نعى اليم ...... سودانيز اون لاين دوت كم تحتسب الزميل فتحي البحيري فى رحمه الله
وداعاً فتحي البحيري
|
|
 "حال البريد مشغول"
|
هل غادر لوركا من متردم?, ام عرف الدار عبد القادر سالم,وليس من متردم,بل مردوم,مردوم حلو,ترقص له جنبات الشرايين.
..
الليله غاب تومي
دلوني ياخلايق
..
اظلام:لمدة خمس ثواني مع استمرار ضخ الاغنية.
..
اضاءة متدرجة,من بعد,الموسيقى تعمل راحة تشمل كل الالات عدا الايقاعات,تشتد الاضاءة فجاة بقوة ضربة,اضاءة في شكل قرطاس اخضر تسقط على عازف جيتار فلامنكو اسباني يبغت chord ,في نفس توقيت ضربة الضوء,بعدها دعوه ليلعب,يلعب,حتى يسيل لعاب السمع,تتحرك الاندلس بكامل بهائها,لترقص بارتياح في مزيكة عبد القادر سالم.
..
ياله من صوت اخضر,فيه تحس رحمنة ندية,تحيق بدماغك كهالة تاملية اخذة,تهدا اخلاط بدنك لتغدو استقصات رائقة,وهذا يوحي لك ان تكتب,على سبيل المثال,وحتى ان عزمت على السكون,فانك واجد روحك تكتب داخليا,فمع عبد القادر سالم,هيهات تقر الشجون وتسكن,تاتيك كل البيوت,كل البراحات الحميمة,كل الجراح.
..
حال البريد مشغول
ما تقولو عاد خايب
..
اعد نجوم الليل..
..
اعد نجوم الليل..
..
الليله غاب تومي..
..
خرشات العود هياكل هندسية مثل نقرشة الماء على صخر,هو اصم,وتحسبه هاشا لتصبب الماء عليه.
..
صبرا بجيب الخيل
لي نارو ما طايق
..
خلوني ياحبايب
..
لا تصدقوه,فهذا من مكر المحب.
..
حبل الصبر ممدود
للخير بجيب سايب
..
اسمع' قامات' اندلسية,وغجر وزيطه وزمبريطه.
..
المشهد: مشهد السيرك في رواية ماركيز"..العزلة".
الايقاع مازال مستمرا,تاتي التمامة صولو جماعي للالات,ينفرش المردوم مزيكه.
تتهاوم نايات فلوت كمال يوسف,ترقص عليها ثعابين هندية,ورائها غجري يؤكد اتجاه ان الغجر,رومان بحرمتوسطيين,وهنود ايضا.
..
اظلام مباغت:صمتت كل الاوركسترا,الا الايقاع الذي برز -كما تخيلته- في تمثل
باركيشن وكنقا,عليهما الاخوين مليجي الكبير,ومليجي الصغير.
اضاءة وسطيه وسطيه متدرجة:يظهر عوض احمودي جالسا بين الاخوين مليجي,يدفق العود بصولة سريعة الضربات وبها كل اشجانه المدركه.
..
حبل الصبر ممدود
..
خلوني ياخلايق
..
نعد نجوم الليل..
..
اغنيه شبعانه وتريانه ورويانه ياصاحبي.
..
نعمل ايه?
..
نحن مواطنون يحملون حنينا.
..
خرجنا نبحث عن براح خال نبدع فيه.
..
غدا البراح سجنا ذا اربعة جدران.
..
لم ياتنا الابداع داخل السجن خاليا من كبد.
..
نحن محزونون حزنا تلطفه رائحة الصور الحميمة الغامضة. وطن تتغير ملامحه كل شروق شمس,انها نعمة الذاكرة البصرية.
..
نحن ننتمي لاكبر خارطة افريقية.
..
خارطة حرياتها حلم جميل.
..
شتات يا فرده.
- بلد انقـطعت فيهو الرحمه?
- بلد..هو الرحمه ذاتها.
..
..
الليلة غاب تومي
خلوني ياحبايب
..
المردوم ردم الوجدان ردم شديد خلاس!
