|
|
 يا مان !
|
تمش الإستاد تلقى الكورة شغالة والحكم منتهى والباك اليمين قاعد ساى والمدرب واقف على الخط يشتم وعامل شكله من الحكم الرابع والناس في المدرجات ما جايبة خبر ... بس كلها شغالة تحليلات يا ربى اللستة دى فيها كم مريخابى وكم زول من ناس الموردة .. تمشى حفلة تلقى الفنان يغنى (يا رمال حلتنا زولا كان بأنسك يا حليلو ) تمشى تشيل الفاتحة تلقى الصيوان كلو مجلي قصة (المرحوم مالو ) وماسكين ليك في قرار مجلس الأمن ويكون في زول كدا من النوع بتاع الجدعات الكبيرة .. ها أزول ... محاكمة شنو .. طلق ..القصة كلها أمها وأبوها الأمريكان عاوزين ليهم سبب يجو يخشو البلد دى ويسو فينا سوات شينة بالحيل ثم يصلح من جلسته وقد تحسس بعض اطرافه ويمسح شاربه لكن وين يلقوها عند الغافل طلق الناس ديل تحت تحت باقلى عندهم شغل مع أمريكا دى زاتها وبكره شيل خت شيل نلقى المسعلة بقت في حق الله فيتدخل متحدث أخر .. ها يا عربي يا مطرطش ات شن بتعرف المحاكمة دى بتقوم وتشوف عينك يمرقو الناس العاوزنهم من البلد دى والشمس فوق والراجل يقول بغم ات قايل الكلام دا لعب دا يا أخوى ربط عديل وحراسات والبلد دى كان لقيت فيها نفاخ النار من المسئولين تعال قابلني .
دا كوم والنساوين كوم قال ليك في الخرطوم طلعت دقت دهب سموها (هاى لاهاي ) وتوب جديد أسمو (كوفي حنان ) وفى توب كمان سموه (المؤتمر الجامع ) طبعا السيد الصادق المهدي من ما سمع بقصة المحاكمات والعكش دى طوالى بقى مقسم على حكاية المؤتمر دا . طبعا ناس الأحزاب ديل مبالغة من يوم القرار الواحد تضرب ليهو يا جماعة عاوزين تصريح يشبكك اسمع هسة عندنا اجتماع مكتب سياسي وبعدين مكتب قيادي وبعدو لقاء مع منظمات المجتمع المدني وقدامو عاوزين نشتغل فى لجنة الترشيحات للحكومة الجديدة عشان كدا يا ابوحميد (دبل سوري ) لكن ممكن اديك بيان واحد يشجب مجلس الأمن والأمم المتحدة وفرنسا وأمريكا وبريطانيا وكل الدول الوصلت لكاس العام في (السمي فاينال ) نزلو بالله واعملو ليهو بهارات .. وبكره برضو عندنا بيان لازم تنشرو لينا خاصة في الويب سايد لأنو الخواجات بيهتمو بالحاجات الالكترونية دى دا فيهو إشادة بالقرار ويؤكد دعمنا للمحاكمات أنشاء الله في الواق واق زاتو والبيان زاتو بيشدد على تأييدنا لحكومة قومية واسعة وعاتية فيها اى زول واى تنظيم وكلنا نجي ونقسم المرارة دى .. فهمتني يا أبو حميد .. قمت قاطعتو لكن يا استاذ بيانين كيف ودا شاين هنا ودا شايت هناك .. اسمع يا محمد حامد بالله عكلتة الصحافيين دى خليها الفكرة انو دى بلوتيكا يا مان مش زمان فيليب غبوش قال للاستاذ محمود محمد طه تعال مع نميرى دا نلعب بولتيكا غبوش لعب ومحمود محمد طه كان واضح قام نميرى فك الاول ولحق التانى امات طه .اها الفكرة انو حزبنا عامل بيانين طبعا بتاع الشجب دا يمشى الجرائد المحلية ليه ؟ عشان الحكومة دى شفتة ويمكن تعمل ليها وهمة كدا ولا حركة وقلبة فى شكل وردة تلم الموضوع ولا تقنع من كم زول من ناسها وتعتبرهم شهداء ويمشو والمسالة تقيف لغاية هنا وبكدا الحكاية تنتهى ويفضل منها شلة كدا قاعدين فى الحيكومة وماسكين ورق اللعب يجرونا خمسين نلقى نفسنا بسبب شلاقتنا دى بره الشبكة وتعرف هسة جية ناس الحركة الشعبية الشفتها صباح الليلة دى ما ساكت جون قرنق دا زول شفت ومقرم ومفتح ولو اتاكد قطع شك انو الامور مع الحكومة دى كدا ولا كدا تمام ما كان خلى الوفد يخت كراعو فى مطار الخرطوم نهائى خاصة انهم قعدو فى ليبيا لمن زهجونا بكل شوية الوفد جاى لا اجلنا الجية تقول ياخ حجز عمرة فى زحمة سفر لكن هسة الوفد دا وصل والحكومة زاتها استقبلتو ليك بمظاهر ابهة وناس الحركة مبسوطين وكلامهم كلو كان بس الشراكة وما ادراك ما الشراكة وتعرف الكلام دا بالذات سخن مع الرئيس بتاع حزبنا ومن الصباح قالو ليك عصبى وبكيورك واخلاقو فى نخرتو ..الراجل قلقان وقال قصة كلام الحركة الحلو دا ما ساى الناس دى راقدها ليها فوق راى مشترك عشان كدا قلنا نحن جوه البلد وقدام الحكومة نعمل حميل ونطلع بيان بتاع حنك سنين لدعم موقفها ونطلع برضو بيان تانى عكسو والبيان التانى – معاى يا ابوحميد – دا لو الطوبة جات فى المعطوبة وختوها للبشير وحكومتو دقسو اتلحسو اهو بنكون اسهمنا اسهام نضالى مقدر وعدنا عين قوية نخمش مع الناس ما تيسر وطبعا لو فى زول طلع ورقتنا وبياننا بتاع دعم الحكومة وشجب القرار بنط فوووووووووووووق .. يطرشنا ...البيان دا ما حقنا ولا كتبناه ولا شفناه وانت زاتك لو قلت غوغ بننكرك بالمناسبة يا محمد حامد أنت هسة جهزت تذكرة سفر ولا بتكون قاعد لمن نخمشك ونوريك المكشن بلا بصل ... شفت الشفافية دى معاك يا بتاع الأس . أم . سى ..
|
|
 
|
|
|
|
|
| |
محمد حامد جمعه
فيس بوك
تويتر
انستقرام
يوتيوب
بنتيريست