|
Re: أسرانا فى الذاكرة .... صور وأسماء نشرتها "الحياة" لأسرى الشرق (Re: عبد المنعم ابراهيم الحاج)
|
العزيز منعم
لك التحية أنت من تعرفهم حقاً ومن اكتوى بالنار مثلهم اقتراحك بنشر الاسماء فهى منشورة فى صدر البوست صاحب الفضل الحقيقى هنا هو صديقى السليك ذلكم الصحفى الذى تلبسه الاحترافية المهنية والالتزام الصارم تجاه نضاله مع الآخرين أتمنى أن تكون هذه مناسبة لعودة السليك الى البورد ليزيدنا ايضاحا عن رحلته مع الأسرى حيوا معى هشام عبيد الذى بذل مجهوداً جباراً بين الفوتو شوب وتحميل الصور
ترقبوا مزيداً من الصور
العجيل
| |
|
|
|
|
|
|
Re: أسرانا فى الذاكرة .... صور وأسماء نشرتها "الحياة" لأسرى الشرق (Re: عبدالبارى العجيل)
|
كثيرون هم أؤلئك الذين يصنفون فى خانة "أهل الله فى بلد الله" الأسر المليئة بالاطفال, مع ضيق الحال المعايش بالدقش المجابدة فى كل شئ مصاريف المدرسة العلاج والدواء اللبس البقى كماليات ما فى فرصة للمجاملة الا الأصابعين العشرة ده اذا ما نقصن بى شاكوش ولا عجل حديد كارو السعيد هو البقدر يواصل تعليم أولادو والشقى هو البصلو أولادو نفق الجامعة أيوه نفق!!! لأنو الواحد لو خش التجنيد الإجبارى ما فى طريقة التجنيد ما مشكلة لكين المشكلة وين؟؟؟ المشكلة إنو بدلاً ما يكون التجنيد للإعمار يكون للخراب والدمار وضد منو؟؟ ضد أولاد البلد ذاتم يعنى لازم يحارب كان فى الجنوب ولا الشرق ولا الغرب بس ما يكون بره السودان جوه البلد ضد البلد يقوم المسكين لا ناقة له ولا حمار يقع فى الأسر ده إذا ما راح فيها زى ما راحو الكتيرين البركة فى روحم والعوض على صاحب العوض ..... ... العجيل
| |
|
|
|
|
|
|
Re: أسرانا فى الذاكرة .... صور وأسماء نشرتها "الحياة" لأسرى الشرق (Re: عبدالبارى العجيل)
|
بعد مسكة الولد الراجنو و البعاينو ليهو زى هلال العيد أهلو ما حيعرفو من ناس الحكومة لأنو الحاجات الزى دى هم بدسوها كل ما يسمعوا ضربة فى حتة تقوم أمو تدعى " يا الله تسلموا من كل بلا" - و البلا يا حاجة قدامك ووراك - "تلفون الدلاقين" او الجماعة الراجعين يجيبوا الخبر - خبر السواد والرماد يا يمة - يا خى قولى البركة بى سلامتو - سلامة شنو يا راجل مع ناس جون قرنق دقى يا مزيقة وأبدى يا مشغولية قالوا شافوهو فى الحتة الفلانية قالوا ود ناس فلان الجا شارد قال كان معاهم وحولوهو لى محل تانى - يا ربى ودوهو ويييييييين؟؟ - كر على يا ولدى الما معروف لك مكان تكتر الروايات ولا تحمل الا الجهجهة والحال الكان مايل يميّل زيادة ....... .......
| |
|
|
|
|
|
|
Re: أسرانا فى الذاكرة .... صور وأسماء نشرتها "الحياة" لأسرى الشرق (Re: عبدالبارى العجيل)
|
الامل الكان بتلالا فى إنو الولد يكمل تعليمو ويشيل الشيلة مع أهلو المهدودين بقوا فى تولاتو وفى سلامة نفسو الهم الراقد بالكيمان, زاد كوم يعِدّوا الايام الشهور السنوات الفرج القريب يصبح بعيد خرمجة الساسة المسوسين كل يوم جايبة ليها محنة الحاجات فى الدنيا دى أكترها واحد + واحد = اتنين الا عندنا بتساوى قدر ما الواحد يقدر يتلولو وما اكتر اللولوة قالوا السلام قلنا الله يجيبو قالوا سلام العزة قلنا العزيز الله قالوا سلام القوة قلنا ما فرقت الله يرجع لينا أولادنا الله يرجع لينا اولادنا .... ....
| |
|
|
|
|
|
|
Re: أسرانا فى الذاكرة .... صور وأسماء نشرتها "الحياة" لأسرى الشرق (Re: عبدالبارى العجيل)
|
لك التحايا عبودي
والحاجه الصعبه، يوم تنقطع الامال بعد الانتظار الطويل والترقب ، لاسرة تتماسك غلي نفسها تتشبث بفكرة حياة ابنها رافضة فكرة الغياب ، الام مازالت ترتب اشياءه التي تركها وراءه، وتزرف عليها دمعةتصر علي انثيالها، في كل مساء تعد له الفراش..وتحسن من هيئته ثم تضع بجانبه "كورية"العشاء عله "يطب" في عمق الليل جائعا، تعبا، وموتور، يستحي ان يزعج العار فيبيت علي "القوى"
ـــــــــــــ منعم
| |
|
|
|
|
|
|