(عدل بواسطة محمد بهنس on 06-01-2006, 00:26 AM)
|
|
 
|
|
|
|
|
|
|
|
Re: "حال البريد مشغول" (Re: محمد بهنس)
|
حال العقل مشغول
والدبرسة ساده على الدرب
وجيت بالحنين
وينك ياراجل يا طيب يا سيد الصورة المضوية ليلنا
مبروك الحفلة ومبروك الحت الحتيتوه في الرقيص الماخمج
\ ونغمات عود حمودي ما تنفعكم ( زول حاسد )
شنو الاختفاء وليه لابد ؟؟
ليك الشوق والمودة
| |
|
|
|
|
|
|
|
|
|
Re: "حال البريد مشغول" (Re: محمد سنى دفع الله)
|
حال البريد مشغول ؟؟
سلامات ، طيب ، يا بهنس ..
والله يحفظ معاليك ...
شفت السودان ده ممكن يكون رحب وفسيح كيف ؟
وإنو فيهو شيء لله ؟
بلد عجيب يا صحبي ، وغريب ..
وعبد القادر سالم .. ذلك الفنان المُغني البديع ، يا سلام ؛
صوته مفروش على سجادة من الشجن .. يحيلك إلى رياح الصحارى
المتدة للبعيد ورملها الدهبي المبسوط ، ويجول بك ، كذا ، تحت
المطر ولمعة البرق ..
صوت ساحر ، وفيه ذلك الشيء الذي قد يجعلك تبكي ..
عبد القادر سالم ، يا بهنس ، كلما سمعته ، وكأنه يمسك وجداني
على كتفه كرضيع إبن يومين ، يغسله ، ويهدهده ليجعله راااائقاً
زي أحلام صبية قبلها حبيبها قبل دقايق ..
سلامات يا عزيزي وصاحبي بهنس ..
كتابتك جميلة ، وشفافة ، نقلت لي ما كنت أتمنى أن أكون معكم فيه ..
الحياة أمامنا إذن ، وسنلتقي ..
...
طلال
| |
|
|
|
|
|
|
|
|
|
Re: "حال البريد مشغول" (Re: طلال عفيفي)
|
حبيبنا ود السني..
حياك الغمام..
جاتنا مزيكة طرب..
عاملة مزيكة قرب..
او كما قال.
..
تسلم عن سؤالك.
الحمد لله على كل حال.
..
ذاكرة الصور..
انها ذاكرة الصور يا ود السني..
هذا كل ما في الامر.
..
انا متابع وموجود,
كيفك انت,وكيف حبيبنا الفنان عماد عبدالله?
..
مرورك طلعة خير
..
تحيه قلبيه
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
حبيبنا الواجد طلال
..
ياصاحب اللون البحري..
عليك السلام..
..
متابع مهامك الجمالية الانسانية,اشد من ازرك.
..
مليون حزن مربع,مليون نغم مربع,مليون دائرة,مثلث,مربع.
..
حتما نلتقي ان شاء الله
قبل ذاك,ارسل لي تلفونك ماسنجريا,لو سمحت من بعد.
..
تحيه قلبيه
| |
|
|
|
|
|
|
|
|
|
Re: "حال البريد مشغول" (Re: تولوس)
|
عبد القادر سالم
" عمري ما بنسا"
الصوت الأليف ,,
احد المُشكلين لذاكرتي الصوتية
صوته يعيدني لأماكن وجو وعمر كامل
تألق فيه صوته
كنت صبيه واحبه
اتهجي صوته بنقاء
بخط انيق داعب صفحات قلبي ,,
شكراً يا بهنس لفته بارعة من بارع !
| |
|
|
|
|
|
|
|
|
|
Re: "حال البريد مشغول" (Re: Adil Osman)
|
حبيبنا الفنان عادل..
لا يا سيدي..في قبل وبعد كلامي كل الكلام الرصين.
..
صورك عطرت بوست ضعيف يتشبث بحنين,هو كل قيمتي كانسان.
..
مرحى لك
..
تحيه قلبيه
| |
|
|
|
|
|
|
|
|
|
Re: "حال البريد مشغول" (Re: Soumeta)
|
عزيزتي عزه..
كيفك?
عساك بخير.
..
..
المردوم عرس الايقاع ,السيرة روح المقاتل,الدليب طرب الروح والجسم,الجالوبا ملكة الايقاعات,الريقي رسول موسيقي.
