|
|
|
 Re: خطاب إستقالة ..ووداع (Re: عصام أحمد)
|
يا عصام .. صباحكـ خير ياخي
رغم انك ما كتبت سبب استقالتكـ لكن يا ريت ماتمشي .. عارف ليه لانكـ جيت بي محض ارادتكـ
رغبة منكـ في التواصل و تبادل الافكار مع الاخرين في الشتات و داخل السودان
ميزة السايبر ده انو عباره عن افكار طايره في الهواء .. بعضها بنقراهو و ننساهو و بعضها
بتحفر في ذاكرتنا
انا تابعت بوستاتكـ و عجبني بعضها و زي ناس كتار هنا برضو انتبهو لي زول اسمو عصام
يعني اسه مجرد انك اشتركت في سودانيزاونلاين اسمك انحفر في راسي طيب اتخيل معاي لو قعدت
؟؟
غالبا انت ذاتكـ ممكن تتحكر في راس ناس كتار 
سودانيزاونلاين مجتمع سوداني كامل يجب انكـ تكتب افكاركـ و احاسيسكـ عشان تقدر علي الاقل
تخلي الناس ديل يستفيدو من الباسوورد بتاعكـ الداير تلحقو امات طه ده
وافتكر انو زول كتب استقاله باللغة الفوق دي .. اكيد لسه عندو كلام مفيد ماقالو
ولا شنو ؟
| |
 
|
|
|
|
|
|
|
|
Re: خطاب إستقالة ..ووداع (Re: خدر)
|
هي يا عصام يا ولدي جيت اسلم عليك القاك مغادر؟؟؟ عين السواد كراعي حاره والله .
غايتو لو في اي طريقه انك تجئ ما تنقطع مرات مرات ادينا طله مع انه انا من قناعاتي انه ادمان البورد لي زول عنده شغل ولا دراسه بخرب عليه الا ارباب المعاشات والناس الهمها فوق غيرها الا زول عنده معايشوا في ايدوا والله البورد يبهدل حاله
| |
|
|
|
|
|
|
|
|
|
Re: خطاب إستقالة ..ووداع (Re: عصام أحمد)
|
الأخ الكريم عصام
لك التحية والاحترام
قرار صعب جدا هو مفارقة المنتديات لان ذلك يعنى الغاء شىء هام من حياتك فالمنتديات ليست مجرد تلاقى مع اخرين وقراءات وينتهى الامر بل هى نمط حياة فى عصرنا هذا وهى جزء من برنامجنا اليومى يعنى تقدر تقول كده زى كباية الشاى فى الصباح أو فنجان القهوة للكيفين ...
كثيرا ما يعترينا هذا الشعور حينما نحس بالاحباط وحينما نجد اننا لم نجد ذواتنا ولكن يبقى سلطان العادة مشرعا على اناملنا تجاه الكى بورد يقودنا اليه قسرا وفى الوجدان اسماء أعزاء وموضوعات معلقة ومعرفة لم تكتمل ولذا نعود ...
رغم اننى شخصيا سافتقدك سيدى ولكنى انحاز لارادتك ...
وأرجو ان تأخذ وقتك عزيزى الفاضل وتعود الينا محملا بالاشواق والمعارف والمعلومات...
يديك العافية
| |
|
|
|
|
|
|
|
|
|
Re: خطاب إستقالة ..ووداع (Re: قرشـــو)
|
الاخ عصام
تعرف,
لاول مرة ارى بوست الأطفال
و بما انو هاشم
كان مساهر
ففتحتة
و كنا نقرأ فية
و فرح بصور الحيوانات
و طلب حتى الذهاب
الى حديقة الحيوان
(احيييييى, كلو منك حسة)
اتمنى ان تعدل عن قرارك
و لنا ان نحترمة
مهما كان
خالص الود
غادة
| |
|
|
|
|
|
|
|
|
|
Re: خطاب إستقالة ..ووداع (Re: garjah)
|
يا عصام
يعني ختيتنا في طيارة واحدة وشغلت الطيار الالي وعاوز تنط؟؟؟؟
مافي طريقة استنى معانا النشوف اخرتها شنو؟؟؟؟؟
السودان يحتضر فعلينا ان نكون حوله, ان لم يكن في ارضه,, ففي هذا الوطن الصغير.
كن معنا دوماو لا تذهب.
