|
Re: أضع كلمة الحب على عتبة القلب .. (Re: نجود حسن عبد الرحمن)
|
يا صاحبي الزمااااااااااااان ..
و قيل : لا كرامة لنبي في أهله .. و أنت نبي .. نبي أغبش مسكون بالشقوق .. و متوالف معاها .. و كريعاتك حفيانة و معروقة و حنينة .. زي الأشجار .. أشجار الضل .. الضل البارد .. تكاية الناس الغلابة .. اليومهم : عليك يا الله .. فتاح يا عليم .. و بكرتهم : باب الله باب كريم ..
يحضرني هذا .. فاسمع و استبن : دار مبسوطة , سور و ورد مدلى من شرفات , جرس باب , و الباب نضيف خشبو بيلمع ( جملكه ) .. و .. قفة ( بيسموها الحناكيش ناس البيت ده : سلة ) .. قفة يا صاحبي كحيانة .. في عتبة الباب سايبينها .. وحيدة و فقيرة و بردانة .. سابوها .. القفة المسكينة و جواها طفل .. عمره يومين .. يوم حديث الولادة . على عتبة الباب يا صاحبي .. لقيط .. و بيبكي .. فتحوا الباب الناس المتحنكشة في البيت السمح الكضاب .. فتحوه و قالوا : أوووووه و تاني قفلوا الباب .. ( القلب الخشب بيعمل صوت لمن يقفل .. زييييييييييييييييييكككك .. القلوب الدهب ماعندها مفصلات .. مفتوحة و بس ) .. نهايتو .. حنوا على صاحبي اللحمة الطرية البكاية .. الناس الفتحوا الباب حنوا .. تتخيل !!! .. حنوا لمن قالوا أووووه سمع أوههم دي الزول الجوه القفة .. فرح : صوت إنساني أخيرا .. هبش نبضو الصوت المتأووووه الكضاب . و لأنه المؤمن صديق ( و الإنسان يولد مؤمنا ) .. قام اللحمة البردانة صاحبي .. صدق . مسكين .. و نام في الطراوة طراوة صوت ( الإنسان ) ..
قفلوا الباب بعد الأووووه .. الناس الكضابة .. و مصمصوا شفايفهم .. شفقة . و ناموا .
جات الكديسة .. أكلت الـ........
كلمتك , على عتبة باب خشب لامع و قاسي و مفصلات ما مزيته ,, ما تختها .. بتبقى لقيطة .. و بيعايروك بيها , حتى لو الكضابين عملوا فيها حنوا .. و شالوها جوه .. و جواهم بارد يا ود فايت .. بارد و غربة .. ولهلهة للقلب اللقيط .
( .. كيف يزهر الفولاذ يا ولد يا أجمل .. ؟؟ )
شيل قفتك فوق راسك تاج .. و اتخارج ملك .. ولأنك ملك .. إختار مملكة تستاهل .
يا عشة يا فلاتية .. قبرك بارد إن شا الله : ( الدار الما داري أنا مالي بيه و البلد الما حقي , ما بمشي ليه )
وسوسة : .... شنو كده .. ح تعرف .
|
|
|
|
|
|
|
العنوان |
الكاتب |
Date |
أضع كلمة الحب على عتبة القلب .. | ADIL FAIT | 06-26-06, 06:23 AM |
Re: أضع كلمة الحب على عتبة القلب .. | ADIL FAIT | 06-26-06, 06:27 AM |
Re: أضع كلمة الحب على عتبة القلب .. | ADIL FAIT | 06-26-06, 06:34 AM |
Re: أضع كلمة الحب على عتبة القلب .. | ADIL FAIT | 06-26-06, 07:19 AM |
Re: أضع كلمة الحب على عتبة القلب .. | oudenoord | 06-26-06, 07:41 AM |
Re: أضع كلمة الحب على عتبة القلب .. | معتز تروتسكى | 06-26-06, 01:03 PM |
Re: أضع كلمة الحب على عتبة القلب .. | ADIL FAIT | 06-27-06, 08:38 AM |
Re: أضع كلمة الحب على عتبة القلب .. | ADIL FAIT | 06-27-06, 08:50 AM |
Re: أضع كلمة الحب على عتبة القلب .. | saadeldin abdelrahman | 06-27-06, 09:01 AM |
Re: أضع كلمة الحب على عتبة القلب .. | معتز تروتسكى | 06-28-06, 01:20 PM |
Re: أضع كلمة الحب على عتبة القلب .. | نجود حسن عبد الرحمن | 07-04-06, 03:40 AM |
Re: أضع كلمة الحب على عتبة القلب .. | Emad Abdulla | 07-04-06, 04:51 PM |
|
|
|