..
..
تحيه قلبيه
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
السحر !
من ينقذك من السحر الشجي ، من الحزن ؟
من يأخذك ويعود بك إلى بلد ، لك فيها أهل وناس
وآلاف المواعيد المنثورة زي السمسم على درب الحمام ؟
من يا صديقي يحلك ، لو ساورك بكاء آخر الليل ، وأنت وحيد ؟
من يأخذ بيدك التي تحن ليد ؟
من يفتح عيناك الصباح ، على شمس الصباح وتحايا الصباح :
أصبحتوا طيبين ؟ ، سلام عليك ! ، عافية ؟ ..
الملك لله يا بهنس ..
والحزن للناس ..
وطنك : حلمك ، لو صدقك .
...
طلال
| |
|
|
|
|
|
|
|
|
|
Re: "حال البريد مشغول" (Re: طلال عفيفي)
|
يا لجمـــــال المردوم ....عبد القادر سالم ده يسطر ما يسطره من عذوبه في صمت وتجرد... يوم شكرو مايجي..
كل الامتنان بهنس.. لكلماتك ووصفك الذي حملنا لاسبانياعلى اجنحة مردوم غربنا الحبيب...
| |
|
|
|
|
|
|
|
|
|
Re: "حال البريد مشغول" (Re: طلال عفيفي)
|
مداخلتك تدعوني للهرب قليلا مع ما هو ايضا يعيدنا لنفس الحزن الشهير,صديق صديقك محمود درويش,'حزن نبيل', لكن وانما.
..
..
حال البريد مشغول
..
..
مما يلطف شجوني الحديث مع طلال.
انه روح استسكانيه,بمعنى انه يساكنك.
..
..
داير تجيبني بي فاكس سريع
..
..
..
..
..
ياشقي
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
بهنس ، سلامات ..
تعرف الحالة - الحنين - القبضت فيها مفرداتك دي من جواك ، حالة تمر بي الواحد كتير ، اول تصرف تجاها هو جرً القلم وسلخ الورقة من أخواتها، لكن علي قدر تكتب تلقى كلامك ما مقاس حنينك ، ودائماً مصير كتابات حالات الحنين مكانا (السلة)،( بركة لي ( الله) ده). كما تقول حاجة عجوبة -ربنا يرحمها - حينما تتشبع بـ(المريسة) .
لكن مفرداتك دي مقاس حنينك بالظبط والربط ، ومقاس حنين عترً ليً دربي وسلخت ليهو ورقة وسليت ليهو قلم لكن ما قدرت عليهو رماني قبل الجولة .
عليه ، وحاة الخوة ، متعة متعتنا ليها ، ودبرسة دخلتًنا فيهاومرًقتها مننا ، وانا اليك راجعون
| |
|
|
|
|
|
|
|
|
|
Re: "حال البريد مشغول" (Re: mutwakil toum)
|
سلام يا بهنس والناس الحلوة هنا ..
الأغنية دي كاسرة فيني ضلعة من زمان ياخواض ..
حال البريد مشغول
ما تقولوا عاد فايق
( كنت اظنها : على البريد )
الفياقة وعدم الشغلة ..
حكم ثقافتنا الرسمي في غالبه ، على شئون الحب والشاعرية والدروشة ومعهم الفلسفة والجمال .. يعني باختصار معظم ما يعني جمعنا هنا .. نحن جمهور الجمال حاسر الرأس عند كل جمال .. القوي ، مصارع الأجيال ، حري بنا القول :
خلونا يا خلايق !
خلونا يا خلايق !
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
محمد بهنس
لماذا؟
كلماتك
وعبدالقادر سالم الغُناء.
عبدالقادر سالم...
رونق الشجن
يمسك بنبرات صوته حس الروح...
شكــــــــــــــــرا.
ويا محمد حولتني ليك تماضر من بوست...السردوب...تماضر الزكية ذكية الكلم
انت صاح، انا هنا سردوبتى بتختفي.
لكما معا
محبتي.
| |
|
|
|
|
|
|
|
|
|
Re: "حال البريد مشغول" (Re: Omayma Alfargony)
|
العزيزه اميمه..
مقام استاذنا عالي,ونحن نتشوف.