لك كل الود
| |
|
|
|
|
|
|
|
|
|
Re: خطاب إستقالة ..ووداع (Re: عصام أحمد)
|
يا عصام
كدى انا يادوب كده انتبهت لى البوست بتاع الاطفال دا خاصة جانب الحكاوي
كدى استهدى باله , خلى بالك طويييييل سلبة
خلى الناس تسفيد من افكارك واراؤك
الاستقالة دى سيبك منها وقول ياهادى
مع خالص تحياتى ومودتى
| |
|
|
|
|
|
|
|
|
|
Re: خطاب إستقالة ..ووداع (Re: شرف الدين آدم إسماعيل)
|
حلفت عليك قسم ما بتمشى ...
ياخ انا معتمدة عليك فى حكاية الافلام دى وكده..
وبرضو التسلية ..
نحن عندنا زهجة مدمرة ..انت الوحيد البفكها..بى بوستاتك الانيقة ..وتداخلاتك المسلية ..
ما تمشى!!!
دى اوامر..
"حكم الضعيف على القوى"...
طيب؟
| |
|
|
|
|
|
|
|
|
|
Re: خطاب إستقالة ..ووداع (Re: النسر)
|
الأخ العزيز عصام
للأسف هذه أول مرة أتداخل معاك وأول مرة انضم
للجنة المساعي الحميدة لإقناع الحردانين
رغم إنك ما ذكرت الأسباب التي دعتك للاستقالة،
لكنني ومع احترامي للاسباب أرى أنها غير مقنعة
بدليل أنك انضممت حديثاً للبورد، اللهم إلا إذا
كنت فاكر إنو المسألة فيها مواهي وكده..
والله يا عصام رغم إن فترتك قصيرة إلا أن مشاركاتك
كانت رائعة وإيجابية وبوستاتك (أرجو الانتباه إلى
هذه الكلمة الأخيرة جيداً حتى لا تفهمنا غلط والمسألة
تجوط) تنم على أنك إنسان حلو وتحمل في دواخلك روح طبية
وسخرية عالية.. الليلة الله يحلك مني..
ويا عصام تعرف مشكلتك الوحيدة شنو؟ إنك ما ثقيل
يا اخي شوف الرؤساء اللي كنا بنهتف ليهم ستاشر وتمنتاشر سنة
حتى الآن ما اشتغلوا بينا..
تجي إنت بمحض إرادتك وتقدم استقالتك؟
يا اخي خلي عدم الثقالة واسحب الاستقالة
تانياً لو استقلت حاتفك الولد الأغبش الفي الصورة ده
في الفرقة..
طلب خاص ، خليك في البورد
| |
|
|
|
|
|
|
|
|
|
Re: خطاب إستقالة ..ووداع (Re: غادة عبدالعزيز خالد)
|
ألأستـاذ / عصـــام
سلامات
بلاش تفارق خليك هنا خليك
اها الفنانة دى بتقول ليك بلاش تفارق
طيب الناس ديل كلهم ما ليهم خاطر عندك
عشان خاطر الفنانة
ياخى انت زول رائع جدا رايح وين تخلينا؟؟
لفولانى
| |
|
|
|
|
|
|
|
|
|
Re: خطاب إستقالة ..ووداع (Re: عصام أحمد)
|
الاخ عصـام
رغم انني لم ارحب بك لحظة قدومك لوجودي خارج البورد لفترة طويلة
الا انني فرحت جدا بأسهاماتك القيمـة.
ترجمة مزرعة الحيوان اعجبتني .. كنت اتمني ان اكتب دراسة نقدية
عن تلز الترجمة لكي تعم الفائدة.
وجودك مهم وضروري
العن الشيطان يا أخوي.
يا حاجة دومــا و تماضــر .. سـلام
| |
|
|
|
|
|
|
|
|
|
Re: خطاب إستقالة ..ووداع (Re: unixo)
|
ينتابنى احســـاس بالأسى كلما رأيتُ ورقةً تسقط ..
أخى عصــأم
لا تقاطع بل دعِ الحبلَ موصولاً .. وامتطى الصبرَ جواداً ..
فالرحلةُ شاقَّة والطريق طـــــويل .. ولا بدَّ من الوصـــول ..
احترامى
شاذلى
| |
|
|
|
|
|
|
|
|
|
Re: خطاب إستقالة ..ووداع (Re: shazaly gafar)
|
عصام الفاضل
يا اخي انت وين ماشي ولو مشيت انت المفروض يقعد منو؟؟؟؟
كفايه صورة بروفايلك بتورينا انت منو؟؟؟؟؟
وولدك الفي صوره ده كنا بنحلم سوى نجيب ليه قميص وبنطلون
وشنطة مدرسه وكتب وكرسات واللوان ولعب حلوه,ويأكل وجبات
صحيه ويلقى الدواء البيخفف وجعوا لو مرض!!!
