|
|
 قروي ضايع في أوروبا !! ..
|
جد فقدتك يابلد
جد فقدتك
جد فقدتك
لما ليل الوحدة أمسى
وشفت صورتك
وجبت سيرتك
دمعة سالت جارية مني
وعشتا عاد بلحيل أصيح :
سامحيني
سامحيني وأعذريني
يارويح للعز دخرتك
أنتي عارفةأنا
غصب عني
وغصب عني
مشيت هجرتك ..
****************
جد فقدتك يا بلد
جد فقدتك
جد فقدتك
ولو حصل أناغبت عنك
أو زمن طولت منك
لا تسيئ بيا ظنك
أو تقولي خلاص هجرتك
ما أصلي يابلدي البحبك
وفي القليب متنامي حبك
جوه في وجداني شلتك
كنت بهتف بيك سنين
وبيك بهاتي واستعين
وفرحة في أعماقي عشتك
زاد هواك
حنين رضاك
وجد عشقتك
وفي ليالي الغربة يمة
ودنيا كانت دامسة ظلمة
نجمة ضاوية بعيدة شفتك ..
***************************
عشت وحدة زول متيم
وشلت ليل الغربة رهبة
وعيني ما لاقت مناما
وجد عرفت الفرقة صعبة
وكيف ليالي الغربة مرة
وما بتحقق لينا رغبة
وانتي يا بلدي الحبيبة
عارفة يا رمز المحبة
أصلي زولن جد حنين
قروي ضايع في أوروبا
لا المحن فايتات دروبو
ولا الزمن حققلو رغبة
وفي نهاية عمرو يحلم
بى وطن يبقالو تربة
فيهو يحضن كوم ترابو
دا المنى العاش ليهو شب
وحلمو كان وطنن معزز
خيرو زاد كيمان وعب
الا بس ملعونة غربة
شتت يا ناس أهلنا
وبعثرت في الكون آحبة
وعشت مكسور الجناح
قروي ضايع في أوروبا ..
***********************
مع تحياتي وودي ..
خضرعطا المنان
[email protected]
كوبنهاغن / الدنمارك / 1998
|
|
 
|
|
|
|
خضر عطا المنان
bushra suleiman
فيس بوك
تويتر
انستقرام
يوتيوب
بنتيريست