الله يخليه لينا.
..
..
حبابك وحباب الجابك.
تماضر واسطة عقد الطمانين في البورد.
..
..
اما السراديب فهي ذائبة بالغلغلة,اي زول يتغلغل صاح,يفتش للسردوب ما يلقاه,
الا يشحد ليو سردوب
او يشتري سردوب'قدر ظروفك' او'سردوب الظروف وقاع'
..
..
..
تسلمي على الطلة
..
تحيه قلبيه
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
Quote: اما السراديب فهي ذائبة بالغلغلة,اي زول يتغلغل صاح,يفتش للسردوب ما يلقاه,
الا يشحد ليو سردوب |
والله يا محمد
كلامك حكم
محكّّّّّّّّّّّّّّّّّرررر!!!.
تبرى من السردوب كان باين ولا كان مغلغل.
تسلم
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
حال البريد حالة ..
حالنا أوحل ..
يا صاحبي هناك ..
الطريق إلى نيالا , و شتاء ما يلحق بالقطار المنغمس تمام في إيلاج عشقه عميقا في السهل الدارفوري البتول .
غارسيا ماركيز كان يلقم العين - للمرة الأولى - بمئات أعوامه المنعزلة ..
و كما الهسيس يأتي من مؤخرة عربة الدرجة الثالثة صوته - عبدالقادر سالم - : حال البريد مشغول ..
يندغمان : ماركيز يغوي .. و صوت عبد القادر يشعل ..
و.. كدردقش .. كدردقش .. كدردقش .. كدردقش ..
ما زال ذلك كذلك ..
نيفً و عشرون عاما ..
يدخل عبد القادر و( من أريد ) حالهما عند بوابات الجن الكلكي ..
تتبعهما النغزة في القلب .. ثم ..
كدردقش .. كدردقش .. كدردقش ..
فينكص ماركيز ..
إذ لا قبل للمسكين بهكذا حنين مرتل .
يديك العافية يا بهنس ..
وتاني ما تعمل كده ..
بطل جنك .. و ..
خلي الخلايا تنوم
| |
|
|
|
|
|
|
|
|
|
Re: "حال البريد مشغول" (Re: Emad Abdulla)
|
والله ياعمده ضحكتني,لمن جيت اضغط"رد", الماوس لطش,قفلت الوب خالص!
..
..
..
يا حبيبنا عماد
..
جدا ياحبيب
..
انا اوعدك تاني ما اعمل كده
..
ياخ شغلة الكارو دي كيفتني جدا..
بعدين شنو ياعمده!
هاك المشهد ده:
نهاري.خور او منخفض وهادي شرقي شرقي غربي.
تسمع مزيكة جالوبا تقترب,ليدخل الكادر (كمن هو شاقي ميدان) كارو مسرع,عليه صبي راستا,راستته صغيرة,لكن وجهه مليئ بخبرة وجراة.سماعات ساوند,يعني بالعربي سماعتين.تمر الجلبة سريعا.
..
..
انا هسي طلعت بره المشهد قاصد.
..
..
لكما في الدوحة ما اغبطه.
..
..
واصبر
يوم بتندغت وبتعمل نفس العمليه
..
..
الجن الكلكي?
..
- ابدا
..
-طيب شنو?
-.. حال البريد مشغول ياصاحبي
..
تحيه قلبيه
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
بهنس ..
ماعرفت أقول شنو ( مازال قطار الغرب يمشط دمي .. كدردقش .. كدردقش .. كدردقش .. )
( قلبي انقطع .. قلبي انقطع .. قلبي انقطع .. قلبي انقطع .. قلبي انقطع .. )
هذه الـ ( سيبيريا ) من جنونك فوارة حد اللهاث .. و صوت عبد القادر قضيبان يحملان إلى ( حيث يبعثون ) ..
- شكيتك علي الله كان تورت نفسنا -
Quote: قلتُ : مجنون هو ( كشأن الرسامين ) ..
قلتُ : ولد مطموس .. ( على طريقة أمي الزلال )
قلتُ : سائحٌٌ في بلاد الله الواسعات .. مضاربه هيِّنةُ الحطّ و الترحال . أينما جمال , ثبت أوتاده و .. أقام
قلتُ : أيكون ( فكي ) ؟؟؟؟
قلتُ : بل صوفيٌ زنديق .. سرقته حوريات اللون فهام علي وجهه في فلوات الروح ..