وبالعون الزاتي نبدأ نبني ليه فصول ومدراس ونوادي عشان يتعلم كورة وباسكت بول
ومساكن شعبيه بسيطه فيها ماسوره بتجيب مويه نظيفه وشبابيك تحميه من الباعوضه
وكنت بحلم وبحلم كل ما اشوف صورته في مداخله لك ووجودك هو الكان بيزكرني انه
في ناس بتشاركني الحلم الجميل ديه...
تقوم تقول ماشي!!!
خلاص ماشي وين ورينا عشان نمشي معاك؟؟؟؟
ومنتظرنك
دي قرفه بتحصل كثير في الاول
لكن بترجع تتعود....
وتقاوم وتعرف تلقى ناسك وحبانك واخوانك وبوستاتهم وين...
وتتعلم ترى القبح وتتجنبه وتفتش للبيفرحك,وتقعد معه
او تصنع حاجاتك براك زي بوستاتك المميزه وزي ماقالت لك بت حاتم
طيارتك دي خليتها معلقه ليه....
اوع تكون ققرت تقفز انت من طيارة سودانيز اونلاين؟؟؟؟
يا أخي دي تكون عوجه كبيره خلاص....
غايتو انت فتحت الباب وقررت ترمي روحك..لكن ناس الطياره ديل كلهم ماسكين فيك
الناس الفي البوست ده للآن ماسكين فيك...
معقول بس ...(الهواء)..ده يكون اقوى مننا كلنا.
تراجي.
| |
|
|
|
|
|
|
|
|
|
Re: خطاب إستقالة ..ووداع (Re: عصام أحمد)
|
اتفهم تماما رغبتك في مغادرة هذا المكان, فكثيرا ما يصيبني الغثيان عند رؤية بوستات المهاترة و التنابذ.
هون عليك, و اختار مايروقك من المواضيع ودع الغث لمجيديه.
| |
|
|
|
|
|
|
|
|
|
Re: خطاب إستقالة ..ووداع (Re: عصام أحمد)
|
شكرا لكم جميعا علي هذه المشاعر النبيلة للذين أضاعوا جزءا من وقتهم الثمين وللذين لم ينتبهوا أيضا لما كتبته أول أمس. وحقيقة الأمر أنني لم أكن أظن أنني أحمل هذه المساحة بينكم (ليس الا لحداثة عهدي كما زكرت)
ولكن ما فؤجئت به أيضا ذلك الكم من الرسائل في الإيميل والتي تحثني علي عدم الرحيل وهي من داخل الحوش ومن خارجه فلهم ولكم مني خالص الود والحب.
وربما إستوقفتني كلماتكم كثيرا ولكن أهم ما أستوقفني هو عبارة - هذا الباسوورد ليس ملكا لك وحدك!!
وفعلا هو ملك لأناس كثيرون غيري..يحتاجونه بشده ..إن لم يكن اليوم فغدا ويجب أن لا أرميه علي الأقل كصوت لمن لا صوت له . يوصله متي ما شاء وفي أي وقت.
Quote:
سودانيزاونلاين مجتمع سوداني كامل يجب انكـ تكتب افكاركـ و احاسيسكـ عشان تقدر علي الاقل
تخلي الناس ديل يستفيدو من الباسوورد بتاعكـ الداير تلحقو امات طه ده
وافتكر انو زول كتب استقاله باللغة الفوق دي .. اكيد لسه عندو كلام مفيد ماقالو
ولا شنو ؟
|
خدر الف شكر وتقدير
فعلا لدي الكثير الذي لم أقله بعد ..وكلامك صاح ..وشكرا لك علي تمسكك بي وعلي نصحك المفيد جدا الذي غاب عني لحظتها.
Quote:
غايتو لو في اي طريقه انك تجئ ما تنقطع مرات مرات ادينا طله مع انه انا من قناعاتي انه ادمان البورد لي زول عنده شغل ولا دراسه بخرب عليه الا ارباب المعاشات والناس الهمها فوق غيرها الا زول عنده معايشوا في ايدوا والله البورد يبهدل حاله
|
دومة لك كل شكر وتقدير
هي زهجة غريبة كده لمت فيني وبي أسبابها والموضوع ما بعيد من هنا لكن ما بنقطع حتما ما مشغول ولا حاجة. وأفوتكم أمشي وين؟
Quote:
رغم اننى شخصيا سافتقدك سيدى ولكنى انحاز لارادتك ...
