|
Re: الى كل احساس مرهف (Re: سولارا)
|
سولارا الصداحة والشوق الجاري عليك لك وأنت تدوزنين زمنا لرهيف الأحساس لها وهي تحترف الغياب
أفتحي صوتي جواك صاح . ما تستغربي لو لمحت في صمتي وطن فاتح خرايطه علي رؤاك , أو لقيتي كل تفاصيلك هناك . ما أنت وقبل أنعتاقك من جواي شان تبقي في كلي , وقبل أكتمالك في التشيؤ . سكنا بيك أنا والفراش قيف الحلم , مدينا ريدك عرس الجروف , فتحنا رسمك ليل غني , غنيناك , غنيناك حد رقصن بنات الموج , وشلتك انا شبال . لميتك من زعرودة الرذاذ , ختيتك الغيمة جلابة الخدار . وصبحنا سكاري في وش الموية بي فعل العشق . طلعت أنت من طقس السحاب , تواقت ليك وهتفت فيك : متين مرقتي من جواي شان أرتوي ؟؟؟ بللتي عطش الأرض , لميتي مطرك واختفيت . سبتي قلبي مرمي علي الدعاش , لموة صاحباتي الفراش ودوة لي اقصي المسام يمكن من حضورك ينعتق , جابوه مليان بيك اكتر , قالوا لقوك زهو المسام . واتيقنت بيك , اتوهطت ريدك ومشيت وراك , انا الفترت بي وراي اسفار غالطتها الخطاوات ومشيت وراك , وهمست ليك بين انشغالك في المشي واندهاشك من الزول الممدد في خطاك , همست ليك : سايقاني وين ؟؟؟ تصدقي ما كنت منتظر الجواب !!! كنت زي داير اجر همسك علي الونسة أو ارضي اشتياقي لي حسك المليان رحيق ,
والريد نيلين
|
|
|
|
|
|