قلتُ : هو أحد الـ wailers فاته اللحاق بالـ ( زيون ترين ) في مدن الضوء والظل .. واللوحات التي عصمتها ( العقلانية الفجة ) .
قلتُ : صعلوكٌ بهنس هذا حين يريد .. و ( كونت ) و ( دوق ) و.. ( مولانا ) حين الحين ..
قلتُ : ولدٌ عاقْ .. أفلت من ربقة أزمان القيد .. وفرمانات التلمود و أبخرة المدن الأسمنت .
قلتُ : ( بَعشَر ما شايف شُغلو ) .. هذا ولدٌ فيه : بسم الله الرحمن الرحيم ..
|
يا بهنس ..
أحبك هكذا .. مشغول بان تريد ..
حيثما جميل .. حيثما ما شاء لك إبليسك من ( ريده ) ..
يا مطرطش ..
| |
|
|
|
|
|
|
|
|
|
Re: "حال البريد مشغول" (Re: Emad Abdulla)
|
كمائن الصمت ,بعض ما يهبك الاصدقاء من اطراء.
..
..
..
تمر بنا ذاكرات الحنين.
ربنا يجمعنا جت غانمين.
..
..
تسلم ياعمده
..
صفحات لا مرئيه تعني تواصل .
..
تحيه قلبيه
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
انا ما داير اطلع من موضوع البوست واكون اشتر لكن لان بيننا شجر من الليمون في عنق البساتين البعييييييييييييييييييييييييييييييييييييدة شائك من خمرة الامس
.....................................................................
.....................................................................
النص دة بضم النون انا سمعتو منك في المسالمة وانت لسة طالب في الجامعة الاهلية يوم الراجل ورانا السيف العتيق الذي ورثة جد عن جد وهو في حقيقة الامر كان يلوح لنا بة
المهم انا حاسي اني شترت البورد لكن بصلحا
انت لازم ترسل لي النص دة بفتح النون او بضمها في اسرع ما يمكن
التحية للاستاذ عبد القادر سالم
....................................
مزيدا من الشتر
في الحانة القديمة
>
>
>مظفر النواب
>--------------------------------------------------------------------------------
>
>المشرب ليس بعيداً.. ما جدوى ذلك
>أنت كما الإسفنجية تمتص الحانات
>ولا تسكر
>يحزنك المتبقي من عمر الليل بكاسات الثملين
>لماذا تتركوها؟
>هل كانوا عشاقاً؟
>هل كانوا لوطيين بمحض إرادتهم كلطاءات القمة؟
>هل كانت بغي ليس لها أحد
>في هذي الدنيا الرثة؟
>وهمست بدفء في رئتيها الباردتين..
>أيقتلك البرد؟
>أنا يقتلني نصف الدفء.. ونصف الموقف أكثر
>سيدتي.. نحن بغايا مصرك
>يزني القهر بنا.. والدين الكاذب.. والفكر الكاذب..
>والخبز الكاذب..
>والأشعار.. ولون الدم يزور حتى في التأبين رماديا
>ويوافق كل الشعب.. او الشعب
>وليس الحاكم أعور
>سيدتي.. كيف يكون الإنسان شريفاً
>وجهاز الأمن يمد يديه بكل مكان
>والقادم أخطر
>نوضع في العصارة كي يخرج منا النفط
>نخبك.. نخبك سيدتي
>لم يتلوث منك سوى اللحم الفاني
>فالبعض يبيع اليابس والأخضر
>ويدافع عن كل قضايا الكون
>ويهرب من وجه قضيته
>سأبول عليه وأسكر.. ثم أبول عليه وأسكر
>ثم تبولين عليه ونسكر
>المشرب غص بجيل لا تعرفه.. بلد لا تعرفه
>لغة.. ثرثرة.. وأمور لا تعرفها
>إلا الخمرة بعد الكأس الأولى تهتم بأمرك
>تدفئ ساقيك الباردتين
>ولا تعرف أين تعرفت عليها منذ زمان
>يهذي رأس بين يديك
>شيء يوجع مثل طنين الصمت
>يشاركك الصمت كذلك
>بالهذيان.. فتحدق
>في كل قناني العمر لقد فرغت
>والنادل أطفأ ضوء الحانة مرات
>لتغادر
>كم أنت تحب الخمرة.. واللغة العربية.. والدنيا
>لتوازن بين العشق وبين الرمان
>هذى الكأس واترك حانتيك المسحورة
>يا نادل لا تغضب فالعاشق نشوان
>واملأها حتى تتفايض فوق الخشب البني
>فما أدراك لماذا هذي اللوحة للخمر..