وأرجو ان تأخذ وقتك عزيزى الفاضل وتعود الينا محملا بالاشواق والمعارف والمعلومات...
يديك العافية
|
قرشو لك مني كل شكر وتقدير
وأنا أيضا كنت سأفتقدك يا صديقي وهي زهجة وعدت أو فكت بي مشاعركم الجميلة دي.
Quote:
الاخ عصام
تعرف,
لاول مرة ارى بوست الأطفال
و بما انو هاشم
كان مساهر
ففتحتة
و كنا نقرأ فية
و فرح بصور الحيوانات
و طلب حتى الذهاب
الى حديقة الحيوان
(احيييييى, كلو منك حسة )
اتمنى ان تعدل عن قرارك
و لنا ان نحترمة
مهما كان
|
غادة عبد العزيز خالد لك مني كل شكر وتقدير
وحقا فرحت بأن هاشم أظلع علي حيوانات حديقة الحيوانات
ويا حليل حديقة الحيوان الفي السودان ..شلعوها ويقت هسه موزعة بين الحدائق والخرطوم اتنين حديقة القرشي للأطفال..لكن كانت جنينة حلوة. تحياتي للمناضل الصغير هاشم والأسرة الكريمة.
Quote:
عصام اخوي
المنابر دي عايزة صبر
ارجوك استمر معانا
واكيد انك حتندمج مع العالم دي
بس مد للصبر شوية
|
قرجة لك مني كل إحترام وتقدير وشكرا جزيلا لك
والله أكتر مرة أضحك كده هنا! لما شفتك شايل قرجتك دي وبقرأ في كلامك اللذيذ ده..وكلامك صاح والحكاية عاوزة صبر شديد.
ورجائك لن يضيع هدرا يا صاحبي.
وشكرا لك من كل قلبي.
Quote:
السودان يحتضر فعلينا ان نكون حوله, ان لم يكن في ارضه,, ففي هذا الوطن الصغير.
كن معنا دوماو لا تذهب.
لك كل الود
|
رشا حاتم
لك مني كل إحترام وتقدير
وشكرا لك علي هذا التنبيه والذي ربما لم يخطر علي بالي لحظتها.
وكما قلت فلن يموت طالما نحن بجانبه وإن لم نكن بإرضه فهنا الآن علي الأقل.
Quote:
الاستقالة دى سيبك منها وقول ياهادى
مع خالص تحياتى ومودتى
|
شرف الدين آدم إسماعيل
لك مني كل إحترام وتقدير وشكرا جزيلا لك
أها يا هـــادي..
Quote:
Tumadir
ما تمشى!!!
دى اوامر..
"حكم الضعيف على القوى"...
طيب؟
|
تماضر
لك مني كل إحترام وتقدير وشكرا جزيلا لك
طيب كويس..حكم الضعيف علي القوي بيمشي.
Quote:
ان تبقي ..
اخي عصام ..
علي الاقل كصوت لاؤلئك الذين لا يستطيعون ايصال اصواتهم
|
محمدين محمد اسحق لك مني كل احترام وتقدير و شكرا جزيلا لك
أتمني ذلك وسأعمل من أجله هنا من هذا المنبر.
Quote:
ما كنت كويس مالك والحصل شنو ؟بنحبك خليك معانا وجنبنا
|
النسر لك مني كل أحترام وتقدير وشكرا جزيلا لك
وأنا ذاتي حبيتكم بالجد ولو ما حبيتكم أكون ما عصام.. لأنكم أهلي ومين فينا ما بيحب أهلوا.!!مين؟
Quote:
تانياً لو استقلت حاتفك الولد الأغبش الفي الصورة ده
في الفرقة..
طلب خاص ، خليك في البورد
|
Nasruddin Al Basheer لك مني كل أحترام وتقدير وشكرا جزيلا لك
والله الولد ده هو بعدكم سبب رئيسي لعودتي هنا ..ده السودان باكر منتظروا.
وطلبك يا سيدي علي العين والراس.
Quote:
خدر ده مرّات بيتجلّى ياعصام ياخ
|
الفاتح وديدي لك مني كل أحترام وتقدير وشكرا جزيلا لك
زي ماقلت لكن مــا مرات ..دايما.
