورات وعقبال الأمراء، اوعك تقول داير تعرس عشان تجيب الولد، لكن طبعا ست
النفر ممكن تفكك عكس الهواء اذا فشلت فى انجاب الذكور لانه ده مسئول منه الأب كما يقول العلم.
غايتو كان عملت معاى أى شكلة بحرش عليك ست النفر وما تنسى انى طبيبة، يعنى حتسمع كلامى
تحياتى
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: مهيرة)
|
مهيرة
| Quote: تحياتى لست النفر وللامورات وعقبال الأمراء، اوعك تقول داير تعرس عشان تجيب الولد، لكن طبعا ست النفر ممكن تفكك عكس الهواء اذا فشلت فى انجاب الذكور لانه ده مسئول منه الأب كما يقول العلم. |
عرس تااااااااااااااني يامهيرة
والله توبة ياحبوبة
كفاية الشفناهو في العرسة الأولى
بعدين أجمل شيء يكون معاك { جن } بتعرفه
تقوم تمشي تغير بواحدة تانية والله الرماد كال حماد
والله عندي صديقي زوجته جميلة جداً
لكن عينه طويلة زي مابقول المثل
اها في زوجة مغترب زوجها مات
والغريب نسوان المغتربين البموتوا أزواجهم عندهن سوق حار جداً
ماعارف الحاصل شنو
المهم صاحبنا يبدو انه بتاع قروش
خاصة وان المغتربة دي كانت شغالة تدريس خاص
قام اتزوجها
بعد يومين أرسلت ليهو شافعة صغيرة
وقالت ليهو : عاوزة 5 الف أواجب بيها جارتنا دي لأنها واجبتني في عرسي
العريس صدم 00 تفاجأ بان الأرملة ماعندها قروش
هسي سافر ليبيا
لاقديمة ولاجديدة
قال زوجة مغترب قال !!!!
Quote: طبعا نحن اولاد حفرة من قبل افتتاح حوش بكرى، اتزاملنا برضو فى بريد قراء الشرق الأوسط
صراحة كنت استمتع كثيرا وانا اكتب بالشرق الأوسط |
وكنت أقرا لك
ولم اتوقع أن نلتقي يوما ما عبر هذا المنتدى
الغريب أن قصاصاتي التي احتفظت بها في الشرق الأوسط
أفادتني كثيراً
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: انعام عبد الحفيظ)
|
أختي انعام
Quote: معقولة لكن انا كنت مفتكره انو العنوان ده خاص بيك انت وبى ست النفر
وانو الاربعة سنين دي هى عمر زواجكم |
قال عمر زواجكم قال !!!
والله لو عرفتي زواجنا متين تصابين بالدهشة
نحن ناسنا قبل ماتنجض كويس يقوموا يعرسوا ليك
بس مرة نطيت في حوش الجيران وكان عندهم بنت جميلة جداً
طوالي الجماعة بعديها { لخوا } الحنة
وقالوا لازم نعرس ليك بعد يومين
وأنا نطيت الحوش عشان أجيب الكورة لأننا كنا مجموعة بنلعب كرة قدم
الله ينعل أبو دي { كورة }
اليوم التاني جابوا الدلوكة
اليوم التالث جابوا المأذون
اليوم الرابع شهر العسل
وياها الورطة من يوم نطينا الحوش
****
Quote: يا سيدى نحنا من الناس الاحبوا سخريتك فى الكتابة
وبالعكس هى الخلت كتابتك عندك طعم خاص |
شكراً كتير يا انعام لأنك احببتي كتاباتي البسيطة
وحا اسجلك عندي في سجل القراء الذهبي
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: ابوحراز)
|
حروزة مبروك و الف مبروك
لكن انا زاتوووووووووووو كنت قايلة الاحتفال بمرور أربع سنين مع ست النفر، تاني اتذكرت
انكم يا معشر الرجال مع حريمكم بتفتشوا تاريخ الانتهاء بتاع الصلاحية. زي المسطول بيفتش في القسيمة مرتو قالت ليه بتفتش في شنو؟؟ قال ليها في التاريخ، قال ليه تاريخ الزواج ما ياهو قدامك، قال ليها انا ده لقيتو لكن بفتش في انتهاء الصلاحية.
على العموم يا حروزة نحنا بنريدك و بنريد كتاباتك من زمن الصادق و تغريد وبناديها وودشدادوايزول والفاضل و ايييييييييييييييك لسه اللستة طويلةز
لكن برضو مع الجيل الجديد البيقراك اسي حا تكون الدنيا أحلى.
وبس
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: BitAlhana)
|
بت الهنا
والله جميل تاريخ الصلاحية دا ياريت لو بيكتبوه
عشان كل واحد بعد المدة المقررة تنتهي يشوف ليه { درب } تاني
لكن نحن عندنا حاجة اصعب من تاريخ الصلاحية
عندنا واحد في قسيمة الزواج بيشهد بالانابة عن الزوجة
وكيل الزوجة يعني
الزول العجيب دا قالوا أي قسيمة شهد فيها للزوجة يستمر الزواج حتى المقابر
يعني قالوا الراجل مابيفكر اتزوج واحدة تانية
والغريب انه عنده شعبية كبيرة جدا من النسوان
يعني أي واحدة تقول ليك لازم يشهد لي { حاج الماحي }
| Quote: على العموم يا حروزة نحنا بنريدك و بنريد كتاباتك من زمن الصادق و تغريد وبناديها وودشدادوايزول والفاضل و ايييييييييييييييك لسه اللستة طويلةز |
ياسلام على هؤلاء الناس الجميلين
لا ادري أين ذهبوا الآن
كانت بيننا مداخلات جميلة
وحرق أعصاب
ومكاواة حد الجنون
وشغب بلا حدود
كان سودانيز اون لاين واحة كبيرة للاستراحة
واحة للنغم والهدوء والاستجمام
واحة للجميلين والمبدعين والبريئين والعميقين جداً
هسي بقى زي النشرة الجوية
كلو فاصل مداري
وتحزبات
واختلافات
ومجاملات
| |
|
|
|
|
|
|
|
|
|
Re: ياجماعة باركوا لينا 00 أكملنا اربع سنوات بدون مشاكل (Re: لؤى)
|
شكراً لؤي على الهدية القيمة
اعجبتني كثيرا واستمتعت بها
وكذلك فنجان القهوة الرائع الذي لايشبه قهوتنا
اها زي القهوة دي وين بنلقاها في الخرطوم ؟؟
لكن برضو قهوتنا طقوسها أجمل من مذاقها
وانتظارها أجمل من طقوسها
{ تصدق عندنا تيس في الحلة هناك اول ما النسوان يسون الجبنة هو بنعس }
| |
|
|
|
|
|
|
| |
ابوحراز
لؤى
قرشـــو
Mustafa Mahmoud
Haytham Abdulaziz
Muna Khugali
Tragie Mustafa
almulaomar
انعام عبد الحفيظ
مهيرة
فيس بوك
تويتر
انستقرام
يوتيوب
بنتيريست