>وتلك لصنع النعش.. وأخرى للإعلان..
>عفواً يا مولاي فما أخرج من حانتك الكبرى
>إلا منطفأً سكران
>أصغر شيء يسكرني فكيف الإنسان
>سبحانك كل الأشياء رضيت سوى الذل
>وأن يوضع قلبي في قفص في بيت السلطان
>وقنعت يكون نصيبي في الدنيا.. كنصيب الطير
>لكن سبحانك حتى الطير لها أوطان.. وتعود إليها
>وأنا ما زلت أطير.. فهذا الوطن الممتد من البحر الى البحر
>سجون متلاصقة
>سجان يمسك سجان
| |
|
|
|
|
|
|
|
|
|
Re: "حال البريد مشغول" (Re: ibrahim barssi)
|
ياابرسي..
عمك مجنون..
ربنا يكفينا شر المجانين.
..
المسالمة دي وطني.
..
انت كيفك?
ووينك?
وكيف حسن ومحمد' فرح'?
..
هل يشرب مظفر النواب خمر الناس?
..
ورينا اخبارك.
..
تحيه قلبيه
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
العزيز بهنس
ياهو حالك
تولع النيران وتقعد تهببا
شوفت الخلايق دي ؟
أشجان مكومة وحنان ومواجد
كتبت ليك هناك في الرمق
وحسي بكتب ليك
طالما انو السيرة انفتحت والاقلام اخضلت
شوف " النص " ده بفتح النون
وكان فتحت ليو قلبك بكون كرم كبير
اسمو " طارت في الجزع "
الى عثمان الشفيع
بهنس
عثمان حامد
وطلال عفيفي
يجدهم بخير
طارت في الجزع
اذ عـدى البرق فات الربوع عطشانة
رمحت خيل غيومو النافرة من تالانا
قبّـلت الشمش غادي وهي دوب حرَدَانا
أليل كم نهار فرض انو لم طلانا
بتقول ننكرب نقدر على الجوانا
وين دهبو الصهيل ، رهقو ، وخيالو الآنا
قرقابا ورشوما وسبحتا وتوهانا
خلاتها وخزف خلخالها وخفقانا
أخلاط العشق لا حولتن سلطانا
يا قلبي القِليت أم قلقلوك أم جانا
مرسال العدم أرواحنا وين هي بُكانا
طارت في الجزع والطير وقع في حنانا
لا عرف الشَرَك أهليتو لا ورانا
كم بات في الصقور من أجلها وما كانا
وحياة النهود ام خت حديد وكنانة
يا قطر الشفيع كم اشتهتك البانة
تعجم يا جسد والصوت بصيرتوعمانا
أفصح من شمس وأحد ّ من جبخانة
وكيف ياخ الشعر في حمتو الهاريانا
كبريتة العزيز الضاحكة السهرانة
كيف جيش النحاس الدق في وجدانا
ساحة وسلسبيل سلم سلاما امانة
للودع الحنون للحنة والحنانا
وأحوال النبات والبنت والتبانة
مفتونين خِلَـق تيراب تلاف ورِبانا
نردم في الدموع بي طرحة الفستانا
يتبلّ القمر شن جابو يترازانا
وضاية الولع جلخت نفوس لمعانا
انكشف السبب يا مال شآم ويمانا
كنيتها ورجف ستر الستور ووشانا
اجمِل من شبيه ازكى ونما وختانا
في القلب اليمين متيمناً احسانا
في النيل الشمال خرتوم عمومك بانا
اماتنا وامم وخلوقها تتلافنا
حب في حب شلع حجرين رحى وترسانة
مليانين شجن ارواحنا يا روحانا
تارة نلجما في التارتين تبرانا
من نرحل تهج وان بتنا ياها معانا
تتشابى السمع وتفج ليك الخانة
اقعد يا الشجرالنجمة واقفة مكانا
تسألني واجيك مترحمنة وشفقانة
كيفك ياحبيب ...