Quote:
استقالة مرفوضة.................. نهائيا
|
فيصل نوبي
لك مني كل أحترام وتقدير وشكرا جزيلا لك
نهائيا!!!!(اليد فوق الرأس )
Quote:
لم اتداخل معك يوما ولكننى اقرأ كل بوستاتك
ارجو ان تراجع قرار الاستقالة .............
|
Ahmed Daoud
لك مني كل أحترام وتقدير وشكرا جزيلا لك
وكما طلبت فقد راجعته ...كما أحب أن أشكرك علي مرورك علي بوستاتي .
Quote:
مرفوووووووووووووووووووووووووووض
|
كوليل
لك مني كل أحترام وتقدير وشكرا جزيلا لك
عديييييييييييييييييييييييييييييييييييييل كده!!!
Quote:
طيب الناس ديل كلهم ما ليهم خاطر عندك
عشان خاطر الفنانة
ياخى انت زول رائع جدا رايح وين تخلينا؟؟
لفولانى
|
عوض الله الفولانى
لك مني كل أحترام وتقدير وشكرا جزيلا لك
إنت الأروع يا صاحبي..وأنا زاتي ما عارف كنت ماشي وين؟؟!!!
لكن هسه جيت راجع.
Quote:
وجودك مهم وضروري
العن الشيطان يا أخوي
|
unixo
لك مني كل أحترام وتقدير وشكرا جزيلا لك
خلاص لعنته ..
Quote:
أخى عصــأم
لا تقاطع بل دعِ الحبلَ موصولاً .. وامتطى الصبرَ جواداً ..
فالرحلةُ شاقَّة والطريق طـــــويل .. ولا بدَّ من الوصـــول ..
احترامى
شاذلى
|
shazaly gafar
لك مني كل أحترام وتقدير وشكرا جزيلا لك
فعلا كما زكرت فالحكاية عاوزة صبر ..وكما زكرت لابد من الوصول وإن طـــال السفر.
Quote:
غايتو انت فتحت الباب وقررت ترمي روحك..لكن ناس الطياره ديل كلهم ماسكين فيك
الناس الفي البوست ده للآن ماسكين فيك...
معقول بس ...(الهواء)..ده يكون اقوى مننا كلنا.
تراجي.
|
Tragie Mustafa
لك مني كل أحترام وتقدير وشكرا جزيلا لك
غير معقول طبعا الهواء يكون أقوي منكم وها أنتم هنا
ومن خارج البورد بقوتكم تقهرون الريح و تعيدونني من جديد
الي داخل الطائرة.
Quote:
اختار مايروقك من المواضيع ودع الغث لمجيديه
|
Osman Malik
لك مني كل أحترام وتقدير وشكرا جزيلا لك
كما زكرت أخي فهذا هو عين العقل.
Quote:
It must have been conclusive to make such a decision,
but may you reconsider it? We hope you do.
Regards
|
Firdouse
لك مني كل أحترام وتقدير وشكرا جزيلا لك
فعلا فقدت أعدت النظر فيما زكرت.
وأخيرا أعتزر عن كل ما سببته لكم من إزعاج ..
وسنواصل بقوة وشكلي حا أركب (حجارة بطارية جديدة
نايل بور قالوا قوية .. والود ده في إيميل وصلني قالي لي لبسوا قميص أو بدلة
وكرفتة
وصلتني تعليقات كتيرة عن فنيلتوا المقطعة دي.. رأيكم شنو؟
ت ح ي ا ت ي
| |
|
|
|
|
|
|
|
|
|
Re: خطاب إستقالة ..ووداع (Re: عصام أحمد)
|
الاخ/ عصــام
بالجد كدا انا ما بحب اقول لزول اقعد ولا امشى بس مرات بخت نفسى فى موقفك ده ..وحقيقه مريت بموقف ذى ده ولا زلت مارا ..بس منتظر يعنى ذى انك منتظر ملك الموت اقول ليك خلاص شلته روحك من sudaneseonline..
بس اتمنى ليك التوفيق فيما تتفق فيه معا نفسك
قفــله بــس (فى مـانـع)
Regards/
bob
| |
|
|
|
|
|
|
| |
خدر
doma
قرشـــو
غادة عبدالعزيز خالد
garjah
Rasha Hatim
Tumadir
محمدين محمد اسحق
Nasruddin Al Basheer
الفاتح وديدي
فيصل نوبي
Ahmed Daoud
عوض الله الفولانى
shazaly gafar
Tragie Mustafa
bob
فيس بوك
تويتر
انستقرام
يوتيوب
بنتيريست