من
وجعتي وسودانا ؟
.............
مشتاقين كتير .
| |
|
|
|
|
|
|
|
|
|
Re: "حال البريد مشغول" (Re: نجلاء التوم)
|
اذكر ذلك النص(بدون اي علامات).
..
..
..
نص صادق.
..
..
دوبيت
..
..
..
انا كتبت "مسدار البيرينه",ولم افرغ من تنضيده بعد,وهي جبال البيرينه(البرانس) الاسبانيه الفرنسيه البحر متوسطيه.اتزكرت ابو دليق.كنت في الجبال,
وهناك بقايا شتاء لئيم.قعدت تحت شجرة,وكانت زاكرتي الداخليه في ابودليق والخلا,وزاكرتي البصريه في هذه المرتفعات.
ساحاول ايراد ما ورد:
الارض الارض في كل زمان واوان
والجبل الجبل مستوحد الانسان
جبال البيرينه تمنحني الشعور طربان
..
ده التلج القبيل كان مويه في امدرمان
** ** **
** ** **
علاقه قديمه ما بين الحجر وجليد
لمن كان عوالي النار خيال في البيد
فلعتني الهبوب تلجانه واني حديد
..
عبير الصخره برضك سابق التلميد
** ** **
** ** **
هضليم الشجر عريان بزازي الفاس
داخله علي الدفو وحتت وريقات ماس
عمر الزول محل ما تقط بيو انفاس
..
الا اهو دي الجبال اكبر عظيم من ناس
** ** **
** ** **
محل جمل الصعيد البيجو فللي كسح
يمر عينيك شجر بسراع ولونو مسح
سريع ذي خاطره في خلا غب افقو رسح
..
تحت من وطاة التجميد وضيقو فسح
** ** **
** ** **
صعلوك المحطه من الترام وداني
مشتى هو للتزحلق في البعيد والداني
انا المولود وسرتي في الشمس دافناني
..
اتزحلق كما العجمان.. واقع سوداني
** ** **
** ** **
هنا مافيش اسد..مافيش عشاري اندايه
مرافعين في فرنسا دي كيف تخش محياي?
احساسي اختلف واتشعلقت برؤاي
..
دببه وطيره ماسمبر وناس ماجايه
** ** **
** ** **
قداد الجبل محضور لطيف ومترجم
فوقو بيوت بشر ذي القطر يتكرجم
ديس هادا الجبل مهدول وكتفو معرجم
..
مغاور في الجبل متل الوليد البرجم
** ** **
** ** **
الوادي العميق مرجيحة الصدى غاب
يبرطم ما وراء الصوت طبيعه سراب
كوكو في القرى زايرا غريب ومهاب
** ** **
** ** **
دخل الطير عليو من كل شكل وباب
** ** **
** ** **
** ** **
شوارع الزلطه ملحانات وغايتو فريزر
تلفح شالك الصايف وتمرق ميزر
الحجر القفل فلين قذاذ السيزر
..
وضو الله الوضيح في الغيم ملون ليزر
** ** ** **
..
..
اما بعد,
والله مشتاقين يانجلاء.
ولولا مواصلة الناس الزول كان نشف .
..
طاريك
..
تحيه قلبيه
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
الغريب يا بهنس ( وربما يكون من محاسن الصدف ) ،
أنه في ذات الفتره التي كتبت انت فيها كتابتك
الجميلة الرهيفه الفرحانه عن حضور عبد القادر
سالم وزيارته شمال البحر ، كان أن جاءنا من
إيطاليا أربعه شباب قدموا ليلة في منتهى الجمال ،
بـ فيولا وكاونتر بيز وجيتار ومؤدي Vocal إستطاعوا
أن يضعوا الرحمن في قلوبنا ..
خرجنا زي الطالعين من ضريح : شعور بالهبه والسكينه
وهداوة البال ..
موسيقى ناعمة زي الحرير ..
خلي نجلاء تكمل الحكايا .. ( ده غايتو النُص حقي ) !
...
طلال
| |
|
|
|
|
|
|
|
|
|
Re: "حال البريد مشغول" (Re: طلال عفيفي)
|
يابو الطل.
دي يبدو انها كانت استحضار موسيقي من الرائعين الطليان.
..
..
..
ولو انو كده برضو جايه,
لكن يبدو انني اخطات في التعابير كعادتي,
طبعا للاستاذ جيات قبل ان ارى انا فرنسا حتى,
ولكنني لم احضر له حفل هنا,فقد كانت حفلة في الداخل.
..
..
تحيه قلبيه
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
يا بهنس ..
عبد القادر سالم صوتو نديان شديد
وحنين اشد
ما أكون ببالغ لو قلت إنو موسيقاه الكردفانية
من أجمل الموسيقى الممكن تسمعا
على مستوى العالم ,,
أول ما سمعت عبد القادر سالم عند إمرأة من بابنوسة
هي الحببتني في صوتو وموسيقتو ومن ديك ويلا ..
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
اوافقك تماما يا تيسير.
..
موسيقى الاستاذ من الموسيقات النادرة التى تلفق مع كل الوجدان الانساني.
..
في الحقيقه انا كنت موجوع غربة,واتتني هذه الانشاء,تلطف كياني بحال البريد.
..
تحيه قلبيه
| |
|
|
|
|
|
|
|
|
|
Re: "حال البريد مشغول" (Re: ibrahim barssi)
|
وبعد ..
أسمع يا مجنون ..
وقَرَ في نفسي أنْ : ماذا لو صاحبتْ فضيلي خلفية من موسيقى السهول الكردفانية ؟؟
ماذا لو ؟؟
كنت – تِحِت ِتِحت – أزمع وضع ( جيناكي زي وزين ) ..
خبثٌ لشيءٍ في نفس يعقوب ..
.. وليست أي ( جيناكي ... ) ..
لكنها تلك الجيناكي التي يطوِّق خصرها الفلوت لديجانقو – رحمه الله – و العود لعبدالقادر ..
أُسقِطَ في يدي حين سلقط ملقط لم أجدها ..
و تبقى يومٌ لقيام الندوة ..
و كلما جلست إلى شيخي فضيلي ..
كلما تيقنتُ أن قراءاته الشعرية ستخرج بنكهة السهل الكردفاني غير منزوع الدسم ..
لو أن الأغنية – تلك التي كتبها هو حين أثلمتْ حشاهُ غربةٌ في المدن التي تأكل جِنياتها –
لو أنها طرزت شعره .. تلك الجيناكي - .. لو .
في المساء سمعتها .. عند صلاح .
حمدتُ الله ..
أنْ مِن فضله جنَّبني البكاء عياناً بيانا , في أمسية شعرية لفضيلي جماع , و الدوحة صيفها دخان .. وفي ليلة كان مزاجها كافورا .
يغني عبد القادر , فيخرج صوته عشبا .. و زرازير .. و عربان .. وغماماتٍ .. و سمبر .. و .....
بهنس ..
.. حال البريد مشغول
| |
|
|
|
|
|
|
|
|
|
Re: "حال البريد مشغول" (Re: محمد بهنس)
|
يا عمده..
يا لها من ليلة اغبطكم عليها,الاستاذ فضيلي جماع اسم واقر في تاريخنا الادبي,
والى الان,انا مستغرب في جراتي ان انشر اشعارا في مكان ينشر فيه اسم مثل فضيلي جماع.
..
"جيناكي ذي وزين"
..
يهدهدها صوت عبد القادر الاخضر,فتحن القماري وتهدل الحمامات.
..
هذا فضاؤنا الذهبي ياعمده.
..
يا رب المجانين
..
تحيه قلبيه
| |
|
|
|
|
|
|
| |
محمد سنى دفع الله
طلال عفيفي
تولوس
fohamer
Adil Osman
Soumeta
نجوان
ثابت محمد
Omayma Alfargony
خالدة البدوي
fadlabi
Emad Abdulla
ibrahim barssi
تيسير عووضة
محمد أبوعاقلة الطريفي
Mohamed Ahmaed Olyesh
فيس بوك
تويتر
انستقرام
يوتيوب
بنتيريست